Ipaay ni Jehova ti Pannakabalin a Nalablabes Ngem ti Gagangay
1 Naitalek kadagiti amin nga adalan ni Jesus ti nagpateg a pribilehio iti sagrado a serbisio—ti Nakristianuan a ministerio. (Mat. 24:14; 28:19, 20) Ngem, gapu iti natauan a kinaimperpekto ken dagiti pakarigatan iti daytoy a sistema ti bambanag pasaray matmatantay ti bagbagitayo a di maikari.
2 No mapasamak daytoy, maliwliwatayo iti surat ni apostol Pablo kadagiti napulotan a Kristiano idiay Corinto. Insuratna: “Addaankami itoy a gameng kadagiti dinamili a basehas.” (2 Cor. 4:7) Nagtalek ni Pablo: “Yantangay adda kadakami daytoy a ministerio . . . , saankami a sumuko.” (2 Cor. 4:1) Pudno, maysa a karit kadatayo amin, napulotan man wenno kameng ti “sabsabali a karnero,” ti panagtultuloytayo a mangiwaragawag iti naimbag a damag ken ‘saan a sumuko.’ Kasapulantayo ti pigsa nga aggapu iti Dios, a mangipaay iti “pannakabalin a nalablabes ngem ti gagangay.”—Juan 10:16; 2 Cor. 4:7b.
3 Makaparegta ta adu ti Saksi a napinget nga ebanghelisador nupay masapul a makidangadangda iti nakaro nga ibubusor, nakaro a parikut iti salun-at, wenno di umanay a gastuen. Masapul a laglagipentayo amin a supsuportaran ni Jehova ti trabahotayo a panangasaba. Imbes nga ituloktayo ti pannakaupay wenno buteng a mangpakapuy iti determinasiontayo a mangasaba, ‘itultuloytayo a gun-oden ti pannakabalin iti Apo ken iti kinabileg ti pigsana.’—Efe. 6:10; Prov. 24:10.
4 No Kasano ti Pananggun-od iti Pannakabalin ti Dios: Agkararag a di agsarday, a kiddawen ti tulong ken panangpabileg ti Dios. (Roma 12:12; Fil. 4:6, 7) Sa, iti amin a pusoyo, agtalek ken Jehova a mangipaay iti pannakabalin a nalablabes ngem iti gagangay. (Prov. 3:5) Basaenyo dagiti moderno-aldaw a pakasaritaan iti biag nga adda kadagiti magasintayo, ta dagita ti mangipaneknek a tultulongan ni Jehova dagiti adipenna iti kaaldawantayo tapno maibturanda dagiti pakasuotan. Agtalinaedkayo a nasinged kadagiti kakabsat iti kongregasion, ket dikay baybay-an dagiti gimong ti kongregasion.—Roma 1:11, 12; Heb. 10:24, 25.
5 Sapay koma ta ikagumaantayo ti umawat iti pannakabalin ni Jehova—ti pannakabalin a nalablabes ngem iti gagangay ken tumulong kadatayo tapno saantay a sumuko iti kapatgan a trabaho a panangikasaba iti Pagarian.