Di Sitn Dem We Rait Dong Iina Di Buk A Juob Kyan Elp Yu Wen Yu A Sofa

1-2. Wa a som gud riizn wa mek wi fi riid di buk a Juob?

WEN laas yu get fi riid di nais sitn dem we rait dong iina di buk a Juob? Aalduo a bout 3,500 ier a-go dem rait da buk ya, nof piipl stil fiil se it a wan a di bes buk we sumadi eva rait. An dem fiil so kaa di sumadi we rait it yuuz som nais wod we iizi fi andastan an we toch piipl aat. An aalduo a Muoziz did rait da buk ya, a Jeuova did yuuz im fi rait it.​—2 Tim. 3:16.

² Di buk a Juob a wan impuotant buk iina di Baibl an it gud fi wi riid it. Kaa fi wan ting, it mek wi andastan se wi an di ienjel dem av a chaans fi shuo Jeuova se wi a sorv im kaa wi lov im an se wi av nof rispek fi im. An wan neda riizn we mek wi fi riid it, a dat it tiich wi bout di nais nais wiez dem we Jeuova av, laik ou im lov wi, ou im waiz, ou im fier an ou im powaful. Laik yu did nuo se a 31 taim di buk a Juob kaal Jeuova “di Almaiti,” an se dat a muor dan di mount a taim we it rait dong iina aal a di ada buk dem we de iina di Baibl? An wen wi riid da buk ya, it gi wi di ansa fi uol iip a kwestiyan we piipl aks laik: Wa mek Gad lou piipl fi a sofa so?

3. A ou it kyan elp wi wen wi riid di buk a Juob?

³ Yu si jos laik ou wen sumadi de pan di tap a wan ai ai mountn dem kyan si evriting we de roun dem gud gud, a siem so wen wi riid di buk a Juob wi kyan si klier klier ou Jeuova tingk bout tingz wen wi a sofa. So mek wi si ou di sitn dem we iina di buk a Juob kyan elp wi wen wi a sofa. Fos, wi a-go luk pan ou di tuori bout Juob mait-a did elp di Izrelait dem an ou it kyan elp wi tide. An den wi a-go luk pan ou wi kyan yuuz it fi elp ada piipl tu.

GAD DID LOU JUOB FI SOFA

4. A ou Juob did difrant fram som a di Izrelait piipl dem we did a liv iina Iijip?

⁴ Wen di Izrelait dem did a sliev iina Iijip, Juob did a liv iina wan plies we niem Oz. Bot im neehn komiin laik som a di Izrelait dem we did staat fi worship faalz gad, im did a worship Jeuova di rait wie. (Jash. 24:14; Izii. 20:8) Jeuova did se dis bout Juob se “nobadi no tan laik im pan di ort.”a (Juob 1:8) Juob a did wan rich rich man an iina di paat a worl we im did liv, nof nof piipl did rispek im muor dan enibadi els. (Juob 1:3) Kaaz a dis, Sietan mos did beks bad wen im si se wan man laka Juob a liv op an a sorv Jeuova!

5. Wa mek Jeuova did lou Juob fi sofa? (Juob 1:20-22; 2:9, 10)

⁵ Sietan did kliem se ef Juob staat fi sofa bad im wuda tap sorv Gad. (Juob 1:7-11; 2:2-5) Bot aalduo Jeuova did lov Juob, wen Sietan did bier fies an se dem sitn ya, Jeuova lou Sietan fi mek Juob sofa fi shuo ef wa Sietan did se bout Juob did go so fi chuu. (Juob 1:12-19; 2:6-8) So Sietan mek dem tek we Juob animal dem, an kil aaf im ten pikni dem, an im lik Juob wid wan wikid diziiz fram im ed tu im fut. Bot aal a we Sietan du neehn kaaz Juob fi tap sorv Jeuova. (Riid Juob 1:20-22; 2:9, 10.) So afta a wail, Jeuova mek Juob get beta an mek im muor richa dan ou im did bi. An im aal gi im bak ten muor pikni, an im mek piipl staat fi rispek Juob agen tu. An Jeuova mek Juob get fi liv fi 140 muor ier so das im kuda get fi si im griet griet granpikni dem. (Juob 42:10-13, 16) A ou da tuori ya bout Juob kuda elp di Izrelait dem an ou it kyan elp wi tu?

6. Ef di Izrelait dem did nuo di tuori bout Juob, a ou dat kuda elp dem? (Luk pan di picha tu.)

⁶ A ou di tuori bout Juob kuda elp di Izrelait dem? Tingz neehn iizi fi di Izrelait dem wen dem did de iina Iijip. Laik tingk bout Jashwa an Kieleb, dem did a sliev iina Iijip wen dem did a pikni. An kaa di eda Izrelait dem neehn du wa Jeuova se dem fi du, dem did afi liv iina di wildanes fi uol-a 40 ier. Ef Jashwa an Kieleb an di eda Izrelait dem did nuo di tuori bout Juob an ou Jeuova bles im, it kuda elp dem an dem pikni pikni dem fi si a uu riili a mek piipl sofa. An it wuda elp dem fi andastan wa mek Jeuova lou piipl fi sofa, an se wen wi liv op an du wa rait it mek Jeuova api.

