Du Laik Jeuova An Shuo Se Yu Ombl

1. Wen yu tingk bout ou ombl Jeuova bi, wa yu lov bout dat?

WEN yu tingk bout piipl we ruul an av powa, it luk laik se dem ombl tu yu? Nuo sa! Bot wen yu tingk bout it Jeuova we av aal a di powa, im ombl. (Sa. 113:5-8) An evriting we Jeuova du shuo se im ombl an notn we im du no shuo se im ful-a imself. So iina da lesn ya wi a-go luk pan fuor a di nais nais wiez dem we Jeuova av an ou dem shuo se im ombl. An wi a-go luk pan ou Jiizas du laik im Faada an shuo se im ombl tu. Wen wi luk pan dem sitn ya, it a-go elp wi fi get kluosa an kluosa tu Jeuova an elp wi fi si ou wi kyan du tingz muor an muor fi shuo se wi ombl jos laik im.

YU NO AFI FRIED FI TAAK TU JEUOVA

2. Wa Saam 62:8 tel wi bout Jeuova? (Luk pan di picha tu.)

² It no aalwiez iizi fi go taak tu piipl we ful-a demself. Kaa nof taim dem chriit piipl bad kaa dem fiil se dem beta dan dem an dat mek piipl no waahn fi av notn fi du wid dem. Bot a no so Jeuova tan! Kaa im ombl im tel wi fi kom an tel im evriting we a gwaan iina wi aat. (Riid Saam 62:8.) So jos laik wan faada we lov im pikni dem an tek im taim fi lisn wa dem a se, a siem so wen wi prie tu Jeuova im waahn fi ier wa riili a gwaan iina wi aat. Matarafak, a uol iip a prieya Jeuova av rait dong iina di Baibl, an wen wi luk pan dem prieya ya dem shuo wi se Jeuova waahn wi fi taak tu im. (Jash. 10:12-14; 1 Sam. 1:10-18) Bot wa wi fi du ef wi fiil laik se wi no gud inof fi go taak tu Jeuova?

3. Wa mek wi kyan nuo fi shuor se Jeuova waahn wi fi prie tu im aafn?

³ Aal ef yu fiil laik se yu no gud inof fi Jeuova lov yu, jos nuo se yu kyan stil prie tu im an mek im nuo ou yu fiil. An wi nuo dat kaa iina di tuori we Jiizas taak bout di bwai pikni we did laas, im mek wi nuo se Jeuova komiin laik di faada we im pikni did fiil laik se im no gud inof fi bi paat a di fambili agen. Bot a wa di faada did du wen im bwai pikni kom bak uom? Jiizas se wen di bwai faada si im, “im faada ron go og im op an kis im.” (Luuk 15:17-20) Jeuova komiin laik da faada de. Yu si wen Jeuova ier wi a prie fram wi aat kaa wi fiil bad bout sitn we wi du rang ar wi a wori wori op wiself bout sitn, kaa im ombl it mek im lisn gud gud tu evriting we wi a se siem taim. (Lam. 3:19, 20) Kaa Jeuova fiil it fi im sorvant dem wen dem prie tu im dem kain-a wie de, it komiin laik se im ron go tu dem fi osh dem an mek dem nuo se im lov dem. (Aiz. 57:15) Bot a ou Jeuova ‘ron tu wi’ tide? Muor taim im du dat wen im yuuz di elda dem ar wi fambili an fren dem we a sorv im tu, fi osh wi. (Jmz. 5:14, 15) An wi fi memba se Jeuova a elp wi iina dem wie ya kaa im waahn wi fi get kluosa an kluosa tu im.

4. A wa mek it weehn so iizi fi piipl go taak tu Jiizas?

⁴ Jiizas did du laik im Faada. Jiizas ombl jos laik im Faada. An kaaz a dat, wen im did de pan ort piipl neehn fried fi go tu im. An a das wai dem neehn fried fi kwestiyan im. (Maak 4:10, 11) An wen im aks dem fi tel im ou dem fiil bout sitn, dem neehn ich fi tel im ou dem did riili fiil. (Mat. 16:13-16) An wen dem did du sitn rang dem neehn fried a wa Jiizas wuda du tu dem, kaa dem nuo se im did kain an im wuda tek im taim wid dem. (Mat. 17:24-27) An kaa Jiizas did tan jos laik im Faada, im falara dem did get fi nuo uu Jeuova riili bi. (Jan 14:9) Dem did get fi si se Jeuova neehn komiin laik di Juu liida dem iina dem taim de, we did chriit di piipl dem rof an gwaan laik se dem beta dan dem. Bot Jiizas did ombl an waahn piipl fi kom taak tu im.

