¿Ndáyoo kúú Jesús?

Jesús kúú iin ta̱a ndayaʼvi chááka̱ ni̱saio ñuyíví yóʼo. Jo kuaʼa̱ na̱yivi, sa̱va̱ʼa kivi̱ oo̱nvá Jesús náʼána, cháá ndiva̱ʼo kúú na̱ xíni̱ ña̱ ndaa̱ saʼa̱ Jesús, kuaʼa̱na sa̱jíin sa̱jíinvá ña̱ʼa kandísana o nákani inina saʼa̱ ndáyoo ni̱sakuu Jesús. ¿Ndíki̱án jánaʼa̱ Tu̱ʼun Ndio̱s saʼa̱ Jesús?

1. ¿Ndáyoo kúú Jesús?

Jesús kúú iin espíritu ta ió kuaʼa̱ ndee̱na nakaa̱na indiví. Jeová ni̱kava̱ʼana Jesús tá ko̱ ña̱ʼa kava̱ʼana javaka̱ ña̱ʼa. Sa̱ʼá ña̱yóʼo Tu̱ʼun Ndio̱s chinaníña “na̱ mií noo̱, dá ni̱ ka̱ʼva̱ʼa ndidaá ña̱ ió” (Colosenses 1:​15). Janí Tu̱ʼun Ndio̱s chinaníña Jesús “iin tóʼón dini̱ de̱ʼe” Ndio̱s, jáchi̱ Jesús ni̱sakuu iin túʼún jini̱ na̱ ni̱kava̱ʼa mií Jeová (Juan 3:​16). Jesús jaá kuití ni̱sakuchúun nduuna xíʼín Tatána, Jeová, jaá ni̱chindeé táʼanna nuu̱ ni̱kava̱ʼa ndijaá táʼa̱n ña̱ʼa (kaʼviní Proverbios 8:​30). Ta nda̱ tiempo viti vií netáʼan va̱ʼa Jesús xíʼín Tatána. Janí Tu̱ʼun Ndio̱s káchi ña̱ Jesús “kúú Tu̱ʼun”, ña̱ kúni̱ kachi, ña̱ Jesús kúú na̱ chindaʼá Ndio̱s kástu̱ʼun saʼa̱ ndijaá ña̱ kúni̱na keena, tátu̱ʼun ndijaá chúun saʼndána ta janí kástu̱ʼunna ndijaáka̱ ña̱ kúni̱ Tatána (Juan 1:​14, TNM).

2. ¿Ndá chúun ni̱kixi Jesús nuu̱ Ñúʼu̱ Ndeʼi̱?

Sa̱ ió 2.000 ká kuia̱, Jeová ni̱kuchúunna espíritu ii̱na jaá ni̱keena iin milagro: nda̱ indiví ni̱ja̱ya̱ʼana vida Jesús—na̱ kúú ángel ndayaʼvi—ti̱xi iin ñáʼa̱ tákú ko̱ ña̱ʼa tandaʼa̱ naní María. Sa̱ʼá ña̱yóʼo, Jesús ni̱kaku̱na tátu̱ʼun iin na̱yivi (kaʼviní Lucas 1:​34, 35). Jesús ni̱kixina nuu̱ Ñu̱ʼú Ndeʼi̱, jaá ni̱sakuuna Cristo o Mesías ni̱ka̱ʼa̱n Tu̱ʼun Ndio̱s kixi, ta jáka̱kuna na̱yivi.a Ndijaá profecía va̱xi nuu̱ Tu̱ʼun Ndio̱s ña̱ káʼa̱n saʼa̱ Mesías ni̱xino̱ko̱oña xíʼín tátu̱ʼun ni̱ndoʼo Jesús. Ña̱yóʼo ni̱chindeéña na̱yivi jaá ni̱saa̱na ni̱kundaa̱ inina ña̱ Jesús “kúú Cristo, na̱ dáka̱ki ñaá. Ta mií ní kúú de̱ʼe Ndios ta̱kí” (Mateo 16:​16).

3. ¿Ndeí nakaa̱ Jesús kivi̱ víti?

Tá ni̱ndiʼi vida Jesús ña̱ ni̱sakuuna iin ta̱a, jaá ni̱nataku Jesús tátu̱ʼun iin espíritu ta ni̱nandióko̱o tukuna kuaʼa̱n nuʼu̱na indiví. Yóʼo “ni̱ chi̱ndaya̱ʼi ñaá Ndios ña̱ kakuu na na̱ ndáya̱ʼi cháá ka̱” (Filipenses 2:9). Ta kivi̱ víti Jesús néʼena iin chúun káʼno ndiva̱ʼo; sa̱va̱ʼa iin túʼún jini̱ miívá Jeová kúú na̱ ndayaʼvi chááka̱ nuu̱ Jesús.

4. Ko̱ kúú Jesús Ndio̱s na̱ kúú Todopoderoso

Va̱árá kuaʼa̱ ndee̱ ni̱natiin Jesús indiví, jo Tu̱ʼun Ndio̱s káchiña ña̱ jaá xinijo̱ʼo Jesús ña̱ káʼa̱n Jeová, jáchi̱ Jeová kúú Tatá ta janí kúúna Ndio̱s mií Jesús. ¿Ndiva̱ʼa káchiyó ña̱yóʼo? Kande̱ʼéndó VIDEO jaá kundaa̱ inindó ña̱ jánaʼa̱ Tu̱ʼun Ndio̱s saʼa̱ Jesús ta jíinvá kúú Jeová Ndio̱s na̱ kúú Todopoderoso.

