Ou Yu Kyan Plan Yu Wedn Iina Wan Wie We A-Go Big Op Jeuova

1-2. A wa Jeuova waahn fi yu pan yu wedn die?

EF YU ingiej fi marid rait ya nou, wi nuo se dis a wan big taim iina yu laif. An unu guda aal bizi a plan unu wedn rait ya nou. Jeuova waahn unu fi enjai unu wedna die an fi liv wan api laif wid unu wan aneda.​—Pr. 5:18; Sang A Sal. 3:11.

² A wan big ting fi yu big op Jeuova pan yu wedn die. Wa mek wi se dat? An a ou yu kyan du dat? Aalduo da lesn ya a fi di tuu piipl dem we a-go marid, di ting dem we wi a-go taak bout iina da lesn ya kyan elp di wan dem we a-go go a di wedn fi big op Jeuova. An it kyan elp yu tu ef di wan dem we a marid aks yu fi tel dem ou yu fiil bout wa dem plan fi du pan dem wedn die.

WA MEK YU FI BIG OP JEUOVA PAN YU WEDN DIE?

3. Wa tuu sumadi we a plan fi marid fi tingk bout, an wa mek?

³ Wen tuu sumadi a plan fi get marid, dem fi mek shuor se dem a fala wa Jeuova se dem fi du iina im Wod di Baibl. Kaa a im set op tingz so dat wan man an wan uman kyan marid. An a im did du di fos wedn we did mek Adam an Iiv kom tugeda. (Jen. 1:28; 2:24) So di wie ou Jeuova fiil bout wa fi gwaan pan di wedn die shuda bi wan big ting tu di tuu piipl we a-go get marid.

4. Wa a wan neda riizn wa mek tuu sumadi we a-go marid fi big op Jeuova pan dem wedn die?

⁴ Wan neda big riizn wa mek yu fi tingk bout ou Jeuova fiil bout wa yu a-go du pan yu wedn die, a kaa Jeuova a yu Faada an yu bes Fren. (Iib. 12:9) An afta yu marid yu waahn yu an im fi gud siem wie, no chuu? So yu no waahn fi du notn at aal pan da die de ar no ada die we a-go ort yu Fren. (Sa. 25:14) An wen yu tingk bout aal a we Jeuova du aredi an we im a-go du fi yu, duohn it se yu fi big im op pan di die we yu a-go get marid?​—Sa. 116:12.

OU YU KYAN BIG OP JEUOVA?

5. Ou di sopm dem we de iina di Baibl kyan elp di wan dem we a plan fi get marid?

⁵ Di Baibl no gi wan bag a ruul bout we wi fi du fram we wi no fi du pan wi wedn die. So piipl kyan du we dem waahn fi du bies pan wich paat dem liv, umoch moni dem av, ar we dem laik. Bot di wan dem we a sorv Jeuova a-go mek shuor se no mata wa dem du, dem a dwi’it bies pan di laa a di konchri wich paat dem liv. (Mat. 22:21) An dem a-go mek shuor se dem yuuz Gad Wod fi riizn pan tingz bifuo dem mek op dem main bout wa dem a-go du, so dat dem kyan du di ting dem we a-go big op Jeuova an mek im api. So wa a som a di sopm dem we dem fi a tingk bout wen dem a plan we fi du pan dem wedn die?

6. Wen tuu sumadi a-go get marid, wa mek dem fi mek shuor se dem du di sopm dem we di govament se dem fi du?

⁶ Du tingz bies pan di laa a di konchri we yu liv iina. (Ruo. 13:1, 2) Iina nof konchri, di govament av som sopm we yu fi du bifuo yu get marid. An yu fi mek shuor se yu du dem sopm de. So di wan dem we a-go get marid fi fain out wa a dem ting de. An ef yu av no kwestiyan bout ou fi du dem, no fried fi go tu di elda dem an aks dem fi elp yu.b

7. Ou tuu piipl we a-go marid kyan du tingz iina wan wie so dat piipl kyan av nof rispek fi Jeuova?

⁷ Du tingz iina wan wie so dat piipl kyan av nof rispek fi Jeuova. (1 Kor. 10:31, 32) Wen tuu sumadi a plan we dem a-go du pan dem wedn die, dem fi mek shuor se dem du tingz da die de di wie ou Jeuova waahn dem fi dwi’it, no di wie ou di piipl dem iina di worl wuda dwi’it. (Gya. 5:19-26) An kaa di man a-go bi di ed a di fambili, a im fi mek shuor se di ting dem we gwaan pan di wedn die a-go mek evribadi api an it a-go big op Jeuova. Wa kyan elp im fi du dat? Im a-go mek shuor se tingz set op fi sumadi gi wan wedn taak bies pan di Baibl. An wen di breda we gi da taak de dwi’it iina wan wie we shuo se im lov piipl, an iina wan wie we a-go big op Jeuova, it a-go mek di piipl dem we de de si se fi get marid a sopm we kom fram Jeuova, an se a wan siiros ting. An kaaz a dis, nof breda an sista mek op dem main fi av dem wedn a wan Kindom Aal ef dat a sitn we dem kyan du. An ef a dat dem a-go du, lang bifuo di wedn die dem fi rait wan leta tu di elda dem fi mek dem nuo se dem waahn fi yuuz da Kindom Aal de.

