Hnangv Haaix Nor Longc Kuv Fienx Yiem Tin-Hungh Daaih! Wuov Buonv Sou
Siang-Sou Zoux Daaih Longc Tengx Mbuo Daaux Nqaang Caux Mienh Gorngv Waac Caux Jiez Gorn Njaaux Mienh Ging-Sou
1. Maaih haaix buonv siang-sou zoux cuotv daaih bun mbuo longc tengx mbuo daaux nqaang caux mienh gorngv waac caux jiez gorn njaaux mienh Ging-Sou?
1 Yiem 2019 wuov hnyangx, mbuo se haiz a’hneiv haic weic zuqc mbuo duqv siang-sou daaih longc tengx mbuo daaux nqaang caux mienh gorngv waac caux jiez gorn njaaux mienh Ging-Sou. Kuv Fienx Yiem Tin-Hungh Daaih! naaiv buonv sou se aav lamh deix hnangv Require wuov buonv sou nor, tiuv nyei se, njaaux nyei jauv gorngv daaih camv nyei, mv baac waac nangv nyei. Naaiv tengx mbuo gauh haih longc naaiv buonv sou caux mienh hoqc Ging-Sou. Require wuov buonv sou se gorngv taux benx Giduc Mienh aa zuqc hnangv haaix nor zoux, zoux daaih bun siang-horqc saeng maiv hec duqv gan, mv baac naaiv buonv siang-sou se mangc jienv Ging-Sou nyei kuv fienx gorngv.—Gong-Zoh 15:35.
2. Weic haaix diuc Kuv Fienx wuov buonv sou se zoux cuotv daaih?
2 Weic haaix diuc naaiv buonv sou zoux cuotv daaih? Gormx naaiv lungh ndiev, gorx-yiouz dorc muoc tov nyungc hec nyei daaih longc tengx mienh hiuv duqv zien leiz yaac haih longc doqc bieqc Bible Teach wuov buonv sou, naaic se da’yietv nyungc jaa-sic mbuo longc caux mienh hoqc Ging-Sou. Mienh dongh buatc sou hoz haic wuov deix maiv oix doqc sou, mv baac ninh mbuo maiv nqemh longc naaiv buonv sou hoqc Ging-Sou. Maiv daan mbuoqc naaic, naaiv buonv sou se gauh hec duqv faan cuotv benx camv-nyungc waac.
3. Naaiv buonv sou caux dieh deix hoqc nyei sou se hnangv haaix nor maiv fih hnangv?
3 Hnangv Haaix Nor Longc: Mbuo longc hoqc nyei sou se maaih camv-buonv nyei fiev daaih bun mienh ganh doqc liuz yaac haih bieqc hnyiouv zien leiz, maiv zuqc longc mienh tengx. Naaiv buonv sou se maiv zeiz hnangv naaic. Naaiv se fiev daaih dorh mienh hoqc Ging-Sou yaac aa zuqc caux dauh njaaux nyei mienh hoqc. Weic naaiv, haaix zanc mbuo bun naaiv buonv sou mienh nor, caux ninh mbuo doqc kang fai i kang nzaangc, liuz gorngv taux naaic deix jauv-louc. Yietc kang yietc kang nzaangc se nangv nyei, meih haih longc caux mienh doqc yiem ninh nyei gaengh ndaangc fai yiem ninh zoux gong nyei dorngx. Mbuo haih yiem gorn doqc da’yietv ginc mingh yaac duqv, mv baac yiem naaiv buonv sou mbuo haih jiez gorn doqc haaix norm dorngx yaac duqv nyei.
4. Naaiv buonv sou hnangv haaix nor tengx mbuo longc Ging-Sou njaaux horqc saeng?
4 Yiem mbuo nyei camv-buonv sou, yietc kang yietc kang nzaangc se maaih waac dau wuov waac-naaic. Mv baac, yiem naaiv buonv sou, waac-dau se nzengc-nzengc yiem Ging-Sou. Maaih mienh camv nyei gauh oix longc Ging-Sou hoqc, maiv oix longc mbuo nyei sou hoqc. Weic naaiv, Ging-Sou yiemc se an daaih maaih camv nyei bun mienh ganh mingh koi Ging-Sou doqc. Naaiv tengx horqc saeng hiuv duqv gorngv ninh mbuo hoqc nyei jauv se yiem Tin-Hungh daaih.—Iˆsaaˆyaa 54:13.
