“ Yu A Wan Gud Man An Yu Speshal Bad”!

1-2. Wa kyan elp wi fi nuo fi shuor se wi wot nof tu Jeuova?

JEUOVA piipl dem speshal tu im, bot som a dem mait no fiil se Jeuova riili lov dem an dat dem no wot notn tu im. An som a dem fiil da wie de kaa sumadi mait-a mek dem fiil laik dem no wot notn tu nobadi. Yu eva fiil laik dat yet? Ef a so yu fiil, wa kyan elp yu nuo fi shuor se yu speshal tu Jeuova?

² Wan ting we kyan elp yu, a wen yu riid di Baibl an si ou Jeuova waahn piipl fi chriit ada piipl. Laik Jiizas did chriit piipl gud an shuo se im rispek dem. An wen im du dat, im did a shuo se di wan dem we fiil laik dem no wot notn did speshal tu im an Jeuova. (Jan 5:19; Iib. 1:3) Iina da lesn ya, wi a-go luk pan: (1) ou Jiizas did elp piipl fi si se dem wot nof tu Jeuova, an (2) ou wi kyan nuo fi shuor se wi wot nof tu Jeuova tu.​—Agai 2:7.

OU JIIZAS DID ELP PIIPL FI SI SE DEM WOT NOF TU JEUOVA

3. A ou Jiizas did chriit di piipl dem iina Gyalalii we did kom tu im fi elp?

³ Wen Jiizas did a priich iina Gyalalii, uol iip a piipl did kom fi lisn im an fi get beta fram dem siknis dem. Wen Jiizas si di piipl dem, im si se “aal saat a sitn did a bada dem, dem did kanfyuuz an dem kudn elp demself. Dem did komiin laik shiip we naa nobadi fi tek kier a dem.” (Mat. 9:36) Di choch liida dem neehn tingk dem piipl ya did wot notn, an dem did kliem se “bad blesn de pan dem.” (Jan 7:47-49) Bot Jiizas did shuo se dem piipl de speshal kaa im tek di taim fi tiich dem an get rid a dem siknis dem. (Mat. 9:35) Pan tap a dat, fi elp muo piipl, Jiizas did chrien im apasl dem fi du di priichin wok, an im tel dem se dem fi mek sik piipl get beta.​—Mat. 10:5-8.

4. Wa yu lorn fram ou Jiizas did chriit di piipl dem we ada piipl did tingk no wot notn?

⁴ Jiizas did kain an shuo se im rispek di wan dem we did lisn tu im. Jiizas did shuo se di piipl dem we ada piipl no tingk wot notn did speshal tu im an im Faada. So ef yu a wanda ef yu wot notn tu Jeuova, jos tingk bout ou Jiizas did chriit di piipl dem we ombl an we did kom tu im fi im tiich dem. Dat kyan elp yu fi si se yu speshal tu Jeuova.

5. Tel wi wa did gwaan wid wan uman we Jiizas did miit iina Gyalalii.

⁵ Jiizas no onggl did tiich piipl iina kroud, bot im taak tu piipl wan a wie tu an chrai fi elp dem. Laik wen im did de iina Gyalalii a priich, im did miit wan uman we kudn tap bliid fi 12 ier. (Maak 5:25) Bies pan di Laa we Jeuova did gi Muoziz, piipl laik da uman de neehn kliin, an enibadi we toch ar wudn kliin niida. So miebi muos a di taim shi wuda de bai arself. Plos, kaaz a di kain-a siknis we shi did av, shi kudn go a di Juu dem choch fi go worship Jeuova ar go non a di festival dem. (Liv. 15:19, 25) So da uman ya no onggl did sik, bot shi mait-a did fiil se nobadi no lov ar an se shi no wot notn.​—Maak 5:26.

