Napaypayso Kadi ti Dios Kadakayo?

NO MAPASPASARANYO dagiti makapaleddaang a parikut, sidadaankayo kadi nga umasideg iti Dios iti kararag? No kasta, mariknayo kadi a makisarsaritakayo iti napaypayso a persona?

Iti panangtukoyna iti nailangitan nga Amana, kinuna ni Jesu-Kristo: “Daydiay nangibaon kaniak napudno.” (Juan 7:28) Wen, ni Jehova a Dios ket napaypayso, ket ti panagkararag kenkuana kasla iyaasideg iti nakasingsinged a natauan a gayyem tapno agpatulong wenno agpabalakad. Siempre, tapno imdengan ti Dios, nasken a dagiti kararagtayo masabetda dagiti Nainkasuratan a kalikaguman iti maakseptar a kararag. Kas pagarigan, masapul a sipapakumbaba nga umasidegtayo iti ‘Managdengngeg iti kararag’ babaen ti Anakna, ni Jesu-Kristo.​—Salmo 65:2; 138:6; Juan 14:6.

Nalabit marikna dagiti dadduma a gapu ta di makita ti Dios, isu ket saan a maysa a persona. Para kadakuada, narigat a matarusan ti Dios. Uray iti sumagmamano a Kristiano a nakaammon kadagiti nakaskasdaaw a kalidad ti Dios, ket nalabit marigatanda no dadduma a mangapresiar ti kinaagpaysona. Napadasanyo kadin daytoy? No kasta, ania ti makatulong tapno ni Jehova a Dios napaypayso kadakayo?

Adalenyo ti Kasuratan

Ad-adalenyo kadi a regular ti Nasantuan a Kasuratan? No nasansansan ken napaspasnek ti panagadalyo iti Biblia, ad-addanto a napaypayso ni Jehova a Dios kadakayo. Iti kasta, mapabileg ti pammatiyo, ket ‘makitayo daydiay Maysa a di makita.’ (Hebreo 11:6, 27) Iti kasumbabangirna, ti sagpaminsan wenno paspasaray a panagadal iti Biblia ket bassit ti epektona iti pammatiyo.

Kas panangyilustrar: Ipapapantayo a ti doktoryo binilinnakayo a mangsapsapo iti di umim-imbag a supotsupotyo iti mamindua kada aldaw tapno umimbag. Maawan kadi ti supotsupotyo no maminsan wenno mamindua laeng a sapsapuanyo iti makabulan? Saan. Umasping iti dayta, impaayannatayo ti salmista iti “reseta” maipaay iti naespirituan a salun-at. Basaen ti Sao ti Dios a ‘siaalumanay iti aldaw ken rabii.’ (Salmo 1:1, 2, NW) Tapno matagiragsak ti adu a pagimbagan, nasken a surotentayo ti “reseta”​—ti inaldaw a panangusig iti Sao ti Dios babaen ti tulong dagiti Nakristianuan a publikasion.​—Josue 1:8.

Kayatyo kadi nga aramiden nga ad-adda a makapabileg iti pammati dagiti oras ti panagadalyo? Adtoy ti maysa a singasing: Kalpasan a mabasayo ti maysa a kapitulo iti New World Translation of the Holy Scriptures wenno sabali pay a Biblia nga addaan kadagiti cross-reference, mangpilikayo iti maysa a makapainteres a bersikulo ket basaenyo dagiti naisitar a reperensia a teksto. Pagbalinento daytoy a makagunggona ti panagadalyo, ket awan duadua a masdaawkayto iti panagtutunos ti linaon ti Biblia, Iti kasta, ad-addanto a napaypayso kadakayo ti Autorna, ni Jehova a Dios.

Ti panangaramat kadagiti cross-reference tulongannakayo met nga agbalin a pamiliar kadagiti padto ti Biblia ken ti kaitungpalanda. Nalabit ammoyo dagiti kangrunaan a padto ti Biblia, kas kadagidiay maipapan iti panangdadael dagiti taga Babilonia iti Jerusalem. Nupay kasta, ti Biblia ket naglaon kadagiti agkakanaig a padto ken ti kaitungpalanda. Saan unay a nalatak ti sumagmamano kadagitoy.

