Jiizas A Di Liida Fi Di Priis Dem We Fiil It Fi Piipl

1-2. (a) Wa mek Jeuova did sen im Bwai Pikni kom a ort? (b) Wa wi a-go luk pan iina da lesn ya? (Iibruu 5:7-9)

BOUT 2,000 ier ago, Jeuova sen im preshos Bwai Pikni fi kom a ort. Wa mek im du dat? Wan riizn a fi kom ya fi kom ded fi wi so dat wi kuda get frii fram sin an get di chaans fi liv fi eva, an fi get rid a aal a di prablem dem we Sietan a kaaz. (Jan 3:16; 1 Jan 3:8) Jeuova did nuo se wa Jiizas did a-go go chuu pan di ort did a-go elp im fi bi wan gud Liida fi di priis dem we fiil it fi piipl. Jiizas ton di Liida fi di priis dem afta im get baptaiz iina 29 C.E.a

² Iina da lesn ya, wi a-go luk pan ou wa Jiizas did go chuu wen im de pan di ort elp im fi ton di bes Liida fi di priis dem we fiil it fi piipl. An dis a sitn impuotant we wi niid fi nuo kaa a so it a-go elp wi fi prie tu Jeuova an get kluosa tu im, speshali wen wi sad kaa wi du sitn rang.​—Riid Iibruu 5:7-9.

GAD PRESHOS BWAI PIKNI KOM A ORT

3-4. A wa an wa Jiizas did afi gi op fi kom a ort, an ou laif did stie pan ort fi im?

³ Fi nof a wi, tingz aalwiez a chienj op iina wi laif, laik wi afi muuv we fram somwe we wi lov an muuv we fram wi fren an fambili dem tu. An wen dat apm, it no iizi fi diil wid. Bot nobadi no go chuu wol iip a chienj iina dem laif laik we Jiizas did afi go chuu. Iina evn, Jiizas did a di fos ienjel we Jeuova mek an im did a di muos impuotant wan tu. Im did aalwiez api kaa im did eva a wok wid im Faada. An im Faada did lov im bad. (Sa. 16:11; Pr. 8:30) Bot Filipiyan 2:7 mek wi nuo se Jiizas did “gi op evriting” we im did av iina evn fi kom a ort kom liv mongks piipl we no porfek.

⁴ Tingk bout di fos kopl ier a Jiizas laif wen im did de pan ort. Im did baan iina wan fambili we puor, an wi nuo dis kaa im fambili kuda onggl gi op tuu sumaal bod az wan sakrifais afta im did baan. (Liv. 12:8; Luuk 2:24) An wen wikid King Erad did ier se Jiizas did baan, im did chrai fi kil im. So fi siev Jiizas laif, im fambili did afi ron we go a Iijip fi wan likl wail. (Mat. 2:13, 15) Di laif we Jiizas liv pan ort did difrant fram di laif we im liv iina evn.

5. A wa Jiizas did si wen im de pan ort, an a ou dat elp im fi bi wan gud Liida fi di priis dem? (Luk pan di picha tu.)

⁵ Wen Jiizas did de pan ort, im si wol iip a piipl a sofa roun im. Im nuo ou it fiil fi si sumadi we im lov ded, laik im stepfaada Juozif. An wen Jiizas did a go roun an priich, im si piipl wid fasi-fasi skin, blain piipl, piipl we kripl, an mada an faada uu did av pikni we ded. Wen im si aal a dat, im fiil it fi dem. (Mat. 9:2, 6; 15:30; 20:34; Maak 1:40, 41; Luuk 7:13) Ye man, a chuu, Jiizas did si piipl a sofa wen im did de a evn, bot wen im did de pan di ort im kuda riili andastan wa piipl a go chuu. (Aiz. 53:4) Jiizas get fi andastan ou difrant difrant tingz we did a gwaan wid piipl mek dem sofa an wa mek dem mait-a fiil sortn an sortn wie. An jos laik ada piipl, Jiizas did get taiyad, fiil schres out, an sad.

