Di Sitn Dem We Rait Dong Iina Di Buk A Juob Kyan Elp Wi Wen Wi Afi Jraa Op Sumadi

1-2. A ou Juob chrii fren dem an Ilaiyuu kuda shuo se dem a riili Juob fren fi chuu?

Wen Juob en op luuz evriting we im av, di nyuuz bout it pred laik wail faiya mongks di piipl dem we did liv iina da ieriya de. So wen Eilfaz an Bildad an Zuofaar ier bout wa apm tu Juob, di chrii a dem lef go a Oz fi go osh Juob. Bot dem neehn redi fi wa dem wuda kom si.

² Tingk bout ou Juob did en op a sofa kaaz im luuz wol iip a di sitn dem we wot nof tu im, laik im wol iip a shiip dem, im kou dem, an im kyamil dem an im dangki dem​—evriting gaan. An aal im pikni dem an wol iip a im sorvant dem ded aaf. An di ous we Juob pikni dem ded iina, de de mash op. An ef aal a dat neehn bad inof, di uol a im badi ful op a bwail we did a kaaz im uol iip a pien. So wen Eilfaz an Bildad an Zuofaar a kom, dem kuda stie faar an si Juob luk laik puo ting sidong iina di ashiz. Wid aal a wa dem did si, wa yu tingk dem du? Fi uol a sevn die dem neva se a wod tu Juob aalduo dem si im de a fiil uol iip a pien. (Juob 2:12, 13) Afta a wail, wan yong man we niem Ilaiyuu kom de kom sidong tu. Den Juob staat fi taak op an kos di die wen im baan an wish se im dis ded. (Juob 3:1-3, 11) So dis mek wi si se Juob did niid som elp fi chuu. So wa dem man ya a-go en op se ya nou an ou dem se it a-go shuo ef dem a Juob fren fi chuu an ef dem riili kier bout im.

3. Wa wi a-go luk pan iina da lesn ya?

³ A Jeuova did mek Muoziz rait dong wa Juob chrii fren dem an we Ilaiyuu did se an wa dem did du. Yu mait-a memba se di sitn dem we Ilaiyuu did se, a Jeuova it did kom fram. Bot som a di sitn dem we Elifaz did se, it luk laik se a wan diiman did tel im fi se dem sitn de. (Juob 4:12-16; 33:24, 25) Wi kyan si wa mek wen wi riid di buk a Juob wi kyan si som a di bes wie we wi kyan elp sumadi an yu kyan si di wos ting we yu kyan du wen yu a chrai fi elp sumadi. So a das wai wi a-go luk pan di sitn dem we rait dong iina di buk a Juob fi si ou it kyan elp wi wen wi a jraa op sumadi. Fos, wi a-go luk pan wa wi kyan lorn fram Eilfaz, Bildad an Zuofaar bout wa wi no fi se an wa wi no fi du wen wi a elp sumadi. An den wi a-go luk pan Ilaiyuu an si wa wi kyan lorn bout wa wi fi se an wa wi fi du wen wi a chrai fi elp sumadi. An wen wi a luk pan wa dem man ya did du, wi a-go si wa di Izrelait dem kuda lorn fram wa rait dong iina di buk a Juob an ou it kyan elp wi tu.

OU JUOB CHRII FREN DEM DID JRAA IM OP

4. Wa mek Juob chrii fren dem neehn get fi elp im di wie ou dem did waahn fi elp im? (Luk pan di picha tu.)

⁴ Di Baibl mek wi nuo se afta Juob chrii fren dem ier wa did apm tu im, dem go luk fi im kaa dem did fiil it fi im an waahn fi osh im. (Juob 2:11) Bot dem neehn du wa dem did plan fi du. Kaa fi wan ting, dem neehn tek di taim fi fain out wa riili did a gwaan wid Juob. Laik dem did fiil se Gad a ponish Juob kaaz a di rang sitn dem we im did du, bot notn neehn go so.a (Juob 4:7; 11:14) Di sekan ting a dat aalduo nof a di sitn dem we dem did se tu Juob did soun laik it mek sens, it neehn riili elp Juob, it did onggl en op ort im. (Juob 13:12) An a tuu taim Bildad did tel Juob se im a chat tu moch. (Juob 8:2; 18:2) An Zuofaar tel Juob se im komiin laik wan man we naa no sens. (Juob 11:12) An di tord riizn we mek dem neehn get fi osh Juob, a dat aalduo dem mait-a neva shout aafa im, di sitn dem we dem se an ou dem se it mek Juob fiil laik se im did du sitn rang. (Juob 15:7-11) Wen yu chek it out, we dem man ya du did shuo se dem onggl a chrai fi pruuv se Juob du sitn rang an neehn riili waahn fi osh im an mek im fiil beta ar elp im fi chos iina Gad muor.