5. Weic haaix diuc jienv nyei njaaux nyei mienh aa zuqc mbenc ziangx longx nyei caux horqc saeng hoqc Ging-Sou?
5 Naaiv buonv sou se maiv porv mengh nzengc Ging-Sou nyei waac. Weic haaix diuc? Weic zuqc naaiv se zoux daaih kuinx horqc saeng naaic waac caux bun njaaux nyei mienh longc ninh nyei banh zeic njaaux. Weic naaiv, gengh jienv nyei haaix zanc mbuo caux horqc saeng hoqc Ging-Sou mbuo aa zuqc mbenc ziangx longx nyei. Faix fim oc. Maiv dungx gorngv waac camv. Mbuo oix porv mengh Ging-Sou nyei waac. Mv baac mbuo bun horqc saeng ganh porv mengh ninh hnamv daaih Ging-Sou nyei waac gorngv taux haaix nyungc se gauh longx. Se gorngv mbuo longc dorh leiz nyei waac-naaic nor, mbuo haih tengx ninh hnamv duqv tong nzaangc nyei waac-eix.—Gong-Zoh 17:2.
6. Mbuo hnangv haaix nor longc sou (a) se gorngv mienh maiv sienx Tin-Hungh caux Ging-Sou nor? (b) yiem biauv jiex biauv wuov zanc? (c) se gorngv mbuo dorng jienv mienh jiez gorn njaaux Ging-Sou nor? (d) haaix zanc mbuo daaux nqaang caux mienh gorngv waac?
6 M’daaih hnangv dieh deix hoqc Ging-Sou nyei sou nor, haaix zanc bun naaiv buonv sou mienh yaac duqv nyei, maiv gunv yietc hlaax ganh maaih nyungc sou bun mienh doqc. Maaih camv-dauh a’hneiv nyei oix dorng jienv mienh jiez gorn longc naaiv buonv sou njaaux Ging-Sou. Maiv daan mbuoqc naaic, haaix zanc longc naaiv buonv sou daaux nqaang caux oix muangx wuov deix mienh gorngv waac nor, se gengh haiz muonh haic!—Mangc wuov deix boxes yiem 5-7 wuov minc.
7. Meih hnangv haaix nor haih longc naaiv buonv sou njaaux mienh Ging-Sou?
7 Hnangv Haaix Nor Longc Sou Njaaux Mienh: Mbuo haih jiez gorn doqc hoc-maaz wuov waac-naaic yiem nzaangc-jieqv nqaengc nyei wuov. Jiex daaih, doqc kang nzaangc caux doqc bungx kengx wuov deix Ging-Sou nyei waac. Longc dorh leiz nyei waac-naaic tengx biauv-ziouv bieqc hnyiouv Ging-Sou nyei waac. Liuz, mbuox biauv-ziouv dau waac-naaic yiem nzaangc-jieqv nqaengc nyei wuov, mangc gaax ninh bieqc hnyiouv nyei fai, dau liuz cingx daaih mingh doqc dieh kang nzaangc. Jiez gorn buangh i ziex nzunc wuov, gorngv taux yietc jioux waac-naaic yiem nzaangc-jieqv nqaengc nyei wuov se gauh longx. Dieh hnoi lauh deix, daaix mbuo haih caux ninh mbuo gorngv nzengc yietc ginc nyei waac.
8. Se gorngv mbuo oix doqc Ging-Sou nor, mbuo oix zuqc hnangv haaix nor gorngv, yaac weic haaix diuc?
8 Dongh mbuox jienv “doqc” nyei Ging-Sou waac se an daaih dau waac-naaic yiem nzaangc-jieqv nqaengc nyei wuov. Haaix zanc doqc Ging-Sou nor, maiv dungx gorngv, “Baulo gong-zoh fiev daaih”, fai gorngv, “Mangc gaax Yeˆleˆmi jaa-ndaangc gorngv haaix nyungc.” Naaiv se haih zoux bun biauv-ziouv laaic duqv mbuo doqc baamh mienh nyei waac. Hnangv naaiv nor gorngv se gauh longx, “Tin-Hungh nyei Waac gorngv”, fai gorngv, “Mangc gaax Ging-Sou jaa-ndaangc gorngv haaix nyungc.”
