Ætti ég að hætta að keyra?

Þekkirðu þessar aðstæður? Ef svo er, hvað getur hjálpað þér að meta hvort þú ættir að halda áfram að keyra eða ekki?

Í sumum löndum þurfa ökumenn sem eru komnir yfir vissan aldur að fá vottorð hjá lækni ef þeir vilja endurnýja ökuskírteinið. Þjónar Guðs í þessum löndum hlýða landslögum og fyrirmælum þeirra sem eru skipaðir af yfirvöldum. (Rómv. 13:1) En sama hvar þú býrð eru til leiðir til að meta hvort þú sért enn þá fær um að keyra af öryggi.

LEGGÐU MAT Á ÖKUHÆFNI ÞÍNA

Öldrunarstofnun Bandaríkjanna (NIA) mælir með að fólk spyrji sig eftirfarandi spurninga:

• Á ég í vandræðum með að lesa á umferðarmerki eða sé ég illa þegar fer að dimma?

• Hefur liðleikinn minnkað svo að ég á erfitt með að snúa höfðinu og horfa í hliðarspegla og gæta mín á blindum blettum?

• Bregst ég ekki nógu fljótt við, eins og þegar ég þarf að færa fótinn af bensíngjöfinni yfir á bremsuna?

• Keyri ég það hægt að það truflar flæðið í umferðinni?

• Hef ég stundum verið nálægt því að lenda í óhappi upp á síðkastið eða eru rispur og dældir á bílnum mínum vegna þess að ég hef keyrt utan í eitthvað?

• Hefur lögreglan stöðvað mig vegna aksturslagsins?

• Hef ég verið nálægt því að dotta undir stýri?

• Er ég á lyfjum sem gætu haft áhrif á aksturslagið?

• Hafa ættingjar eða vinir látið í ljós áhyggjur varðandi aksturslag mitt?

Ef þú svaraðir einni eða tveim af þessum spurningum játandi gæti verið kominn tími til að gera breytingar. Þú gætir til dæmis ákveðið að keyra minna, sérstaklega eftir að fer að dimma. Endurmettu stöðuna reglulega. Þú gætir spurt ættingja eða vin hvað honum finnst um aksturslagið hjá þér. Og þú gætir farið í ökutíma til að skerpa á öryggisatriðum. En ef þú hefur svarað fleiri en tveim þessara spurninga játandi væri kannski skynsamlegast að hætta að keyra.a

LÁTTU MEGINREGLUR BIBLÍUNNAR LEIÐBEINA ÞÉR

Það er ekki víst að við sjálf tökum eftir því að við erum ekki lengur jafn góðir bílstjórar og við vorum. Og það getur verið viðkvæmt mál fyrir okkur að leiða hugann að því hvort við ættum að hætta að keyra. Hvaða meginreglur Biblíunnar gætu hjálpað þér að sjá málin í skýru ljósi og taka góða ákvörðun? Lítum á tvær þeirra.

Vertu hógvær. (Orðskv. 11:2) Þegar við eldumst minnkar sjón, heyrn og vöðvastyrkur og það hægist á viðbrögðum. Flest fólk hættir til dæmis að taka þátt í ákveðnum íþróttum þegar það eldist því að það áttar sig á að hættan á meiðslum eykst með aldrinum. Hið sama ætti að eiga við um akstur. Sá sem er hógvær gæti ákveðið að hætta að keyra þegar hann telur það ekki öruggt lengur. (Orðskv. 22:3) Og hógvær manneskja er tilbúin að hlusta þegar aðrir láta í ljós áhyggjur sínar. – Samanber 2. Samúelsbók 21:15–17.

Forðastu blóðsekt. (5. Mós. 22:8) Bíll er hættulegt farartæki ef öryggis er ekki gætt. Sá sem heldur áfram að keyra þótt hæfni hans hafi minnkað gæti stofnað lífi sínu og annarra í hættu. Og hann gæti bakað sér blóðskuld ef hann veldur dauðaslysi.

Ef þú stendur frammi fyrir þeirri erfiðu ákvörðun að hætta að keyra skaltu forðast þá hugsun að þú missir virðingu annarra eða sért minna virði. Jehóva elskar þig fyrir fallega eiginleika þína, þar á meðal hógværð, auðmýkt og umhyggju fyrir velferð annarra. Og hann lofar að styðja þig og hughreysta. (Jes. 46:4) Hann yfirgefur þig aldrei. Biddu hann að hjálpa þér að nota visku og góð ráð frá Biblíunni þegar þú tekur ákvörðun um hvort þú ættir að hætta að keyra.