Wan Kwestiyan We Enibadi Kyan Aks

Mieri an ar ozban Jan,a liv iina wan konchri we dem kuda priich tu nof piipl we kom fram di Filipiinz fi kom luk wok de an liv. Wen KUOVID did a go roun, Mieri did get fi stodi di Baibl wid som wol iip a piipl we liv wich paat shi liv an som we kom fram som ada konchri tu. A ou shi did du dat?

Mieri wuda aks di piipl dem we shi a stodi wid se, “Yu nuo nobadi els we wuda waahn fi stodi di Baibl?” An ef dem se ye, shi wuda tel dem se shi wuda laik fi miit dem. Kaa shi aks da kwestiyan ya a nof gud sitn apm. An dat a kaa nof piipl we lov fi stodi di Baibl waahn dem fambili an fren dem fi stodi di Baibl tu. Bot wa did apm kaa Mieri did aks da kwestiyan ya?

Mieri did a stodi di Baibl wid Jasmin, an Jasmin mek shi miit fuor a ar fren dem, an Mieri staat fi stodi di Baibl wid dem tu. Wan a Jasmin fren dem we niem Kristine did so api fi av ar stodi dat shi staat fi stodi wid Mieri tuu taim a wiik. Wen Mieri aks Kristine ef shi nuo nobadi els we wuda waahn fi stodi di Baibl, Kristine tel ar se, “Ye man, mi a-go mek yu miit som a mi fren dem.” Likl afta dat, Kristine mek Mieri miit som a ar fren dem we did waahn fi stodi di Baibl. Den afta dat, Kristine mek shi miit som ada wan a ar fren dem, an dem fren de mek Mieri miit som ada fren we dem av tu we waahn fi stodi di Baibl.

Kristine did waahn ar fambili we liv iina di Filipiinz fi lorn bout di Baibl tu. So shi taak tu ar daata, Andrea, bout it. Bot Andrea did tingk se, ‘Di Jeuova Witnis dem a neehn no gud rilijan kaa dem no biliiv iina Jiizas an dem onggl yuuz di Uol Testiment paat a di Baibl.’ Bot afta shi stodi jos wan taim shi get fi si se dem sitn de a no chuu. Evritaim shi lorn sitn nyuu iina di stodi shi wuda se, “Ef di Baibl se so, a mos so it go!”

Andrea did mek Mieri miit tuu a ar fren dem an wan uman we shi wok wid, an Mieri staat fi stodi di Baibl wid dem tu. Andrea did av wan blain anti we niem Angela we did a lisn wen Mieri did a kip di stodi wid Andrea bot Mieri neehn nuo dat. Den wan die Angela aks Andrea ef shi kuda mek ar miit Mieri so shi kuda get fi av fi ar uona Baibl stodi. Kaa Angela did lov di sitn dem we shi a lorn so moch iina wan mont taim shi memba nof a di skripcha dem bai aat, an shi did aal waahn fi stodi fuor taim fi di wiik! Andrea did elp Angela fi aal staat go a di miitn dem pan vidiyo kaal.

Wen Mieri fain out se Kristine ozban, Jashwa, did a lisn wa a gwaan pan di Baibl stodi, Mieri aks im ef im wuda waahn fi kom iin pan di stodi tu. Jashwa tel ar se, “Mi wi lisn wa a gwaan, bot mek shuor se yu no aks mi no kwestiyan kaa mi a-go git op an lef, yu ier.” Bot iina di fos faiv minit a di stodi, im aks uol iip a kwestiyan muor dan wa Kristine did aks an nou im did waahn fi’im uona Baibl stodi.

Kaa Mieri aks da kwestiyan ya a uol iip a piipl shi staat fi stodi di Baibl wid. An shi saat out tingz so dat ada breda an sista kuda stodi wid som a dem piipl ya. Wen wi chek it op, a 28 sumadi Mieri did staat fi stodi di Baibl wid we kom fram fuor difrant konchri.

Jasmin, we a di fos sumadi we Mieri did staat fi stodi di Baibl wid baptaiz iina Iepril 2021. An Kristine get baptaiz iina Mie 2022 an shi gaan baka di Filipiinz ya nou fi liv wid ar fambili. An yu si tuu a di piipl dem we Kristine did mek Mieri miit, dem get baptaiz tu. Likl afta dat, Angela get baptaiz an shi a wan regila paiyanier ya nou. An yu waahn nuo se Kristine ozban, Jashwa, an dem daata, Andrea, an uol iip a di ada piipl dem we Mieri did a stodi di Baibl wid a gwaan gud ya nou tu.

Iina di taim wen di Baibl did a rait, nof a di piipl dem did tel dem fambili an fren dem bout wa dem did a lorn bout Gad Kindom. (Jan 1:41, 42a; Aks 10:24, 27, 48; 16:25-33) So aks di piipl dem we yu a stodi di Baibl wid an ada piipl we waahn fi nuo muor bout di Baibl da kwestiyan ya, “Yu nuo nobadi els we wuda waahn fi stodi di Baibl?” Ef yu du dat yu mait-a get fi stodi di Baibl wid uol iip a piipl.