Ruut An Nayuomi

Wan taim wen fuud did shaat iina Izrel, wan uman niem Nayuomi lef de an go liv a Muowab wid ar ozban an dem tuu bwai pikni dem. Afta a taim, Nayuomi ozban ded. Ar son dem did marid tuu uman we kom fram Muowab we niem Ruut an Arpa. Bot sad fi se, afta a taim Nayuomi bwai pikni dem ded tu.

Wen Nayuomi ier se fuud neehn shaat a Izrel agen, shi disaid fi gu bak de. Ruut an Arpa did disaid fi go wid ar, bot pan di wie, Nayuomi tel dem se: ‘Unu did chriit mi son dem gud an unu chriit mi gud tu. Bot mi waahn unu fi marid agen. So unu gu baka Muowab.’ Dem se: ‘Wi no waahn fi lef yu. Wi lov yu ino!’ Bot Nayuomi neva tap tel dem fi gwaan. So Arpa lef an gu baka ar yaad, bot Ruut tan wid Nayuomi. Nayuomi tel ar se: ‘Si’it de, Arpa gaan bak uom an gaan worship ar gad dem. Gwaan wid ar an gu baka yu mada yaad.’ Bot Ruut tel ar se: ‘Mi naa lef yu. Yu si fi yu piipl, dem a-go bi fi mi piipl tu an fi yu Gad a-go bi fi mi Gad.’ Ou yu tingk Nayuomi did fiil wen Ruut se dat?

Wen Ruut an Nayuomi kech a Izrel, piipl did jos staat riip di baali we dem did plaant. Wan die, Ruut ga’a wan fiil go kalek som a di grien dem we did lef bak. Da fiil de a did fi wan man niem Buowaz, Rieyab bwai pikni. Im ier se Ruut kom fram Muowab, an ou shi did a stik tu Nayuomi. So im tel di man dem we wok fi’im fi lef som ekschra grien iina di fiil so shi kyan get it wen shi kom.

Da sed iivnin de, Nayuomi aks Ruut se: ‘A uufa fiil yu go wok iina tide?’ Ruut se: ‘A wan man we niem Buowaz uon it.’ Nayuomi tel ar se: ‘Yu nuo se im an mi ozban a fambili. Gwaan wok wid di ada yong uman dem iina da fiil de. Yu a-go aarait de-so.’

Ruut did wok iina Buowaz fiil til dem don riip di baali. Buowaz did si ou Ruut wok aad an im kuda si se shi a wan gud uman. Yu si iina dem taim de, ef wan man ded an im neehn get no bwai pikni, wan a di man dem iina im fambili wuda marid im waif we im ded lef. So Buowaz marid Ruut. Dem av wan son niem Uobed. A im did en op bi King Dievid granfaada. Nayuomi fren dem did wel api fi ar. Dem se: ‘Jeuova gi yu Ruut an luk ou shi gud tu yu, an nou yu av wan granson. Mek wi big op Jeuova fi aal we im du!’