Ti Pannakidangadangko iti Makapakapuy a Sakit

KAS INSALAYSAY NI TANYA SALAY

Iti sumagmamano laeng a tawen a napalabas, nakagangganaygayak nga ina ken amin-tiempo a ministro iti bassit nga ili ti Luverne, Alabama. Natalna ken saan unay nga okupado ti kasasaad ti biag ditoy. Amin ket kasla nasayaat kadakami ken lakayko a Duke, ken ti ubing pay idi a barok a ni Daniel. Pagammuan ta ti maysa a simple nga operasion ti nakaigapuan iti dakkel a panagbalbaliw iti estilo ti panagbiagmi.

NANGRUGI dagiti problemami idi 1992 idi a naikkat ti matrisko. Di nagbayag kalpasanna, kanayon nga addan dagiti mariknak a nakaro nga ut-ot ken agkaraisboak (mamin-50 agingga iti mamin-60 a daras iti kada aldaw). Kamaudiananna, inyeskediul ti gynecologist-ko nga agpaeksamenak iti maysa a urologist, wenno espesialista iti pagisbuan, tapno maammuan ti makagapu iti problema.

Napanak idiay ospital tapno agpaeksamen. Iti immuna nga panagpadoktorko, nadayagnos ti urologist ti problemak​—interstitial cystitis (IC), wenno makapakapuy a panagebbal ti basisaw. Saan a nalaka a madayagnos agsipud ta dagiti sintoma ti IC ket kaasping ti dadduma a sakit iti sistema ti pagisbuan. Maysa pay, awan ti masnup a pangeksamen a mangilasin iti IC. Gapuna, masapul nga ipuera dagiti doktor ti dadduma a kasasaad sakbay nga akseptarenda ti dayagnosis ti IC.

Sipapaprangka nga imbaga ti doktormi a tangay saan a naan-anay a naballigi ti panangagas, agtungpalto met laeng dayta iti pannakaikkat ti basisaw! Kinunana nga awanen ti sabali pay a panangagas tangay saan a naballigi amin dagitoy. Siempre, talaga a makapakellaat a damag dayta kadakami. Nakasalsalun-atak idi. Kas Saksi ni Jehova, adun a tawen nga agserserbikami ken ni Duke iti amin-tiempo a serbisio, ket ita, imbagada a masapul a maikkat ti basisawko. Yaman pay ta nagsayaat ti panangandingay kaniak ni lakayko.

Inkeddengmi ti agsapul iti sabali a urologist. Pinadasmi ti nadumaduma a doktor. Nakalkaldaang ta idi a tiempo, nagbassit ti ammo ti adu a doktor maipapan iti IC. Kasta met nga adu a urologist ti addaan iti bukodda a teoria maipapan iti IC, isu a nadumaduma ti insingasingda a panangagas. Kuna ti maysa a pagiwarnak iti medisina: “Posible a kumaro ti sakit.” Kuna ti sabali pay a pagiwarnak: “Awan pay ti natakuatan dagiti sientista a pangagas iti IC, wenno dida maipakpakauna no siasino ti kasayaatan a pagkurrian ti aniaman a panangagas. . . . Agsipud ta di ammo dagiti doktor no ania ti makagapu iti IC, panggep dagiti panangagas nga ep-epen laeng dagiti sintoma.”

Napalalo ti nariknak idi nga ut-ot gapu ta agbetted ken sarsaripitenak isu a situtulok a pinadasko ti aniaman nga insingasing dagiti doktor. Pinadaskon ti nasurok nga 40 a nadumaduma nga agas agraman dagiti makaagas a mula, acupuncture, lokal a pangbibineg iti aglawlaw dagiti urat tapno malapdan ti panaggitebgiteb dayta nga espesipiko a paset ti bagi, anesthesia para iti ulo ken durik, ken ti transcutaneous electrical nerve stimulation (TENS), maysa a pamay-an a dagiti kalkalainganna a bileg ti koriente ket sumrek iti bagik iti sumagmamano a minuto wenno oras. Inkagumaak ti nagsukimat a naimbag, nga uray kaskasano ket nakatulong kaniak a mangtarus bassit iti mapaspasamak idi.

Iti agdama, agtomtomarak iti methadone, a maysa a pangep-ep iti ut-ot, agraman ti innem pay a dadduma nga agas. Regular met a mapanak iti klinika a mangep-ep iti ut-ot. Sadiay nga ineksionandak iti anesthesia para iti ulo ken durik agraman dagiti steroid tapno tumulong a mangep-ep iti ut-ot. Gapu ta agkaraisboak, mapanak idiay ospital agarup kada tallo wenno uppat a bulan para iti pamay-an ti panangagas a maawagan hydrodistension. Adda likido a mausar a mangpalobo iti basisawko. Namin-adu metten nga inaramidko daytoy. Gagangay a bang-arannak iti sumagmamano a bulan. Nasurok a namin-30 a darasen a nagkaraapanak idiay ospital iti napalabas a sumagmamano a tawen.

Komusta ngay ti ultimo a pamuspusan nga isu ti pannakaikkat ti basisawko? Kuna ti maysa nga autoridad: “Saan a situtulok ti kaaduan a doktor a mangopera agsipud ta di mapakpakadaan ti epektona iti nadumaduma a pasiente​—adda dagiti naoperan ngem kaskasdi nga adda pay laeng dagiti sintoma.” Isu nga iti agdama, diak pay laeng ikeddeng ti agpaopera.

No dadduma, napalalo ken naynay ti ut-ot a mariknak isu a nalaka laeng a maldaangak. Uray la a napanunotko payen ti agpakamatay. Ngem diak maitured ti ibungana a pannakaibabain ti nagan ni Jehova no aramidek ti kasta. Naamirisko ti kinapateg ti panagkararag ken personal a panagadal agraman ti panangpatanorko iti nasinged a relasion ken Jehova, agsipud ta saanmo a pulos nga ammo no ania ti mabalin a dumteng a mangbalbaliw iti panagbiagmo. Daytoy a relasion ti literal a nangispal iti biagko kabayatan ti panagsakitko, tangay ammok a no awan daytoy a relasion, nalabit nagpakamatayakon.

No lagipek ti napalabas a siam a tawen, nautobko no kasano kapartak ti panagbalbaliw ti biag. Apresiarek dagiti sasao iti Eclesiastes 12:1 (NW), a kunana: “Lagipem, itan, ti Naindaklan a Namarsuam kadagiti aldaw ti kinaagtutubom, sakbay nga umay dagiti makadidigra nga aldaw, wenno dimtengen dagiti tawen inton kunaem: ‘Awan pakaragsakak kadakuada.’” Agyamanak unay ta nangrugiak iti amin-tiempo a serbisio idi agtawenak pay laeng iti 15 ken naitultuloyko iti dandani 20 a tawen. Kabayatan dayta a panawen, napatanorko ti nasinged a relasion ken Jehova.

Agyamanak ken Jehova agsipud ta manangandingay unay ni lakayko ken ti barok a ni Daniel. Makaparegta met unay no agtelepono wenno sumarungkar dagiti kakongregasionak. Marigatanak a rummuar no kalam-ekna agsipud ta kumaro ti mariknak a turtog no nalamiis. Isu a mangasabaak babaen ti telepono, a makatulong tapno agtalinaed ken kanayon a napaypayso kaniak ti namnama a Paraiso. Segseggaak ti panawen inton mapukaw ken malipatanen ti panagsakit ken panagsagaba.​—Isaias 33:24.