Memba Fi Prie Fi Ada Piipl Tu

1. A ou wi nuo se wi prieya dem impuotant tu Jeuova?

PRIEYA a wan nais nais sitn we Jeuova gi wi. Kaa tingk bout it: Jeuova gi di ienjel dem sortn an sortn tingz fi du. (Sa. 91:11) An Jeuova gi Jiizas som big an impuotant wok fi du. (Mat. 28:18) Bot wen it kom aan tu wi prieya dem, a uu Jeuova gi di wok fi lisn tu dem? Jeuova no gi nobadi da wok de. Di Baibl mek wi nuo se ‘a im lisn tu wi wen wi prie.’ So a im lisn tu aal a wi prieya dem.​—Sa. 65:2.

2. Wa Paal did du we wi kyan fala?

² Aalduo wi kyan taak tu Jeuova bout evriting we a gwaan wid wi, it nais wen wi kyan prie fi ada piipl tu. An a dat di apasl Paal did du. Laik wen im did rait tu di kanggrigieshan iina Efisos, im se: “Mi no tap gi tangks fi unu wen mi a prie.” (Ifii. 1:16) Paal did prie fi difrant difrant piipl iina di kanggrigieshan dem tu. Laik Paal did tel Timoti se: “Evritaim mi prie tu Gad mi memba yu an gi Gad tangks fi yu.” (2 Tim. 1:3) Paal did av fi im uona prablem dem fi prie bout. (2 Kor. 11:23; 12:7, 8) Bot im stil tek di taim fi prie fi ada piipl tu.

3. Wa mek wi mait-a figet fi prie fi ada piipl?

³ Som a di taim wi mait-a figet fi prie fi ada piipl. Wa mek? Wan sista we niem Sabrinaa mek wi nuo wa mek dat kuda apm. Shi se: “Muor wail wi get so bizi dat wi onggl a tingk bout fi wi uona prablem an nat iivn memba fi prie fi ada piipl tu.” Yu eva fain se a dis a apm tu yu? Ef a so it go, den da lesn ya kyan elp yu. It a-go elp yu fi si (1) wa mek it impuotant fi prie fi ada piipl an (2) it a-go mek yu nuo ou yu kyan dwi’it.

WA MEK WI FI PRIE FI ADA PIIPL?

4-5. Ou wen wi prie wi prieya dem kyan “mek gud sitn apm” fi ada piipl? (Jiemz 5:16)

⁴ Wen wi prie fi ada piipl, it av “powa an wi [kyan] mek gud sitn apm.” (Riid Jiemz 5:16.) Yu tingk se wen wi prie fi ada piipl it kyan mek gud tingz apm? Ye man! Jiizas did nuo se di apasl Piita did a-go gwaan laik se im no nuo im. So Jiizas tel im se: “Mi prie fi yu, Saiman, so yu no tap biliiv.” (Luuk 22:32) Paal did nuo tu se wen yu prie fi ada piipl, gud tingz kyan apm. Wen dem did lak im op iina prizn iina Ruom, im did rait tu Failiiman an se: “Mi a uop se Gad wi ansa unu prieya an sen mi bak tu unu.” (Failii. 22) An a dat did apm. Dem did frii op Paal an im kuda go bak go priich agen.

⁵ Bot dat no miin se wen wi prie wi kyan fuos ar presha Jeuova fi du notn. Im nuo wa im sorvant dem fiil bout di sitn we dem a prie bout, an som a di taim im du wa dem aks im fi du. Wen wi nuo dat, it wi elp wi fi no tap prie tu Jeuova bout sitn an nuo fi shuor se im a-go saat out tingz iina di bes wie fi wi.​—Sa. 37:5; luk pan 2 Korintiyan 1:11.

6. Ou it mek wi fiil bout di sumadi wen wi prie fi dem? (1 Piita 3:8)

⁶ Wen wi prie fi ada piipl, it wi elp wi fi “kier fi dem” muor. (Riid 1 Piita 3:8.) Wen wi kier fi ada piipl, wi a-go si wa dem a go chuu an wi a-go waahn du sitn fi elp dem. (Maak 1:40, 41) Dis a wa wan elda we niem Maikal se: “Wen mi prie bout wa ada piipl a go chuu, mi get fi si se it rof pan dem. An kaaz a dat, mi get fi lov dem iivn muor. An nof a dem mait-a no nuo dis, bot mi fiil kluosa tu dem.” An wan elda we niem Richard taak bout wan neda gud sitn we apm wen wi prie fi ada piipl. Im se: “Wen wi prie fi sumadi, it mek wi muor waahn fi elp dem. Wen wi du tingz fi elp di sumadi we wi prie fa, it wuda komiin laik se a elp wi a elp fi ansa di prieya.”

7. Ou wen wi prie fi ada piipl it elp wi fi no onggl a tingk bout fi wi uona prablem dem? (Filipiyan 2:3, 4) (Luk pan di picha dem tu.)

