Notum biblíutengdu ritin skynsamlega
1, 2. Hvað finnst mörgum um ritin frá okkur og hvaða spurningu vekur það?
1 „Ég hef lesið ritin frá ykkur síðan 1965. Ég fletti ritningarstöðunum upp í Biblíunni jafnóðum og ég les. Allt í ritunum er í samræmi við það sem stendur í Biblíunni. Mig hefur alltaf langað til að þekkja sannleikann um Guð og Jesú og ég get sagt með sanni að réttu svörin er að finna í lesefni ykkar og í Biblíunni.“ Þetta skrifaði maður í bréfi til aðalskrifstofu Votta Jehóva. Hann óskaði einnig eftir biblíunámskeiði.
2 Eins og þessi þakkláti maður kunna milljónir manna um allan heim vel að meta biblíunámsritin sem hinn „trúi og hyggni þjónn“ lætur í té. (Matt. 24:45) Á hverju ári er gríðarlegt magn af lesefni gefið út til að hjálpa hjartahreinu fólki að komast „til þekkingar á sannleikanum“. (1. Tím. 2:4) Hvernig getum við notað biblíutengdu ritin skynsamlega?
3. Hvernig getum við komið í veg fyrir að sólunda ritum?
3 Vörumst sóun: Með tímanum geta safnast upp hjá okkur fleiri rit en við höfum þörf fyrir. Hvað getum við gert til að koma í veg fyrir að sólunda þessum dýrmætu ritum? Nauðsynlegt er að sýna skynsemi þegar við náum okkur í rit fyrir boðunarstarfið. Við ættum að fá okkur eitt eða tvö eintök af bók eða bæklingi og sækja þá fleiri þegar þeim hefur verið dreift frekar en fá mörg eintök af ritum til væntanlegrar dreifingar. Það kemur í veg fyrir að birgðir safnist upp heima hjá okkur. Við ættum einnig að minnka blaðapöntunina ef blöð safnast upp hjá okkur.
4. Hvað er til ráða ef söfnuður situr uppi með umframbirgðir af ritum?
4 Umframbirgðir: Ef söfnuðurinn situr uppi með of miklar birgðir af ákveðnum ritum gæti bókaþjónninn athugað hvort aðrir söfnuðir á svæðinu gætu nýtt sér umframritin. Eldri rit má bjóða ættingjum, sem eru ekki í trúnni, biblíunemendum og öðrum. Kannski vilja þeir sem eru nýlega farnir að sækja samkomur fá þessi eldri rit í bókasafn sitt.
5. Hvernig getum við sýnt að við kunnum að meta ritin sem við fáum?
5 Okkur langar til að lesefnið frá okkur nái tilætluðu markmiði, það er að segja að hjálpa einlægu fólki til að kynnast nánar stórkostlegri fyrirætlun Jehóva. Jesús sólundaði ekki umframmat þegar hann gerði kraftaverk og gaf mannfjöldanum að borða. Eins ætti markmið okkar að vera að nýta sem best þau dýrmætu biblíutengdu rit sem við fáum. (Jóh. 6:11-13) Boðskapurinn í ritunum getur hvorki snert hjörtu réttsinnaðs fólks né bjargað því ef þau liggja uppi á hillu eða í starfstöskunni. Við verðum því að sýna dómgreind þegar við biðjum um rit fyrir boðunarstarfið og nota þau skynsamlega öðrum í hag. — Fil. 4:5.