Lifum við á síðustu dögum?

ORÐIN ‚örðugar tíðir‘ eru þýðing grísku orðanna kairoiʹ khalepoiʹ. (2. Tímóteusarbréf 3:1) Khalepoiʹ er fleirtölumynd orðs sem merkir bókstaflega „grimmur“ og felur í sér hugmyndina um ógnun og hættu. Biblíuskýrandi segir að orðið lýsi „geysiharðri árás illskunnar.“ ‚Hinir síðustu dagar‘ myndu því bera af öðrum tímabilum mannkynssögunnar í ólgu og grimmd. Eins og 2. Tímóteusarbréf 3:13 orðar það: „Vondir menn og svikarar munu magnast í vonskunni.“

Lýsir þetta okkar dögum? Við skulum brjóta til mergjar nokkur hinna einstöku tákna sem er að finna í 2. Tímóteusarbréfi 3:2-5 og sjá hvort þau gefa til kynna að við lifum á síðustu dögum.

„Mennirnir verða . . . fégjarnir.“ — 2. Tímóteusarbréf 3:2.

Tímaritið U.S.News & World Report talar um „taumlaus auðgunarafbrot“ til að lýsa því hve fjársvik eru orðin algeng. Fjársvik kosta bandaríska heilbrigðiskerfið á bilinu 3000 til 4800 milljarða króna á ári. Slíkur óheiðarleiki er því miður dæmigerður. „Þjóðfélagið dásamar stundum óheiðarleikann,“ eins og Gary Edwards, formaður ráðgjafarmiðstöðvar í siðfræði, segir. Hann heldur áfram: „Við gerum hetjur úr skálkum, hvort sem það eru stjórnmálamenn eða kaupsýslumenn sem svindla á kerfinu og komast upp með það.“

„Hrokafullir.“ — 2. Tímóteusarbréf 3:2.

Hrokafullur maður lítur niður á aðra með fyrirlitningu. Það birtist mjög greinilega í kynþátta- og þjóðernisfordómum nútímans! „Allir minnihlutahópar eru skotspónn,“ segir Tórontóblaðið The Globe and Mail. „Kynþáttaofbeldi færist í aukana í Þýskalandi, Ku Klux Klan er starfandi í Bandaríkjunum og hakakrossar óprýða gangstéttir og samkunduhús í Tórontó.“ Irving Abella, forseti Gyðingaráðsins í Kanada segir: „Við sjáum það alls staðar: Í Svíþjóð, á Ítalíu, í Hollandi og Belgíu og eins í Þýskalandi.“

„Foreldrum óhlýðnir.“ — 2. Tímóteusarbréf 3:2.

„Margir saka þá sem fæddust rétt eftir síðari heimsstyrjöldina um að hafa alið upp kynslóð kjöftugra, deilugjarnra og ókurteisra óþekktarorma,“ segir The Toronto Star. Uppreisnargirni heima fyrir heldur oft áfram í skólanum. Kennari nokkur segir að börn allt niður í fjögurra ára gömul séu hortug. „Kennarar eyða meiri tíma í uppeldi en kennslu,“ segir hann. Auðvitað eru ekki allir krakkar uppreinsargjarnir. Engu að síður „virðast þeir almennt séð bera ósköp litla virðingu fyrir nokkrum sköpuðum hlut,“ segir Bruce MacGregor sem er gamalreyndur framhaldsskólakennari.

„Kærleikslausir.“ — 2. Tímóteusarbréf 3:3.

Á síðustu dögum átti fjölskyldulífinu að hnigna mjög — einmitt þar sem ást og umhyggja ætti helst að ríkja. Dagblaðið The New York Times segir að „heimilisofbeldi sé algengasta orsök meiðsla og dauða bandarískra kvenna og valdi meira tjóni en umferðarslys, nauðganir og rán samanlagt.“ Kynferðisleg misnotkun barna er oftast verk ættingja sem er treyst. Tíðir hjónaskilnaðir, ill meðferð aldraðra og fóstureyðingar eru einnig merki þess að marga „skorti algerlega . . . eðlilega mannlega ástúð.“ — Phillips.

„Grimmir, ekki elskandi það sem gott er.“ — 2. Tímóteusarbréf 3:3.

„Ungir morðingjar þurfa ekki mikið tilefni,“ skrifar dálkahöfundurinn Bob Herbert. „Fjöldi krakka hefur af miklum áhuga meðtekið þá hugmynd að skjóta aðra mannveru til bana ‚bara til gamans.‘“ Suma foreldra virðist jafnvel skorta siðferðiskennd. Þegar hópur unglingspilta var ákærður fyrir að hafa keppst um sín á milli að hafa kynmök við sem flestar stelpur sagði einn af feðrunum: „Drengurinn minn gerði ekkert sem sérhver tápmikill bandarískur drengur á hans aldri hefði ekki gert.“

„Elskandi munaðarlífið meira en Guð.“ — 2. Tímóteusarbréf 3:4.