5. Wa mek wen wi ombl it mek it iiziya fi piipl kom taak tu wi?

⁵ A ou wi kyan du laik Jeuova? Wen wi wok aad fi ombl wiself, it mek it iiziya fi piipl kom taak tu wi. An wen wi ombl, wi naa go groj piipl fi we dem av an wi naa go ful-a wiself an no waahn fi paadn piipl, kaa ef a so wi stie nobadi naa go waahn fi bi wi fren. Bot ef wi ombl, it a-go mek wi chriit piipl nais an tek wi taim wid dem an redi fi paadn dem. An ef a dem wiez ya wi av, piipl a-go waahn fi bi wi fren. (Kol. 3:12-14) Muor dan enibadi els, di elda dem fi mek it iizi fi di breda an sista dem fi kom taak tu dem. Bot ef dem a-go du dat dem afi spen taim wid di breda an sista dem. So dat miin tu se, ef a no fi wan speshal riizn, dem a-go go a miitn a di Kindom Aal insted-a fi de pan Zoom an dem ting de. An wen dem kyan dwi’it dem fi mek shuor se dem go ous tu ous wid di breda an sista dem tu. Wen di breda an sista dem get fi nuo di elda dem beta, it a-go iiziya fi dem go taak tu dem an tel dem ou dem fiil wen dem a go chuu dem prablem dem.

JEUOVA NO AAD AN FAAS

6-7. Tel wi bout tuu a di taim dem wen Jeuova shuo se im no aad an faas wen im a diil wid im sorvant dem.

⁶ Wen piipl ful-a demself wen dem a diil wi ada piipl dem aad an faas. Bot kaa Jeuova ombl, wen im a diil wid piipl im no aad an faas, aalduo im aalwiez nuo di bes ting fi du. Tingk bout ou im did diil wid Muoziz sista we niem Miriyam. Shi an Ieran did a grombl grombl gens Muoziz, uu Jeuova did a yuuz fi liid im piipl dem. So wen Miriyam did du dat, a riili Jeuova shi did a disrispek. An kaaz a dat, Jeuova did beks wid Miriyam an im lik ar wid leprosi. Bot wen Ieran did beg Muoziz fi elp ar an Muoziz go beg Jeuova fi iil ar, a wa Jeuova did du? Jeuova shuo se im neehn aad an faas, kaa im neehn uol no aad-en an mek shi tan wid di leprosi we im lik ar wid. Bot kaa Jeuova ombl im du wa Muoziz se an mek shi get beta.​—Nom. 12:1-15.

⁷ Wen Jeuova did a diil wid King Ezikaiya, im shuo se im did ombl tu. Im did yuuz im prafit fi mek Ezikaiya nuo se im did a-go ded, bot Ezikaiya baal an beg Jeuova fi mek im get beta. So Jeuova lisn tu im an mek im liv fi fiftiin muor ier. (2 Ki. 20:1, 5, 6) Dis mek wi si se kaa Jeuova ombl, im fiil it fi piipl an im no uol aad-en.

8. Wa an wa shuo se Jiizas no aad an faas? (Maak 3:1-6)

⁸ Jiizas did du laik im Faada. Wen Jiizas kuda du gud tingz fi piipl wen im de pan ort, im neehn ich fi dwi’it. Laik im wuda iil piipl pan di Sabat die, aalduo di Juu liida dem neehn tingk se im fi a du dat. Bot Jiizas neehn tan laik dem, im neehn aad an faas. (Riid Maak 3:1-6.) An rait ya nou Jiizas a di ed fi di kanggrigieshan an im stil no aad an faas. Laik wen sumadi iina di kanggrigieshan sin bad, im tek taim wid dem an im gi dem taim fi tap du di rang sitn dem we dem a du an staat fi du we rait agen.​—Rev. 2:2-5.

9. Ou wi kyan shuo se wi no aad an faas iina di wie ou wi tingk bout tingz an ou wi diil wid piipl? (Luk pan di picha dem tu.)

