Jeuova Elp Ilaija Fi Tan Op Chrang

Wen Jezibel ier wa apm tu di Bieyal prafit dem, shi did beks bad. So shi sen da mesij ya tu Ilaija: ‘Tumaro tumaro, yu a-go ded jos laik dem Bieyal prafit de.’ Ilaija kech im fried an ron we go aid iina di dezot. Im prie an se: ‘Jeuova, mi kyaahn tek it no muo. Du, jos kil mi an don.’ Ilaija did so taiyad dat im jrap asliip anda wan chrii.

Wan ienjel wiek im op an se tu im se: ‘Ilaija, git op an iit sopm.’ Ilaija luk an si wan roun bred pan som at stuon an im si wan jog a waata tu. Im git op an nyam di bred an jringk di waata an go bak go sliip. Di ienjel go wiek im op wan neda taim an se: ‘Iit som muor man. Yu av wan lang jorni fi tek aan.’ So Ilaija nyam som muo. Den im chravl fi 40 die an 40 nait til im riich a mount Uoreb. Wen im kech de, im go iina wan kiev go sliip. Bot Jeuova taak tu im an se: ‘Ilaija, we yu a du ya-so?’ Ilaija ansa im an se: ‘Di Izrelait dem tap du wa dem pramis yu se dem a-go du. Dem mash dong yu alta dem an kil aaf yu prafit dem. An nou dem aal waahn fi kil mi tu.’

Jeuova tel im se: ‘Gwaan go tan op pan di mountn.’ Afta dat, wan chrang piis a briiz bluo paas we di kiev de. Den wan ortkwiek shiek op di plies, an den wan faiya staat bliez. Afta aal a dat, Ilaija ier wan vais we soun nais an kaam. Im tek im ruob an kova im fies an tan op outsaida di kiev. Den Jeuova aks im wa mek im ron we. An Ilaija se tu im: ‘A mi a di onggl wan lef.’ Bot Jeuova tel im se: ‘Nuo man, a no yu wan lef Ilaija. Mi av 7,000 piipl iina Izrel we stil a worship mi. So gwaan go pik Ilaisha fi ton prafit. Im a-go tek uova fram yu.’ Ilaija go du wa Jeuova tel im fi du sed taim. Yu tingk a sed wie Jeuova a-go elp yu fi du wa im waahn yu fi du? Ye man. Mek wi fain out bout sitn we did apm iina di taim wen no rien neehn a faal.