6. A we di uman we did a bliid fi 12 ier did du fi get beta?

⁶ Da uman ya did a sofa bad bad so shi did wel waahn Jiizas fi iil ar, bot shi neehn go tu im an aks im fi dwi’it. Wa mek yu tingk shi neehn aks im? Kaa shi mait-a did fiil shiem kaaz a di siknis we shi did av. Ar miebi shi did fried se Jiizas mait-a ron ar kaa shi neehn fi de mongks piipl wid da kain-a siknis de. Shi toch Jiizas kluoz kaa shi did nuo fi shuor se ef shi did du dat shi wuda get beta. (Maak 5:27, 28) An yu waahn fi nuo se a dat did apm fi chuu, kaa shi get beta. Sed taim Jiizas ton roun iina di kroud an aks a uu toch im, so di uman mek Jiizas nuo se a shi dwi’it. Bot ou yu tingk Jiizas did chriit ar?

7. Ou Jiizas did chriit di uman we did a sofa bad? (Maak 5:34)

⁷ Jiizas did chriit di uman iina wan kain wie an shuo se im rispek ar. Im did si se shi “did fried an a chrimbl.” (Maak 5:33) So im taak tu ar iina wan jengkl wie so dat shi no fiil bad. Im aal kaal ar “daata.” An wen im se dat, im neehn onggl a shuo se im rispek ar, bot im did a chriit ar wid lov an chriit ar iina wan kain wie. (Riid Maak 5:34.) An yu waahn fi nuo se dis a di onggl taim iina di Baibl wen Jiizas kaal wan uman “daata.” An miebi im did kaal ar “daata” tu kaa im did si se shi fried. Ou yu tingk di uman did fiil wen shi ier ou Jiizas did taak tu ar? Shi mos did fiil api kaaz Jiizas did chriit ar gud. Ef Jiizas neehn taak tu ar iina wan kain wie, shi mait-a did get beta yes, bot shi wuda fiil bad bout wa shi did du. A neehn jos beta Jiizas did waahn di uman fi get beta bot we im did waahn a fi shi nuo se shi did speshal tu ar Faada Jeuova we lov ar bad.

8. Wa a som sitn we wan sista we kom fram Brazil did afi diil wid?

⁸ Nowadiez, som a Jeuova piipl dem mait-a afi diil wid som siknis we wuda mek dem fiil sad bad an fiil laik dem no wot notn. An a so Maria,a we a wan regila paiyanier we kom fram Brazil, did fiil. Shi neehn baan wid no fut, an shi neehn baan wid no lef an niida. Shi se: “Kaaz a mi siknis, di pikni dem a mi skuul yuus tu chobl mi an kaal mi aal kain-a niem we did ort mi bad. An somtaim iivn mi uona fambili did mek mi fiil laik mi no wot notn.”

9. A wa did elp Maria fi nuo se shi speshal tu Jeuova an dat shi wot nof tu im?

⁹ A wa did elp Maria fi fiil beta? Afta shi ton wan Jeuova Witnis, di breda an sista dem iina ar kanggrigieshan osh ar an elp ar fi si ou Jeuova fiil bout ar. Shi se: “A uol iip a breda an sista did elp mi, an mi tangk Jeuova fram diip dong iina mi aat fi da nais nais fambili ya we im gi mi.” Di breda an sista dem elp Maria fi si se shi speshal tu Jeuova an wot nof tu im.

10. A wa did apm tu Mieri Magdaliin, an a ou it did mek ar fiil? (Luk pan di picha dem tu.)

¹⁰ Wan neda sumadi we Jiizas did elp a Mieri Magdaliin. Shi did av sevn diiman iina ar! (Luuk 8:2) Di diiman dem mait-a did mek ar du aal kain-a tingz we piipl no naamali du, so dis wuda mek piipl neehn waahn fi de roun ar. An kaaz a wa shi did a go chuu, shi did sofa bad. An shi mos did fiil fried an tingk se nobadi neehn lov ar, ar kuda elp ar. Kaaz Jiizas did fiil it fi ar, miebi a im did ron di diiman dem outa ar, an afta dat shi did ton wan a im falara dem. Wa els Jiizas did du fi elp Mieri Magdaliin nuo se shi speshal tu Gad?