Samkvæmt einu mati eyða unglingar 15 klukkustundum við tónlist, kvikmyndir og því um líkt á móti hverri einni sem þeir verja til trúariðkana. „Nú orðið,“ segir Altoona Mirror, „ræður fjölmiðlamenningin, sem blómstrar í verslanamiðstöðvum og á skólagöngunum, lífi unglinganna. Fjölskyldan hefur næstmest áhrif. Kirkjan er svo í síðasta sæti.“ Blaðið segir einnig að „ef foreldrarnir eru fjarri og kirkjan þögul eru það fjölmiðlarnir sem hafa mestu áhrifin í lífi unga fólksins.“

„Hafa á sér yfirskin guðhræðslunnar, en afneita krafti hennar.“ — 2. Tímóteusarbréf 3:5.

Sannleikur Biblíunnar hefur kraft til að breyta lífi manna. (Efesusbréfið 4:22-24) En einhver óguðlegustu verkin eiga sér stað undir yfirskini trúarinnar. Sorglegt dæmi um það er kynferðisleg misnotkun klerka á börnum. The New York Times hefur eftir bandarískum lögfræðingi að hann hafi „í undirbúningi 200 mál í 27 ríkjum þar sem skjólstæðingar hans segjast hafa verið kynferðislega misnotaðir af prestum.“ Illvirki þessara presta afhjúpa sérhvert guðræknisyfirskin þeirra sem tóma hræsni.

FLEIRI EINKENNI HINNA SÍÐUSTU DAGA

2. TÍMÓTEUSARBRÉF 3:2-4 SEGIR LÍKA AÐ MENNIRNIR VERÐI . . .

□ Raupsamir

□ Lastmælendur

□ Vanþakklátir

□ Vanheilagir

□ Ósáttfúsir

□ Rógberandi

□ Taumlausir

□ Sviksamir

□ Framhleypnir

□ Ofmetnaðarfullir

„TÁKN NÆRVERU ÞINNAR“

Skömmu fyrir dauða sinn var Jesús spurður: „Hvert verður tákn nærveru þinnar og endaloka heimskerfisins?“ (Matteus 24:3, NW) Jesús tilgreindi ástand og atburði sem myndu einkenna hina síðustu daga. Við skulum skoða sumt af því.

„Þjóð mun rísa gegn þjóð og ríki gegn ríki.“ — Matteus 24:7.

„Þótt tuttugasta öldin einkennist almennt séð af félagslegum framförum og aukinni umhyggju yfirvalda fyrir kjörum fátækra, hefur mest borið á vélbyssunni, skriðdrekanum, B-52 sprengjufluvélinni, kjarnasprengjunni og loks flugskeytinu. Hún hefur einkennst af blóðugari og mannskæðari styrjöldum en nokkur önnur öld sögunnar.“ — Milestones of History.

„Landskjálftar á ýmsum stöðum.“ — Matteus 24:7.

Á þessari öld hafa jarðskjálftar frá 7,5 til 8,3 stig á Richterkvarða gengið yfir Indland, Íran, Ítalíu, Japan, Kína, Perú, Síle og Tyrkland.

„Þá verða . . . ógnir.“ — Lúkas 21:11.

Ógnvekjandi atburðir á síðustu árum valda því að ótti er sennilega sterkasta tilfinningin í lífi fólks. Fólk óttast stríð, glæpi, mengun, sjúkdóma, verðbólgu og margt annað sem ógnar öryggi þess og jafnvel lífi.

„Þá verður hungur.“ — Matteus 24:7.

„Hungrið ógnar meðan hjálparstofnanir deila,“ sagði í fyrirsögn tímaritsins New Scientist. Haft er eftir einum fyrrverandi forseta Bandaríkjanna að veruleg hætta sé á hungursneyð um allan heim innan tveggja áratuga. „Þrátt fyrir þessar hrikalegu spár,“ segir greinin, „fer fjárstuðningur ríku þjóðanna til uppbyggingar akuryrkju í þróunarlöndunum ört minnkandi.“

„Drepsóttir . . . á ýmsum stöðum.“ — Lúkas 21:11.

Að sögn umræðuhóps sérfræðinga hefur barátta Bandaríkjastjórnar gegn alnæmi — sem kostar meira en 30 milljarða króna árlega — verið kölluð ömurlega misheppnuð. „Við erum að missa heila kynslóð vinnufærra manna vegna alnæmis,“ sagði dr. Donna Sweet sem hefur á bilinu 200 til 300 sjúklinga til meðferðar. Alnæmi er nú algengasta dánarorsök karlmanna á aldrinum 25 til 44 ára í Bandaríkjunum.

„Lögleysi magnast.“ — Matteus 24:12.

Könnun, sem náði til 2500 unglinga, leiddi í ljós að 15 af hundraði þeirra hafði verið með skotvopn á sér einhvern tíma síðustu 30 daga fyrir könnunina, 11 af hundraði höfðu orðið fyrir skoti á undangengnu ári og 9 af hundraði höfðu einhvern tíma skotið af byssu á annan mann.

HVAÐ ER FRAMUNDAN?

Eins og við höfum séð er mannkynið komið langt af leið og er fjarri friðsælum heimi. Umfang þessa ástands, sem tíundað hefur verið, á sér enga hliðstæðu í sögunni. Mannkynið er svo sannarlega á ókunnum slóðum. Það er að ganga í gegnum tímabil sem kallast síðustu dagar. Hvað kemur í kjölfarið?

[Rétthafi myndar á blaðsíðu 4]

Michael Lewis/Sipa Press