Jehóva opinberar leynda hluti

„Vissulega er Guð ykkar guð guðanna og konungur konunganna. Og leynda hluti opinberar hann.“ – DAN. 2:47.

HVERT ER SVARIÐ?

Hvaða upplýsingar hefur Jehóva opinberað okkur um framtíðina?

Hvað tákna fyrstu sex höfuð dýrsins í Opinberunarbókinni?

Hvaða samsvörun er milli dýrsins í Opinberunarbókinni og líkneskisins í draumi Nebúkadnesars?

1, 2. Hvað hefur Jehóva opinberað okkur og hvers vegna?

HVAÐA ríki verða við völd á jörðinni þegar ríki Guðs bindur enda á yfirráð manna? Við vitum það því að Jehóva Guð, sem ,opinberar leynda hluti‘, hefur birt svarið. Í ritum Daníels spámanns og Jóhannesar postula gerir hann okkur kleift að bera kennsl á þessi ríki.

² Jehóva birti þessum mönnum sýnir þar sem brá fyrir ýmsum dýrum. Hann skýrði líka fyrir Daníel merkingu risastórs málmlíkneskis sem konungi Babýlonar birtist í draumi. Jehóva lét skrásetja frásögur af þessu og varðveita í Biblíunni til að við nytum góðs af. (Rómv. 15:4) Markmiðið var að styrkja þá von okkar að ríki hans eyði bráðlega öllum ríkjum manna. – Dan. 2:44.

3. Hverju þurfum við að átta okkur á til að skilja spádóma Biblíunnar nákvæmlega og hvers vegna?

³ Ef frásögur Daníels og Jóhannesar eru lagðar saman benda þær á átta konunga eða ríki og sýna jafnframt í hvaða röð þau koma fram. En við skiljum ekki þessa spádóma nákvæmlega nema við áttum okkur á hvað fyrsti spádómurinn í Biblíunni merkir. Af hverju? Af því að uppfylling þessa spádóms gengur eins og rauður þráður gegnum Biblíuna. Allir aðrir spádómar eru tengdir honum með einum eða öðrum hætti.

NIÐJAR HÖGGORMSINS OG DÝRIÐ

4. Hverjir eru niðjar konunnar og hvað gera þeir?

⁴ Skömmu eftir uppreisnina í Eden gaf Jehóva loforð um að ,kona‘ mynd eignast „niðja“.a (Lestu 1. Mósebók 3:15.) Þegar fram liðu stundir áttu niðjar konunnar að merja höfuð höggormsins Satans. Jehóva opinberaði síðar að ættleggurinn myndi liggja frá Abraham til Ísraelsþjóðarinnar og síðan frá ættkvísl Júda og ætt Davíðs konungs. (1. Mós. 22:15-18; 49:10; Sálm. 89:4, 5; Lúk. 1:30-33) Jesús Kristur reyndist vera mikilvægasti niðjinn. (Gal. 3:16) Andasmurðir bræður og systur í kristna söfnuðinum eru einnig niðjar konunnar. (Gal. 3:26-29) Jesús og hinir andasmurðu mynda í sameiningu stjórn Guðsríkis sem Jehóva notar til að sundurmola Satan. – Lúk. 12:32; Rómv. 16:20.

5, 6. (a) Hve mörg stórveldi nefna Daníel og Jóhannes? (b) Hvað tákna höfuð dýrsins í Opinberunarbókinni 13. kafla?

⁵ Í fyrsta spádóminum, sem borinn var fram í Eden, kemur einnig fram að Satan myndi geta af sér „niðja“. Þeir myndu hata niðja konunnar og sýna þeim fjandskap. Niðjar höggormsins eru allir þeir sem líkja eftir hatri Satans á Guði og berjast gegn þjónum hans. Í aldanna rás hefur Satan skipað niðjum sínum í ýmsar pólitískar hreyfingar eða ríki. (Lúk. 4:5, 6) Tiltölulega fá ríki manna hafa þó haft teljandi áhrif á þjóna Guðs, hvort heldur Ísraelsþjóðina eða söfnuð hinna andasmurðu. Hvers vegna skiptir það máli? Það skýrir hvers vegna aðeins er talað um átta voldug ríki í sýnum Daníels og Jóhannesar.

⁶ Undir lok fyrstu aldar lét Jesús Jóhannes postula sjá áhrifamiklar sýnir. (Opinb. 1:1) Í einni þeirra sér Jóhannes djöfulinn í líki dreka standa á sjávarströnd. (Lestu Opinberunarbókina 12:18-13:2.) Jóhannes sá líka undarlegt dýr stíga upp af hafinu og drekinn fékk því mikið vald. Síðar segir frá skarlatsrauðu dýri en það er líkneski af dýrinu sem nefnt er í Opinberunarbókinni 13:1. Engill segir Jóhannesi að sjö höfuð þess tákni ,sjö konunga‘ eða ríki. (Opinb. 13:14, 15; 17:3, 9, 10) Þegar Jóhannes skrifaði þetta voru fimm konunganna fallnir, einn var við völd og sá síðasti var „ókominn“. Hver eru þessi ríki eða heimsveldi? Við skulum nú ræða um öll höfuð dýrsins sem lýst er í Opinberunarbókinni. Við könnum líka hvernig Daníelsbók veitir nánari upplýsingar um þessi ríki, sum hver öldum áður en þau komu fram á sjónarsviðið.

