Konan við brunninn

Einhvern tíma eftir páskana lögðu Jesús og lærisveinarnir aftur af stað til Galíleu. Þeir fóru í gegnum Samaríu á leiðinni og stoppuðu nálægt borginni Síkar á stað sem hét Jakobsbrunnur. Jesús hvíldi sig þar og lærisveinarnir fóru inn í borgina til að kaupa mat.

Kona kom að brunninum til að sækja vatn. Jesús sagði við hana: „Gefðu mér að drekka.“ Hún sagði: ‚Af hverju ertu að tala við mig? Ég er samversk kona. Gyðingar tala ekki við Samverja.‘ En Jesús sagði við hana: ‚Ef þú vissir hver ég er myndir þú biðja mig um að gefa þér að drekka og ég myndi gefa þér lifandi vatn.‘ ‚Hvað meinarðu?‘ spurði konan. „Þú ert ekki einu sinni með fötu.“ Jesús sagði: ‚Sá sem drekkur vatnið sem ég gef honum verður aldrei aftur þyrstur.‘ Konan sagði: „Herra, gefðu mér þetta vatn.“

Þá sagði Jesús við hana: ‚Náðu í manninn þinn.‘ Hún sagði: „Ég á engan mann.“ Hann sagði: ‚Það er rétt hjá þér. Þú hefur verið gift fimm sinnum og núna býrðu með manni sem þú ert ekki gift.‘ Konan sagði: ‚Ég sé að þú ert spámaður. Fólkið mitt segir að við getum tilbeðið Guð á þessu fjalli en Gyðingarnir segja að það sé bara hægt að tilbiðja hann í Jerúsalem. Ég trúi að þegar Messías kemur muni hann kenna okkur hvernig við eigum að tilbiðja.‘ Þá sagði Jesús svolítið við hana sem hann hafði ekki sagt við neinn áður: ‚Ég er Messías.‘

Konan flýtti sér til borgarinnar og sagði við Samverjana: ‚Ég held að ég hafi fundið Messías. Hann veit allt um mig. Komið og sjáið!‘ Þeir fóru með henni til brunnsins og hlustuðu á Jesú kenna.

Samverjarnir buðu Jesú að stoppa hjá sér í borginni. Hann kenndi fólkinu þar í tvo daga og margir fóru að trúa á hann. Þeir sögðu við samversku konuna: ‚Við erum búnir að hlusta á manninn og núna vitum við að hann er í alvörunni frelsari heimsins.‘