Kas pagarigan, basaenyo ti padto maipapan iti pannusa gaput’ panangibangon manen iti Jerico sa usigenyo ti pannakaibanagna. Kuna ti Josue 6:26: “Ni Josue inkumitna kadakuada ti maysa a sapata iti daydi a tiempo, a kinunana, Mailunod ti tao iti saklang ni Jehova, ti tumakder ken mangbangon itoy ili a Jerico: ti mangikabilto iti sementona matayto ti anakna nga inauna, ket ti mangikabilto kadagiti ruruanganna matayto ti anakna nga inaudi.” Natungpal daytoy 500 a tawen kalpasanna, ta mabasatayo iti 1 Ar-ari 16:34: “Kadagiti al-aldaw [ni Ari Acab] binangon ni Hiel a taga Beth-el ti Jerico: isu inkabilna ti pamuonna iti pannakatay ni Abiram nga inauna nga anakna, ket binangonna dagiti ruruanganna iti pannakatay ti inaudian nga anakna a Segub, a mayannurot iti sao ni Jehova, isu a sinaona iti pannakaaramat ni Josue nga anak ni Nun.”a Ti laeng napaypayso a Dios ti makaipaltiing iti kakasta a padto ken mangsigurado iti pannakatungpalda.

Bayat a basbasaenyo ti Biblia, nalabit dumteng ti punto a rumsua dagiti saludsodyo. Kas pagarigan, baka maisaludsodyo no mano a tawen ti naglabas manipud pannakaipadto ti maysa a pasamak aginggat’ pannakatungpalna. Imbes a basta imtuodenyo iti sabali, apay a diyo pagreggetan nga usigen a mismo? Babaen ti panangaramat kadagiti tsart ken katulongan iti panagadal iti Biblia, siaanep a birokenyo dagiti sungbat kas iti panangikagumaanyo a mangsukisok iti mapa ti gameng. (Proverbio 2:4, 5) Ti panangbirok kadagiti sungbat dakkel ti epektona iti pammatiyo ken ad-addanto a napaypayso ni Jehova a Dios kadakayo.

Agkararag a Regular ken Sipapasnek

Diyo tagtagibassiten ti kinapateg ti kararag ken pammati. Kiniddaw a mismo dagiti adalan ni Jesus daytoy: “Ikkannakami iti ad-adu pay a pammati.” (Lucas 17:5) No kasla saanen a napaypayso ni Jehova kadakayo, apay a diyo ikararag kenkuana ti maipapan iti panagkasapulanyo iti ad-adu a pammati? Sitatalek a kiddawenyo iti nailangitan nga Amayo a tulongannakayo tapno isu ket agbalin a napaypayso kadakayo.

No burburiborennakayo ti maysa a parikut, iwayaanyo nga iyebkas a naimpusuan iti nailangitan a Gayyemyo dagiti pakaseknanyo. Idi nga umasidegen ti ipapatay ni Jesus, sipapasnek a nagkararag. Nupay kinondenarna dagiti narelihiosuan nga aramid nga atitiddog a panagkararag a nairanta a mabuya ti publiko, nagpatpatnag a nagkararag a bukbukodna sakbay a nangpili iti 12 nga apostolna. (Marcos 12:38-40; Lucas 6:12-16) Mabalintayo met ti makasursuro ken Anna, a nagbalin nga ina ni mammadto Samuel. Gapu iti panagtarigagayna iti anak a lalaki, “isu agkarkararag idi iti sango ni Jehova.”​—1 Samuel 1:12.

Ania ti kangrunaan a maadaltayo kadagitoy? No mangnamnamakayo kadagiti sungbat dagiti kararagyo, nasken nga agkararagkayo a sipapasnek, nasged, di agsarday​—ken siempre, maitunos iti pagayatan ti Dios. (Lucas 22:44; Roma 12:12; 1 Tesalonica 5:17; 1 Juan 5:13-15) Ti panangaramid iti daytoy ket tumulong a mamagbalin a napaypayso ti Dios kadakayo.

Paliiwenyo Dagiti Parsua

Ti personalidad ti maysa a pintor ket maipalgak kadagiti impintana. Umasping iti dayta, nabatad a makita dagiti “di makita a kualidad” ni Jehova, ti Diseniador ken Namarsua iti uniberso, kadagiti pinarsuana. (Roma 1:20) No paliiwentayo a naimbag dagiti aramid ni Jehova, maaddaantayo iti nasaysayaat a pannakaawat iti personalidadna, ket iti kasta ad-adda a napaypayso kadatayo.

No obserbaranyo a naimbag dagiti bambanag a pinarsua ti Dios, nalabit masdaawkay unay iti kinaagpayso dagiti kalidadna. Kas pagarigan, ti impormasion maipapan iti abilidad dagiti tumatayab a mapan kadagiti adayo a lugar ad-adda a parayrayenna ti apresasionyo iti kinasirib ni Jehova. Iti panagbasbasayo maipapan iti uniberso, nalabit naammuanyo a ti Milky Way, a 100,000 a light year no ballasiwen, ket maysa laeng kadagiti binilion a galaksi iti law-ang. Saan kadi nga ipaganetget dayta kadakayo ti kinaagpayso ti sirib ti Namarsua?