EGYPTALAND OG ASSÝRÍA – FYRSTU TVÖ HÖFUÐIN

7. Hvað táknar fyrsta höfuðið og hvernig vitum við það?

⁷ Fyrsta höfuð dýrsins táknar Egyptaland af því að Egyptaland var fyrsta stórveldið til að sýna þjóð Guðs fjandskap. Afkomendum Abrahams fjölgaði mjög í Egyptalandi en niðjar konunnar, sem heitið var, áttu að koma af þeim. Egyptar tóku þá að kúga Ísraelsmenn. Satan reyndi að útrýma þjóð Guðs áður en niðjar konunnar kæmu fram. Hvernig? Með því að fá faraó til að reyna að lífláta öll sveinbörn Ísraelsmanna. Jehóva ónýtti fyrirætlun hans og frelsaði þjóð sína úr þrælkuninni í Egyptalandi. (2. Mós. 1:15-20; 14:13) Síðar lét hann þjóð sína setjast að í fyrirheitna landinu.

8. Hvað táknaði annað höfuðið og hvað reyndi það að gera?

⁸ Annað höfuð dýrsins táknar Assýríu. Þetta volduga ríki reyndi einnig að útrýma þjóð Guðs. Jehóva notaði Assýringa að vísu til að refsa tíuættkvíslaríkinu fyrir uppreisn þess og skurðgoðadýrkun. En síðan réðust Assýringar á Jerúsalem. Satan ætlaði sér ef til vill að útrýma konungsættinni sem Jesús átti síðar að koma af. Þessi árás var ekki liður í fyrirætlun Jehóva og hann vann því kraftaverk til að útrýma innrásarhernum og frelsa trúa þjóna sína. – 2. Kon. 19:32-35; Jes. 10:5, 6, 12-15.

BABÝLON – ÞRIÐJA HÖFUÐIÐ

9, 10. (a) Hvað leyfði Jehóva Babýloníumönnum að gera? (b) Hvað þurfti að gerast til að spádómarnir rættust?

⁹ Þriðja höfuð dýrsins, sem Jóhannes sá, táknar ríkið sem átti Babýlon að höfuðborg. Jehóva leyfði Babýloníumönnum að vinna Jerúsalem og flytja þjóð sína í útlegð. En áður en hann leyfði að þjóðin yrði auðmýkt varaði hann uppreisnargjarna Ísraelsmenn við að þessi ógæfa biði þeirra. (2. Kon. 20:16-18) Hann boðaði að konungsættin, sem sögð var sitja í „hásæti Drottins“ í Jerúsalem, yrði sett af. (1. Kron. 29:23) En Jehóva hét því jafnframt að afkomandi Davíðs konungs, sá sem hefði „dómsvald“ eða „réttinn“ (Biblían 1981), myndi koma og endurheimta konungdóminn. – Esek. 21:30-32.

¹⁰ Í öðrum spádómi kemur fram að musterið í Jerúsalem yrði enn tilbeiðslustaður Gyðinga þegar Messías, hinn smurði, kæmi fram. (Dan. 9:24-27) Áður en Ísraelsmenn voru fluttir í útlegð til Babýlonar var borinn fram spádómur þess efnis að Messías myndi fæðast í Betlehem. (Míka 5:1) Til að þessir spádómar rættust þurftu Gyðingar að snúa heim úr útlegðinni og endurreisa musterið. Það var hins vegar ekki venja Babýloníumanna að láta fanga sína lausa. Hvernig gat þjóð Guðs þá snúið heim? Jehóva opinberaði spámönnum sínum það. – Amos 3:7.

11. Hvaða tákn eru notuð í Biblíunni til að lýsa heimsveldinu Babýlon? (Sjá neðanmálsgrein.)

¹¹ Daníel spámaður var meðal þeirra sem fluttir voru í útlegð til Babýlonar. (Dan. 1:1-6) Jehóva fékk honum það verkefni að opinbera hvaða ríki myndu taka við af babýlonska heimsveldinu og í hvaða röð þau kæmu. Jehóva notaði ýmiss konar tákn til að upplýsa það. Hann lét til dæmis Nebúkadnesar, konung í Babýlon, dreyma risastórt líkneski sem var samsett úr ólíkum málmum. (Lestu Daníel 2:1, 19, 31-38.) Fyrir munn Daníels upplýsti Jehóva að gullhöfuð líkneskisins táknaði heimsveldið Babýlon.b Eftir Babýlon kom heimsveldi sem táknað var með brjósti og armleggjum úr silfri. Hvaða ríki var það og hvernig myndi það fara með þjóð Guðs?