5. A ou Juob did en op fiil wen im fren dem don taak tu im?

⁵ Wi kyan si wa mek wen Eilfaz an Bildad an Zuofaar don taak tu Juob, im did fiil wos dan bifuo dem staat fi taak tu im. (Juob 19:2) So wi kuda si wa mek im did afi taak op fi imself an se im neehn du notn rang. An a das wai im en op se tingz we im neehn fi se. (Juob 6:3, 26) Di ting dem we Juob fren dem did se, a neehn wa Jeuova did waahn dem fi se, so dem neehn de osh im an mek im fiil beta. An kaaz a dat, dem en op mek Sietan yuuz dem. (Juob 2:4, 6) Ou da tuori ya bout Juob kuda elp di Izrelait dem, an ou it kyan elp wi tu?

6. Wen di elda dem iina Izrel did luk pan di tuori bout Juob, a wa dem kuda lorn bout ou fi taak tu di piipl dem?

⁶ A ou di tuori bout Juob kuda elp di Izrelait dem? Afta Jeuova gi di Izrel piipl im laa dem, im pik som man fi ton elda fi joj im piipl dem an fi elp dem fi du di sitn dem we im tel dem fi du. (Dyuu. 1:15-18; 27:1) An dem man ya wuda afi lisn gud tu di piipl dem bifuo dem joj dem an tel dem wa fi du. (2 Kr. 19:6) An dem wuda afi aks di piipl dem kwestiyan an no fiil se dem nuo evriting bout wa apm. (Dyuu. 19:18) An dem wudn taak tu dem rof, bot dem wuda du we dem kyan du fi elp di wan dem we kom tu dem. An dis a kaa ef dem rof dem op, dem wuda mek di sumadi no waahn fi tel dem evriting we a gwaan iina dem aat. (Ek. 22:22-24) Dem ya a som a di sopm dem we di elda dem iina Izrel kuda lorn fram di tuori bout Juob.

7. A uu els iina Izrel kuda jraa op sumadi, an ou di tuori bout Juob kuda elp dem fi dwi’it? (Pravorbz 27:9)

⁷ A neehn onggl di elda dem iina Izrel kuda jraa op sumadi an gi dem di elp we dem niid. Dat a sitn we enibadi kuda du. It neehn mata ef dem yong ar dem uol, ar ef dem a wan man ar dem a wan uman, dem kuda stil elp dem fren fi gwaan worship Jeuova di rait wie an fi tap du eniting we dem a du we dem no fi du. (Sa. 141:5) So wen dem jraa op dem fren iina da wie ya, it a-go mek dem fren si se dem lov dem fi chuu. (Riid Pravorbz 27:9.) An wen dem luk pan wa Juob chrii fren dem did du, it kuda elp dem fi si wa dem no fi se an wa dem no fi du wen dem a jraa op sumadi.

8. Wa an wa wi no fi du wen wi a jraa op sumadi? (Luk pan di picha dem tu.)

⁸ A ou di tuori bout Juob kyan elp wi? Aal a wi waahn fi elp wi breda an sista dem wen dem a go chuu dem prablem dem. Bot wen wi a dwi’it wi no fi du di siem ting laik we Juob chrii fren dem did du. So fos ting, wi fi mek shuor se wi nuo evriting we wi kyan nuo bout wa did go dong bifuo wi chrai fi elp di sumadi. An di sekan ting a dat, wi no fi onggl chrai fi elp dem bies pan we wi go chuu iina laif laik we Elifaz did du nof taim, bot wi fi mek shuor se eniting we wi a se it a kom fram Gad Wod. (Juob 4:8; 5:3, 27) An di tord ting a dat, wi fi mek shuor se wi no se tingz we a-go mek di sumadi fiil bad bout demself. Memba se Elifaz an im fren dem did se som tingz we go so fi chuu, kaaz aal Paal did se bak wan a di sitn dem we dem did se. (Luk pan Juob 5:13 an 1 Korintiyan 3:19.) Bot nof a di tingz dem we dem did se bout Gad neehn go so, an di sitn dem we dem did se onggl en op mek Juob fiil bad bout imself. So Jeuova se we dem did a se neehn go so. (Juob 42:7, 8) So ef yu a jraa op sumadi di rait wie, it naa go mek dem fiil se Jeuova no fier ar se im kyaahn lov dem. Nou mek wi luk pan wa wi kyan lorn fram wa Ilaiyuu did se.