Wen, ti sirib ni Jehova ket agpayso! Ngem ania ti kaipapanan dayta kadakayo? Bueno, sigurado a saan a mariribukan kadagiti parikut nga iyasidegtayo kenkuana iti kararag. Wen, uray ti sangkabassit a pannakaammo iti panamarsua pagbalinenna nga ad-adda a napaypayso ni Jehova kadakayo.

Makipagnakayo ken Jehova

Mabalin kadi a personal a mapadasanyo no kasano a napaypayso ni Jehova? Wen, no tuladenyo ni matalek a patriarka Noe. Kasta la unay ti kankanayon a panagtulnogna ken Jehova, a mabalin a maikuna: “Nakipagna ni Noe iti Dios.” (Genesis 6:9) Nagbiag ni Noe a kasla la adda ni Jehova iti mismo a sibayna. Mabalin met a kasta ti kinaagpayso ti Dios kadakayo.

No makipagpagnakayo iti Dios, agtalekkayo kadagiti Nainkasuratan a karina ket agtignaykay a maitunos kadagitoy. Kas pagarigan, mamatikayo kadagiti sao ni Jesus: “Itultuloyyo . . . a sapulen nga umuna ti pagarian ken ti kinalinteg [ti Dios], ket isuamin dagitoy sabsabali pay a bambanag [dagiti material a kasapulan] mainayonto kadakayo.” (Mateo 6:25-33) Pudno, nalabit saan a kanayon nga ipaay ni Jehova ti kasapulanyo kas iti wagas nga inanamaenyo. Nupay kasta, no agkararagkayo sa kalpasanna mapasaranyo ti tulong ti Dios, agbalinto a napaypayso kadakayo kas iti maysa nga adda iti dennayo.

Mapatanor ti kasta a nasinged a pannakirelasion ken Jehova bayat nga itultuloy ti maysa ti pannakipagnana iti Dios. Usigenyo ni Manuela, maysa nga Espanõl ti pagsasaona a Saksi, a nagibtur iti adu a pannubok. Kunana: “No adda pakaburiborak wenno panagkasapulak, iyaplikarko ti prinsipio a masarakan iti Proverbio 18:10. Agpatulongak ken Jehova. Isu a kankanayon ti ‘nabileg a sarikedkedko.’” Maibaga ni Manuela daytoy kalpasan ti 36 a tawen a panagpannurayna ken Jehova ken pannakapadasna iti pannaranayna.

Irugrugiyo pay la kadi ti agtalged ken Jehova? Dikay maupay no ti pannakirelasionyo kenkuana ket saan pay a ti kapkapnekanyo. Agbiagkayo iti tunggal aldaw kas tao a makipagpagna iti Dios. Bayat nga agbibiagkayo a simamatalek, matagiragsakyonto ti nasingsinged a pannakirelasion ken Jehova.​—Salmo 25:14; Proverbio 3:26, 32.

Ti maysa pay a pamay-an a pannakipagna iti Dios isu ti panangipamaysa iti serbisiona. No makiramramankayo iti trabaho a panangikasaba iti Pagarian, katrabahuannakayo ni Jehova. (1 Corinto 3:9) Talaga nga napaypayso ti Dios kadakayo no sipapanunotkayo iti daytoy.

Indagadag ti salmista: “Ikumitmo ti dalanmo ken Jehova; agtalekka met kenkuana, ket isu ibanagnanto.” (Salmo 37:5) Pulos a dikay liplipatan nga iyallatiw ken Jehova ti aniaman a pakadagsenan wenno pakaseknanyo. Kankanayon a mangnamnamakay iti tulong ken panangiwanwanna. No agpannuraykayo ken Jehova a Dios iti kararag ken naynay nga agtalekkayo a naan-anay kenkuana, natalgedkayto gapu ta ammoyo nga agtignayto a maipaay iti pagimbaganyo. Adda kadi panagtalekyo no iyadaniyo ken Jehova dagiti personal a pakaseknanyo? Kastakayto​—no napaypayso ti Dios kadakayo.

[Footnotes]

[Ladawan iti panid 21]

Aramidenyo a makapabileg pammati ti panagadalyo

[Ladawan iti panid 22]

Iwayaanyo ti regular, napasnek a panagkararag

[Dagiti Ladawan iti panid 23]

Paliiwenyo no kasano a maiparangarang dagiti kalidad ti Dios kadagiti pinarsuana

[Credit Lines]

Hummingbird: U.S. Fish and Wildlife Service, Washington, D.C./Dean Biggins; Bitbituen: Retrato: Copyright IAC/RGO 1991, Dr. D. Malin et al, Isaac Newton Telescope, Roque de los Muchachos Observatory, La Palma, Canary Islands