No Tan Laik Di Piipl Dem Iina Da Worl Ya We Onggl Tingk Bout Demself

Evridie wi si piipl roun wi we gwaan laik se piipl fi chriit dem beta dan ada piipl. An aal wen piipl chriit dem gud, dem stil fiil se piipl fi chriit dem beta. An wan a di riizn we mek piipl tan so a kaa wi a liv iina di laas die dem, an di Baibl mek wi nuo se piipl iina dem taim ya a-go onggl a bizniz wid demself an dem naa go gi tangks fi notn.​—2 Tim. 3:2.

Bot a lang taim nou yu av piipl we onggl a tingk bout demself. Laik yu av Adam an Iiv we did onggl a tingk bout demself wen dem did a mek op dem main bout wa gud an wa bad. An kaaz a wa dem du, it mek wol iip a prablem kom dong pan wi. Den lang afta dat, yu did av wan king iina Juuda we niem Ozaiya, an im did tingk se im did av di rait fi go bon swiit spais a Gad ous, bot kaa im du dat im onggl bring dong prablem pan imself. (2 Kr. 26:18, 19) An a siem so di Farisii dem an di Sadyusii dem did fiil se Gad fi chriit dem beta dan ada piipl kaa dem did a Iebriyam jinarieshan.​—Mat. 3:9.

Kaa yu av so moch piipl roun wi we ful-a demself an tingk se dem beta dan ada piipl, ef wi no main shaap wi kyan komiin laik dem tu. (Gya. 5:26) Wi mait-a staat fi fiil se piipl fi chriit wi beta dan ada piipl ar a wi fi get sortn an sortn wok iina di aaganaizieshan. Bot wen taim wi chrai fi tingk bout tingz di wie ou Jeuova tingk bout tingz, it kyan elp wi fi no tingk dem kain-a wie ya. So mek wi luk pan tuu sitn iina di Baibl we wi kyan riizn pan we kyan elp wi.

A Jeuova nuo wa an wa wi fi get. Si som sitn ya we im se wi fi get:

• Iina di fambili di ozban fi fiil se im waif rispek im an di waif fi nuo se ar ozban lov ar. (Ifii. 5:33) An di ozban an di waif no fi mek nobadi els fiil laik se dem a luk dem, a onggl dem wan aneda dem fi mek fiil da wie de. (1 Kor. 7:3) An di mada an faada dem ekspek se di pikni dem fi lisn an du wa dem se, an dem fi lov an tek kier a dem pikni dem.​—2 Kor. 12:14; Ifii. 6:2.

• Iina di kanggrigieshan, di breda an sista dem fi av nof rispek fi di elda dem we a wok aad fi dem. (1 Tes. 5:12) Bot di elda dem na’av no rait fi de aada-aada roun di breda an sista dem iina di kanggrigieshan.​—1 Pii. 5:2, 3.

• Jeuova gi di govament dem di rait fi kalek taks an im waahn wi fi gi dem nof rispek tu.​—Ruo. 13:1, 6, 7.

Kaa Jeuova lov wi im gi wi wol iip muor dan wa wi fi get. Kaa wi a sina, a onggl ded wi fi ded. (Ruo. 6:23) Bot kaa Jeuova av di kain-a lov we mek im stik tu wi no mata wa, a so koms im gi wi dem uol iip a blesn ya. (Sa. 103:10, 11) So ef wi get no likl wok fi du iina Jeuova aaganaizieshan ar ef im bles wi wid sitn, wi fi memba se a lov Jeuova lov wi iivn duo wi no dizorv it.​—Ruo. 12:6-8; Ifii. 2:8.

WA WI KYAN DU SO DAT WI NO ONGGL TINGK BOUT WISELF?

Chrai aad fi no tingk laik ou di piipl dem iina di worl tingk. Ef wi no main shaap, wi kyan staat fi tingk laik ou di piipl dem iina di worl tingk an fiil se wi beta dan ada piipl. Jiizas did shuo wi se dis kyan apm tu wi wen im did tel di tuori bout di man dem we did a wok fi wan man we did uon wan griep faam. Som a di man dem did wok an bon op iina son fi di uol die, an yu did av som ada man we did jos wok fi wan owa. Di man dem we did wok fi di uol die iina son did fiil se dem fi get muo moni dan di man dem we did jos wok fi wan owa. (Mat. 20:1-16) Wen Jiizas did a tel da tuori ya, im did a mek im falara dem nuo se dem fi satisfai wid di sitn dem we Gad gi dem.

Gi tangks fi wa yu get an no fiil se piipl mos gi yu tingz. (1 Tes. 5:18) Wi kyan du laik di apasl Paal, im neehn ekspek di breda an sista dem iina Korint fi sopuot im an gi’im tingz iivn duo im kuda aks dem fi du dat. (1 Kor. 9:11-14) A siem so wi fi api fi evri likl ting we wi get an no fiil se piipl fi gi wi tingz.

Wi fi wok aad fi ombl wiself. Wen sumadi onggl a tingk bout demself, nof taim dem no satisfai wid wa dem av, dem fiil se dem fi get muor. So ef wi no waahn fi stie so wi afi mek shuor se wi wok aad fi ombl wiself.

Di prafit we did niem Daniyel did riili ombl. Kaa Daniyel did luk gud an im did kom fram wan tap-a-tap fambili plos im did brait an did nuo ou fi du tingz gud tu, im kuda fiil laik se im did afi get di difrant difrant kain-a wok dem we im did get fi du an piipl shuda chriit im speshal. (Dan. 1:3, 4, 19, 20) Bot Daniyel neehn ful-a imself, im did ombl an kaaz a dat Jeuova did lov im bad.​—Dan. 2:30; 10:11, 12.

Mek wi wok aad fi no tan laik di piipl dem iina da worl ya we onggl a tingk bout demself. Insted-a dat, wi waahn fi mek shuor se wi api fi evri likl ting we Jeuova gi wi aalduo wi no dizorv it.