JIIZAS SHUO SE IM FIIL IT FI PIIPL

6. Wa wi lorn fram wa Aizaiya did rait dong bout Jiizas? (Aizaiya 42:3)

⁶ Wen Jiizas did a priich pan ort, im did shuo se im fiil it fi di piipl dem we ada piipl chriit bad. An wen im did du dat, im did a mek wa Jeuova did mek Aizaiya rait dong kom chuu. Di paat a di Baibl we rait iina Iibruu taak bout di piipl dem we rich an powaful an se dem komiin laik wan gyaadn we aalwiez a get waata ar laik som taal chrii. (Sa. 92:12; Aiz. 61:3; Jer. 31:12) Bot di wan dem we puor an we piipl chriit bad komiin laik graas we piipl tep op pan we suun brok aaf, ar dem wuda komiin laik wan lamp we bieli a lait op. (Riid Aizaiya 42:3; Mat. 12:20) Jeuova mek Aizaiya rait dong dem sitn ya fi mek wi si umoch Jiizas wuda fiil it fi di piipl dem we ada piipl chriit bad an fi shuo umoch im lov dem.

7-8. A ou Jiizas did mek wa Aizaiya rait dong kom chuu?

⁷ Matyu did shuo se Jiizas mek we Aizaiya did rait dong kom chuu wen im se: “Im wuda neva pap out no graas we luk laik it suun brok aaf, ar out out wan lamp we bieli a lait op.” Som a di mirikl dem we Jiizas did du did elp di wan dem we did fiil laik graas we piipl tep op pan an we suun brok aaf, an di wan dem we did fiil laik wan lamp we bieli a lait op. Wan a dem sumadi de a did wan man we did av fasi-fasi skin. Da man de mos did fiil laik se a it dat fi im, an dat im naa go eva get fi de roun im fambili an fren dem agen. (Luuk 5:12, 13) An den yu did av wan man we def an kudn taak gud. Tingk bout ou da man de mos did fiil wen im si piipl a taak tu dem wan aneda bot im kyaahn andastan we dem a se. (Maak 7:32, 33) Bot a no de-so it don.

⁸ Wen Jiizas did de pan di ort, nof a di Juu piipl dem yuus tu biliiv se wen sumadi sik bad, a ponish dem a get ponish fi dem sin dem ar fi di bad sitn dem we dem mada an faada du. (Jan 9:2) Kaa som piipl yuus tu biliiv dem sitn de, dem yuus tu chriit dem piipl de bad, an dem yuus tu mek dem fiil laik dem no wot notn. Wa Aizaiya did se bout Jiizas did kom chuu fi chuu kaa Jiizas did mek sik piipl get beta an mek dem si se Gad kier bout dem. Wa dis a tiich wi bout Jiizas?

9. Ou Iibruu 4:15, 16 shuo se wi Liida fi di priis dem, Jiizas, fiil it fi piipl?

⁹ Riid Iibruu 4:15, 16. No mata wa wi a go chuu, wi kyan aalwiez nuo fi shuor se Jiizas a-go fiil it fi wi. Wa it miin fi fiil it fi sumadi? Wen yu fiil it fi sumadi yu a-go du aal we yu kyan du fi elp da sumadi de we yu si a sofa. Di Griik wod we di Baibl yuuz fi mek wi nuo wa it miin fi ‘fiil it fi sumadi’ mek wi nuo se it komiin laik se dem a go chuu di siem ting we da sumadi de a go chuu. An Paal did yuuz di siem Griik wod a Iibruu 10:34 fi shuo se im fiil it fi di wan dem we did de iina prizn. Wen wi riid iina di Baibl bout ou Jiizas did elp piipl, wi kyan si se im did riili fiil it fi dem. Im neehn kyuor di piipl dem kaa im did afi dwi’it, im dwi’it kaa im did kier bout dem an im did waahn fi dwi’it. Laik wen im did kyuor di man wid di fasi-fasi skin, im neehn afi toch im, bot im did waahn fi dwi’it. An dat mait-a did di fos taim sumadi a toch da man de iina wol iip a ier. An wen Jiizas did a elp di man we def, im tek im we fram di kroud an kya im go somwe we nobadi no de an iil im de-so. An wen wan Farisii man did a chat bout di uman we did yuuz ar yai waata fi wash Jiizas fut an ar ier fi jrai it aaf, Jiizas did jraa im op fi it, speshali laik ou di uman did tap du di bad sitn dem we shi yuus tu du. (Mat. 8:3; Maak 7:33; Luuk 7:44) Jiizas neva did ton im bak pan di piipl dem we did sik ar we sin bad. Insted-a dat, im did waahn dem fi kom tu im so dat im kuda shuo dem se im lov dem an kier fi dem. An siem wie laik ou Jiizas did fiil it fi dem piipl de, wi kyan nuo fi shuor se a di siem wie im fiil it fi wi tu.