MEDÍA-PERSÍA – FJÓRÐA HÖFÐUÐIÐ

12, 13. (a) Hvað opinberaði Jehóva um fall Babýlonar? (b) Af hverju er fjórða höfuð dýrsins viðeigandi tákn Medíu-Persíu?

¹² Meira en öld fyrir daga Daníels opinberaði Jehóva ýmislegt fyrir munn Jesaja um heimsveldið sem myndi vinna Babýlon. Hann upplýsti bæði hvernig Babýlon yrði unninn og nafngreindi líka sigurvegarann. Það var Kýrus Persakonungur. (Jes. 44:28-45:2) Daníel sá tvær sýnir til viðbótar um heimsveldið Medíu-Persíu. Í annarri þeirra birtist það í líki bjarndýrs sem reis upp á aðra hliðina. Því var sagt: „Éttu firn af kjöti.“ (Dan. 7:5) Í hinni sýninni sá Daníel þetta tvíveldi táknað með tvíhyrndum hrúti. – Dan. 8:3, 20.

¹³ Jehóva notaði heimsveldið Medíu-Persíu til að sigra Babýlon og leyfa Gyðingum að snúa heim, alveg eins og hann hafði sagt fyrir. (2. Kron. 36:22, 23) En síðar lá við að þetta sama ríki útrýmdi þjóð Guðs. Í Esterarbók í Biblíunni er sagt frá ráðabruggi Hamans sem var forsætisráðherra Persíu. Hann lagði á ráðin um að allir Gyðingar í öllu ríkinu skyldu drepnir og tiltók hvaða dag þjóðarmorðið ætti að eiga sér stað. En Jehóva skarst í leikinn og verndaði þjóð sína enn og aftur fyrir fjandskap niðja Satans. (Est. 1:1-3; 3:8, 9; 8:3, 9-14) Fjórða höfuð dýrsins í Opinberunarbókinni er því viðeigandi tákn Medíu-Persíu.

GRIKKLAND – FIMMTA HÖFUÐIÐ

14, 15. Hvað opinberaði Jehóva varðandi gríska heimsveldið?

¹⁴ Fimmta höfuð dýrsins í Opinberunarbókinni táknar Grikkland. Þegar Daníel túlkaði draum Nebúkadnesars um líkneskið opinberaði hann að kviðurinn og lendarnar, sem voru úr eiri, táknuðu þetta sama ríki. Daníel sá einnig tvær sýnir sem lýsa ótrúlega vel eðli Grikklands og áhrifamesta leiðtoga þess.

¹⁵ Í annarri sýninni sá Daníel Grikkland birtast sem hlébarða með fjóra vængi. Það var lýsandi fyrir skjóta landvinninga þess. (Dan. 7:6) Í hinni sýninni sá Daníel geithafur með stórt horn sem réðst á tvíhyrnda hrútinn, það er að segja Medíu-Persíu, og drap hann með hraði. Jehóva sagði Daníel að geithafurinn táknaði Grikkland og stóra hornið táknaði einn af konungum þess. Daníel lýsti því einnig hvernig stóra hornið brotnaði og fjögur smærri uxu í staðinn. Þótt spádómurinn væri skráður öldum áður en Grikkland varð heimsveldi rættist hann í einu og öllu. Alexander mikli var stóra hornið. Hann var voldugasti konungur Grikklands til forna og leiddi herförina gegn Medíu-Persíu. En stóra hornið brotnaði áður en langt um leið. Alexander dó meðan veldi hans stóð sem hæst, aðeins 32 ára. Ríkið skiptist síðar milli fjögurra hershöfðingja hans. – Lestu Daníel 8:20-22.

16. Hvað gerði Antíokos fjórði?

¹⁶ Eftir að hafa unnið Persíu réð Grikkland yfir landinu þar sem þjóð Guðs bjó. Gyðingar voru þá sestir að í fyrirheitna landinu á nýjan leik og höfðu endurbyggt musterið í Jerúsalem. Þeir voru enn þá útvalin þjóð Guðs og musterið var enn miðstöð sannrar tilbeiðslu. Á annarri öld f.Kr. gerðist það hins vegar að Grikkland, fimmta höfuð dýrsins, réðst á þjóð Guðs. Antíokos fjórði, einn af erfingjum hins klofna heimsveldis Alexanders, lét reisa heiðið altari á musterissvæðinu í Jerúsalem. Hann bannaði Gyðingum að iðka trú sína að viðlagðri dauðarefsingu. Enn á ný sýndu niðjar Satans hatur sitt. En ekki leið á löngu áður en Grikklandi var velt úr sessi sem heimsveldi. Hvaða ríki skyldi vera sjötta höfuð dýrsins?

