ADALEN 6

Ipakita ti Pateg ti Teksto

Juan 10:33-36

SUMARIO: Dimo basta basaen ti maysa a teksto sa mapankan iti sumaruno a punto. Siguraduem a nalawag a makita dagiti agdengdengngeg ti koneksion ti teksto nga ibasam ken ti puntom.

TI ARAMIDEM:

Itampokmo ti napateg a sasao. No nabasamon ti maysa a teksto, pagminarem ti sasao a konektado iti kangrunaan a puntom. Maaramidam daytoy no ulitem dagita a sasao wenno saludsodam dagiti agdengdengngeg tapno mailasinda ti napateg a sasao.

No agusarka iti naiduma a sasao a mangulit iti ideya ti teksto, siguraduem a nalawag latta a makita dagiti agdengdengngeg ti koneksion ti sasao iti Biblia iti kangrunaan a puntom.
Ipaganetgetmo ti punto. No nalawag nga imbagam ti rason a basaem ti teksto, ilawlawagmo ti koneksion ti napateg a sasao iti teksto ken ti rason nga imbagam.

Bayat nga ilawlawagmo ti teksto, pagtalinaedem a nakalukat ti Bibliam. Makatulong dayta kadagiti agdengdengngeg tapno makitada ti koneksion ti ibagbagam iti teksto a kabasbasam.
Pagbalinem a simple ti panangilawlawagmo iti teksto. Dimo komentuan dagiti detalye a saan a konektado iti kangrunaan a punto. Panunotem ti dati nga ammo dagiti agdengdengngeg maipapan iti topiko, sa agdesisionka no kasano kaadu a detalye ti kasapulam nga ilawlawag tapno maawatanda a naimbag ti punto.