9. Hoqc sou caux horqc saeng nyei ziangh hoc mbuo horpc zuqc doqc nzengc yietc zungv an daaih nyei Ging-Sou yiemc fai?
9 Mbuo horpc zuqc doqc nzengc yietc zungv an daaih nyei Ging-Sou yiemc fai, aqv fai kungx doqc dongh mbuox jienv “doqc” nyei Ging-Sou hnangv? Naaic se yiem meih caux meih nyei horqc saeng aqv. Yietc zungv an daaih nyei Ging-Sou yiemc se maaih ninh nyei jauv nyei. Yietc yiemc maaih yietc yiemc nyei waac mbuo haih gorngv taux. Mv baac nzunc baav, weic zuqc horqc saeng maiv maaih ziangh hoc camv, maiv oix muangx, fai maiv nangc haih doqc sou nor, mbuo doqc dongh mbuox jienv “doqc” nyei Ging-Sou waac ganh hnangv.
10. Haaix zanc mbuo cingx daaih haih tiuv bieqc longc Bible Teach wuov buonv sou?
10 Haaix Zanc Cingx Daaih Tiuv Bieqc Longc Bible Teach Wuov Buonv Sou: Se gorngv mbuo duqv caux horqc saeng doqc sou camv-nzunc liuz, yaac zanc-zanc buangh hoqc sou nyei nor, mbuo haih tiuv bieqc Bible Teach wuov buonv sou, fai doqc ziangx Kuv Fienx naaiv buonv sou ndaangc. Njaaux wuov dauh ganh hnamv mangc gaax haaix zanc horpc zuqc tiuv. Se gorngv mbuo yietv tiuv bieqc Bible Teach wuov buonv sou nor, mbuo aa zuqc yiem gorn doqc mingh fai? Maiv maaih waac bun daaih gorngv mbuo oix zuqc hnangv naaic zoux. Dauh dauh mienh se maiv fih hnangv. Mv baac, se gorngv mbuo aengx dorh hoqc jiex nyei jauv daaih gorngv muonc nyei yiem Bible Teach wuov buonv sou nor, camv-dauh horqc saeng aengx gauh haih bieqc hnyiouv longx.
11. Weic haaix diuc mbuo oix longc naaiv buonv siang-sou?
11 Yiem maiv nangc maaih kuv fienx nyei lungh ndiev, mbuo duqv kuv gong zoux, duqv zunh longx jiex nyei kuv fienx. Naaiv kuv fienx se Tin-Hungh nyei Guoqv oix gunv naaiv norm baamh gen, liuz maiv lauh aqv yiem siang-lungh ndiev kungx maaih zoux horpc nyei jauv hnangv! (Matvˆtaai 24:14; 2 Bide 3:13) Mbuo haih bungx laangc nyei gorngv mienh camv duqv haiz liuz naaiv kuv fienx ziouc gorngv: “Yangh mbong yangh zorng daaih mbuox kuv fienx nyei mienh nyei zaux nzueic haic. Ninh zunh baengh orn nyei jauv, gorngv kuv fienx, zunh njoux en nyei fienx gorngv mbuox Siˆon, ‘Meih nyei Tin-Hungh zoux hungh mi’aqv.’” (Iˆsaaˆyaa 52:7) Tov mbuo longc naaiv buonv siang-sou dorh Tin-Hungh nyei kuv fienx mingh bun jaang nqaatv nyei mienh!