VIDEO: ¿Á kúú Jesucristo Ndio̱s? (3:​22)

Texto va̱xi yóʼo chindeéña jaá kundaa̱ va̱ʼa iniyó ndáyoo kúú Jeová ta ndáyoo kúú Jesús. Kaʼvindó iin ta iin texto ta kanatúʼúnndó saʼa̱ ña̱ va̱xi yóʼo:

Kaʼvindó Lucas 1:​30-​32, TNM.

• Tátu̱ʼun ni̱kachi ángel, ¿ndáyoo kúú Jesús ta ndáyoo kúú Jeová, na̱ “Káʼno chááka̱”?

Kaʼvindó Mateo 3:​16, 17.

• ¿Ndiku̱ú ña ni̱ka̱ʼa̱nna nda̱ indiví tá ni̱kundúta̱ Jesús?

• ¿Ndáyoo kúú na̱ ni̱ka̱ʼa̱n nda̱ indiví káʼán miíní?

Kaʼvindó Juan 14:​28, TNM.

• ¿Ndáyoo kúú na̱ sa̱va̱ʼa chááka̱ ta na̱ saʼndá chááka̱ chúun? ¿Á na̱ kúú tatá o na̱ kúú de̱ʼe?

• ¿Ndiku̱ú ña̱ jánaʼa̱ Jesús nuu̱yó tá ni̱kachina xíʼín Jeová “Tatá”?

Kaʼvindó Juan 12:​49.

• ¿Á ni̱sakáʼán Jesús ña̱ inu̱ú ta iin túʼún na̱yivi ni̱sakuuna xíʼín Tatána? ¿Ndixi káʼán miíní?

5. Jesús ni̱saa̱na ni̱sakuuna Mesías

VIDEO: Profecía ni̱xino̱ko̱o saʼa̱ Jesús (3:​03)

Kaʼvindó profecía yóʼo nuu̱ Tu̱ʼun Ndio̱s ta kanatúʼúnndó saʼa̱ ña̱ va̱xi yóʼo:

Kaʼvindó Miqueas 5:2 jaá kundaa̱ inindó saʼa̱ ndeí kúú ñuu nuu̱ kaku̱ Mesías.b

• ¿Á ni̱xino̱ko̱o ña̱ ni̱ka̱ʼa̱n profecía yóʼo tá ni̱kaku̱ Jesús? (Mateo 2:1).

Kaʼvindó Salmo 34:​20 xíʼín Zacarías 12:​10 jaá kande̱ʼéndó java ña̱ ni̱ka̱ʼa̱n profeta saʼa̱ tátu̱ʼun ki̱ʼo ndoʼo Mesías nuu̱ kivina.

• ¿Á ni̱xino̱ko̱o ndijaá ña̱ ni̱ka̱ʼa̱n profecía yóʼo? (Juan 19:​33-​37).

• ¿Á káʼánní ña̱ mií Jesús ni̱keyíko̱ ndijaá ña̱ ni̱ndoʼona jaá ná xino̱ko̱o profecía yóʼo?

• Ta miíní, ¿ndíki̱án jánaʼa̱ ña̱yóʼo nuu̱ní saʼa̱ Jesús?

ÑA̱ NI̱KATI̱ʼAYÓ

Jesús kúúna iin espíritu ndayaʼvi ta ió kuaʼa̱ ndee̱na, ta kúúna De̱ʼe Ndio̱s ta janí kúúna Mesías.

¿Á naku̱ʼun inión?

• ¿Ndiva̱ʼa Tu̱ʼun Ndio̱s chinaníña Jesús “na̱ mií noo̱, dá ni̱ ka̱va̱ʼa ndidaá ña̱ ió”?

• ¿Ndíki̱án ni̱sakee Jesús tá ko̱ ña̱ʼa kixina nuu̱ Ñúʼu̱ Ndeʼi̱?

• ¿Ndiva̱ʼa náʼáyó ña̱ Jesús kúúna Mesías?

KUU NANDUKÚNÍ JAVAKA̱ ÑA̱ʼA

Kati̱ʼaní saʼa̱ chááka̱ ña̱ naʼa̱ ña̱ Jesús kúúna Mesías.

“¿Á naʼa̱ profecía va̱xi nuu̱ Tu̱ʼun Ndio̱s ña̱ Jesús kúúna Mesías?” (Artículo nuu̱ jw.org)

Kande̱ʼéní á jánaʼa̱ Biblia ña̱ Ndio̱s ni̱saa̱na kúúna tatá Jesús tátu̱ʼun ki̱ʼa ndóʼo na̱yivi tá ndóyi de̱ʼena.

“¿Ndiva̱ʼa Tu̱ʼun Ndio̱s chinaníña Jesús De̱ʼe Ndio̱s?” (Artículo nuu̱ jw.org)

Kande̱ʼéní ndiva̱ʼa ña̱ chinanína trinidad ko̱ kúúña iin ña̱ jánaʼa̱ Tu̱ʼun Ndio̱s.

“¿Á kúú Jesús Ndio̱s?” (La Atalaya, 1 de abril de 2009)

Kaʼviní ndixi ni̱naja̱ma vida iin ñáʼa̱, tá ni̱ndiʼi ni̱ja̱kuáʼa va̱ʼañá ña̱ jánaʼa̱ Tu̱ʼun Ndio̱s saʼa̱ Jesús.

“Iin ñáʼa̱ kúú judía nakaniñá ndiva̱ʼa ni̱naja̱ma ña̱ kandísañá” (¡Despertad!, mayo de 2013)