Samvinna í boðuninni á svæði margra málhópa

Fólk hlustar frekar á boðskapinn um Guðsríki á sínu móðurmáli. Það gæti verið ástæðan fyrir því að Jehóva sá til þess á páskahátíðinni árið 33 að ,guðræknir Gyðingar frá öllum löndum undir himninum‘ fengu að heyra fagnaðarerindið á ,eigin móðurmáli‘ þótt þeir hafi sennilega talað sameiginlegt tungumál, eins og hebresku eða grísku. (Post 2:5, 8) Á svæðum þar sem margir málhópar eru nú á dögum, halda söfnuðir samkomur á mismunandi tungumálum en hafa kannski starfsvæði í sömu hverfum. Hvernig geta boðberar í þessum söfnuðum unnið að því að boða öllum trúna án þess að það skarist að óþörfu og skaprauni húsráðendum?

• 

  Leitum ráða (Okv 15:22): Starfshirðar ættu að ræða saman um boðunina og koma sér saman um fyrirkomulag sem allir eru sáttir við. Ef starfsvæði er takmarkað óska söfnuðir sem boða trúna á erlendum tungumálum þess líklega að íbúðum sem tilheyra þeirra svæði sé sleppt. En ef þeir ná ekki að fara yfir svæðið sitt reglubundið vegna þess að það er of dreift, gætu þeir beðið ykkar söfnuð um að sleppa engum íbúðum heldur láta þá vita ef einhver sem tilheyrir þeirra svæði sýnir áhuga. (od-E 93 gr. 37) Þeir gætu líka beðið ykkar söfnuð um aðstoð við að finna fólk sem talar tungumál þeirra safnaðar og láta þá fá heimilisföng sem ættu að tilheyra starfssvæði þeirra. Höfum í huga að stundum eru töluð fleiri en eitt tungumál á sama heimilinu. Ráðstafanir í sambandi við yfirferð starfssvæða eiga að vera í samræmi við lög um meðferð persónuupplýsinga.

• 

  Vinnum saman (Ef 4:16): Fylgdu gaumgæfilega öllum leiðbeiningum frá starfshirðinum. Hefur biblíunemandi þinn annað móðurmál en talað er í þínum söfnuði? Nemandinn myndi líklega taka hraðari framförum ef þú bæðir söfnuð eða hóp, sem talar sama tungumál og hann, um að annast biblíunámskeiðið.

• 

  Undirbúum okkur (Okv 15:28; 16:1): Ef húsráðandi á þínu starfssvæði talar annað tungumál en þú, skaltu gera þitt besta til að segja honum frá fagnaðarerindinu. Þú getur undirbúið þig með því að kanna hvaða tungumál eru töluð á svæðinu. Þú gætir sótt biblíuþýðingar og myndskeið í snjalltækið þitt á þessum tungumálum. Þú gætir líka notað JW Language-appið til að læra að heilsa á nokkrum tungumálum.