11. A wa an wa Jiizas did du fi Mieri Magdaliin fi shuo ar se shi did speshal tu Jeuova? (Luk pan di picha dem tu.)

¹¹ Jiizas did tel Mieri Magdaliin se shi kuda kom wid im an im falara dem wen dem a go roun an priich.b An dat did elp ar kaa shi kuda gwaan lisn tu Jiizas an lorn fram im. An shi did a wan a di fos sumadi we Jiizas did go luk fa an taak tu pan di die im did kom bak alaiv. Jiizas did aal tel ar fi mek im apasl dem nuo se im did kom bak alaiv. Aal a dis shuo se shi did speshal tu Jeuova!​—Jan 20:11-18.

12. Wa mek Lidiya did fiil se nobadi kudn lov ar?

¹² Jos laik Mieri Magdaliin, yu av nof piipl tide we fiil laik se nobadi no lov dem an dat dem no wot notn. Wan sista we niem Lidiya, we kom fram Spien, se wen ar mada did pregnant wid ar, shi did a tingk bout fi dash we di beli. Aal wen shi did a likl likl pikni, Lidiya memba se ar mada neva yuus tu pie ar no main, an shi yuus tu tel ar som at wod we ort ar bad. Shi se: “Kaa mi mada neehn shuo se shi lov mi, aal mi did waahn iina laif, a fi piipl lov mi an tek mi az dem fren. Bot mi did fiil se dat wuda neva apm kaa mi mada did mek mi tingk se mi a no wan gud sumadi.”

13. Wa did elp Lidiya fi si se shi speshal tu Jeuova?

¹³ Afta Lidiya did staat fi stodi di Baibl, shi staat fi chienj di wie ou shi tingk bout arself. Wan ting we did elp ar a wen shi prie tu Jeuova an riid di Baibl. Di breda an sista dem did taak tu ar nais an chriit ar kain, an dat did elp ar tu fi si se shi speshal tu Jeuova. Shi se: “Mi ozban tel mi aal di wail se im lov mi bad an im aalwiez a tel mi se mi av som gud wiez. An a siem wie mi gud gud fren dem chriit mi tu.” Yu kyan tingk bout sumadi iina fi yu kanggrigieshan we yu kyan elp fi mek dem nuo se dem speshal tu Jeuova?

OU WI KYAN SI WISELF LAIK OU JEUOVA SI WI?

14. Ou 1 Samwel 16:7 elp wi fi si ou Jeuova tingk bout piipl? (Luk tu pan di paat we niem “Wa Mek Jeuova Piipl Dem Wot Nof Tu Im?”)

¹⁴ Memba se Jeuova no tingk bout yu laik ou piipl iina di worl tingk bout yu. (Riid 1 Samwel 16:7.) Nof piipl iina di worl tingk se sumadi impuotant bies pan ou dem luk, umoch moni dem av, ar umoch skuulin dem get. Bot Jeuova no tingk dem kain-a wie de. (Aiz.55:8, 9) So chrai fi tingk bout yuself di wie ou Jeuova tingk bout yu, an no laik ou di piipl dem iina worl wuda tingk bout yu. Di Baibl taak bout piipl we did fiil laik dem neehn wot notn, piipl laik Ilaija, Nayuomi, an Ana. Wen yu riid bout dem wan ya, luk pan ou Jeuova did shuo se im did riili lov dem. An yu kyan aal rait dong tingz we did apm iina yu laif, we shuo se Jeuova lov yu an se yu wot nof tu im. An ef yu stil fiil laik se yu no wot notn, yu kyan luk op tingz iina wi buk an pamplet dem we taak bout ou yu fiil.c