7-8. Ou di tuori bout Juob kyan elp di wan dem we a sofa? Tel wi wa did apm wid Hazel.

⁷ A ou di tuori bout Juob kyan elp wi? Uol iip a piipl tap biliiv iina Gad kaa dem no nuo wa mek bad tingz apm tu gud piipl. Laik luk pan wa did apm tu Hazelb we kom fram Ruwanda. Shi did biliiv iina Gad wen shi did a pikni bot kaaz a di bad sitn dem we apm tu ar, shi tap biliiv iina Gad. Wa did apm a dat, ar mada an faada did divuos, an di man we ar mada marid tu did chriit ar bad. An wen shi did a tiinieja wan man riep ar aaf. An wen shi go a choch fi get som elp fi fiil beta, shi neehn get no elp. So afta dat, Hazel rait wan leta tu Gad. Shi se, “A nof taim mi prie tu yu an mi chrai fi du wa rait bot yu onggl mek mi a sofa. So mi don wid yu an fram nou aan mi onggl a-go du wa mek mi api.” Duohn se wen wi tingk bout piipl laik Hazel, uu piipl mek fiil se a Gad mek dem a sofa, it mek wi fiil sad?

⁸ Bot wen wi riid di tuori bout Juob wi get fi si se a no Gad a mek wi sofa, a Sietan. An wi get fi andastan se wen sumadi a sofa a no mos kaa dem du sitn bad. Kaa di Baibl tel wi se “taim kech op pan dem, an tingz we dem neehn tingk wuda apm, apm tu dem.” So wi get fi si se sitn bad kyan apm tu enibadi enitaim. (Iik. 9:11; Juob 4:1, 8) An wi lorn se ef wi gwaan liv op an du wa rait wen wi a sofa, wi a gi Jeuova di chaans fi ansa Sietan we aalwiez a chat bad bout im. (Juob 2:3; Pr. 27:11) Duohn wi glad se, wi lorn dem sitn ya fram di Baibl? Kaa nou wi get fi nuo wa mek wi an wi piipl dem a sofa. Afta Hazel staat fi stodi wid di Jeuova Witnis dem, shi get fi andastan se a no Gad kaaz ar fi go chuu di sitn dem we shi did go chuu. Shi se, “Mi prie tu Gad fram mi aat an mi tel im se, wen mi did se, ‘Mi don wid im,’ a neehn dat mi riili miin, kaa mi riili neehn nuo im. Bot nou mi get fi si se Jeuova lov mi an nou mi api an aarait wid mi laif.” Aal a wi api se wi nuo wa mek Jeuova lou piipl fi sofa! Nou mek wi luk pan ou di tuori bout Juob kyan elp wi wen wi a sofa.

OU DI TUORI BOUT JUOB KYAN ELP WI FI ENG AAN AN NO GI OP

9. Tel wi wa did a gwaan wid Juob wen im did sidong iina di ashiz? (Jiemz 5:11)

⁹ Picha dis: Juob sidong iina ashiz an im kin ful op a bwail, an di wie ou pien a waks im, im kudn iivn tan op chriet. An di diziiz we im av mek im kin get blak an staat fi piil aafa im maaga badi. Di onggl ting we it luk laik se im did a du a sidong an a tek piis a brok op klie pat an kriep im kin wid it an taak bout di uol iip a pien we a lik im. Bot Juob neehn jos a go chuu, im did a eng aan an no gi op. (Riid Jiemz 5:11.) Bot a wa did elp Juob fi eng aan an no gi op?

10. Tel wi wa mek yu wuda se Juob neehn fried fi tel Jeuova bout ou im fiil.

¹⁰ Juob neehn fried fi tel Jeuova ou im fiil. (Juob 10:1, 2; 16:20) Laik iina chapta 3, it shuo se kaa Juob did fiil se a Jeuova a mek dem bad sitn de apm tu im, im neehn fried fi se im fiil sad bout wa a apm tu im. An wen chrii a Juob fren dem a se a Gad a ponish im fi di bad sitn dem we im du, Juob neehn tap tel dem se im a du wa rait iina Gad yai. An muor taim wen Juob did a ansa dem, im wudaana taak tu Jeuova tu. An fi a wail, som a di sitn dem we Juob did a se mek it komiin laik se, im did a du wa rait muor dan Gad. (Juob 10:1-3; 32:1, 2; 35:1, 2) Bot im mek wi nuo se kaa im did a chrai so aad fi pruuv se im a du wa rait iina Gad yai, im taak aal kain-a fuulinish. (Juob 6:3, 26) An iina chapta 31, wi si se im did waahn Gad fi ansa im an pruuv se im neehn did a du notn rang. (Juob 31:35) Bot Juob did rang fi waahn Gad fi ansa im an tel im wa mek im did a sofa.

