„Rafeindaárás á heilann“

SJÓNVARPIÐ getur verið fræðandi og skemmtilegt. En prófessor Moshe Aronson við háskólann í Tel-Aviv varar við því að óhóflegt sjónvarpsáhorf geti verið hættulegt heilsunni. Hvernig?

Aronson segir að aðgerðarlaus áhorfandi byggi upp með sér spennu sem ekki sé hægt að losa um þar sem hann situr fyrir framan sjónvarpið. Við það losna úr læðingi streituhormón sem geta, í miklu magni, skaðað taugafrumur í drekanum (hippocampus) — heilastöð sem er mikilvæg fyrir minnið. Aronson getur þess að ítarlegri rannsókna sé þörf, en telur að þessi hrörnun geti stuðlað að vitglöpum og kannski aukið hættuna á Alzheimerssjúkdómi síðar á ævinni. Hvað sem því líður kallar tímaritið New Scientist óhóflegt sjónvarpsáhorf „rafeindaárás á heilann.“

Lestur örvar aftur á móti ímyndunaraflið og rökhyggjuna — sem getur varla talist aðgerðarleysi! Í sjónvarpinu eru allar myndir og hljóð túlkuð fyrir áhorfandann, en lesandinn skapar í huganum eigið sjónarsvið og leikhljóð. Þessi skapandi notkun hugans kemur í veg fyrir að hugurinn staðni og er því heilsusamleg. Væri ekki viturlegt að takmarka tímann sem þú situr fyrir framan sjónvarpið?