Baro a Programa iti Aldaw ti Espesial nga Asamblea
Ti tema ti baro a programa iti aldaw ti espesial nga asamblea a mangrugi inton Pebrero ket “Aramidenyo ti Isuamin a Bambanag Maipagapu iti Naimbag a Damag.” (1 Cor. 9:23) Ti naimbag a damag ti Pagarian isu ti kapapatgan a damag a mangngegan itatta. Dayta a programa tulongannatayo a mangapresiar iti naisangsangayan a pribilehiotayo nga agawit iti daytoy nakaskasdaaw a damag. Paturedennatay met nga agtultuloy a mangideklara iti naimbag a damag nga awan sardayna.—Ara. 5:42.
Ti programa ipakitana kadatayo no kasano nga usaren a naan-anay ti nateokratikuan a pannakasanaytayo tapno ad-adu ti maaramidantayo iti ministerio. Mangngegtayto dagiti kapadasan ti sumagmamano a nangaramid kadagiti panagbalbaliw tapno mapalawada ti serbisioda, agraman dagiti agtutubo a mangipapaay iti amin a kabaelanda a mangisaknap iti naimbag a damag.—Idiligyo ti Filipos 2:22.
Ti kangrunaan a palawag, nga ipaay ti bisita nga agpalawag, ipaganetgetna a masapul nga agtalinaedtayo a “maikari a pakaitalkan ti naimbag a damag.” (1 Tes. 2:4) Matulongantayto a mangtarus a tapno masalimetmetantayo ti pribilehio a mangiburay iti naimbag a damag kadagiti sabsabali, masapul a naynay a tungpalentayo dagiti kalikaguman ken pagalagadan ti Dios iti panagpampanunot ken kababalintayo. Maitampok met dagiti bendision a magun-odtayo iti panangaramid iti daytoy.
Diyo palabsen daytoy nagpateg a programa. Dagiti kabbaro a nagdedikar nga agtarigagay nga agpabautisar iti aldaw ti espesial nga asamblea dagdagusenda koma nga ibaga dayta iti mamangulo a manangaywan. Awisenyo amin nga iyad-adalanyo a tumabunoda. Bay-antay a pabilgennatayo ni Jehova a mangaramid iti isuamin a bambanag maigapu iti naimbag a damag ket iti kasta mairingpas ti kadaklan a trabaho sakbay ti Armagedon.