No Ich Fi Elp Piipl Uu ‘Wel Waahn Fi Lorn Bout Di Gud Nyuuz’

1. Wa an wa som piipl a-go du wen dem ier di gud nyuuz? (Aks 13:47, 48; 16:14, 15)

WEN DI Kristiyan dem iina Baibl taim did a priich, nof piipl did wel api fi ier di chuut an did waahn ton Kristiyan siem taim. (Riid Aks 13:47, 48; 16:14, 15.) An a siem wie so som piipl iina fi wi taim wel api wen dem ier di Gud Nyuuz fi di fos taim. Iivn di wan dem we neehn waahn ier notn fram wi wan taim mait-a chienj an waahn fi lorn bout Gad an worship im. So wa wi fi du wen wi fain piipl we wel waahn fi lorn bout di gud nyuuz?

2. Ou wen wi a priich an tiich it komiin laik wen wan faama a plaant op im grong?

² Tingk bout dis: Wen wi a priich tu piipl, wi wuda komiin laik sumadi we a plaant op im grong. Ef im si wan a di fruut chrii dem a raip op, im a-go pik aaf di fruut dem aafa it. Bot dat naa go tap im fram gwaan plou op di grong somwe els pan di faam. A siem wie so wen wi fain sumadi we redi fi tek di chuut, wi naa go ich fi elp dem. Bot dat naa go tap wi fram gwaan elp di wan dem we no redi yet so dat dem wi waahn fi lorn muor bout Gad an di Baibl. (Jan 4:35, 36) Fi yu fi nuo di bes wie fi elp sumadi we waahn nuo bout Jeuova, it wuda gud fi nuo ef dem redi fi tek di chuut ar dem no redi rait nou. Mek wi luk pan wa wi kyan du di fos taim wi taak tu sumadi we redi fi lorn bout Jeuova. An wi a-go luk pan wa wi kyan du fi elp dem wan de fi gwaan get kluosa an kluosa tu Jeuova an staat worship im.

WEN SUMADI REDI FI TEK DI CHUUT

3. Wa wi fi du wen wi fain sumadi we waahn fi lorn muor bout Jeuova? (1 Korintiyan 9:26)

³ Wen wi fain piipl we waahn fi lorn bout Jeuova, wi no waahn fi lie lie bot wi waahn fi elp dem sed taim. An di fos taim wi taak tu dem, wi no fi ich fi tel dem se wi waahn fi stodi di Baibl wid dem an fi invait dem a wi miitn dem.​—Riid 1 Korintiyan 9:26.

4. Tel wi bout sumadi uu did redi fi staat stodi di Baibl sed taim.

⁴ Tel dem se yu waahn fi stodi di Baibl wid dem. Som a di piipl dem we wi priich tu fi di fos taim redi fi staat stodi di Baibl wid wi. Laik wan Torzde, wan uman iina Kyanada did go op tu wan a wi kyaat dem an tek op wan a di Yu Kyan Bi Api Nou An Fi Eva! pamplet dem. Di sista we de a di kyaat mek shi nuo se wi yuuz da pamplet de fi stodi di Baibl wid piipl. Di uman se shi wuda waahn dat, so dem tek dem wan aneda fuon nomba. Lieta dong iina di die, di uman teks di sista fi aks ar wen dem kuda du di stodi. So di sista tel ar se shi kuda kom pan di wiiken, bot di uman se tu ar se: “Wa bout tumaro? Mi naa du notn.” So dem du di Baibl stodi di Fraide, an pan da siem wiiken de di uman go a ar fos miitn. An yu waahn fi nuo se shi stil a gwaan gud ya nou.

5. Wa wi kyan du fi mek sumadi waahn fi stodi di Baibl wid wi? (Luk pan di picha dem tu.)

⁵ A no evribadi a-go waahn fi stodi di Baibl wid wi sed taim laik da uman de. Som piipl mait-a niid muor taim bifuo dem mek op dem main se dem waahn fi stodi di Baibl wid wi. Di fos taim wi taak tu dem wi mait-a niid fi taak tu dem bout sitn we dem waahn fi taak bout. Bot ef yu no rait dem aaf an gwaan shuo se yu kier bout dem, likl fram dat dem mait-a waahn fi stodi di Baibl. Wa yu kyan se fi mek dem nuo se yu waahn fi stodi di Baibl wid dem? Wi did aks som breda an sista we nuo ou fi staat Baibl stodi da sed kwestiyan de. Mek wi ier wa dem se.