RÓM – SJÖTTA HÖFUÐIÐ, HRÆÐILEGT OG ÓGNVEKJANDI

17. Hvaða þátt átti sjötta höfuðið í að uppfylla spádóminn í 1. Mósebók 3:15?

¹⁷ Róm var heimsveldi þegar Jóhannes sá sýnina um dýrið. (Opinb. 17:10) Það var sjötta höfuðið og átti veigamikinn þátt í að uppfylla spádóminn í 1. Mósebók 3:15. Satan fékk rómverska valdamenn til að höggva niðja konunnar „í hælinn“ og lama hann um tíma. Þeir réttuðu yfir Jesú og dæmdu hann til dauða eftir að hann hafði ranglega verið sakaður um uppreisnaráróður. (Matt. 27:26) En sárið greri innan tíðar því að Jehóva reisti Jesú upp frá dauðum.

18. (a) Hvaða nýju þjóð útvaldi Jehóva og hvers vegna? (b) Hvernig héldu niðjar höggormsins áfram að sýna niðjum konunnar fjandskap?

¹⁸ Trúarleiðtogar Ísraels gerðu samsæri við Rómverja gegn Jesú og á heildina litið hafnaði þjóðin honum. Jehóva yfirgaf því Ísrael og Gyðingar voru ekki lengur þjóð hans. (Matt. 23:38; Post. 2:22, 23) Hann útvaldi nýja þjóð sem er kölluð „Ísrael Guðs“. (Gal. 3:26-29; 6:16) Þessi þjóð var söfnuður andasmurðra kristinna manna en í honum voru bæði Gyðingar og fólk af öðrum þjóðum. (Ef. 2:11-18) Niðjar höggormsins héldu áfram að sýna niðjum konunnar fjandskap eftir að Jesús var dáinn og upprisinn. Róm reyndi oftar en einu sinni að útrýma kristna söfnuðinum en þeir sem mynduðu hann voru einnig niðjar konunnar.c

19. (a) Hvernig lýsir Daníel sjötta heimsveldinu? (b) Um hvað er fjallað í næstu grein?

¹⁹ Í draumnum, sem Daníel réð fyrir Nebúkadnesar, eru fætur úr járni tákn Rómaveldis. (Dan. 2:33) Daníel sá einnig sýn þar sem lýst er bæði Rómaveldi og heimsveldinu á eftir sem óx út frá því. (Lestu Daníel 7:7, 8.) Um aldaraðir virkaði Rómaveldi „hræðilegt, ógnvekjandi og afar máttugt“ í augum óvina. Í spádóminum kemur hins vegar fram að „tíu horn“ myndu vaxa af Rómaveldi og síðan myndi „annað horn og smærra“ spretta fram meðal þeirra og verða þeim yfirsterkara. Hvað merkja þessi tíu horn og hvað táknar smærra hornið? Hvaða samsvörun á smærra hornið sér í risalíkneskinu sem Nebúkadnesar sá í draumi? Um það er fjallað í greininni sem hefst á bls. 14.

Jehóva opinberar „það sem verða á innan skamms“

„Opinberun Jesú Krists sem Guð gaf honum til að sýna þjónum sínum það sem verða á innan skamms.“ – OPINB. 1:1.

HVERT ER SVARIÐ?

Hvaða hluti líkneskisins mikla táknar ensk-ameríska heimsveldið?

Hvernig lýsir Jóhannes tengslum ensk-ameríska heimsveldisins og Sameinuðu þjóðanna?

Hvernig lýsa Daníel og Jóhannes endalokum mannlegra stjórnvalda?

1, 2. (a) Hvað skiljum við ef við berum saman spádóma Daníels og Jóhannesar? (b) Hvað tákna fyrstu sex höfuð dýrsins í 13. kafla Opinberunarbókarinnar?

SPÁDÓMAR Daníels og Jóhannesar kallast á með þeim hætti að við getum skilið þýðingu margra atburða í heiminum, bæði í nútíð og framtíð. Hvaða vitneskju fáum við ef við berum saman sýn Jóhannesar um dýrið með sjö höfuð, sýn Daníels af dýrinu ógnvekjandi með hornin tíu og skýringu Daníels á hvað líkneskið mikla merkti? Og hvað ættum við að gera eftir að hafa fengið skýran skilning á þessum spádómum?

² Við skulum rýna nánar í sýn Jóhannesar um dýrið í 13. kafla Opinberunarbókarinnar. Eins og fram kom í greininni á undan tákna fyrstu sex höfuð dýrsins Egyptaland, Assýríu, Babýlon, Medíu-Persíu, Grikkland og Rómaveldi. Öll sýndu þau niðjum konunnar fjandskap. (1. Mós. 3:15) Sjötta höfuðið, Rómaveldi, réð lögum og lofum um aldaraðir eftir að Jóhannes skrásetti sýnina. Að lokum átti sjöunda höfuðið að taka við af Rómaveldi. Hvaða heimsveldi reyndist það vera og hvernig myndi það fara með niðja konunnar?