11. A wa Jeuova did du wen Juob did a taak laik se im did a du wa rait muo dan nobadi els?

¹¹ Nou wi get fi andastan se wen Juob did a taak tu Jeuova di wie ou im did a taak tu im a kaa im an Jeuova a did gud gud fren, an im did nuo se Jeuova wuda chriit im fier. An wen Jeuova did mek di briiz bluo aad an im ansa Juob, im neehn tel Juob wa mek im did a sofa an im neehn jraa im op fi wa im did se ar tel im se im did du notn rang niida. Bot Jeuova taak tu im laik ou wan faada wuda taak tu im bwai pikni an mek im nuo di rait wie ou fi luk pan tingz. An dat a did di bes wie fi elp im kaa it mek Juob si se im neehn riili nuo wa im did a se an im staat fi fiil sari bout di fuulinish we im did se. (Juob 31:6; 40:4, 5; 42:1-6) A ou da tuori ya bout Juob kuda elp di Izrelait dem an ou it kyan elp wi tu?

12. A ou di tuori bout Juob kuda elp Muoziz an di ada Izrelait dem?

¹² A ou di tuori bout Juob kuda elp di Izrelait dem? Bies pan wa did apm wid Juob di Izrelait dem kuda lorn sitn fram it. Laik tingk bout Muoziz. It neehn iizi fi im wen im did a liid di Izrel piipl dem, kaa uol iip a taim dem neehn du wa Jeuova tel dem fi du an dis did mek Muoziz fiil bad. An yu si wen tingz did get aad fi Muoziz, im neehn du laik di Izrelait dem we wuda aalwiez a grombl grombl gens Jeuova, bot wa im wuda du a go tu Jeuova an mek im nuo wa a bada im. (Ek. 16:6-8; Nom. 11:10-14; 14:1-4, 11; 16:41, 49; 17:5) An wa did apm wid Juob kuda elp Muoziz tu wen Jeuova jraa im op. Kaa likl bifuo di Izrelait dem get fi go iina di Lan we Gad did pramis fi gi dem, Muoziz did get beks bad an im aal taak chrang chrang tu dem an im neehn gi Jeuova di big op we im fi get. (Sa. 106:32, 33) An kaaz a dat, Jeuova neehn mek Muoziz get fi go iina di Lan. (Dyuu. 32:50-52) Dis mos did bon Muoziz, bot im ombl imself an tek di ponishment we im did get. An ef di Izrelait dem an dem pikni pikni dem did sidong an tingk bout wa did apm tu Juob, it kuda elp dem fi go chuu dem prablem dem. An dem wuda nuo ou fi tel Jeuova bout ou dem riili fiil an se dem no fi taak laik se dem a du wa rait muo dan Gad. An dem wuda lorn ou fi ombl demself an tek di jraa op we Jeuova gi dem.

13. Ou di tuori bout Juob kyan elp wi fi eng aan an no gi op? (Iibruu 10:36)

¹³ A ou di tuori bout Juob kyan elp wi? Aal a wi we a sorv Jeuova niid fi eng aan an no gi op. (Riid Iibruu 10:36.) Som a wi sik bad ar som a wi mait-a sad bad, ar wi mait-a a diil wid som saat a fambili prablem, ar sumadi fi wi ded, ar wi av som ada kain-a prablem a diil wid. An som a di taim sumadi mait-a se ar du sitn we mek it aada fi wi go chuu wi prablem dem. (Pr. 12:18) Bot di tuori bout Juob mek wi nuo se wi kyan tel Jeuova ou wi riili fiil an nuo fi shuor se im a-go ier wi. (1 Jan 5:14) An it mek wi si se aal wen wi se tingz som a di taim we no mek no sens Jeuova naa go beks wid wi, bot im a-go gi wi di chrent fi nuo wa fi du fi eng aan an no gi op, jos laik wa im did du fi Juob. (2 Kr. 16:9; Jmz. 1:5) An ef wi niid wan likl jraa op, im a-go dwi’it tu. An yu si wen Jeuova aaganaizieshan ar sitn iina di Baibl ar wan fren we chrang iina wa wi biliiv iina karek wi, di tuori bout Juob kyan elp wi fi gwaan eng aan an no gi op. (Iib. 12:5-7) An jos laik ou it did elp Juob wen im ombl imself an tek di jraa op we im get, a siem so it a-go elp wi wen wi tek di elp we wi get. (2 Kor. 13:11) So a uol iip a sitn wi kyan lorn fram di tuori bout Juob! Mek wi luk pan ou wi kyan yuuz da tuori ya fi elp ada piipl.