6. Wa wi kuda se fi mek di sumadi we wi a taak tu nuo se a wan gud sitn ef dem stodi di Baibl?

⁶ Di breda an sista dem we wi did aks bout ou dem staat Baibl stodi mek wi nuo se iina som konchri, it wuda gud ef wi no se tingz laik “stodi di Baibl wid yu” ar “tiich yu” wen yu a taak bout wan Baibl stodi. Dem get fi si se piipl wuda muor waahn fi stodi di Baibl wid wi wen wi se tingz laik: “Wi kyan taak bout di Baibl wid yu” ar “Wi kyan elp yu fi get fi nuo yu Baibl beta.” Fi mek di sumadi waahn fi taak tu yu agen, yu kyan se sitn laik: “Yu nuo se di Baibl kyan ansa nof a di big an impuotant kwestiyan dem we wi av iina laif?” ar “Di Baibl a no jos wan buk bout Gad ino, it kyan elp yu wid ada tingz iina laif tu.” Den yu kuda se: “It naa go tek no uol iip a taim man, jos 10, 15 minit, an yu kyan lorn uol iip a sopm.” An wi no afi tel dem se a evri wiik ting fi mek dem fiil laik se a tai wi a tai dem dong.

7. A wen a di fos taim som piipl si se a di chuut dem a lorn? (1 Korintiyan 14:23-25)

⁷ Invait dem fi kom a wi miitn dem. Iina di taim wen di apasl Paal did de bout, it wuda luk laik se a wen som piipl did go a wan miitn fi di fos taim dem did a ier di chuut. (Riid 1 Korintiyan 14:23-25.) An a di siem ting a gwaan iina fi wi taim. Wi fain se nof a di piipl dem we wi stodi di Baibl wid, az dem staat kom a miitn so a di kwika dem an Jeuova get kluosa an kluosa. So a wen wi fi invait dem fi kom a wi miitn dem? Iina lesn 10 a di Yu Kyan Bi Api Nou An Fi Eva! buk, it invait yu Baibl stodi fi staat kom a miitn. Bot yu no afi wiet til yu riich da paat de fi tel dem se dem kyan staat kom a miitn. Fram di fos taim yu taak tu dem, yu kyan tel dem se dem kyan kom a di miitn pan di wiiken, an yu kuda tel dem di taikl a di taak, ar sitn we wi a-go taak bout iina di Wachtowa stodi.

8. Wa wi kyan tel sumadi wen wi a invait dem fi kom a wi miitn? (Aizaiya 54:13)

⁸ Wen wi a invait sumadi fi kom a wi miitn dem, tek di taim fi mek dem nuo wa gwaan de so dat dem kyan nuo se it difrant fram wa dem yuus tu. Wen wan Baibl stodi did kom a di Wachtowa stodi fi di fos taim, shi did aks ar Baibl tiicha se, “Da man de we de pan di stiej, im nuo evribadi niem?” Di sista tel ar se aal a wi chrai fi nuo di niem a evribadi iina di kanggrigieshan jos laik ou wi nuo di niem a di piipl dem iina wi fambili. Di Baibl stodi neva si notn laka dis bifuo, kaa muos a di piipl dem iina ar choch no nuo dem wan aneda niem. Wi kyan tel di sumadi we wi a invait wan neda riizn wa mek wi miitn dem difrant. (Riid Aizaiya 54:13.) Wi kyan mek dem nuo se wi go a wi miitn dem fi lorn fram Jeuova an worship im an fi bil op wi wan aneda tu. (Iib. 2:12; 10:24, 25) Di miitn dem set op fi elp wi, an a das wai dem ron sortn an sortn wie. (1 Kor. 14:40) Wi mek shuor se di Kindom Aal av inof lait so dat wi kyan si gud, an it set op iina wan wie so dat wi kyan sidong, tek iin wa a gwaan, an lorn gud. Dem naa go ier wi a taak bout palitiks a wi miitn kaa wi no get miks op iina dat. An dem naa go ier nobadi a shout an a aagyu-aagyu bout notn niida. It wuda gud ef yu mek yu Baibl stodi wach di vidiyo we niem Wa Apm a wan Kindom Aal? bifuo dem kom a di miitn kaa dat wuda elp dem fi nuo wa a-go gwaan.

