Di Fos King We Ruul Uova Izrel

A di joj dem Jeuova did a yuuz fi liid di Izrelait dem bot dem did waahn wan king. So dem tel Samwel se: ‘Aal a di ada piipl dem av king. Wi waahn wan king tu.’ Samwel neehn tingk se dat did rait, so im prie tu Jeuova bout it. Jeuova tel im se: ‘A no yu dem no waahn fi liid dem, a mi. Tel dem se dem kyan get wan king, bot da king de gweehn ekspek dem fi du a bag a tingz.’ Aal wen dem ier dat, di piipl dem stil se: ‘Wi no bizniz. Wi waahn wan king!’

Jeuova tel Samwel se a wan man we niem Saal a-go bi di fos king. So Samwel go a wan plies we niem Riema go luk fi Saal an naint im ed wid ail. Dis shuo se a Saal did get pik fi ton king.

Afta dat, Samwel kaal di Izrelait dem fi shuo dem dem nyuu king. Bot dem kudn fain Saal no we. Yu nuo wa mek dem kudn fain im? A kaa im did a aid we di bag dem de. Wen dem fain Saal, dem kya im wich paat di piipl dem de an mek im tan op mongks dem. Saal did taala dan di wol a dem an im did ansom bad. Samwel tel dem se: ‘Si di wan we Jeuova pik fi bi king ya.’ Wen di piipl dem si di king dem did api bad.

Wen Saal dis ton king, im did a lisn tu Samwel an du wa Jeuova se im fi du. Bot den im chienj. Dem taim de, di king neehn fi gi op no sakrifais. Bot wan a di taim, Samwel did fi kom gi op sakrifais, an im tel Saal se im fi wiet til im kom. Bot kaa Samwel neehn kom sed taim, Saal tek it op pan imself an go dwi’it. A wa yu tingk Samwel did du? Im tel Saal se: ‘Jeuova se yu neehn fi du dis. Wa mek yu neehn lisn tu im?’ Yu tingk Saal wuda gwaan beta afta dat?

Som taim afta da, Saal go fait di Amalikait dem, an Samwel did tel im se im fi kil aaf di wol a dem. Bot Saal neehn kil dem King we niem Iegag. So Jeuova tel Samwel se: ‘Saal ton im bak pan mi, an im naa du notn we mi tel im fi du.’ Samwel did sad bad, an im tel Saal se: ‘Yu si kaa yu naa du wa Jeuova se yu fi du, im a-go pik wan neda king.’ Wen Samwel ton roun an a lef, Saal uol aan pan im an tier di tiel paat a im kluoz. Den Samwel se tu Saal se: ‘Jeuova a-go tek we di kindom fram yu.’ Jeuova did a-go pik wan king we lov im an redi fi du wa im tel dem fi du.