Umakarkayo Kadi?
No wen ti sungbat iti dayta a saludsod, adu ti masapul nga aramidenyo ken aramiden dagiti sabsabali. Babaen ti panangsurot kadagiti simple nga addang a naibalabala iti baba, alistokayto a mairuam iti baro a kongregasionyo.
(1) No ammoyon no sadino ti umakaranyo, mabalin a maala ti agdama a sekretario ti kongregasionyo ti direksion ti Kingdom Hall iti baro a kongregasionyo. No makasangpetkayon iti dayta a lugar, dagdagusenyo a biroken ti Kingdom Hall ket siertuenyo dagiti oras ti gimong ti kongregasion. No saan a maymaysa a kongregasion ti mangus-usar iti Kingdom Hall, damagenyo kadagiti panglakayen no ania a kongregasion ti makinteritoria iti pagnanaedanyo. Dikay itantan ti makigimong ken makiam-ammo kadagiti lokal a panglakayen.
(2) Agtinnulong dagiti sekretario ti agdama ken ti baro a kongregasionyo iti pannakayakar dagiti Congregation’s Publisher Record card-yo ken ti pamiliayo. Maipatulodto met kadagiti panglakayen iti baro a kongregasionyo ti surat a pangyam-ammo. (Kitaenyo ti “Saludsod” iti Marso 1991 a Ministeriotayo iti Pagarian.) Ti Congregation Service Committee sadiay pakaammuanda koma ti mayanatup a konduktor ti panagadal iti libro maipapan iti isasangpetyo tapno makasaritanakayo ken matulongannakayo a mangbirok iti baro a grupoyo iti panagadal iti libro.—Roma 15:7.
(3) Adda makaparagsak a maaramidan dagiti amin nga agibumbunannag iti baro a kongregasionyo—ti panangam-ammoda kadakayo ken panangipariknada a maragsakanda a mangawat kadakayo. (Idiligyo ti 3 Juan 8.) Siempre, kaipapanan daytoy a masapul nga addakayo kadagiti gimong tapno matagiragsakyo ti makaparegta ken makapabileg a pannakilangen kadagiti kakabsat.
(4) Saanyo koma nga urayen a maileppas pay amin a trabaho a mainaig iti iyaakaryo sakbay a makiramankayo iti tay-ak ti ministerio iti baro a kongregasionyo. Bayat nga iyun-unayo dagiti interes ti Pagarian, matamingto dagiti sabsabali pay a banag, ket mariknayonto a komportablekayo iti baro nga aglawlawyo. (Mat. 6:33) No nakasimpakayon iti baro a pagtaenganyo, nalabit kayatyo nga awisen ti sumagmamano iti kongregasion tapno sumarungkar ken ad-adda a makapagiinnammokayo.—Roma 12:13b.
Ti iyaakar ket dakkel a proyekto. Ngem no aramiden ti tunggal maysa dagitoy a singasing, awanto ti tubeng iti naespirituan. Tagiragsakentayto amin ti naayat a Nakristianuan a panagkakabsattayo.