“Nagpintasen a Ladawan!”

Namin-anon a kasta ti naibagam iti bagim wenno iti sabsabali no ukradem ti baro a ruar daytoy a magasin? Napagpanunotan a naimbag ken adda panggep dagiti napipintas a ladawan ken retrato a naikabil iti daytoy a magasin. Katulongan dagita iti panangisuro a mamagpanunot ken mangtukay iti riknatayo. Dakkel ti maitulongda iti panagsagana ken pannakipasettayo iti Panagadal iti Pagwanawanan.

Kas pagarigan, panunotem ti umuna a ladawan iti tunggal pagadalan nga artikulo. Apay a dayta ti napili? Ania ti iladladawanna? Ania ti nakainaiganna iti titulo ti artikulo wenno iti kasuratan a nakaibatayan ti artikulo? Kalpasanna, panunotem no kasano a ti dadduma pay a ladawan iti artikulo ket makatulong iti panangtarusmo iti punto a maus-usig ken no kasano a makatulong dayta iti biagmo.

Ti konduktor iti Panagadal iti Pagwanawanan ikkanna iti gundaway dagiti kakabsat iti kongregasion a mangkomento iti tunggal ladawan. Mabalinda nga ilawlawag no kasano a nainaig dayta iti punto a mapagad-adalan ken no ania ti makunada iti dayta. No dadduma, dakamaten ti kapsion no ania a parapo ti nakainaigan ti maysa a ladawan. Adda met dagiti ladawan a ti konduktor ti mangikeddeng no ania a parapo ti kasayaatan a pangusigan kadagita. Iti kastoy a pamay-an, naan-anay a magunggonaantayo kadagiti ladawan a nairanta a tumulong tapno agbalin a nalawag iti isiptayo dagiti leksion a masarakan iti Sao ti Dios.

Kinuna ti maysa a kabsat a lalaki, “Agserbi dagiti ladawan kas icing ti keyk.” Dagita ti ad-adda a mangpasayaat kadagiti naisurat nga artikulo.