8. Ef yu a-go kip wan wedn paati, we yu kyan du fi mek shuor se it big op Jeuova? (Ruoman 13:13)

⁸ Riid Ruoman 13:13. Ef yu a-go mek op yu main fi av wan paati a yu wedn, mek shuor se unu naa du tingz laik ou di piipl dem iina di worl wuda dwi’it. Di Griik wod we dem yuuz fi “wail paati” a taak bout paati we piipl a jringk tu moch lika, an myuuzik we a plie til liet iina di nait. An ef yu a-go sorv lika, set op tingz iina wan wie so dat nobadi no en op a jringk tu moch.c An ef yu a-go plie myuuzik, no ton it op so loud dat di piipl dem kyaahn ier dem wan aneda wen dem a taak. An mek shuor se unu tek di taim fi go chuu di kain-a myuuzik we unu a-go plie, an chrai fi nuo wa di wod dem iina di sang dem a se tu, so dat it no kaaz nobadi fi fiil a wie.

9. Wa tuu sumadi we a-go marid fi chrai an memba wen it kom aan tu di sitn dem we piipl a-go se ar du a dem wedn paati?

⁹ Unu a-go mek ada piipl se tingz a unu wedn paati, ar unu a-go shuo no vidiyo ar no picha ar tingz laik dat? Som piipl du tingz laik dis pan dem wedn die an it mek di die muor speshal tu dem. Bot ef yu a-go du sopm laik dis, mek shuor se eniting we nobadi a-go se, ar eniting we dem a-go shuo, a-go big op Jeuova. (Fil. 4:8) So yu kyan aks yuself: ‘Dem sitn de a shuo rispek fi ada piipl? It a-go shuo se wi rispek marid laif?’ An wan a di bigis ting we yu fi aks yuself, a ef it a-go big op Jeuova. Aalduo it nais fi ron juok an dem ting de, unu fi mek shuor se enibadi we a-go se notn naa go taak bout tingz ar chrai gi juok bout notn we av fi du wid seks. (Ifii. 5:3) An mek shuor se eni wan a yu fambili ar fren dem we a-go se notn a sumadi we a-go rispek ou yu fiil bout dem tingz ya.

10. Wa mek tuu piipl we a marid no fi shuo aaf an go uova buod wid notn? (1 Jan 2:15-17)

¹⁰ No shuo aaf an go uova buod wid notn. (Riid 1 Jan 2:15-17.) Jeuova lov wen di wan dem we a sorv im du tingz fi big im op insted-a fi big op demself. So wan Kristiyan naa go spen tu moch moni jos fi shuo aaf an buos bout we dem av. Si som wie ya we it kyan go elp yu ef yu no shuo aaf an go uova buod wid notn pan yu wedn die. Tingz mait-a ton out fi yu laik ou it did ton out fi wan breda we kom fram Narwie we niem Mike. Im se: “Wi neehn baro no moni so wi neehn uo nobadi notn wen wi don. An dat mek wi kuda gwaan paiyanier. Wi wedn neehn buosi bot it did stil nais an a wan die we wi kyaahn figet.” An wan sista, we kom fram Indiya we niem Tabita, se: “Wi neehn afi a wori wori op wiself. Kaa wi neehn av wan big fansi wedn, wi did av les tingz fi plan an les tingz fi aagyu bout.”

11. Ou tuu piipl kyan shuo se dem naa go uova buod wid notn pan dem wedn die wen it kom aan tu di kluoz we dem a-go wier? (Luk pan di picha dem tu.)

¹¹ Unu mek op unu main yet bout wa unu a-go wier? Wi nuo se unu waahn fi luk gud pan unu wedn die. An aal iina Baibl taim, wan man an uman we did a-go marid did waahn fi jres op demself iina wan nais wie tu. (Aiz. 61:10) Wi nuo se we unu a-go wier pan unu wedn die a-go difrant fram wa unu wuda wier go somwe els, bot unu fi mek shuor se di sitn dem we unu wier stil luk prapa. (1 Tim. 2:9) An unu no fi mek di sitn dem we unu wier ar notn els laka dat, bi di big ting a unu wedn.​—1 Pii. 3:3, 4.