9-10. Wa wi kyan tel sumadi so dat dem no fried fi kom a wi miitn dem? (Luk pan di picha tu.)

⁹ Som piipl mait-a no waahn kom a wi miitn dem kaa dem mait-a tingk se dem afi go “ton wan Jeuova Witnis.” Mek di sumadi nuo se wi api wen piipl kom a wi miitn dem an wi naa go fuos dem fi ton wan Jeuova Witnis ar tek paat iina di miitn. Mek dem nuo se evribadi iina di fambili kyan kom, iivn di likl pikni dem tu. Wen wi de a wi miitn dem, di pikni dem naa lorn sitn difrant fram wa di mada an faada dem a lorn. Insted-a dat, aal a dem sidong tugeda an lorn di siem ting. Da wie de di mada an faada dem nuo wich paat di pikni dem de an wa dem a lorn. (Dyuu. 31:12) Wi naa go paas roun no kalekshan pliet ar no envilop fi put moni iina laik se a beg wi a beg. Insted-a dat, wi du we Jiizas se wi fi du an lou piipl ‘fi gi fram dem aat.’ (Mat. 10:8) Yu kuda aal tel di sumadi se im no niid fi wier no dier kluoz fi kom a di miitn dem kaa Gad si wa iina sumadi aat an no ou di sumadi luk.​—1 Sam. 16:7.

¹⁰ Wen sumadi kom a wi miitn, du wa yu kyan du fi mek dem nuo se wi api se dem di de. Mek dem miit di elda dem an di ada breda an sista dem. Ef im fiil se di piipl dem nais an kier bout im, im a-go waahn fi kom bak agen. An wen di miitn a gwaan, ef im na’av no Baibl, mek im luk iina fi yu uon. An yu kyan elp im fi andastan wa di breda we a gi di taak a se an ou wi stodi di Baibl tugeda.

WEN WI STAAT WAN BAIBL STODI

11. Ou yu kyan shuo se yu rispek di sumadi we yu stodi wid?

¹¹ Wa yu fi memba wen yu a du wan Baibl stodi? Kaa wi nuo se piipl bizi, wi waahn fi mek shuor se ef wi a tel sumadi se wi a kom sortn an sortn taim, wi de pan taim, an dat wi shuo se wi rispek dem. An it no mata ef wich paat yu liv piipl no naamali de pan taim laik se a Jamieka taim dem a wok wid. Pan tap a dat, it wuda gud ef yu no tek op tu moch taim pan di fos stodi. Som breda an sista we stodi di Baibl wid uol iip a piipl se iivn ef di sumadi a aks som uol iip a kwestiyan, wi stil no fi spen wan uol iip a taim pan di stodi. An du, no chat tu moch. Mek di sumadi du muos a di taakin.​—Pr. 10:19.

12. Wa wi fi du fram di fos taim wi staat stodi wid sumadi?

¹² Fram di fos taim yu staat stodi wid dem, elp yu Baibl stodi fi get fi nuo Jeuova an Jiizas an staat fi lov dem fram dem aat. Wi kyan du dis wen wi shuo dem wa di Baibl se an no wa wi tingk. (Aks 10:25, 26) Wen di apasl Paal did a tiich, im wuda taak nof bout Jiizas Krais, di wan we Jeuova sen fi elp wi fi nuo bout Im an lov im. (1 Kor. 2:1, 2) Plos Paal did elp im Baibl stodi dem fi si se dem fi av som gud wiez we komiin laik som dier stuon, an silva, an guol. (1 Kor. 3:11-15) Som a di wiez dem we dem fi av a fi kyan chos iina Gad, du tingz we waiz, an av nof rispek fi Jeuova. (Sa. 19:9, 10; Pr. 3:13-15; 1 Pii. 1:7) So wi kyan du laik Paal an elp wi Baibl stodi dem fi chos iina Jeuova wid aal a dem aat an get kluosa an kluosa tu dem Faada iina evn we lov dem.​—2 Kor. 1:24.