BRETLAND OG BANDARÍKIN KOMAST TIL VALDA

3. Hvað táknar dýrið hræðilega í sýn Daníels og hvað tákna hornin tíu sem spruttu á höfði þess?

³ Við getum glöggvað okkur á hvað sjöunda höfuð dýrsins í 13. kafla Opinberunarbókarinnar táknar með því að bera þessa sýn saman við sýn Daníels um dýrið hræðilega með hornin tíu.a (Lestu Daníel 7:7, 8, 23, 24.) Dýrið, sem Daníel sá, táknar Rómaveldi. (Sjá yfirlitið á bls. 12-13.) Rómaveldi tók að liðast í sundur á fimmtu öld. Hornin tíu, sem spruttu á höfði dýrsins hræðilega, tákna ríkin sem urðu til þegar Rómaveldi hnignaði.

4, 5. (a) Hvað gerði smáa hornið? (b) Hvað táknar sjöunda höfuð dýrsins?

⁴ Fjögur af hornunum á höfði þessa hræðilega dýrs eru nefnd sérstaklega til sögunnar. Þrjú horn eru rifin upp til að rýma fyrir öðru horni og „smærra“. Þetta rættist þegar Bretlandi óx fiskur um hrygg en það hafði áður tilheyrt Rómaveldi. Bretland hafði verið fremur áhrifalítið fram á 17. öld. Þrjú önnur ríki – Spánn, Holland og Frakkland – voru mun valdameiri en þau höfðu líka tilheyrt Rómaveldi. Bretland velti þessum ríkjum úr sessi hverju á fætur öðru. Um miðbik 18. aldar var Bretland á góðri leið með að verða voldugasta ríki heims. En það var enn ekki orðið sjöunda höfuð dýrsins.

⁵ Þótt Bretland væri orðið voldugasta ríki heims lýstu nýlendur þess í Norður-Ameríku yfir sjálfstæði. Bretland leyfði Bandaríkjunum að vaxa að völdum og beitti meira að segja sjóhernum þeim til varnar. Um það leyti sem dagur Drottins rann upp árið 1914 var Bretland orðið stærsta heimsveldi sögunnar og Bandaríkin mesta iðnríki jarðar.b Bandaríkin og Bretland bundust sérstökum böndum í fyrri heimsstyrjöldinni. Sjöunda höfuð dýrsins var nú komið fram sem ensk-ameríska heimsveldið. Hvernig fór það með niðja konunnar?

6. Hvernig hefur sjöunda höfuðið farið með fólk Guðs?

⁶ Skömmu eftir að dagur Drottins rann upp réðst sjöunda höfuðið á þjóna Guðs, það er að segja þá sem eftir voru af bræðrum Krists á jörð. (Matt. 25:40) Jesús gaf til kynna að þeir yrðu starfandi á jörðinni á þeim tíma. (Matt. 24:45-47; Gal. 3:26-29) Ensk-ameríska heimsveldið háði stríð við hina heilögu. (Opinb. 13:3, 7) Meðan fyrri heimsstyrjöldin stóð yfir kúgaði það fólk Guðs, bannaði sum af ritum þess og lét fangelsa suma af þeim sem fóru með forystuna. Sjöunda höfuð dýrsins stöðvaði nánast boðun fagnaðarerindisins um tíma. Jehóva sá þennan atburð fyrir og opinberaði Jóhannesi hann. Hann upplýsti Jóhannes einnig um að andi Guðs myndi blása nýju lífi í niðja konunnar og þeir færu að boða fagnaðarerindið aftur. (Opinb. 11:3, 7-11) Nútímasaga þjóna Jehóva staðfestir að þetta átti sér stað.

ENSK-AMERÍSKA HEIMSVELDIÐ OG FÆTURNIR ÚR JÁRNI OG LEIR

7. Hvernig tengjast sjöunda höfuð dýrsins og líkneskið mikla?

⁷ Hvernig tengjast sjöunda höfuð dýrsins og líkneskið mikla? Bretland klofnaði frá Rómaveldi og segja má að Bandaríkin hafi gert það óbeint sökum tengsla sinna við Bretland. En hvað um fætur líkneskisins? Þeir eru blanda úr járni og leir. (Lestu Daníel 2:41-43.) Þessi lýsing á við tímann þegar sjöunda höfuðið, það er að segja ensk-ameríska heimveldið, komst til verulegra áhrifa. Rétt eins og leirblandað járn er veikara en hreint járn er ensk-ameríska heimsveldið veikara en Rómaveldi sem það kom af. Hvað veldur því?

8, 9. (a) Hvernig sýndi sjöunda heimsveldið styrk járnsins? (b) Hvað táknar leirinn í fótum líkneskisins?

