Janatan Did Briev An Im Did A Wan Gud Fren

King Saal fos bwai did niem Janatan. Im did briev an kuda fait gud. Dievid did se Janatan chrangga dan wan laiyan an faasa dan wan iigl. Wan die, Janatan si 20 Filistiin suoja pan wan il. Im se tu di man we did a kyari im aami kluoz an ting se: ‘Di onggl wie wi a-go rosh dem a ef Jeuova gi wi wan sain. So ef di Filistiin dem tel wi fi kom fait dem, den wi nuo se a dat wi fi du.’ Di Filistiin dem shout out tu dem an se: ‘Unu kom op ya-so kom fait wi!’ So di tuu a dem klaim op pan di il an fait dem an win.

Kaa Janatan did a Saal fos bwai pikni, a im did fi bi king afta im. Bot Janatan did don nuo se a Dievid Jeuova pik fi bi di neks king iina Izrel, bot im neehn bad main im. Matarafak, Janatan an Dievid did ton gud gud fren. An dem pramis se dem a-go aalwiez luk out fi dem wan aneda. Fi shuo umoch im riet Dievid, Janatan gi’im im ruob, im suod, im buo, an im belt.

Wan a di taim wen Dievid did a ron we fram Saal, Janatan go tu im an se: ‘Briev op yuself an gwaan tan op chrang, kaaz a yu Jeuova pik fi bi king. Aal mi faada nuo dat tu.’ Yu wudn waahn wan gud fren laik Janatan?

A nof taim Janatan elp Dievid, aal wen im kuda en op luuz im laif. Janatan did nuo se King Saal did waahn kil Dievid, so im se tu im faada se: ‘Ef yu kil Dievid, a sin yu wudaana sin, kaa im no du notn rang.’ Wen Saal ier dis, im blod did a bwail tu ou im beks wid Janatan. Som ier afta dat, Saal an Janatan go fait wan waar an di tuu a dem ded iina it.

Afta Janatan ded, Dievid go sorch fi Janatan son we niem Mefiboshet. Wen im fain im, Dievid tel im se: ‘Mi an yu faada did a brejrin, an im did gud tu mi. So mi a-go tek kier a yu fi di res a yu laif. Yu a-go liv iina mi palis an yu a-go sidong an nyam fuud wid mi a fi mi tiebl.’ So Dievid neva figet bout im fren Janatan.