⁷ Wen wi prie fi ada piipl, it wi elp wi fi luk pan wi prablem dem iina wan difrant wie. (Riid Filipiyan 2:3, 4.) A Sietan kanchuol da worl ya, so aal a wi av difrant difrant prablem we wi afi a diil wid. (1 Jan 5:19; Rev. 12:12) Wen wi mek it a ting fi aalwiez prie fi wi breda an sista dem, it mek wi memba se ‘aal a wi we de aal uova di worl a go chuu di siem kain-a sofarieshan.’ (1 Pii. 5:9) Dis a we wan paiyanier sista we niem Katherine se: “Wen wi prie fi ada piipl, it elp wi fi memba se dem av fi dem uona prablem a diil wid. An dat elp mi fi no onggl a tingk bout fi mi uona prablem dem.”

DEM NIID WI FI PRIE FI DEM

8. A uu an uu wi kyan prie fa?

⁸ A uu an uu wi kyan prie fa? Wi kyan prie fi di piipl dem we sik bad, di pikni dem we a go a skuul we ada pikni a mak an a chrai presha fi du wa rang, an di wan dem we afi a diil wid aal kain-a tingz kaa dem op iina iej. Nof a wi breda an sista dem a go chuu wan rof taim kaa dem fambili ar di govament a fait gens dem kaaz a wa dem biliiv iina. (Mat. 10:18, 36; Aks 12:5) Som a wi breda an sista dem afi ron we lef dem yaad kaaz a palitiks an dem ting de. An yu av som ada breda an sista we afi a diil wid orikien an dem ting de. Wi mait-a no nuo dem breda an sista ya, bot wi fi prie fi dem siem wie. An wen wi du dat, a fala wi a fala wa Jiizas se wen im se wi fi “lov [wi] wan aneda.”​—Jan 13:34.

9. Wa mek wi fi prie fi di man dem we a liid wi iina Jeuova aaganaizieshan an prie fi dem waif tu?

⁹ Wi kyan tek di taim an prie fi di wan dem we a liid wi iina Jeuova aaganaizieshan. Laik di breda dem pan di Govanin Badi an di man dem we elp dem, di Branch Komitii man dem, di breda dem we inchaaj a di difrant difrant dipaatment dem a di branch afis dem, di sorkit uovasiya dem, di elda dem, an di ministiiriyal sorvant dem. Nof a dem breda ya av dem uona prablem a diil wid bot dem a wok aad fi elp wi siem wie. (2 Kor. 12:15) Laik wan sorkit uovasiya we niem Maak se: “Wan a di aadis ting fi mi a fi de faar fram mi mada an faada we op iina iej, an di tuu a dem no so aati. Aalduo mi sista an ar ozban a tek kier a dem, mi stil fiil a wie se mi kyaahn du wa mi wuda laik fi du.” Wi mait-a no nuo evriting we dem breda ya we a wok aad fi wi a go chuu, bot wi fi stil prie fi dem. (1 Tes. 5:12, 13) Wi kyan prie fi dem waif tu so dat dem kyan gwaan sopuot dem ozban wid di wok we dem av fi du.

10-11. Wen wi prie an no kaal non a wi breda an sista dem niem, yu tingk Jeuova laik dem prieya de? Tel wi wa mek yu se so.

¹⁰ Jos laik wa wi taak bout aredi, nof a di taim wi prie fi wi breda an sista dem we de aal uova di worl. Laik wen wi a prie, wi mait-a no kaal nobadi niem, bot wi jos prie fi aal a di breda an sista dem we de iina prizn ar di wan dem we sumadi ded fi dem. Wan elda we niem Donald se, “Wi av uol iip a wi breda an sista dem we a go chuu wan aad taim, so som a di taim wi jos prie fi aal a dem an no kaal no niem.”

¹¹ Yu tingk Jeuova laik dem prieya de? Ye man! Kaa wi no nuo evri likl ting we wi breda an sista dem a go chuu, so notn no rang ef wi prie laik dat. (Jan 17:20; Ifii. 6:18) An wen wi prie dem wie de, a shuo wi a shuo se ‘wi lov wi breda an sista dem we de aal uova di worl we biliiv iina Gad tu.’​—1 Pii. 2:17.

WEN WI PRIE AN KAAL DEM BAI DEM NIEM

12. Ou wen wi tek iin wa a gwaan wid wi breda an sista dem dat elp wi fi nuo ou fi prie fi dem?

¹² Tek iin wa a gwaan wid yu breda an sista dem. Ye, it gud fi wi prie fi di breda an sista dem aal uova di worl, bot it wuda gud tu fi prie fi som a dem an kaal dem niem iina wi prieya. Yu av sumadi iina yu kanggrigieshan we sik bad? Yu av wan yong sumadi iina yu kanggrigieshan we fiil laik im waahn gi op kaa di pikni dem a skuul a presha im fi du wa rang? Yu av wan mada an wan faada iina yu kanggrigieshan we a fain it aad fi riez dem pikni pan dem uon an a chrai aad fi elp di pikni fi “liv di wie ou di Laad waahn dem fi liv”? (Ifii. 6:4) Wen yu tek iin wa a gwaan wid di breda an sista dem, yu a-go fiil it fi dem an it a-go push yu fi prie fi dem.b​—Ruo. 12:15.