⁸ Sjöunda höfuð dýrsins hefur stundum sýnt styrk járnsins. Það sýndi til dæmis mátt sinn og megin með því að sigra andstæðinga sína í fyrri heimsstyrjöldinni. Styrkur járnsins var einnig áberandi í síðari heimsstyrjöldinni.c Eftir stríðið sýndi sjöunda höfuðið enn eiginleika járnsins af og til. En járnið reyndist snemma blandað leir.

⁹ Þjónum Jehóva hefur lengi verið hugleikið að skilja hvað fætur líkneskisins tákna. Í Daníel 2:41 er talað um að blanda járnsins og leirsins sé eitt og sama „ríkið“ en ekki mörg ríki. Leirinn táknar því öfl innan áhrifasvæðis ensk-ameríska heimsveldisins sem gera það veikara en Rómaveldi sem táknað var með hreinu járni. Leirinn er kallaður ,niðjar mannkyns‘, það er að segja almennir borgarar. (Dan. 2:43, NW) Fólk hefur risið upp og veikt ensk-ameríska heimsveldið með verkalýðsbaráttu og sjálfstæðishreyfingum, og með því að berjast fyrir borgaralegum réttindum. Almenningur gerir ensk-ameríska heimsveldinu erfitt um vik að beita hörku járnsins. Ólíkar stjórnmálaskoðanir og naumir sigrar í kosningum gera auk þess að verkum að leiðtogar, jafnvel þeir vinsælu, hafa ekki skýrt umboð til að hrinda stefnumálum sínum í framkvæmd. Daníel spáði: „Eftir því verður það ríki öflugt að nokkru en máttlítið að nokkru.“ – Dan. 2:42; 2. Tím. 3:1-3.

10, 11. (a) Hvaða framtíð eiga fætur líkneskisins? (b) Hefur fjöldi táa á líkneskinu einhverja sérstaka þýðingu?

¹⁰ Bretland og Bandaríkin hafa viðhaldið sterkum tengslum fram á þennan dag. Oft koma þau fram sem ein heild í heimsmálum. Spádómarnir um risalíkneskið og dýrið staðfesta að ensk-ameríska heimsveldið á ekki eftir að víkja fyrir einhverju ókomnu heimsveldi. Það er síðasta heimsveldi sögunnar. Það er vissulega veikara en Rómaveldi, sem fótleggirnir af járni tákna, en það líður samt ekki undir lok af sjálfu sér.

¹¹ Hefur fjöldi táa á líkneskinu einhverja sérstaka þýðingu? Í öðrum sýnum nefnir Daníel ákveðnar tölur, til dæmis hve mörg horn ýmis dýr séu með. Þessar tölur hafa ákveðna merkingu. En þegar Daníel lýsir líkneskinu nefnir hann ekki hve tærnar eru margar. Talan virðist því ekki hafa neina þýðingu frekar en það að líkneskið skuli vera með tvo handleggi, hendur, fótleggi og fætur, auk fingra. Daníel tekur sérstaklega fram að tærnar séu úr járni og leir. Af lýsingu hans má álykta að ensk-ameríska heimsveldið verði við völd þegar „steinninn“, sem táknar ríki Guðs, lendir á fótum líkneskisins. – Dan. 2:45.

ENSK-AMERÍSKA HEIMSVELDIÐ OG TVÍHYRNDA DÝRIÐ

12, 13. Hvað táknar tvíhyrnda dýrið og hvað lætur það gera?

¹² Enda þótt ensk-ameríska heimsveldið sé blanda af járni og leir átti það að fara með mikilvægt hlutverk á síðustu dögum. Þetta má sjá af sýnunum, sem Jesús birti Jóhannesi, en þar bregður fyrir dýri með tvö horn og það talaði eins og dreki. Hvað táknar þetta kynlega dýr? Þar sem hornin eru tvö táknar það tvíveldi, það er að segja ensk-ameríska heimsveldið, en nú í sérstöku hlutverki. – Lestu Opinberunarbókina 13:11-15.

¹³ Þetta dýr lætur gera líkneski af dýrinu með höfuðin sjö. Jóhannes segir að líkneski dýrsins birtist, hverfi og komi svo aftur. Þannig fór fyrir samtökum sem Bretland og Bandaríkin beittu sér fyrir að yrðu stofnuð, en þau áttu að sameina þjóðir heims og vera fulltrúi þeirra.d Þessi samtök voru sett á laggirnar eftir fyrri heimsstyrjöldina og voru kölluð Þjóðabandalagið. Þau hurfu af sjónarsviðinu þegar síðari heimsstyrjöldin braust út. Meðan á stríðinu stóð lýstu þjónar Guðs yfir að samkvæmt spádómum Opinberunarbókarinnar myndi líkneski dýrsins koma aftur. Og það rættist en nú var það nefnt Sameinuðu þjóðirnar. – Opinb. 17:8.

14. Í hvaða skilningi er líkneski dýrsins,áttundi konungurinn‘?

