Pétur segist ekki þekkja Jesú

Þegar Jesús var í herberginu uppi á efri hæðinni með postulunum sagði hann við þá: ‚Þið eigið allir eftir að yfirgefa mig í nótt.‘ Pétur sagði: ‚Ekki ég! Þó að allir hinir yfirgefi þig mun ég aldrei gera það.‘ En Jesús sagði við Pétur: ‚Áður en hani galar muntu segja þrisvar sinnum að þú þekkir mig ekki.‘

Þegar hermennirnir fóru með Jesú til Kaífasar flúðu flestir postularnir. En tveir þeirra fóru á eftir honum með hópnum. Annar þeirra var Pétur. Hann fór inn í garðinn við hús Kaífasar og hlýjaði sé við eldinn. Þjónustustúlka sá andlit Péturs í birtunni frá eldinum og hún sagði: ‚Ég veit hver þú ert! Þú varst með Jesú!‘

Pétur sagði: ‚Nei! Ég veit ekki um hvað þú ert að tala!‘ Hann fór í áttina að hliðinu. En fljótlega sá önnur þjónustustúlka hann og sagði við fólkið: „Þessi maður var með Jesú!“ Pétur sagði: ‚Ég þekki ekki einu sinni Jesú!‘ Annar maður sagði: ‚Þú ert einn af þeim! Þú talar eins og Galíleumaður, þaðan sem Jesús er.‘ En Pétur sagði: ‚Ég sver! Ég þekki hann ekki!‘

Þá galaði hani. Pétur sá að Jesús sneri sér við og horfði á hann. Þá mundi hann eftir því sem Jesús hafði sagt og hann fór út og hágrét.

Á sama tíma komu mennirnir í æðstaráðinu saman í húsi Kaífasar til að dæma Jesú. Þeir voru búnir að ákveða að drepa Jesú og núna þurftu þeir bara að finna afsökun fyrir því. En þeir fundu ekkert til að dæma hann fyrir. Að lokum spurði Kaífas Jesú beint út: ‚Ertu sonur Guðs?‘ Jesús sagði: ‚Ég er það.‘ Kaífas sagði: ‚Við þurfum ekki meiri sannanir. Þetta er guðlast!‘ Dómararnir voru sammála og sögðu: ‚Þessi maður skal deyja.‘ Þeir börðu Jesú, hræktu á hann, bundu fyrir augun á honum, slógu hann og sögðu: ‚Ef þú ert spámaður, segðu okkur þá hver sló þig.‘

Þegar það var kominn dagur fóru þeir með Jesú í sal æðstaráðsins og spurðu aftur: ‚Ert þú sonur Guðs?‘ Jesús svaraði: „Þið segið að ég sé það.“ Þá dæmdu þeir hann fyrir guðlast og fóru með hann í höll Pontíusar Pílatusar, rómverska landstjórans. Hvað gerðist næst? Við skulum lesa um það í næstu sögu.