Unu Mait-A Op Iina Iej Bot Unu Stil Wot Nof Tu Di Kanggrigieshan

Miebi yu kuda du wol iip a tingz wen yu did yongga tu bot nou yu kyaahn du dem agen kaa yu op iina iej. An iivn duo yu mait-a a sorv Jeuova fi wol iip a ier, wen yu luk bak pan wa yu yuus tu du wen yu did yongga an mach it op tu wa yu a du ya nou, yu mait-a fiil sad kaa yu fiil se yu naa gwaan wid notn. Ef a so yu fiil, wa kyan elp yu fi fiil api?

WA JEUOVA WAAHN YU FI DU

Aks yuself, ‘Wa Jeuova waahn mi fi du?’ Yu wi fiil gud fi nuo wa Dyuutaranami 6:5 se, it se: “Yu fi lov Jeuova yu Gad wid aal a yu aat, an wid aal a yu suol, an wid aal a yu chrent.”

Da vors de shuo wi se Jeuova waahn wi fi du di bes we wi kyan du fi sorv im. So wi no fi mach op wa ada piipl a du wid wa wi kyan du. An wi no fi mach op wa wi kuda du wan taim wid wa wi kyan du ya nou.

Tingk bout dis: Wen yu did yongga, a wa yu did a du fi Jeuova? Yu mait-a did a du di bes we yu kuda du fi im dem taim de, no so? An nou yu mait-a a du di bes we yu kyan du iina yu uol iej. So ef yu luk pan tingz da wie de, yu kyan si se yu did a du di bes we yu kuda du fi Jeuova wen yu did yongga, an yu stil a du di bes we yu kyan fi im ya nou tu.

YU KYAN TIICH ADA PIIPL BOUT WA YU LORN IINA LAIF

Tingk bout dis tu: Insted-a fi a onggl tingk bout wa yu kyaahn du agen, tingk bout di wol iip a tingz dem we yu kyan du nou fi elp ada piipl nou dat yu op iina iej. Yu si kaa yu op iina iej, yu kyan du som sitn nou we yu kudn du wen yu did yongga. Laik yu kyan du dis:

Tel ada piipl bout wa yu lorn fram wa yu go chuu iina laif. Tingk bout dem skripcha ya:

King Dievid: “Mi uol ya nou, an fram mi a lili bwai, mi neva eva si sumadi we a du wa rait afi a fen fi demself, ar si dem pikni a beg fuud.”​—Sa. 37:25.

Jashwa: “So ier wa mi a se ya nou! Mi nuo se mi suun ded, an unu nuo fi shuor se aal a di gud sitn dem we Jeuova yu Gad pramis se im a-go du fi unu, im dwi’it. Evriting apm jos laik ou im se it wuda apm. Im no taak notn we no go so.”​—Jash. 23:14.

Miebi yu did se sitn laik wa Dievid an Jashwa se wen yu did yongga fi elp push sumadi fi gwaan sorv Jeuova. An yu si kaa dem man de did a sorv Jeuova fi wol iip a ier, nof a di ting dem we dem taak bout a tingz we dem wuda si an ier fi demself. So wen dem tel piipl bout dem ting de, piipl wuda muor fi biliiv dem an nuo se a di chuut dem a taak.

Ef yu a sorv Jeuova fi wan lang taim, yu kyan taak bout wa Jeuova du fi yu an fi ada piipl tu. Yu kyan memba wan taim wen yu si wen Jeuova elp im piipl dem iina wan speshal wie? Ef yu memba notn laik dat, tel ada piipl bout it! Wen dem ier bout di nais ting dem we Jeuova du fi im piipl dem den dat kyan elp fi push dem fi gwaan sorv Jeuova.​—Ruo. 1:11, 12.