13. Ou wi kyan shuo se wi a tek wi taim wid wi Baibl stodi dem? (2 Korintiyan 10:4, 5) (Luk pan di picha tu.)

¹³ Jiizas did tek im taim wid piipl wen im a tiich dem, an a dat wi fi du tu. So no aks yu Baibl stodi no kwestiyan we a-go mek dem fiil a wie. An ef dem a chogl fi andastan sitn, no bada di de a chrai nak it iina dem ed. Jos muuv aan an den kom bak tu it wan neda taim. An ef sitn di de we im niid fi wok pan, no bada chrai fuos im fi chienj, gi im taim so dat di chuut kyan toch im aat. (Jan 16:12; Kol. 2:6, 7) Di Baibl mek wi nuo se Jeuova a elp wi fi mash dong eni rang tiichin we wi Baibl stodi mait-a did lorn. (Riid 2 Korintiyan 10:4, 5) It mait-a no iizi fi wi Baibl stodi let go aafa sitn we im nuo fram lang taim. So di fos ting wi niid fi du a fi elp wi Baibl stodi fi riili lov Jeuova an den it a-go iiziya fi im let go aafa di rang sitn dem we im did lorn.

WEN PIIPL JOS STAAT KOM A MIITN

14. Ou wi fi chriit di wan dem we jos staat kom a miitn?

¹⁴ Jeuova waahn wi fi kain tu evribadi an im no waahn wi fi paashal. It shudn mata we dem kom fram, di mount a moni we dem av, ar ou dem luk. (Jmz. 2:1-4, 9) So ou wi kyan mek di wan dem we jos staat kom a miitn si se wi lov dem?

15-16. Wa an wa wi fi du fi mek di wan dem we kom a miitn fi di fos taim waahn fi kom bak?

¹⁵ Som piipl mait-a kom a di Kindom Aal jos fi si wa a gwaan a wi miitn dem ar dem mait-a kom kaa sumadi we liv iina wan neda ieriya tel dem fi kom. So wi no fi ich fi go taak tu dem wen dem kom fi mek dem nuo se wi api fi si dem, bot no bamrosh dem. An yu kyan tel dem se dem kyan sidong saida yu. An yu kuda mek dem luk iina yu Baibl an di buk an pamplet we wi a yuuz a di miitn, ar yu kyan gi dem fi dem uona tingz fi luk iina. Pan tap a dat, yu kyan tingk bout som ada tingz we yu kuda du fi mek dem fiil komfatebl a di miitn. Wan man we did kom a di Kindom Aal fi di fos taim tel di breda we go taak tu im se im did fiil a wie kaaz a di kain-a kluoz we im did av aan. Di breda mek im nuo se im neehn afi wori wori op imself kaa Jeuova Witnis a naamal piipl tu. Di man did get baptaiz afta a wail, bot im neva figet wa di breda did se tu im. Bot dis a sitn we wi afi tingk bout duo: Wen yu a taak tu di piipl dem we kom a wi miitn dem, shuo se yu kier bout dem, bot no mek it luk laik se yu a faas iina dem bizniz.​—1 Pii. 4:15.

¹⁶ Wen sumadi we a no wan Jeuova Witnis kom a wi miitn dem, wan neda wie wi kyan shuo se wi api fi si dem an wi rispek dem a wen wi kierful bout ou wi chat bout dem an di sitn dem we dem biliiv, laik wen wi a ansa kwestiyan ar wi a du wi miitn paat dem. So chrai fi no se notn we a-go mek dem fiil a wie an mek dem no waahn fi kom bak. (Taitos 2:8; 3:2) Laik wi no waahn fi chat bad bout di sitn dem we dem biliiv iina. (2 Kor. 6:3) So di breda dem we gi di taak dem pan di wiiken afi kierful bout wa dem se tu. An wen dem a gi dem taak, dem fi se tingz iina wan wie fi mek piipl we a no Witnis andastan wa dem a se.

17. Wa wi fi du wen wi fain piipl ‘we wel waahn fi lorn bout Jeuova’?

¹⁷ Piipl out de waahn fi lorn bout Jeuova so wi kyaahn iiz op ya nou. An di muor wi priich a di muor wi a fain piipl “we Gad [a] pik fi liv fi eva.” (Aks 13:48) So wen wi fain dem piipl de, wi no fi ich fi tel dem se wi waahn fi stodi di Baibl wid dem ar fi invait dem fi kom a wi miitn dem. Yu si wen wi du dat, a elp wi a elp dem fi go pan “di ruod we piipl de pan we a-go mek dem kyan liv fi eva.”​—Mat. 7:14.