13. Ou wi kyan prie fi wi breda an sista dem iivn duo wi no nuo dem?

¹³ Kaal dem niem iina wi prieya wen wi a prie fi dem. Wi kyan du dat iivn duo wi no nuo dem. Laik tingk bout som a wi breda an sista dem we de iina prizn iina di konchri dem laik Kraimiya, Erochriya, Rosha, an Singapuor. Wen yu go pan jw.org, yu wi si di niem dem a di breda an sista dem we de iina prizn.c Wan sorkit uovasiya we niem Bryan se: “Wen mi rait dong di niem a wan breda ar wan sista we de iina prizn an mi se dem niem, it mek it iiziya fi mi fi memba dem wen mi a se fi mi uona prieya.”

14-15. Wen wi a prie, wa mek it gud fi wi tel Jeuova wa wi waahn fi apm fi wi breda an sista dem?

¹⁴ Tel Jeuova wa yu wuda waahn fi apm fi di breda an sista dem. Maikal, we wi did taak bout aredi, se: “Wen mi riid pan jw.org bout wa a gwaan wid wi breda an sista dem we de iina prizn, mi chrai fi tingk bout ou mi wuda fiil ef a mi did di de. Mi nuo se mi wuda wori bout mi waif an mi wuda waahn fi nuo se shi av di sitn dem we shi niid. So wen mi tingk bout aal a dat, mi nuo wa fi put iina mi prieya fi di breda an sista dem we de iina prizn we marid.”​—Iib. 13:3.

¹⁵ Wen wi tingk bout wa laif mait-a komiin laik fi wi breda an sista dem we de iina prizn, it mait-a kyan elp wi fi tingk bout som ada tingz we wi kyan prie fa. Laik wi kyan prie se di prizn waadn dem chriit wi breda an sista dem gud, an dat di wan dem we inchaaj a di prizn wi lou di breda an sista dem fi worship Jeuova. (1 Tim. 2:1, 2) An wi kuda prie tu se di kanggrigieshan we dem breda an sista ya kom fram wi tan op chrang wen dem si se di wan dem iina prizn naa gi op, ar dat di ada prizna dem wi si ou dem breda an sista ya biyiev gud an waahn fi lorn muor bout Jeuova. (1 Pii. 2:12) An wi kyan du di siem ting tu wen wi a prie fi wi breda an sista dem uu av ada prablem a diil wid. Wen wi tek iin wa a gwaan wid wi breda an sista dem, an kaal dem niem wen wi a prie fi dem, an mek Jeuova nuo wa yu waahn fi apm fi dem, a shuo wi a shuo se ‘wi lov wi wan aneda.’​—1 Tes. 3:12.

NO FIIL SE JEUOVA AFI DU EVRITING WE YU SE IINA YU PRIEYA

16. Wa wi fi memba se wen wi a prie? (Matyu 6:8)

¹⁶ So wi si se wen wi prie, gud tingz kyan apm. Bot wi afi memba se Jeuova no afi du evriting we wi se iina wi prieya. Wen wi prie, a no tel wi a tel Jeuova bout sitn we im no nuo bout aredi. An wi fi memba tu se a no tel wi a tel Jeuova di bes wie fi diil wid wa wi a prie bout. Jeuova nuo wa im sorvant dem niid iivn bifuo dem nuo bout it ar wi nuo bout it. (Riid Matyu 6:8.) So a wa mek wi fi prie fi ada piipl den? Ada dan di riizn dem we wi taak bout aredi iina da lesn ya, wen wi prie fi piipl it shuo se wi kier bout dem. A lov push wi fi prie fi wi wan aneda. An Jeuova api wen im si se wi a chrai fi du laik im.

17-18. Tel wi bout sitn we wi prieya dem kuda komiin laik fi wi breda an sista dem?

¹⁷ Iivn ef it luk laik notn gud naa kom outa wi prieya dem, it stil de shuo se a lov wi lov wi breda an sista dem, an Jeuova si dat. Tingk bout it da wie ya: Se yu av wan fambili wid tuu lili pikni​—wan bwai an wan gorl. Di bwai lidong iina bed kaa im sik bad. So kaaz a dat, di gorl go tu ar faada an se: “Dadi, mi a beg yu, du, du sitn fi elp mi breda. Im sik bad!” Bot di faada a du sitn aredi fi elp di likl bwai kaa im lov im an di de a tek kier a im. Bot di faada mos api fi si se im likl daata lov ar breda an a beg im fi elp im.

¹⁸ An a dat Jeuova waahn wi fi du. Im waahn wi fi kier bout wi wan aneda an prie fi wi wan aneda. Wen wi du dis, wi shuo se wi no onggl a tingk bout wiself wan, bot wi riili lov wi breda an sista dem, an Jeuova si dat. (2 Tes. 1:3; Iib. 6:10) So jos laik we wi taak bout aredi, wi si se wen wi prie it kyan mek tingz wok out gud fi ada piipl. So mek wi aalwiez memba fi prie fi wi wan aneda.