¹⁴ Jóhannes kallar líkneski dýrsins með höfuðin sjö,hinn áttunda‘ konung. Hvað á hann við með því? Þetta líkneski kemur ekki fram sem áttunda höfuðið á dýrinu heldur aðeins sem líkneski þess. Það fær vald sitt frá aðildarríkjunum, ekki síst ensk-ameríska heimsveldinu sem er helsti bakhjarl þess. (Opinb. 17:9-11) Það fær hins vegar konungsvald og vinnur ákveðið verk sem hleypir af stað vissri atburðarás og hún breytir gangi sögunnar.

LÍKNESKI DÝRSINS RÍFUR SKÆKJUNA Í SIG

15, 16. Hvað táknar skækjan og hvernig hefur dregið úr stuðningi við hana?

¹⁵ Að sögn Jóhannesar situr skækja á skarlatsrauða dýrinu – líkneski dýrsins með höfuðin sjö – og ráðskast með það. Hún heitir „Babýlon hin mikla“. (Opinb. 17:1-6) Skækjan er viðeigandi táknmynd um falstrúarbrögðin í heild sinni. Þar eru kirkjudeildir kristna heimsins fremstar í flokki. Falstrúarbrögðin hafa veitt líkneski dýrsins blessun sína og reynt að stjórna því.

¹⁶ Á degi Drottins hefur hins vegar dregið stórlega úr stuðningi fólks við Babýlon hina miklu. Það er táknað með vatninu sem þornar upp. (Opinb. 16:12; 17:15) Sem dæmi má nefna að þegar líkneski dýrsins kom fram í fyrra sinnið réðu kirkjudeildir kristna heimsins lögum og lofum á Vesturlöndum. Nú hafa kirkjur og prestar glatað virðingu og stuðningi fjöldans. Margir eru meira að segja þeirrar skoðunar að trúarbrögðin stuðli að átökum eða beinlínis valdi þeim. Hópur menntamanna á Vesturlöndum gerist æ háværari og herskárri og krefst þess að þjóðfélagið losi sig með öllu undan trúarlegum áhrifum.

17. Hvað verður bráðlega um falstrúarbrögðin og af hverju?

¹⁷ En falstrúarbrögðin líða ekki bara hljóðlega undir lok. Skækjan verður áfram áhrifamikið afl og reynir að láta konunga lúta stjórn sinni uns Guð leggur þeim í brjóst að gera vilja sinn. (Lestu Opinberunarbókina 17:16, 17.) Innan skamms lætur Jehóva pólitísku öflin í heimi Satans, sem Sameinuðu þjóðirnar tákna, ráðast á falstrúarbrögðin. Þau munu svipta hana öllum áhrifum og auði. Fyrir fáeinum áratugum hefði þótt ótrúlegt að slíkt gæti gerst en núna riðar skækjan til falls á baki skarlatsrauða dýrsins. Hún á þó ekki eftir að renna hægt af baki heldur dettur hún snögglega og tortímist. – Opinb. 18:7, 8, 15-19.

DÝRIN LÍÐA UNDIR LOK

18. (a) Hvað gerir dýrið og með hvaða afleiðingum? (b) Hvaða ríkjum á Guðsríki eftir að eyða samkvæmt Daníel 2:44? (Sjá skyggða textann á bls. 17.)

¹⁸ Eftir að falstrúarbrögðum hefur verið útrýmt verður sjöhöfða dýrinu, sem táknar pólitískt fyrirkomulag Satans á jörðinni, líklega sigað á ríki Guðs. En konungar jarðar geta ekki ráðist á ríki Guðs á himnum svo að þeir láta reiði sína bitna á þeim jarðarbúum sem styðja ríki Guðs. Það getur ekki farið nema á einn veg. (Opinb. 16:13-16; 17:12-14) Daníel lýsir hvernig þessu lokastríði lýkur. (Lestu Daníel 2:44.) Dýrið, sem nefnt er í Opinberunarbókinni 13:1, líkneski þess og tvíhyrnda dýrið verða að engu gerð.

19. Hverju getum við treyst og hvað þurfum við að gera núna?

¹⁹ Við lifum á þeim tíma þegar sjöunda höfuðið er við völd. Það eiga ekki eftir að spretta fram fleiri höfuð á dýrinu áður en því er tortímt. Ensk-ameríska heimsveldið fer með völdin þegar falstrúarbrögðunum verður útrýmt. Spádómar Daníels og Jóhannesar hafa ræst í smáatriðum. Við getum treyst að falstrúarbrögðunum verði eytt og stríðið við Harmagedón skelli á innan skamms. Guð hefur opinberað þessa atburðarás nákvæmlega. En gefum við gaum að orðum spámannanna? (2. Pét. 1:19) Nú er rétti tíminn til að taka afstöðu með Jehóva og styðja ríki hans. – Opinb. 14:6, 7.

[Neðanmáls]

[Mynd á bls. 17]

HVER ERU,ÖLL ÞESSI RÍKI‘ Í DANÍEL 2:44?