OU ILAIYUU DID JRAA OP JUOB

9. Wa mek afta Juob fren dem don taak tu im, im did stil fiil bad, an a wa Jeuova did du fi elp im?

⁹ Bai di taim Juob an im fren dem tap aagyu aagyu, evribadi mos did beks. Wa dem man de did se ful op 28 chapta iina di Baibl. An nof a di sitn dem we dem did a se a kaa dem did beks an neehn nuo wa fi se. So wen taim dem don chat, Juob did stil fiil a wie an im stil did niid sumadi fi osh im an mek im si di rait wie ou im fi a tingk bout tingz. So Jeuova yuuz Ilaiyuu fi elp im. Bot wa mek Ilaiyuu did sidong de so lang bifuo im staat fi taak op? Im se, “Mi yong an unu op iina iej. An a kaa mi rispek unu mi neehn kwik fi taak.” (Juob 32:6, 7) Ilaiyuu did get fi si se muo taim kaa sumadi op iina iej dem get fi lorn uol iip a sitn we mek dem get waiz an nuo nof bout laif muor dan sumadi we yong. An a dat uol iip a piipl get fi fain out tu. Bot afta Ilaiyuu di de a lisn tu dem ou lang, im did afi taak op. Im tel dem se, “Kaa sumadi op iina iej, dat no miin tu se dem waiz, an a no onggl di man dem we op iina iej andastan di sitn dem we rait.” (Juob 32:9) Bot a wa Ilaiyuu did se afta dat, an a ou im did se it?

10. Wa Ilaiyuu did du bifuo im staat fi jraa op Juob? (Juob 33:6, 7)

¹⁰ Bifuo Ilaiyuu did staat fi jraa op Juob, im did waahn im fi fiil kaam an redi fi lisn tu we im did a-go se. So di fos ting im did du a mek shuor se im kanchuol fi imself, kaa di Baibl mek wi nuo se Ilaiyuu did beks wid Juob kaaz a di sitn dem we im did a se. (Juob 32:2-5) Bot im neehn jraa dong pan im kaaz a ou im did fiil. Bot wa im did du a dat im did taak tu Juob nais an mek im fiil gud. Laik im did se tu Juob se, “Di tuu a wi a di siem ting tu Gad.” (Riid Juob 33:6, 7.) An afta dat, Ilaiyuu did mek Juob nuo se im did lisn tu im gud gud, kaa im kuda tel Juob bak som a di sitn dem we im did se di siks taim dem wen im did taak. (Juob 32:11; 33:8-11) An wen Ilaiyuu did afi jraa op Juob agen a kain-a di siem wie im did dwi’it.​—Juob 34:5, 6, 9; 35:1-4.

11. A wa Ilaiyuu did du wen im did a jraa op Juob? (Juob 33:1)

¹¹ Wen Ilaiyuu did a jraa op Juob, im neehn taak tu im iina wan wie we mek im fiil laik se im naa no yuus. Bot im taak tu im iina wan wie we mek im si se im rispek im. Laik wen im did a taak tu Juob, im yuuz Juob niem, bot it luk laik se wen di ada man dem did taak tu im dem neehn du dat. (Riid Juob 33:1.) An Ilaiyuu mait-a memba ou im did wel waahn fi taak op wen Juob an im chrii fren dem did a taak, so wen im did a taak im gi Juob a chaans fi ansa im. (Juob 32:4; 33:32) An im mek Juob nuo se im fi kierful bout som a di ting dem we im a se. An im mek im memba ou Jeuova waiz, ou im av aal a di powa, an ou im fier an ou im lov im piipl dem an a-go stik tu dem no mata wa. (Juob 36:18, 21-26; 37:23, 24) Ilaiyuu did elp Juob iina wan wie we wuda mek im redi fi tek di elp we Jeuova did a-go gi’im. (Juob 38:1-3) Ou di sitn dem we Ilaiyuu did se an du wen im did a jraa op Juob kuda elp di Izrelait dem an ou it kyan elp wi tu?

