Som Torbl Ortkwiek Mash Op Torki An Siriya—Wa Di Baibl Av Fi Se Bout Dis?

SITN CHIENJ: Febiweri 10, 2023

Pan Torzde, Febiweri 9, 2023, dis a wa wi fain out: A muo dan 20,000 piipl dem fain ded sins di ortkwiek lik Torki an Siriya pan Monde. A kopl touzn piipl wel get ort an a uol iip muor dan dat no av no we fi liv kaaz a di ortkwiek.

Di Jeuova Witnis dem set op tuu Dizaasta Riliif Komitii we a sorch fi piipl an a du wa dem kyan du fi elp dem. (Gyalieshan 6:10) Som bredaz fram di branch afis we de iina di ieriya riich wich paat di ortkwiek did gwaan kwik kwik, iivn duo di taim did so kuol an it neehn iizi fi dem kech de. Bot dem de de a elp di breda dem we go chuu di ortkwiek fi tan op chrang an fi kip kluos tu Gad. (1 Piita 5:2) Wi a-go mek unu nuo wa a gwaan wid di wok we dem a du fi elp dem pan di paat a di websait we niem Newsroom.

Di Baibl mek wi nuo se “Jeuovaa de de fi di piipl dem we dem aat a tier op insaida dem, an im siev di wan dem we fiil laik dem taiyad an waahn gi op.” (Saam 34:18) Dem sitn ya we bies aafa di Baibl kyan elp yu fi diil wid aal a di pien an schres we yu a go chuu dem taim ya.

Ef sumadi fi yu ded, yu kyan fain som tingz we kyan elp yu iina di vidiyo we niem Sitn Fi Osh Di Wan Dem We Sumadi Fi Dem Ded.
Yu kyan fain som tingz iina di Baibl we yu kyan yuuz fi elp yu pikni dem so dat dem kain-a nyuuz ya no fraitn dem iina di sitn we niem “Help Your Children Deal With Disturbing News Reports.”

Pan Monde, Febiweri 6, 2023, som torbl ortkwiek lik Torki an Siriya.

“Pan Monde wan big big ortkwiek kil aaf muo dan 3,700 piipl iina paat a Torki an paat a Siriya tu. Kaa di taim kuol bad, it did mek it aad fi di wan dem we get ort an di wan dem uufa ous mash op. An di kuol weda mek it aad fi di wan dem we did a chrai elp dem wan de tu.”—Reuters, Febiweri 6, 2023.

Wen dem kain-a sitn de apm, wi fiil it fi chuu. Dem taim ya wi kyan luk fi get elp fram Jeuova. Im a “di Gad we elp piipl wen dem niid it an we osh dem wen dem sad.” (2 Korintiyan 1:3) Im gi wi im Wod ‘fi elp push wi fi tan op chrang an fi gwaan luk fi get di sitn dem we im pramis wi.’—Ruoman 15:4.

Dis a wa wi lorn fram di Baibl:

Wa it tel wi bout ortkwiek.
We wi kyan fain tingz we kyan osh wi an mek wi fiil beta.
Ou Gad a-go get rid a aal a di sitn dem we mek piipl sofa.

Fi fain out wa di Baibl av fi se bout dem tapik ya, riid dem ya:

“Great Earthquakes—What Did the Bible Prophesy?”
“Where Can I Find Hope?”
“God Will Soon End All Suffering”

a Gad niem a Jeuova.—Saam 83:18.