Pagragsakam ti Sao ti Dios
NARAGSAK ti tao a “ti pakaragsakanna adda iti linteg ni Jehova.” Ti kasta a tao basaenna ti Sao ti Dios “iti nababa a timek iti aldaw ken rabii.” (Sal. 1:1, 2) Mariknam met kadi dayta a ragsak? Kasano a maparayraymo ti rag-o nga itden kenka ti Sao ti Dios?
Umimdengka Bayat nga Agsasao ni Jehova
Saanmo a basta basaen dagiti sasao. Sirmataem dagiti situasion a basbasaem. Timudem ti timek dagidiay adda iti salaysay. Bayat a basbasaem dagiti panglukat a kapitulo ti Biblia, denggem ti agsasaganad a panangipalgak a mismo ni Jehova iti panangaramidna iti daga a maitutop a pagnaedan ti tao. Umimdengka bayat nga ibagana iti Anakna, ti Nasigo a Managobra, a dimtengen ti tiempo tapno parsuaenna dagiti umuna a tao. Sirmataem ti eksena: Nagrebelde da Adan ken Eva, inukom ida ti Dios ket, kalpasanna, pinaruarna ida iti Paraiso. (Genesis, kap. 1-3) Riknaem ti panagsiddaaw a mabuyogan iti amak no mabasam nga adda timek a naggapu sadi langit nga agkuna a ni Jesu-Kristo ket Anak ti Dios, ti dungdungnguen, ti imbaon ti Dios a mangidaton iti biagna gapu iti sangatauan. (Mat. 3:16, 17) Iladawanmo iti panunotmo ti reaksion ni apostol Juan idi mangngegna ti kuna ni Jehova: “Adtoy! Pagbalbalinek a baro ti amin a bambanag.” (Apoc. 21:5) Pudno, a makaparagsak ti kastoy a panagbasa iti Sao ti Dios!
Ituloymo a basaen ti naipaltiing a rekord, ket maammuam ni Jehova a kas naindaklan ken nakaskasdaaw a persona. Mariknam a maguyugoyka unay Kenkuana a mangay-ayat kadatayo, naasi kadatayo, tumulong no sipapakumbaba nga ikagumaantay nga aramiden ti pagayatanna, ken mangisuro no kasanotay nga agballigi iti amin nga aramidentayo.—Jos. 1:8; Sal. 8:1; Isa. 41:10.
No ad-adu ti busbosem a tiempo nga agbasa iti Biblia, ad-addanto met ti pannakapnekmo bayat a rumangrang-ay ti pannakaammom iti pagayatan ti Dios para kenka. Ngem saan la a dayta ti mangparagsak kenka. No ti panagbasam ipaayna ti tulong a kasapulam a mangrisut a nainsiriban kadagiti problema, kaslakanto iti salmista a nagkuna: “Nakaskasdaaw dagiti pammalagipmo. Dayta ti makagapu a tinungpal ida ti kararuak.” (Sal. 119:129) Maragsakankanto met no mailasinmo manipud Kasuratan dagiti prinsipio a tumulong a mangsukog iti panunot ken tarigagaymo iti nadiosan a wagas.—Isa. 55:8, 9.
Ipaay ti Biblia ti moral a pannarabay a mangsalaknib kadatayo iti aniaman a pagdaksantayo ken ipakitana kadatayo ti umiso a dalan. Bayat a basbasaentay dayta, mariknatayo a ni Jehova ket maysa nga Ama nga ammona dagiti problema a rumsua no tumuloktayo kadagiti imperpekto a nainlasagan a tarigagay. Dina kayat a sagabaentayo dagiti nakas-ang a bunga a sigurado nga apitentayo no ditay suroten dagiti nangato a moral a pagalagadanna. Maseknan kadatayo ken kayatna a tagiragsakentayo ti kasayaatan a wagas ti panagbiag. Ti panangbasa iti Saona tulongannatayo a mangapresiar nga ad-adda a talaga a naparaburantayo ta isu ti Dios ken nailangitan nga Amatayo.