⁹ A ou wi kyan du laik Jeuova? Wi fi ombl wiself an du laik Jeuova an no aad an faas iina di wie ou wi tingk bout tingz an ou wi diil wid piipl. (Jmz. 3:17) Laik ef yu a wan mada ar wan faada, yu naa go ekspek yu pikni dem fi du muor dan wa dem kyan du, aalduo yu naa go lou dem fi du evriting we dem waahn fi du. An wen wi riid di tuori bout Jiekob a Jenisiz 33:12-14, wi si se im neehn waahn im pikni dem fi du muor dan wa dem kuda du. Wen di mada an faada dem ombl an no aad an faas, it wi elp dem no fi fiil laik se wan pikni fi aalwiez a du laik we di eda wan a du. An di elda dem waahn fi shuo se dem no aad an faas tu. Wan wie dem kyan du dat, a wen taim dem de iina wan eldaz miitn an di muos a dem agrii se a so sitn fi go, an dem naa brok no laa, di wan dem we no agrii no fi uol no aad-en. (1 Tim. 3:2, 3) An aal ef wi no si tingz di wie ou sumadi els si’it, wi fi chrai fi andastan wa mek dem fiil di wie ou dem fiil bout sopm. (Ruo. 14:1) So aal a wi iina di kanggrigieshan fi wok aad fi mek piipl si se wi no aad an faas.​—Fil. 4:5.

JEUOVA TEK TAIM WID PIIPL

10. Tel wi bout som a di taim dem wen Jeuova did tek taim wid piipl.

¹⁰ Nof taim kaa piipl ful-a demself dem no laik fi wiet pan nobadi. Bot a no so Jeuova stie, evriting we im du shuo se im tek taim wid piipl. Laik iina Nowa taim, Jeuova se im wuda wiet 120 ier bifuo im get rid a di wikid piipl dem. (Jen. 6:3) An kaaz a dat, Nowa did get di taim fi gruo im pikni dem an fi im an im fambili fi mek di aak. An afta dat, wen Iebriyam did a aks Jeuova ienjel bout Sadam an Gomaro, di ienjel did tek im taim wid Iebriyam. Bot ef a sumadi we proud, dem mait-a did se, “A uu yu tingk yu bi bout yu a kom kwestiyan kwestiyan mi, iihn?” Bot kaa di ienjel did du laik Jeuova im did tek im taim wid Iebriyam.​—Jen. 18:20-33.

11. Bies pan 2 Piita 3:9, a wa mek Jeuova stil a tek im taim wid piipl?

¹¹ Jeuova stil a shuo se im a tek taim wid piipl. Im a wiet pan di taim we im plan fi get rid a wikid piipl, an im a wiet “kaa im no waahn fi kil aaf nobadi. Bot wa im riili waahn a fi evribadi ton we fram dem sin an staat du wa rait.” (Riid 2 Piita 3:9.) An kaa Jeuova tek im taim wid piipl, uol iip a miliyan a piipl a get kluos tu im an a sorv im. An wi wel waahn uol iip muor miliyan a piipl fi kom sorv im tu. An wi nuo se Jeuova naa go aalwiez a wiet a galang a galang so. Aalduo im lov piipl, im naa go aalwiez a mek piipl a du we dem waahn fi du. So dat mek wi nuo fi shuor se im naa go mek wikidnis a gwaan fi eva.​—Aba. 2:3.

12. A ou Jiizas shuo se im a du laik Jeuova an a tek taim wid piipl?

¹² Jiizas did du laik im Faada. Fi uol iip a touzn a ier, Jiizas a tek im taim wid piipl jos laik Jeuova. Im si Sietan a tel lai pan Jeuova an pan di piipl dem we a du wa rait. (Jen. 3:4, 5; Juob 1:11; Rev. 12:10) An im si uol iip a piipl a sofa tu, so im mos wel waahn fi si di taim wen im kyan go get “fi mash op di Devl wok.” (1 Jan 3:8) Bot a wa mek Jiizas a wiet fi Jeuova tel im wen fi get rid a aal a di wikid sitn dem we Sietan du? Wel fi wan ting Jiizas ombl, im nuo se a Jeuova a di wan we disaid wen di worl a-go don.​—Aks 1:7.

13. A ou Jiizas did shuo se im tek im taim wid im falara dem, an a wa mek im dwi’it?

¹³ Wen Jiizas did de pan di ort, im did tek im taim wid im falara dem tu. Laik wen dem aalwiez a aagyu aagyu bout wich wan a dem av di tap-a-tap pozishan, Jiizas neehn gi op pan dem. Insted-a dat, im gwaan tek im taim wid dem. (Luuk 9:46; 22:24-27) Im did nuo se afta a wail dem wuda lorn fi ombl demself. Yu fain se somtaim yu du di siem ting we yu no fi du uova an uova? Ef dat apm tu yu, yu no api fi nuo se di King we a ruul uova yu ombl an tek im taim wid piipl?