Í spádóminum í Daníel 2:44 segir að ríki Guðs muni „eyða öllum þessum ríkjum“. Þessi spádómur vísar aðeins til þeirra ríkja sem hinir ólíku hlutar líkneskisins tákna.

Hvað um öll önnur ríki mannanna? Við sjáum heildarmyndina í hliðstæðum spádómi í Opinberunarbókinni. Þar kemur fram að ,allir konungar í veröldinni‘ sameinist gegn Jehóva „á hinum mikla degi Guðs hins alvalda“. (Opinb. 16:14; 19:19-21) Eyðingin í Harmagedón nær því ekki aðeins til ríkjanna sem líkneskið táknar heldur einnig til allra annarra ríkja manna.

Átta konungar opinberaðir

Ef innblásnar frásögur Daníels og Jóhannesar eru lagðar saman benda þær á átta konunga eða ríki og sýna jafnframt í hvaða röð þau koma fram. En við skiljum ekki þessa spádóma nákvæmlega nema við áttum okkur á hvað fyrsti spádómurinn í Biblíunni merkir.

Í aldanna rás hefur Satan skipað niðjum sínum í ýmsar pólitískar hreyfingar eða ríki. (Lúk. 4:5, 6) Tiltölulega fá ríki manna hafa þó haft teljandi áhrif á þjóna Guðs, hvort heldur Ísraelsþjóðina eða söfnuð hinna andasmurðu. Í sýnum Daníels og Jóhannesar er aðeins talað um átta slík stórveldi.

[Mynd á bls. 12, 13]

(Sjá uppsettan texta í ritinu)

1. Egyptaland

2. Assýría

3. Babýlon

5. Grikkland

6. Rómaveldi

ÞJÓNAR GUÐS

2000 f.Kr.

Abraham

1500

Ísraelsþjóðin

1000

Daníel 500

f.Kr./e.Kr.

Jóhannes

Ísrael Guðs 500

1000

1500

2000 e.Kr.

[Neðanmáls]

[Myndir]

Risastóra líkneskið (Dan. 2:31-45)

Fjögur dýr sem koma upp úr hafinu (Dan. 7:3-8, 17, 25)

Hrúturinn og geithafurinn (Dan. 8. kafli)

Sjöhöfða dýrið (Opinb. 13:1-10, 16-18)

Tvíhyrnda dýrið lætur gera líkneski af sjöhöfða dýrinu (Opinb. 13:11-15)

[Rétthafi myndar]

Myndir: Egyptaland og Róm: Ljósmyndað með góðfúslegu leyfi British Museum. Medía-Persía: Musée du Louvre, París.

Spurningar frá lesendum

Hvenær varð ensk-ameríska heimsveldið sjöunda heimsveldið sem spáð er um Biblíunni?

▪ Líkneskið mikla, sem Nebúkadnesar konungur sá, táknar ekki öll heimsveldi sögunnar, heldur aðeins þau fimm sem ríktu frá og með dögum Daníels og höfðu veruleg áhrif á þjóna Guðs. – Dan. 2:31-45.

Af lýsingu Daníels á málmlíkneskinu má ráða að ensk-ameríska heimsveldið myndi koma af Rómaveldi frekar en að það legði það undir sig. Daníel lýsir líkneskinu svo að járnið í fótleggjunum nái niður í fæturna og tærnar. (Járnið í fótunum og tánum er blandað leir.)a Samkvæmt þessari lýsingu átti ensk-ameríska heimsveldið að koma af fótleggjunum sem voru úr járni. Þetta kemur heim og saman við mannkynssöguna. Bretland hafði tilheyrt Rómaveldi en tók að vaxa fiskur um hrygg á síðari hluta 18. aldar. Síðar fóru Bandaríkin að láta verulega til sín taka. En sjöunda heimsveldi biblíuspádómanna var enn ekki komið fram. Af hverju? Af því að Bretland og Bandaríkin voru ekki farin að starfa saman í mikilvægum málum. Það gerðist hins vegar í fyrri heimsstyrjöldinni.

„Börn ríkisins“ störfuðu einna mest í Bandaríkjunum á þeim tíma og aðalstöðvar þeirra voru í Brooklyn í New York. (Matt. 13:36-43) Hinir andasmurðu prédikuðu af kappi í löndum sem voru undir stjórn Breta. Bretland og Bandaríkin tóku höndum saman í fyrri heimsstyrjöldinni gegn pólitískum óvinum sínum. Þjóðernishyggja jókst til muna af völdum stríðsins. Stjórnvöld beggja ríkjanna sýndu niðjum ,konunnar‘ fjandskap með því að banna ritin sem þeir gáfu út og fangelsa þá sem fóru með forystu í boðunarstarfinu. – Opinb. 12:17.

Af spádómum Biblíunnar má því sjá að sjöunda heimsveldið kom ekki fram á síðari hluta 18. aldar þegar Bretland fór að láta að sér kveða. Það kom ekki fram á sjónarsviðið fyrr en dagur Drottins hófst.b