12. A ou Jeuova did yuuz di prafit dem fi elp im piipl dem, an ou wa Ilaiyuu did se an du kuda elp di Izrelait dem?

¹² A ou di tuori bout Juob kuda elp di Izrelait dem? Wen Jeuova a diil wid di Izrelait dem, muor taim im wuda yuuz som difrant difrant prafit fi mek dem nuo wa im waahn dem fi du. Laik iina di taim wen Jeuova did a yuuz di Joj dem fi liid im piipl dem, yu did av Debra uu a did wan prafit we did elp di piipl dem iina Izrel fi nuo wa Jeuova waahn dem fi du. An yu did av di prafit Samwel we did a wok aad fram im a likl bwai fi mek dem nuo wa Jeuova waahn dem fi du tu. (Joj. 4:4-7; 5:7; 1 Sam. 3:19, 20) An iina di taim wen di king dem did a ruul, Jeuova yuuz wan prafit afta di ada fi elp di Izrelait dem fi gwaan worship im di rait wie. An wen di piipl dem neehn de du wa Jeuova se dem fi du, im wuda yuuz di prafit dem fi karek dem. (2 Sam. 12:1-4; Aks 3:24) So di sitn dem we rait dong iina di buk a Juob bout wa Ilaiyuu did se an du wen im did a jraa op Juob, kuda elp di Izrelait dem fi nuo wa dem fi se an ou dem fi se it wen dem did a jraa op sumadi.

13. Ou di breda an sista dem kyan push dem wan neda fi gwaan sorv Jeuova?

¹³ A ou di tuori bout Juob kyan elp wi? Jos laik di prafit dem, wi a mek piipl nuo wa Jeuova waahn dem fi du. An wi du dat wen wi tel dem wa de iina im Wod di Baibl. An wan neda wie ou wi du dat, a wen wi se tingz fi push wi breda an sista dem fi gwaan sorv Jeuova. (1 Kor. 14:3) An muor dan enibadi els, di elda dem fi wok aad fi taak tu dem breda an sista dem iina wan nais wie we a-go mek dem fiil beta, aal wen dem beks an dem se tingz we dem no fi se.​—1 Tes. 5:14; Juob 6:3.

14-15. A ou di elda dem kyan du laik Ilaiyuu wen dem a chrai fi elp sumadi?

¹⁴ Se wan elda ier se wan sista we iina im kanggrigieshan sad bad, an im an wan neda elda go luk fi di sista fi osh ar an mek ar fiil beta. An wen dem de de a chrai fi elp di sista, shi staat fi se aal kain-a tingz we no mek no sens, an a se aalduo shi a go a di miitn dem an a go out iina sorvis shi stil no api. Wa yu tingk di elda fi du?

¹⁵ Di fos ting im waahn fi du a fain out wa mek shi fiil di wie ou shi fiil. An ef im a-go du dat, im afi lisn tu ar gud gud an fain out ef a fiil shi fiil se shi no dizorv fi Jeuova lov ar, ar a kaa shi “a fret bout laif” mek shi fiil dem kain-a wie de. (Luuk 21:34) Di sekan ting im waahn fi du a fi luk fi som sitn we im kyan big op di sista bout. Kaa wen yu tingk bout it, aalduo shi sad bad shi stil a go a miitn an a go out iina fiil sorvis. An afta im andastan wa riili a gwaan wid ar, di tord ting we im waahn fi du a fi yuuz di Baibl fi mek shi nuo fi shuor se Jeuova lov ar.​—Gya. 2:20.

NO TAP LORN FRAM DI SITN DEM WE RAIT DONG IINA DI BUK A JUOB

16. Wa wi kyan du fi gwaan lorn fram di sitn dem we rait dong iina di buk a Juob?

¹⁶ Wen wi riid di tuori bout wa did apm tu Juob, wi kyan lorn uol iip a tingz fram it! Laik iina di lesn bifuo da wan ya, wi no onggl lorn wa mek Gad a lou piipl fi sofa, bot wi lorn ou wi kyan eng aan an go chuu wen wi a sofa. An iina da lesn ya, wi lorn ou fi jraa op sumadi iina wan wie we a-go elp dem. An wi kyan du dat wen wi no fala di sitn dem we Juob chrii fren dem did du bot wi du it laik ou Ilaiyuu did dwi’it. So ef yu afi jraa op sumadi, it wuda gud ef yu go uova di sitn dem we yu lorn fram di buk a Juob. An ef a lang taim nou sins yu riid di buk a Juob, it wuda gud ef yu go bak an riid it agen, kaa yu a-go fain se di sitn dem we rait dong iina it kyan stil elp wi tide.