[Box on page 2]
Se Gorngv Mienh Maiv Sienx Tin-Hungh Caux Ging-Sou:
● Yiem norm baav dorngx, zunh doz mienh hoqc hiuv gorngv da’faanh biauv-ziouv haiz “Tin-Hungh” fai “Ging-Sou” wuov jioux waac nor, ninh mbuo maiv oix caux mbuo gorngv waac aqv. Weic hnangv naaic, mbuo buangh mienh daauh nzunc wuov, haaix nyungc kuonx ninh mbuo nyei hnyiouv mbuo dorh naaic daaih gorngv taux se gauh longx jiex, hnangv oix maaih longx nyei hungh jaa nyei jauv, tengx hmuangv-doic nyei jauv, caux mingh wuov hingv nyei jauv. Zuov mbuo caux biauv-ziouv gorngv taux mbuo hnangv haaix nor gengh hiuv duqv maaih Tin-Hungh nyei caux weic haaix diuc Ging-Sou waac se kaux duqv wuonv nyei, hnangv naaiv gorngv camv-nzunc liuz, mbuo cingx daaih bun ninh mbuo hiuv duqv mbuo maaih Kuv Fienx wuov buonv sou.
[Box on page 3]
Yiem Biauv Jiex Biauv Wuov Zanc:
● “Yie daaih meih naaiv weic oix bun meih mangc ndongc haaix nyei hec mbuo haih hiuv duqv Tin-Hungh maaih haaix nyungc za’eix bun baamh mienh maaih hoz nqaang. Meih duqv hnamv taux Tin-Hungh oix zorqv guangc nzengc mbuo nyei kouv naanc nyei fai? [Zuov ninh dau.] Naaiv buonv sou mbuox jienv meih mingh doqc haaix norm dorngx yiem Ging-Sou, tengx meih lorz waac dau naaic jioux waac-naaic. [Bun buonv sou ninh, liuz doqc da’yietv wuov kang nzaangc yiem da’yietv wuov ginc, yaac doqc Yeˆleˆmi 29:11.] Doqc liuz naaiv, meih gorngv Tin-Hungh oix mbuo maaih gauh longx jiex nyei hoz nqaang nyei fai? [Zuov ninh dau.] Se gorngv meih oix nyei nor, naaiv buonv sou se bun meih siou jienv doqc. Dieh nzunc, mbuo haih doqc da’nyeic wuov kang nzaangc lorz Ging-Sou nyei waac dau naaiv jioux waac-naaic, ‘Tin-Hungh oix hnangv haaix nor zorqv guangc nzengc yietc zungv zoux bun baamh mienh zuqc kouv nyei jauv?’” Buangh daauh nzunc wuov, se gorngv buatc biauv-ziouv maaih ziangh hoc camv deix nyei nor, meih haih doqc yaac caux ninh gorngv taux da’nyeic wuov kang nzaangc caux wuov deix buo jioux Ging-Sou nyei waac. Dingc ziangx hnoi, ziangh hoc, caux dorngx daaux nqaang caux biauv-ziouv gorngv da’nyeic wuov jioux waac-naaic yiem naaic ginc.
● “Maaih mienh camv nyei oix daux gaux. Meih nzunc baav daux gaux nyei fai? [Zuov ninh dau.] Meih hnamv daaih Tin-Hungh muangx yietc zungv daux gaux nyei waac nyei fai, aqv fai maaih deix daux gaux nyei waac se maiv horpc ninh nyei hnyiouv? [Zuov ninh dau.] Yie maaih buonv sou mbuox jienv meih hnangv haaix nor lorz naaic deix waac nyei waac-dau yiem Ging-Sou. [Bun buonv sou ninh, liuz caux ninh doqc da’yietv wuov kang nzaangc yiem ziepc nyeic wuov ginc caux doqc dongh mbuox jienv “doqc” wuov deix Ging-Sou waac.] Tin-Hungh maiv nqemh muangx mbuo nyei daux gaux waac se gengh yaauc dingc aqv orqc? Mv baac se gorngv mbuo oix mbuo nyei daux gaux waac bun mbuo duqv longx nor, mbuo aa zuqc hiuv duqv Tin-Hungh longx nyei. [Koi sou mingh da’nyeic wuov ginc, liuz nuqv hoc-dauh dorn bun mangc.] Se gorngv meih oix nyei nor, yie haih bun naaiv buonv sou meih, liuz dieh nzunc, mbuo haih doqc Ging-Sou nyei waac dau taux naaiv deix oix hiuv haic nyei waac-naaic.”