WI A DU DI SIEM TING LAIK WI LIIDA FI DI PRIIS DEM

10. Wa an wa di de fi elp di def piipl dem an di blain piipl dem fi jraa kluosa tu Jeuova? (Luk pan di picha dem tu.)

¹⁰ Kaaz wi waahn fi du laik Jiizas, wi chrai aad fi shuo piipl se wi lov dem an fiil it fi dem. (1 Pii. 2:21; 3:8) Wi kyaahn iil def piipl an blain piipl, bot wi kyan elp dem fi jraa kluosa an kluosa tu Jeuova. Laik wi av wi buk an pamplet dem iina muor dan 100 difrant difrant sain langwij. An fi elp di wan dem we blain an kyaahn si gud, wi av di buk an pamplet dem iina briel iina muor dan 60 difrant difrant langwij. An iina muor dan 100 difrant difrant langwij, di vidiyo dem av sumadi we a taak bout wa a gwaan iina dem fi elp dem wan de tu. Aal a dem ting ya elp di wan dem we def an di wan dem we blain fi get kluosa an kluosa tu Jeuova an im Bwai Pikni, Jiizas.

11. Ou Jeuova aaganaizieshan a du laik Jiizas an a mek shuor se no mata we piipl kom fram dem kyan ier di gud nyuuz? (Aks 2:5-7, 33) (Luk pan di picha dem tu.)

¹¹ Jeuova aaganaizieshan wok aad fi elp piipl no mata we dem kom fram fi get kluosa an kluosa tu Jeuova. Memba se afta Jiizas did kom bak alaiv im did gi im falara dem we did de iina Jeruusilem pan di die a Pentikas, di uoli spirit fi mek ada piipl ier di gud nyuuz iina “fi dem uona langwij.” (Riid Aks 2:5-7, 33.) An a dat Jeuova aaganaizieshan du nowadiez. It elp di piipl dem we chat di difrant difrant langwij dem fi get fi nuo Jeuova. An a das wai wi buk an pamplet dem de iina muor dan 1,000 difrant difrant langwij. Som a dem langwij ya, a jos likl bit a piipl chat dem. Laik iina Naat an Sout Amerika a likl bit a piipl chat di Amarindiyan langwij dem. Bot wi buk an pamplet dem de iina muor dan 160 a dem langwij de fi mek shuor se wol iip muor piipl get di chaans fi ier di gud nyuuz. An wi buk an pamplet dem de iina muor dan 20 a di difrant difrant Ruomani langwij dem tu. Nof a di piipl dem we chat dem difrant difrant langwij de get fi staat sorv Jeuova.

12. Wa els Jeuova aaganaizieshan du fi elp piipl nowadiez?

¹² A no onggl di gud nyuuz aluon Jeuova aaganaizieshan elp piipl fi get, bot dem elp piipl tu wen orikien an dem ting gwaan. An kaaz a dat, wol iip a breda an sista redi fi elp out wen orikien an dem ting de gwaan. An di aaganaizieshan bil Kindom Aal an dem ting de so dat piipl kyan get fi lorn bout umoch Jeuova lov dem.