14. Wa wi fi du ef wi waahn fi tek taim wid piipl laik Jiizas?

¹⁴ A ou wi kyan du laik Jeuova? Wen wi wok aad fi tingk laik ou Krais Jiizas tingk, it a-go elp wi fi tingk di wie ou Jeuova tingk an fi du tingz laik im. (1 Kor. 2:16) Ef wi waahn fi fain out ou Jiizas tingk bout tingz, wi afi riid Matyu, Maak, Luuk an Jan. An den wi niid fi tek di taim fi tingk bout wa wi riid an si wa it tiich wi bout ou Jiizas tingk bout tingz. An afta dat, wi niid fi aks Jeuova fi elp wi fi tingk bout tingz iina wan ombl wie laik Jiizas. Di muor wi wok aad fi tingk laik Jiizas, a di muor wi a-go du laik Jeuova an a di muor wi a-go shuo se wi a tek taim wid wiself an wid wi breda an sista dem.​—Mat. 18:26-30, 35.

JEUOVA TEK NUOTIS A DI PIIPL DEM WE OMBL

15. Ou Jeuova mek wi si se im du wa Saam 138:6 se?

¹⁵ Riid Saam 138:6. It riili nais fi nuo se Jeuova we av di tap-a-tap pozishan iina evn an pan ort a luk out fi di wan dem we ombl! Fi uol iip a ier nou, Jeuova a big op piipl we ada piipl mait-a fiil se no wot notn. An wi mait-a nat iivn a tingk bout som a dem piipl ya, bot Jeuova mek shuor se wa dem did du did rait dong iina di Baibl. Laik Jeuova yuuz Muoziz fi rait bout wan nors we did niem Debra. Shi did wok iina Aizak an Jiekob ous fi bout 125 ier. Aalduo wi no nuo nof bout da uman ya, Jeuova mek wi nuo iina di Baibl umoch di piipl dem we shi did wok wid did lov ar. (Jen. 24:59; 35:8, ftn.) An lang afta dat, Jeuova did mek wan shepad bwai we niem Dievid ton king iina Izrel. (2 Sam. 22:1, 36) An likl afta Jiizas baan, Jeuova big op som ombl shepad an mek dem bi di fos wan dem fi nuo se Jiizas did baan iina Betliyem. (Luuk 2:8-11) An wen Mieri an Juozif did go a Gad ous, Jeuova did big op Simiyan an Ana we did op iina iej an mek dem get fi si im bwai pikni. (Luuk 2:25-30, 36-38) So wi si se “iivn duo Jeuova so ai, im tek nuotis a piipl wen dem ombl!”

16. Wa Jiizas did du fi shuo se im chriit piipl laik ou im Faada chriit dem?

¹⁶ Jiizas did du laik im Faada. Jos laik im Faada, Jiizas tek nuotis a di piipl dem we ombl. Laik di piipl dem we im tiich di chuut bout Gad govament, a piipl we did a ‘jos aadineri piipl we neva go a no skuul go lorn.’ (Aks 4:13; Mat. 11:25) An wen Jiizas did mek sik piipl get beta, im neehn onggl jos mek dem get beta bot im did mek dem fiil gud bout demself agen. (Luuk 5:13) Di nait bifuo Jiizas ded, im du di wok we wan sorvant wuda du an wash im falara dem fut. (Jan 13:5) An bifuo im go baka evn, im gi aal a im falara dem dem taim de, an di wan dem we a fala im nou, di bes wok we enibadi kuda eva du, an dat a fi tiich piipl so dat dem kyan get fi liv fi eva!​—Mat. 28:19, 20.

17. Wa wi kyan du fi shuo se wi lov an rispek ada piipl? (Luk pan di picha tu.)

¹⁷ A ou wi kyan du laik Jeuova? Wi shuo se wi lov an rispek piipl wen wi tel dem bout di gud nyuuz, no mata wich paat dem kom fram ar di kola a dem skin ar umoch skuulin dem get. An wi big op wi breda an sista dem wen wi no gwaan laik se wi beta dan dem, no mata di sitn dem we wi kyan du ar di kain-a wok we wi get fi du fi Jeuova. (Fil. 2:3) An wen wi ombl wiself an aalwiez put wi breda an sista dem bifuo wiself an shuo dem se wi lov dem an av nof rispek fi dem, it mek Jeuova api.​—Ruo. 12:10; Zef. 3:12.

18. Wa mek yu waahn fi ombl yuself laik Jeuova?

¹⁸ Wen wi wok aad fi ombl wiself laik Jeuova, it mek it iizi fi ada piipl kom taak tu wi. An it mek wi no aad an faas wen wi a diil wid piipl an it elp wi fi tek wi taim wid dem tu. An wi a-go shuo se wi lov piipl an rispek dem laik Jeuova. An wen wi wok aad fi du dem sitn ya, it a-go mek wi get kluosa an kluosa tu Jeuova wi Gad we ombl an it a-go mek evri singgl wan a wi wot nof tu im!​—Aiz. 43:4.