● “Yie daaih meih naaiv weic zuqc maaih mienh camv nyei nzauh heix taux naaiv norm lungh ndiev haih benx hnangv haaix. Meih hnamv daaih naaiv norm lungh ndiev nyei sic haih longx nyei fai? [Zuov ninh dau.] Maaih mienh camv nyei maiv hiuv duqv Ging-Sou maaih kuv fienx bun mbuo maaih lamh hnamv. Naaiv maaih deix waac-naaic dongh Ging-Sou dau taux wuov.” Bun buonv sou ninh, liuz bun ninh ginv haaix jioux waac yiem sou nqa’haav maengx wuov ninh gauh oix hiuv jiex. Liuz mingh naaic ginc, caux ninh doqc sou yaac njaaux ninh hnangv haaix nor longc sou. Dingc ziangx hnoi, ziangh hoc, caux dorngx daaux nqaang caux ninh doqc dieh jioux waac-naaic yiem naaic ginc.
[Box on page 4]
Dorng Jienv Mbuox Mangc Gaax:
● “Yie daaih meih naaiv weic oix bun meih hiuv duqv yie mbuo maaih buonv siang-sou longc hoqc Ging-Sou. Naaiv buonv sou se maaih ziepc hmz ginc, yaac mbuox jienv meih mingh doqc haaix norm dorngx yiem meih nyei Ging-Sou, bun meih duqv waac-dau dau jienv nyei waac-naaic. [Bun sou ninh mangc nza’hmien caux nqa’haav maengx.] Meih duqv seix jiex mangc gaax meih haih bieqc hnyiouv Ging-Sou nyei waac nyei fai? [Zuov ninh dau.] Yie oix bun meih mangc naaiv deix njaaux nyei jauv-louc se ndongc haaix nyei hec duqv bieqc hnyiouv. [Mingh da’faam wuov ginc, doqc da’yietv wuov kang nzaangc yiem da’faam wuov jioux waac-naaic, liuz doqc Laauc Yaangh 21:4, 5. Se gorngv biauv-ziouv kungx nyei nor, doqc dieh kang nzaangc caux doqc dongh mbuox jienv “doqc” wuov deix Ging-Sou waac.] Se gorngv meih oix nyei nor, yie haih bun naaiv buonv sou meih. Seix hoqc nzunc Ging-Sou mangc gaax maah. Hoqc liuz oix nyei nor, meih haih hoqc jienv mingh. Dieh nzunc, mbuo haih hoqc da’yietv wuov ginc. Mangc naaiv oc, naaiv se yietc minc hnangv.”
[Box on page 4]
Daaux Nqaang Lorz Wuov Zanc Bun Hiuv Maaih Siang-Sou:
● “Yie longx hnyiouv aengx duqv buangh meih. Yie dorh naaiv buonv sou daaih bun meih. Naaiv maaih Ging-Sou nyei waac dau taux camv-jioux longx haic nyei waac-naaic. [Bun buonv sou ninh, liuz mbuox ninh mangc sou nyei nqa’haav maengx.] Meih gauh oix hiuv jiex haaix nyungc? [Zuov ninh dau. Liuz koi sou mingh doqc dongh ninh ginv wuov ginc.] Yie oix bun meih mangc hnangv haaix nor longc naaiv buonv sou lorz Ging-Sou nyei waac-dau.” Koi sou caux ninh doqc yietc kang fai i kang nzaangc yaac doqc mbuox jienv “doqc” wuov deix Ging-Sou waac. Yaauc dingc aqv! Meih jiez gorn njaaux mienh Ging-Sou! Bun sou biauv-ziouv siou jienv, liuz dingc ziangx hnoi, ziangh hoc, caux dorngx daaux nqaang caux ninh hoqc sou. Haaix zanc meih hoqc ziangx naaic ginc nor, meih haih hoqc bieqc dieh ginc dongh biauv-ziouv ginv wuov, fai yiem gorn hoqc mingh yaac duqv nyei.