YUUZ DI TUORI BOUT JUOB FI ELP ADA PIIPL

14. Ou yu kuda riizn wid sumadi fi elp dem fi andastan wa mek piipl a sofa so?

¹⁴ Yu eva miit sumadi iina fiil sorvis we aks yu wa mek piipl a sofa so? Wa yu did ansa dem se? Yu mait-a did tel dem bout wa di Baibl se did gwaan iina di gyaadn a Iidn an ou Sietan tel di fos man an uman wan lai we mek dem ton gens Gad. (Jen. 3:1-6) Den yu mait-a tel dem se a kaaz a wa Adam an Iiv did du mek so moch piipl a sofa an a ded. (Ruo. 5:12) An den yu mait-a mek dem nuo se Gad a lou taim fi paas fi pruuv se wa Sietan did se a lai, an im a lou taim fi paas tu so dat piipl kyan ier di gud nyuuz bout di taim wen evribadi a-go porfek agen. (Rev. 21:3, 4) Dis a wan gud wie fi ansa di kwestiyan, an da wie ya elp uol iip a piipl fi get di ansa.

15. Ou wi kyan yuuz di tuori bout Juob fi elp sumadi uu waahn fi nuo wa mek piipl a sofa? (Luk pan di picha dem tu.)

¹⁵ Wan neda ting we yu kuda du a yuuz di tuori bout Juob fi ansa di kwestiyan. Fos, yu kyan big op di sumadi fi di kwestiyan we dem aks. Den yu kuda mek dem nuo se aalduo Juob did a sorv Gad, im did aks wan kwestiyan laik dat wen im did a sofa. An im did aal fiil se a Gad a mek im a sofa tu. (Juob 7:17-21) An wen di sumadi nuo dis, it mait-a mek dem fiil gud fi nuo se a lang taim piipl a aks kwestiyan laik dis. An iina wan nais wie yu kyan mek dem nuo se a no Gad did a kaaz Juob fi a sofa, bot a di Devl did a kaaz im fi sofa. An di Devl did mek Juob sofa kaa im did a chrai fi pruuv se piipl onggl a sorv Gad fi wa dem kyan get fram im. Den yu kuda mek di sumadi nuo se aalduo a neehn Gad did a mek Juob sofa, im lou im fi sofa kaa im did nuo se piipl wuda stil du we im se an shuo se Sietan a laiyad. An yu kyan mek dem nuo se kaa Juob did eng aan an du wa Gad se, Gad did bles im. So wi kyan elp piipl fi fiil beta wen wi mek dem nuo se a no Jeuova a kaaz dem fi sofa.

16. Tel wi ou di tuori bout Juob did elp sumadi we a sofa.

¹⁶ Luk pan ou di tuori bout Juob did elp Mario. Iina 2021, wan sista did a yuuz di fuon fi priich, an di fos sumadi we shi get a Mario. An shi riid wan vors fram di Baibl fi im we shuo se Gad no onggl lisn tu wi wen wi prie, bot im a-go mek tingz beta fi wi iina di fyuucha. Wen shi aks im wa im tingk bout dat, Mario mek ar nuo se wen shi did kaal im, a rait im did a rait wan leta fi mek im fambili dem nuo se im did a-go kil imself. Im se, “Mi biliiv se Gad de ino, bot dis maanin mi did a wanda ef im don wid mi.” Di sekan taim shi kaal im, dem taak bout wa Juob did go chuu. So Mario disaid se im a-go riid di uol-a di buk a Juob. So di sista sen im di lingk tu di Baibl we de pan jw.org. An kaaz a dis, Mario se, ye, im wuda stodi di Baibl an im did api fi lorn muor bout di Gad we shuo se im kier bout im.

17. Wa mek yu api se Jeuova put di buk a Juob iina di Baibl? (Juob 34:12)

¹⁷ Wi si klier klier se Gad Wod av di powa fi elp piipl aal di wan dem we a sofa tu. (Iib. 4:12) An wi api se Jeuova put di tuori bout Juob iina di Baibl! (Juob 19:23, 24) An di buk a Juob mek “wi nuo fi shuor se Gad no du notn we wikid.” (Riid Juob 34:12.) An it mek wi nuo wa mek Gad lou piipl fi a sofa an ou wi kyan eng aan an no gi op. An wi kyan yuuz it fi osh di wan dem we a sofa. Iina di neda lesn, wi a-go taak bout som ada tingz we wi kyan lorn fram di buk a Juob, laik ou wi kyan jraa op sumadi iina wan wie we a-go elp dem.