A Ou Yu Kyan Bi Wan Chuu Fren?

Yu eva fiil laik se a yu wan a go chuu yu prablem dem, nobadi no di de fi elp yu? Di Baibl mek wi nuo se “iina di laas die dem tingz a-go get aad aad,” an dat kyan mek wi fiil sad bad an fiil laik se wi na’av nobadi fi elp wi. (2 Tim. 3:1) Bot yu nuo se yu wan no afi go chuu yu prablem dem, kaa di Baibl tel wi se wen wi av som riil fren dem kyan elp wi “wen [wi] a go chuu aad taim.”​—Pr. 17:17.

A OU WI CHUU FREN DEM KYAN ELP WI?

Di apasl Paal fren dem we im yuus tu chravl roun wid fi priich did elp im nof nof. (Kol. 4:7-11) Wen Paal did iina prizn iina Ruom, im fren dem du som tingz fi im we im kudn du fi imself. Laik Epafrodaitos did gi Paal som tingz we im did niid we di breda an sista dem iina Filipai did sen fi’im. (Fil. 4:18) An Taikikos did gi di difrant difrant kanggrigieshan dem som leta we im did get fram Paal fi gi dem. (Kol. 4:7) Aalduo dem did aada im fi no lef im yaad an den dem put im iina prizn, kaa im fren dem did a elp im, Paal kuda stil push di breda an sista dem iina di difrant difrant kanggrigieshan dem fi gwaan tan op chrang. Wa yu kyan du fi shuo se yu a wan riil fren?

Iina fi wi taim ya nou wi av breda an sista we shuo wi wa wan chuu fren kyan du fi elp dem wan aneda. Luk pan wa did gwaan wid wan regila paiyanier iina Spien we niem Ilizibet an ou wan sista did shuo se shi a ar chuu fren. Wen Ilizibet mada did sik bad wid kyansa, di sista sen som wol iip a teks mesij wid som Baibl vors tu Ilizibet we mek shi fiil beta. Ilizibet se, “Di mesij dem we shi did sen mi did gi mi di chrent fi go chuu di die an so mi neva fiil laik se mi na’av nobadi fi elp mi.”​—Pr. 18:24.

Wi an wi breda an sista dem kyan ton gud fren wen wi elp dem fi go priich an fi go a di miitn dem. Wi kyan du dat wen wi gi wan breda ar wan sista we op iina iej wan jraiv fi go a miitn ar fiil sorvis. Wen wi du dat, wi a-go a bil dem op an dem a-go bil wi op tu. (Ruo. 1:12) Bot som a di breda an sista dem kyaahn lef dem yaad kaa dem mait-a sik, ar dem op iina iej, ar sitn els mek dem kyaahn lef dem yaad. So a ou wi kyan elp dem out an shuo se wi a wan chuu fren?

ELP DI WAN DEM WE KYAAHN LEF DEM YAAD

Som a wi breda an sista dem kyaahn kom a miitn a di Kindom Aal kaa dem sik bad ar sitn els mek dem kyaahn kom. Luk pan wa did gwaan wid wan breda we niem Dievid we av kyansa an fi siks mont im did a tek kiimo. Wen dat did a gwaan, Dievid an im waif Lidiya did afi yuuz vidiyo kaal an dem ting de fi go a miitn.

A ou dem fren dem we de iina dem kanggrigieshan did elp dem? Wen di miitn dem don, som a di breda an sista dem wuda go pan di vidiyo kaal an taak tu Dievid an Lidiya. An wen Dievid an Lidiya ansa kwestiyan a miitn, di breda an sista dem wuda sen dem som teks mesij afta di miitn fi big dem op, an dis mek Dievid an Lidiya fiil laik se di breda an sista dem riili lov dem.

Wan neda ting we wi kyan du a dat wi kyan chienj op som likl tingz iina wi laif fi elp di wan dem we afi tan a dem yaad fi nuo se wi no figet dem. (Pr. 3:27) Yu tingk yu kuda plan op wid dem fi go rait leta ar priich tu piipl pan di fuon wid dem? Di wan dem we kyaahn lef dem yaad mait-a kyan kom a di miitn fi fiil sorvis pan vidiyo kaal. An Dievid an Lidiya did lov dis. Dievid se, “Jos fi de de iina di miitn fi fiil sorvis wid di breda an sista dem iina wi gruup an fi ier di likl sopm we dem taak bout an fi ier di prieya, dat did elp bil wi op nof nof.” An ef it aarait fi yu dwi’it, yu tingk yu kuda plan op wid wan a di sumadi dem we yu stodi wid fi go a di yaad we wan a di breda ar sista dem liv, we kyaahn lef dem yaad, fi du dem stodi de?

Wen wi spen taim wid wi breda an sista dem we kyaahn lef dem yaad an wi si di nais nais wiez dem we dem av, wi an dem kyan ton gud fren. Laik wen wi a priich wid dem an wi si ou dem kyan yuuz di Baibl gud gud fi tiich sumadi an elp dem fi ton Jeuova fren, den dat mek wi lov dem iivn muor. So wen wi elp wi breda an sista dem fi priich an fi go a miitn, den dat wi elp wi fi get som nyuu fren.​—2 Kor. 6:13.

Wen Paal did a go chuu som aad taim, im fren Taitos did go luk fi im an did elp im fi fiil beta. (2 Kor. 7:5-7) So dis mek wi si se wi no onggl a-go se som tingz fi mek wi breda an sista dem fiil beta bot wi a-go spen taim wid dem an du wa wi kyan du fi elp dem tu.​—1 Jan 3:18.

WI FI ELP WI FREN DEM WEN ADA PIIPL A CHRIIT DEM BAD KAAZ A WA DEM BILIIV IINA

Wi breda an sista dem iina Rosha shuo we it miin fi elp dem wan aneda wen ada piipl a fait gens dem kaaz a wa dem biliiv iina. Laik luk pan wa did gwaan wid wan breda we niem Sergey an im waif we niem Tatyana. Afta di poliis dem sorch op sorch op dem ous, dem kya dem go a di poliis stieshan fi kwestiyan dem. Den dem let go Tatyana an shi go bak uom. Sergey se: “Az [Tatyana] riich uom so wan sista we wel briev kom a wi yaad, den afta dat, muor breda an sista kom an elp wi fi fiks op bak wi ous.”

An Sergey se: “Mi aalwiez laik wa Pravorbz 17:17 se, it se: ‘Wan chuu fren shuo lov aal di taim, an im komiin laik wan breda uu de de fi yu wen yu a go chuu aad taim.’ Yu si iina dem taim de wen dem a chriit mi bad kaaz a wa mi biliiv iina, mi did niid di elp we mi get fram mi fren dem kaa mi kudn go chuu pan mi uon. Jeuova riili gi mi dem fren de we neva fried fi gwaan elp mi an dat mek mi si se wa di skripcha se a Pravorbz 17:17 a riili chuu.”

Tingz a-go get wosa an wosara, so wi a-go niid wi fren dem fi elp wi. An wen di wos sofarieshan staat, a da taim de wi a-go niid fi av som chuu fren. So mek wi du evriting we wi kyan du ya nou fi shuo se wi a wan chuu fren!​—1 Pii. 4:7, 8.