Hvað er hið stjórnandi ráð Votta Jehóva?

Hið stjórnandi ráð er lítill hópur reyndra kristinna manna sem veitir vottum Jehóva um heim allan leiðsögn. Hlutverk þeirra er tvískipt:

• Þeir hafa umsjón með því að útbúa biblíufræðslu. Fræðslunni er síðan miðlað í ritum, á samkomum og í skólum Votta Jehóva. – Lúkas 12:42.

• Þeir hafa umsjón með starfsemi Votta Jehóva um allan heim meðal annars í boðun meðal almennings og hafa umsjón með því hvernig frjáls fjárframlög eru notuð.

Hið stjórnandi ráð fylgir fordæmi ,postulanna og öldunganna í Jerúsalem‘ á fyrstu öld sem tóku mikilvægar ákvarðanir fyrir hönd kristna safnaðarins. (Postulasagan 15:2) Á sama hátt eru meðlimirnir í hinu stjórnandi ráði ekki leiðtogar safnaðarins. Þeir leita leiðsagnar í Biblíunni og viðurkenna að Jehóva Guð hefur útnefnt Jesú Krist sem höfuð safnaðarins. (1. Korintubréf 11:3; Efesusbréfið 5:23)

Hverjir eru í hinu stjórnandi ráði?

Í hinu stjórnandi ráði eru Kenneth Cook yngri, Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane og Jeffrey Winder. Þeir starfa við aðalstöðvar okkar í Warwick í New York, Bandaríkjunum.

Hvernig vinnur hið stjórnandi ráð?

Ráðinu er skipt í sex nefndir sem hafa umsjón með ákveðnu starfssviði. Allir í ráðinu sitja í einni eða fleiri nefndum.

• Ritaranefnd hefur umsjón með lögfræðilegum málum og bregst við þegar náttúruhamfarir, trúarofsóknir og aðrar aðkallandi aðstæður snerta votta Jehóva.

• Starfsmannanefnd hefur umsjón með Betelfjölskyldum.

• Útgáfunefnd hefur umsjón með framleiðslu og dreifingu biblíutengdra rita, byggingu ríkissala, þýðingarskrifstofa og deildarskrifstofa.

• Þjónustunefnd hefur umsjón með boðun ,fagnaðarerindisins um ríkið‘. – Matteus 24:14.

• Fræðslunefnd hefur umsjón með því verkefni að útbúa andlega fræðslu sem er komið á framfæri á samkomum, í skólum safnaðarins og með myndböndum og hljóðrituðu efni.

• Ritnefnd hefur umsjón með því verkefni að útbúa andlega leiðsögn sem birtist á prenti og á vefsetri okkar. Nefndin hefur líka umsjón með þýðingarstörfum.

Auk þess að sinna verkefnum í þessum nefndum kemur hið stjórnandi ráð saman á vikulegum fundum til að fara yfir þarfir alheims safnaðarins. Á þessum fundum ræða meðlimirnir um það sem Biblían segir og fylgja áhrifum heilags anda Guðs, og leitast við að komast að einróma ákvörðunum. – Postulasagan 15:25.

Hverjir eru aðstoðarmenn hins stjórnandi ráðs?

Stjórnandi ráð er með áreiðanlega kristna menn sem aðstoða nefndirnar. (1. Korintubréf 4:2) Þeir hafa reynslu og hæfni til að takast á við þau verk sem nefndirnar sinna og þeir mæta á vikulega fundi nefndanna. Þrátt fyrir að þeir komi ekki beint að ákvarðanatöku hjálpa þessir aðstoðarmenn með því að gefa góð ráð og upplýsingar, hrinda í framkvæmd ákvörðunum nefndanna og fylgjast með að verkin séu leyst vel úr hendi. Þeim er líka stundum falin önnur verkefni frá hinu stjórnandi ráði eins og að heimsækja bræður okkar í hinum ýmsum löndum eða til að flytja ræður á viðburðum eins og á ársfundinum eða við brautskráningu Gíleaðnemenda.