Hjálpum þeim sem hneigjast til eilífs lífs
1. Hverjum safnar Jehóva til sín nú á dögum?
1 Allir hafa ákveðnar tilhneigingar. (Matt. 12:35) Biblían talar um þá sem hafa ‚ófrið í hjarta sínu‘. (Sálm. 55:22) Og sumir eru ‚bráðlyndir‘. (Orðskv. 29:22) En síðan eru þeir sem ‚hneigjast til eilífs lífs‘. (Post. 13:48, NW) Jehóva safnar til sín þess konar fólki nú á dögum. (Hagg. 2:7) Hvernig getum við hjálpað því til þess að tilbiðja Jehóva?
2. Hvað felst í því að gera fólk að lærisveinum?
2 Farðu samviskusamlega í endurheimsóknir: Við þurfum að hafa rétt viðhorf til endurheimsókna til að gera fólk að lærisveinum eins og okkur er falið. (Matt. 28:19, 20) Fylgjum við áhuganum kostgæfilega eftir? Förum við aftur til allra sem þáðu rit eða sýndu fagnaðarerindinu áhuga? Erum við dugleg að hjálpa þeim að vaxa í trú? Við verðum að kynda undir allan þann áhuga sem fólk sýnir því að líf eru í húfi.
3. Hvað ættum við að gera eftir að samtali við húsráðanda lýkur?
3 Ef húsráðandi sýnir áhuga skaltu gefa þér tíma til að skrifa niður nafn hans og heimilisfang á meðan samtalið er enn í fersku minni. Skrifaðu hjá þér um hvað þið töluðuð, hvaða ritningarstaðir voru lesnir og hvaða rit þú skildir eftir hjá honum. Vertu síðan ákveðinn í að fara sem fyrst til hans aftur.
4. Hvernig geta endurheimsóknirnar orðið áhrifaríkar?
4 Að fara í endurheimsókn: Þegar þú ferð aftur til húsráðandans skaltu vera vingjarnlegur og hlýlegur og sýna persónulegan áhuga. Haltu samræðunum á einföldum og biblíulegum nótum. Búðu þig undir að fjalla um áhugavert efni í Biblíunni og varpaðu fram spurningu í lokin sem þú getur svarað þegar þú kemur aftur. Forðastu að hrekja óbiblíuleg viðhorf húsráðandans að þarflausu. Leggðu þig heldur fram um að byggja á því sem þið eruð sammála um. — Kól. 4:6.
5. Hvað gerði brautryðjandi nokkur og hver var árangurinn?
5 Endurheimsóknir kosta vinnu og viðleitni en umbunin er mikil. Brautryðjandi í Japan setti sér það markmið að fjölga endurheimsóknunum í hverjum mánuði. Hann byrjaði á því að halda skrá yfir alla sem hann hitti í boðunarstarfinu og fór síðan aftur til þeirra áður en vikan var liðin. Hann undirbjó vel það sem hann ætlaði að segja og flutti síðan boðskapinn með miklum sannfæringarkrafti. Í einni endurheimsókninni tókst honum að hefja biblíunámskeið þar sem húsráðandinn sagði: „Ég hef aldrei áður viljað talað við ykkur vottana. Þetta er í fyrsta skipti sem ég hlusta.“ Þrautseigjan og kærleikurinn, sem þessi brautryðjandi sýndi, bar árangur. Í lok mánaðarins var hann kominn með tíu biblíunámskeið.
6. Hvers vegna verðum við að vera dugleg að fara í endurheimsóknir?
6 Aðstæður manna breytast í sífellu. (1. Kor. 7:31) Oft þarf að reyna nokkrum sinnum til að hitta hinn áhugasama aftur. En með því að fara samviskusamlega í endurheimsóknir getum við hjálpað þeim sem hneigjast til eilífs lífs að komast inn á veginn til lífsins. — Matt. 7:13, 14.