Kærleikur knýr okkur til að prédika
1 Vottar Jehóva eru best þekktir fyrir að boða Guðsríki af kostgæfni. (Matt. 24:14) Meira en sex milljónir boðbera starfa um heim allan. Talan hækkar jafnt og þétt eftir því sem fleiri taka þátt í prédikunarstarfinu.
2 Hvað knýr okkur til að bjóða okkur fram til svona krefjandi verkefnis? Enginn þvingar okkur, lokkar okkur með von um efnislegan ávinning eða upphefð. Í byrjun voru mörg okkar hrædd því að okkur fannst við ekki vera starfinu vaxin, og því að viðbrögð voru oft neikvæð. (Matt. 24:9) Fæstir skilja hvað knýr okkur til að prédika. Það hlýtur að vera sterk ástæða fyrir því að við höldum áfram.
3 Kraftur kærleikans: Jesús benti á æðsta boðorðið þegar hann sagði að við ‚skyldum elska Jehóva af öllu hjarta, sálu, huga og mætti.‘ (Mark. 12:30) Kærleikur okkar til Jehóva er sprottinn af djúpri virðingu fyrir honum. Hann er stjórnandi alheimsins, skapari allra hluta sem er ‚verður að fá dýrð, heiður og mátt.‘ (Opinb. 4:11) Eiginleikar hans eru óviðjafnanlegir. — 2. Mós. 34:6, 7.
4 Þar sem við þekkjum og elskum Jehóva finnum við okkur knúin til að láta ljós okkar lýsa meðal mannanna. (Matt. 5:16) Ljós okkar lýsir þegar við lofum hann opinberlega, segjum frá dásemdarverkum hans og breiðum út boðskapinn um ríki hans. Við höldum á „eilífum fagnaðarboðskap, til að boða . . . sérhverri þjóð og kynkvísl, tungu og lýð,“ rétt eins og engillinn í háhvolfi himins. (Opinb. 14:6) Kærleikur okkar er aflið að baki þessu alþjóðlega boðunarstarfi.
5 Heimurinn telur prédikun okkar vera ‚heimsku‘ sem á að hunsa. (1. Kor. 1:18) Mikið hefur verið reynt til að stöðva starf okkar. Tryggur kærleikur okkar hefur styrkt okkur til að lýsa yfir eins og postularnir: „Vér getum ekki annað en talað það, sem vér höfum séð og heyrt. . . . Framar ber að hlýða Guði en mönnum.“ (Post. 4:20; 5:29) Boðunarstarfið vex í öllum heimshornum þrátt fyrir andstöðu.
6 Kærleikur okkar til Jehóva er eins og eldur sem knýr okkur til að víðfrægja dáðir hans. (Jer. 20:9; 1. Pét. 2:9) Við höldum áfram að ‚gera máttarverk hans kunn meðal þjóðanna því að dásemdarverk hefur hann gert‘! — Jes. 12:4, 5.