Inaldaw a Basaem ti Biblia
Kinuna ti salmista maipapan iti tao nga inaldaw nga agbasa iti Sao ti Dios: “Isuamin nga aramidenna agballiginto.” (Sal. 1:3) Wen, nupay imperpektotayo, nupay agbibiagtayo iti dakes a sistema ti bambanag ni Satanas, ken nupay ikagkagumaannatay nga alun-onen ti Diablo, ti regular a panangbasa ken panangyaplikar iti linaon ti Sao ti Dios ti mamagballigi kadatayo iti amin a banag a nainaig iti relasiontayo ken Jehova.
Yantangay parparigatennatayo daytoy daan a sistema, mapakirednatayo ti panangagsep iti pampanunot ti Namarsua uray iti sumagmamano la a napateg a kanito iti tunggal aldaw. Dagiti sumagmamano a bersikulo a naadaw kadagiti artikulo ti diario ti mabalin a basaen laeng idi dagiti dadduma a naibalud gapu iti pammatida. Indulin, inkabesa, ken inut-utobda dagitoy. Binendisionan ida ni Jehova gapu ta iti baet ti kasasaadda, impamuspusanda a ginun-od ti pannakaammo iti Sao ti Dios. (Mat. 5:3) Ngem nawaywaya nga amang ti kaaduan kadatayo. Ditay koma ipagarup nga adda datdatlag nga epektona kadatayo ti apagbiit a panangbasa iti maysa a bersikulo ti Biblia iti inaldaw. Nupay kasta, agpaay a pagimbagantayo no iyun-unatayo dagiti napateg a banag, iti kasta maiwayaantay a basaen ti Biblia iti kada aldaw, utoben, ken ipakat dayta iti biagtayo.
Kinapudnona, mabalin a masinga dagiti kasayaatan a planotayo. No mapasamak dayta, ipangpangrunatayo dagiti banag a talaga a nasken. Kas pagarigan, ditay gagaraen ti lumangan nga uminum iti danum iti maysa wenno dua nga aldaw. Ngarud, aniaman ti sumangbay iti inaldaw-aldaw a panagbiagtayo, iwayaantay koma a bang-aran ti bagitayo babaen ti danum ti kinapudno.—Ara. 17:11.
Basaem ti Intero a Sao ti Dios
Nabasam kadin ti intero a Biblia? Adda dagidiay maibilang a nadagsen ti panangbasa manipud Genesis agingga iti Apocalipsis. Gapuna, adu dagidiay mayat a mangbasa iti intero a Biblia ngem inyun-unada a basaen ti Kristiano a Griego a Kasuratan. Apay? Nalabit nalaklakada a matarusan no kasano nga agaplikar kadakuada dagita a libro ti Biblia kas indibidual nga agtarigagay a mangsurot kadagiti addang ni Kristo. Wenno nalabit gapu ta ab-ababa a basaen ti Kristiano a Griego a Kasuratan—nasurok bassit a kakapat ti Biblia. Ngem kalpasan a nabasada dagita a 27 a libro, immallatiwda kadagiti 39 a libro ti Hebreo a Kasuratan sada inrugi a binasa ket tinagiragsakda dagita. Idi nalpasdan ti Hebreo a Kasuratan, nakaipasdekdan iti eskediul para iti regular a panagbasa iti Biblia, isu nga intultuloyda, nga inulitda a binasa ti Kristiano a Griego a Kasuratan, ket saandan a pulos a nagsarsardeng. Sapay koma ta iyugalim met a basaen nga inaldaw ti Sao ti Dios iti unos ti panagbiagmo.
Adda kadi iti pamiliam wenno kakongregasionmo a di makabasa? Apay a dika itukon kenkuana nga ibasaam iti Biblia a regular? Magunggonaanka, ken uray isu magunggonaan met bayat nga ut-utobenna ti mangngegna sana iyaplikar iti biagna.—Apoc. 1:3.