Wan neda wie we yu kyan bil op di breda an sista dem an bil op yuself tu, a wen yu go a di miitn dem a di Kindom Aal evritaim wen yu kyan go. Connie we wi ier fram aredi se: “Wen mi go a di miitn dem, mi kyaahn fiil sad kaa di breda an sista dem no tap shuo mi se dem lov mi. Mi gi dem som likl prezent fi mek dem nuo se mi tangk dem fi wa dem du fi mi. An mi chrai fi go a fiil sorvis an dem ting de wid dem tu.”

JEUOVA API WID AAL A WA YU DU FI IM

Di Baibl tel wi bout nof piipl we kudn du aal a wa dem waahn fi du fi Jeuova bot Jeuova did stil lov dem. Tingk bout Simiyan, we a did wan Izrelait we did op iina iej wen Jiizas did baan. Wen im yuus tu go a Gad ous, im wuda si di yong man dem a du som impuotant wok. An im mait-a did tingk se Jeuova neehn av no yuus fi im kaa im kudn du we dem yong man de did a du agen. Bot tu Jeuova, Simiyan did a ‘wan gud sumadi we riili did a liv fi im.’ An Jeuova mek im get fi si di biebi Jiizas. Jeuova aal mek im taak se a Jiizas wuda bi di Mesaiya! (Luuk 2:25-35) So wi si klier klier se Jeuova neehn did a luk pan it se Simiyan did uol, bot im did si im az wan man we chos iina im uol iip an se “di uoli spirit did de wid im.”

Iivn duo yu kyaahn du we yu yuus tu du fi Jeuova agen, yu kyan stil nuo fi shuor se eniting we yu kyan du fi im rait ya nou, wot nof tu im. Wen Jeuova luk pan wa yu did gi op fi du wa yu kyan du fi im, im “no bizniz wid umoch yu av ar no av. Wa mata a umoch yu waahn fi gi outa we yu av.”​—2 Kor. 8:12.

So jos du wa yu kyan du. Laik yu kyan tingk bout di difrant difrant wie dem we yu kyan priich, iivn ef yu kyaahn priich fi tuu lang. Miebi yu kuda rait sitn nais pan wan kyaad ar kaal di breda an sista dem fi bil dem op. Dem likl ting ya wi shuo di breda an sista dem se yu lov dem, speshali wen dem si se it a kom fram sumadi we a sorv Jeuova fi wol iip a ier.

Som a di wan dem we op iina iej kyaahn muuv roun an du sortn an sortn tingz agen. Laik luk pan wa did gwaan wid wan sista we kom fram Iis Afrika iina di paat we niem “Shi Yuuz Gad Wod Fi Elp Siev Sumadi Laif.”

Memba se kaa yu a sorv Jeuova wid aal a yu aat an yu a stik tu im fi wol iip a ier, dat kyan push di ada breda an sista dem fi du di siem ting. An kaa yu a eng aan an naa gi op, aalwiez memba se ‘Gad fier, im naa go figet wa yu du. Im naa figet ou yu shuo umoch yu lov im wen yu elp di breda an sista dem we biliiv iina Gad, an ou yu stil a elp dem.’​—Iib. 6:10.

GWAAN DU WE YU KYAN DU FI ELP ADA PIIPL

Piipl we stodi bout di wan dem we op iina iej se wen dem wan de elp ada piipl dem kip beta elt, dem tingk beta, an dem liv langga.

Bot memba se jos kaa yu a du gud tingz fi ada piipl dat no miin se yu naa go get sik an fiil no pien, kaa yu a get op iina iej. A onggl Gad Kindom kyan get rid a sin we kaaz piipl fi get uol an ded.​—Ruo. 5:12.

Bot wen yu du wa Jeuova se yu fi du rait ya nou, laik fi elp ada piipl fi get fi nuo im, dat kyan elp yu fi get chrangga iina wa yu biliiv iina, an elp yu fi kip elti tu. Ef yu op iina iej, jos memba se evriting we yu du fi Jeuova wot nof tu im. An di kanggrigieshan lov yu kaa yu a eng aan an naa gi op.