15. A wa mek Jeuova did tingk se Daniyel a ‘wan man we speshal bad’? (Daniyel 9:23)

¹⁵ Aalwiez memba se kaa yu a du wa Jeuova se yu fi du, yu speshal tu im. Wen di prafit Daniyel did a nieli 100 ier uol, im did taiyad bad an im did fiil laik im waahn gi op. (Dan. 9:20, 21) A wa Jeuova did du fi elp im? Im sen di ienjel we niem Giebrel fi mek Daniyel memba se im a ‘wan gud man an im speshal bad,’ an se Jeuova ier im prieya dem. (Riid Daniyel 9:23.) So a wa did mek Daniyel so speshal tu Jeuova? Daniyel did av nof gud wiez, bot wa mek im so speshal tu Jeuova a kaa im did lov fi du wa rait an aalwiez a du wa Jeuova se im fi du. (Izii. 14:14) So Jeuova mek di ting dem we gwaan wid Daniyel rait dong iina di Baibl, so dat it kyan elp push wi fi tan op chrang an no gi op. (Ruo. 15:4) Kaaz yu aalwiez a du wa rait, an a du wa Jeuova se yu fi du, dat mek yu speshal tu im. An siem wie laik ou Jeuova lisn tu Daniyel prieya dem, a siem wie so im a-go lisn tu fi yu prieya dem tu.​—Mai. 6:8; Iib. 6:10.

16. Wa kyan elp yu fi tingk bout Jeuova az wan faada we lov yu?

¹⁶ Tingk bout Jeuova az wan Faada we lov yu. Aal Jeuova waahn fi du a fi elp yu, no fi fain faalt wid yu. (Sa. 130:3; Mat. 7:11; Luuk 12:6, 7) Wen nof piipl tingk bout dat, it elp dem fi nuo se dem speshal tu Jeuova. Laik tingk bout wan sista we niem Eliana we kom fram Spien. Shi did fiil laik se nobadi neehn lov ar an fiil laik se shi neehn wot notn, kaaz fi uol iip a ier ar ozban yuus tu se som tingz we ort ar bad. Shi se: “Wen mi fiil laik mi no wot notn, mi chrai fi picha Jeuova a kyari mi iina im an dem, an a protek mi, an a shuo mi se im lov mi.” (Sa. 28:9) Wan neda sista we niem Lauren, we kom fram Sout Afrika, se shi aalwiez a chrai fi memba arself se: “Ef mi Faada Jeuova jraa mi tu im, an a elp mi fram wen, an aal yuuz mi fi elp tiich ada piipl bout di Baibl, den im mos tingk se mi wot nof tu im.”​—Oz. 11:4.

17. Wa kyan elp yu fi nuo fi shuor se Jeuova api wid yu? (Saam 5:12) (Luk pan di picha tu.)

¹⁷ Yu kyan nuo fi shuor se Jeuova api wid yu. (Riid Saam 5:12.) Dievid mek wi nuo se Jeuova api wid di wan dem we aalwiez du wa rait an se im a-go protek dem. So wen wi nuo se Jeuova api wid wi, it wi elp wi fi no fiil laik wi no wot notn. Bot ou yu kyan nuo se Jeuova api wid yu? Wan a di wie dem we wi taak bout aredi, a wen wi riid di Baibl an si ou im fiil bout wi. An im yuuz di elda dem, an wi gud gud fren dem, an ada piipl tu, fi memba wi se wi wot nof tu im. So wa yu fi du wen dem wan ya se nais tingz bout yu?

18. Wa mek wen piipl a tel wi gud tingz bout wiself wi fi biliiv it?

¹⁸ Wen di wan dem we nuo yu an lov yu big yu op, an tel yu se yu a gwaan gud, yu no fi tingk se notn no go so, kaa Jeuova mait-a a yuuz dem fi mek yu nuo se im api wid yu. Eliana, we wi taak bout aredi, se: “Likl bai likl mi a lorn fi biliiv piipl wen dem tel mi gud tingz bout miself. Mi naa tel no lai, dis a no wan iizi sitn fi mi du, bot mi nuo se a wa Jeuova waahn mi fi du.” Di elda dem did elp Eliana fi si se Jeuova api wid ar, an nou shi a wan paiyanier an a elp out wid som wok a Betel fram ar yaad.

19. Wa mek yu kyan nuo fi shuor se yu speshal tu Jeuova?

¹⁹ Jiizas elp wi fi memba se wi wot nof tu wi Faada Jeuova. (Luuk 12:24) So wi kyan nuo fi shuor se wi speshal tu im, an dis a sitn we wi fi aalwiez memba. An mek wi du aal a we wi kyan du fi elp ada piipl fi si se dem speshal tu Jeuova tu.