DI LIIDA FI DI PRIIS DEM KYAN ELP YU

13. Wa an wa Jiizas du fi elp wi?

¹³ Kaa Jiizas a di gud shepad, im mek shuor se wi av evriting we wi niid fi stie kluos tu Jeuova. (Jan 10:14; Ifii. 4:7) Som a di taim, kaaz a di wol iip a tingz we a gwaan iina wi laif, wi mait-a fiil laik wan lamp we bieli a lait op ar laik graas we piipl tep op pan we suun brok aaf. Wi mait-a fiil laik wi waahn gi op kaa wi sik bad, kaa wi mait-a sin gens Jeuova, ar kaa wi an sumadi iina di kanggrigieshan naa grii. An aal a dem sitn de mait-a mek it aad fi wi tingk bout di gud sitn dem we a-go gwaan fi wi iina di fyuucha. Bot memba se Jiizas si wa yu a go chuu an im andastan ou yu fiil. An kaaz im fiil it fi yu, im a-go du sitn fi elp yu. Laik wen yu fiil laik yu waahn gi op, im a-go gi yu di uoli spirit fi elp yu eng aan an tan op chrang. (Jan 16:7; Taitos 3:6) Pan tap a dat, Jiizas gi wi ‘di elda dem az wan gif’ an im gi wi di breda an sista dem iina di kanggrigieshan tu fi elp push wi an gi wi di chrent we wi niid fi eng aan.​—Ifii. 4:8.

14. Wa wi fi memba ef wi fiil laik wi taiyad an waahn gi op?

¹⁴ Ef yu fiil taiyad an fiil laik yu waahn gi op, memba se Jiizas a di Liida fi di priis dem, an tingk bout wa dat miin fi yu. An memba tu se Jeuova neehn onggl sen Jiizas kom a ort fi ded fi wi, bot Im sen im so dat im kuda andastan wa wi a go chuu. Wen wi fiil sad kaaz a di bad sitn dem we wi mait-a du, memba se Jiizas eva redi an im wel waahn fi elp wi “enitaim wi niid di elp.”​—Iib. 4:15, 16.

15. Wa did elp wan breda we did lef di chuut fi kom bak kom sorv Jeuova?

¹⁵ Jiizas elp im piipl dem fi fain di wan dem we lef di chuut so dat dem kyan elp dem fi kom bak kom sorv Jeuova. (Mat. 18:12, 13) Tingk bout wa did gwaan wid Stefano.b Afta im did get put outa di kanggrigieshan fi 12 ier, im did mek op im main se im a-go go a wan a di miitn dem. Im se: “Mi naa lai, mi did fiil a wie, bot mi did wel waahn kom bak kom sorv Jeuova an bi paat a im fambili agen. Di elda dem did miit wid mi an dem neehn mek mi fiil no wie. Bot som a di taim mi did stil fiil bad se mi did lef Jeuova an mi did fiil laik mi waahn gi op. Bot di breda dem elp mi fi memba se Jeuova an Jiizas waahn mi fi eng aan an no gi op. Wen dem did se mi a wan Jeuova Witnis agen, evribadi iina di kanggrigieshan did api an it did mek mi an mi fambili fiil gud. Afta a wail, mi waif staat stodi di Baibl, an nou mi an mi waif an mi daata a sorv Jeuova tugeda.” Wi Liida fi di priis dem, Jiizas, mos api wen im si di wan dem we lef di chuut get di elp we dem niid fi kom bak kom sorv Jeuova agen!

16. Wa mek wi api fi av Jiizas we andastan wa wi a go chuu az wi Liida fi di priis dem?

¹⁶ Wen Jiizas did de pan di ort, im elp wol iip a piipl wen dem did niid di elp. Wi tu kyan nuo fi shuor se Jiizas a-go elp wi wen wi niid di elp. An suun suun iina di nyuu worl, im a-go elp wi fi liv wan laif we frii fram aal di ting dem we sin kaaz. Wi tangk Jeuova, we lov wi so moch, fi pik Jiizas fi bi di Liida fi di priis dem we fiil it fi wi!