12. Wa mek tuu sumadi we a-go marid no fi du sortn tingz a dem wedn jos kaa dem si dem piipl a dwi’it?

¹² No du di sopm dem we di piipl iina yu ieriya du a wan wedn we go gens we di Baibl se. (Rev. 18:4) Nof a di ting dem we dem du a wedn nowadiez av fi du wid faalz rilijan, uobiya an dem ting de. Bot Jeuova mek wi si klier klier se wi fi kip we fram dem sitn de. (2 Kor. 6:14-17) So ef yu baan kom si yu piipl a du sortn tingz a wedn we yu no so shuor bout, chrai an go luk op fi si we dem sitn de kom fram, an wa mek piipl du dem, an wa di Baibl av fi se bout it bifuo yu plan fi go dwi’it a fi yu wedn.

13. Wen yu a-go get prezent a yu wedn, ou yu kyan luk pan tingz di wie ou Jeuova luk pan tingz?

¹³ Iina di ieriya wich paat yu liv, piipl naamali gi di tuu piipl we a marid wan prezent? Memba se evribadi we yu invait no av di siem mount a moni, so evribadi naa go kyan gi yu di siem kain-a prezent. An memba se di Baibl mek wi nuo se a wan gud sopm fi gi sumadi sitn kaa it a-go mek wi api. (Pr. 11:25; Aks 20:35) Bot wi no waahn fi mek di piipl dem we wi invait fiil se dem afi gi wi sitn, ar mek dem fiil se ef dem onggl kyan gi wi wan likl sitn wi naa go waahn it. Wi fi du laik Jeuova an mek piipl gi wa dem waahn fi gi bies pan we dem av an wa dem waahn fi gi fram dem aat.​—2 Kor. 9:7.

WA YU KYAN DU FI MEK SORTN PRABLEM NO KOM OP, AN OU YU KYAN DIIL WID DEM EF DEM KOM OP

14. Wa a som a di ting dem we tuu piipl we a plan fi marid afi diil wid?

¹⁴ Wen yu a plan wan wedn, yu mait-a fain se it no so iizi fi yu dwi’it iina wan wie we a-go big op Jeuova. Laik yu mait-a fain se it aad fi no plan wan big fansi wedn. Charlie, we kom fram Salaman Ailan, se: “It did aad fi wi mek op wi main bout uu fi invait fi kom a di wedn paati, kaa wi did av wol iip a fren, an wich paat wi kom fram aal a wi fren dem did tingk se wi fi invait dem.” Tabita, we wi did taak bout aredi, se: “Wich paat mi liv, piipl naamali av wan big wedn paati. An it neehn so iizi fi wi mada an faada get it se wi onggl a-go invait bout wan onjrid piipl.” An Siera fram Indiya se, “Wen som piipl a marid, di big ting fi dem a fi av wan big eva wedn we shuo se dem av wol iip a moni an ting. Laik mi kozn dem we did marid bifuo mi did av wan big fansi wedn, so mi did kom anda presha fi av wan biga an fansiya wedn paati.” Wa kyan elp yu fi diil wid dem kain-a presha ya an eni ada prablem we mait-a kom op?

15. Wa mek a wan big ting fi wen tuu sumadi a-go marid dem prie tu Jeuova bout we dem a-go du?

¹⁵ Prie aafn bout evriting we unu plan fi du. Yu kyan tel Jeuova bout eniting we a schres yu out wen yu a plan yu wedn. (Fil. 4:6, 7) An yu kyan aks im fi elp yu fi du di rait ting, an fi elp yu fi iizi yuself wen yu a wori an fret bout notn, an fi briev op yuself wen yu niid fi dwi’it. (1 Pii. 5:7) An wen yu si ou Jeuova elp yu, yu a-go chos iina im muor. Tabita, we wi did taak bout aredi, se: “Mi an di breda we mi did a-go marid tu did a wori op wiself bout tingz we wi ar wi fambili mait-a no fiil di siem wie bout. So evri taim wi a-go taak bout tingz we av fi du wid di wedn, wi wuda se wan prieya fos. An wi did si ou Jeuova did elp wi an wi fambili fi taak bout tingz wid wi wan aneda an gwaan liv iina piis.”

16-17. Ou it elp fi mek tingz wok out gud fi unu wen unu taak bout tingz wid unu fambili an unu wan aneda wen unu a plan unu wedn?