Inton agangay, mabalin a kayatmo nga iraman dagiti espesial a proyekto a nainaig iti panangbasam iti Biblia. Parayrayen ti dadduma kadagitoy ti pannakaawatmo no kasano nga agkakanaig dagiti nagduduma a paset ti Biblia. No adda dagiti marginal reference ti Bibliam, dagitoy ti mangiturong kenka kadagiti historikal a detalye ken umarngi a salaysay. Tulongandaka dagita a mangtarus kadagiti sirkumstansia a nangiturong iti pannakaisurat dagiti nadumaduma a salmo agraman dagiti surat a pinutar dagiti apostol ni Jesu-Kristo. Naglaon ti Insight on the Scriptures iti nawadwad nga impormasion maipapan kadagiti tattao, lugar, ken galad a nadakamat iti Biblia. Dagiti tsart iturongda ti atension iti kaitungpalan dagiti padto iti Biblia, ipakitada no asino dagiti ari ken mammadto nga agkakataeban, ken ipaayda dagiti mapattapatta a petsa dagiti adu a pasamak a naisalaysay iti Biblia.
Bayat nga ut-utobem ti maad-adalmo, maawatamto no apay a napasamak ti nadumaduma a kasasaad iti ili ti Dios. Matakuatamto met ti makagapu iti wagas ti pannakilangen ni Jehova iti ilina. Maawatamto no kasano ti panangmatmat ni Jehova iti tigtignay dagiti gobierno, nasion, ken dagiti indibidual. Naun-unegto ti pannakatarusmo iti panagpampanunotna.
Ad-addanto a makapainteres kenka ti historia ti Biblia no sirmataem iti panunotmo ti lugar a nakapasamakan dagiti bambanag. Dagiti mapa ti dagdaga a nadakamat iti Biblia ipakitada ti kasasaad ti daga agraman ti distansia dagiti lugar. Kas pagarigan, sadino ti posible a nagballasiwan dagiti Israelita iti Nalabaga a Baybay? Kasano ti kalawa ti Naikari a Daga? Kasano ti kawatiwat ti pinagpagna ni Jesus bayat ti ministeriona ditoy daga? Ania dagiti buya a nakita ni apostol Pablo iti panagdaliasatna kas misionero? Dagiti mapa ken deskripsion ti geograpia ibuksilanda dagiti detalye a mamagbalin iti panagbasam a makapainteres. Pakasarakam kadagiti mapa ti dagdaga a nadakamat iti Biblia? Adda dagiti agparang iti Baro a Lubong a Patarus ti Nasantuan a Kasuratan. Naglaon dagiti tomo ti Insight iti agarup 70 a mapa, ken adda indese dagiti mapa iti tartaraudi ti umuna a tomo. Usarem ti Watch Tower Publications Index tapno mabirokam dagiti dadduma a mapa. No awan kenka dagitoy a publikasion, usarem dagiti mapa a naipablaak iti Ti Pagwanawanan a makatulong kenka iti panagbasam iti Biblia.
Iti Hebreo a Kasuratan, intan-ok ni Ari David ni Jehova, a kunkunana: ‘Anian a nagpateg dagiti panunotmo! O Dios, anian a nagdakkel ti pakadagupan ti intero a pakagupgopanda!’ (Sal. 139:17) Iti Kristiano a Griego a Kasuratan, indaydayaw ni apostol Pablo ni Jehova gapu ta Isu ket “nagsilnag iti puspusotayo tapno lawagan ida iti nadayag a pannakaammo iti Dios babaen ti langa ni Kristo.” (2 Cor. 4:6) Adu a siglo ti nagbaetan da David ken ni Pablo, ngem agpada a nagragsakanda ti Sao ti Dios. Maragsakankanto met no iwayaam a basaen ti amin nga inted ni Jehova kenka kadagiti binulong ti naipaltiing a Saona.