¹⁶ Taak iina wan wie we shuo se unu rispek unu wan aneda. (Pr. 15:22) Wen tuu piipl a get marid, a wol iip a sitn dem afi mek op dem main bout, laik di die wen dem a-go marid, di mount a moni dem a-go spen, an uu an uu dem a-go invait, an wol iip a ada tingz. So bifuo unu mek op unu main bout wa unu a-go du, it wuda gud fi unu taak bout dem sitn ya wid unu wan aneda, an luk iina di Baibl fi tingz we kyan elp unu fi nuo wa fi du. An ef no breda ar sista we chrang iina wa dem biliiv iina tel unu tingz we unu kyan du, unu kyan taak bout dat tu. An wen unu a taak tu unu wan neda an unu fambili bout wa unu waahn fi du, dwi’it iina wan nais wie, an du tingz we shuo se yu a tingk bout tingz iina wan waiz wie, an no fried fi chienj op tingz tu. An ef wan a yu kluos fambili, laik yu mada ar yu faada, waahn yu fi du sopm, ef yu kyan dwi’it chrai an dwi’it. Memba se dis a wan speshal taim fi dem tu. An ef yu kyaahn du we dem waahn yu fi du, mek dem nuo iina wan nais wie wa mek yu kyaahn dwi’it. (Kol. 4:6) Mek yu fambili dem nuo se wa yu riili waahn fi du a fi big op Jeuova pan da speshal die de.

¹⁷ Ef yu mada an faada naa sorv Jeuova, it mait-a aad fi yu tel dem wa yu waahn fi du, bot no wori yuself kaa tingz kyan stil wok out. Wan breda, fram Indiya we niem Santhosh, se: “Wi fambili dem did waahn wi fi du som wol iip a sitn we di Hindu piipl dem du a wedn, an it tek wi wan lang taim fi tel dem wa mek wi naa go du sortn tingz. Bot wi stil chienj op likl tingz we wi kuda chienj op we notn neehn rang wid. Laik wi did av di kain-a fuud we dem did waahn a di wedn paati, an wi neehn mek nobadi sing an daans kaa dat a sopm we dem neehn yuus tu.”

18. Wa an wa yu kyan du so dat evriting ron gud pan yu wedn die? (1 Korintiyan 14:40) (Luk pan di picha tu.)

¹⁸ Tek unu taim an mek shuor unu plan out tingz gud. Yu naa go fiil so schres pan yu wedn die ef yu tek di taim fi saat out tingz prapa bifuo yu wedn die. (Riid 1 Korintiyan 14:40.) Wayne, we kom fram Taiwan, se: “Kopl die bifuo wi wedn, wi did av wan likl miitn wid wi fren dem we did a-go elp wi a wi wedn. Wi taak bout wa an wa wi did plan fi du, an wi aal praktis som a di sitn dem we wi wuda du fi mek shuor se evriting ron gud.” Yu fi du yu bes fi staat yu wedn pan taim kaa dis a-go shuo se yu rispek di piipl dem we yu invait.

19. We yu kyan du fi mek shuor se tingz ron di wie ou yu waahn it fi ron a yu wedn paati?

¹⁹ Ef yu tek di taim bifuo yu wedn die fi tingk bout som a di prablem dem we mait-a kom op pan yu wedn die, it kyan elp yu fi nuo wa fi du so dat yu no av no uol iip a prablem. (Pr. 22:3) Laik ef yu liv iina wan ieriya we it naamal fi piipl we yu no invait fi kom a yu wedn paati, yu kyan tingk bout we yu kyan du fi no mek dis apm. An it wuda gud fi yu tel yu fambili dem we naa sorv Jeuova, wa an wa dem kyan ekspek a di wedn, an mek dem nuo wa yu tingk bout di difrant difrant ting dem we piipl du a wedn. Fi elp yu fi du dat, yu kuda mek dem luk pan di paat pan jw.org we niem “What Happens at a Wedding of Jehovah’s Witnesses?” An wan neda ting we yu kuda du fi mek evriting ron gud a yu wedn paati, a fi mek wan breda we chrang iina wa dem biliiv iina, fi bi di “fuud manija.” (Jan 2:8) Ef yu tel im klier klier wa an wa yu waahn, den im kyan mek shuor se di sitn dem we apm a yu wedn paati big op Jeuova an gwaan di wie ou yu did waahn tingz fi gwaan.

20. A wa tuu sumadi we a marid fi memba bout dem wedn die?

²⁰ Yu mait-a fiil schres out wen yu tingk bout evriting we yu afi du fi plan di wedn. Bot memba se yu wedn a jos wan die, an a jos di staat a wan nais nais laif fi di tuu a unu we a-go sorv Jeuova tugeda. So du evriting we yu kyan du no fi mek yu wedn big an buosi. Bot mek it wan die we a-go big op Jeuova. An chos iina Jeuova, kaa im kyan elp yu fi plan yu wedn so dat wen yu luk bak pan it yu a-go api, an yu naa go fiil no wie bout notn we did apm pan da nais nais die de.​—Sa. 37:3, 4.