LECCIÓN 16
¿Ndiku̱ú ña̱ ni̱kee Jesús tá ni̱saiona nuu̱ Ñúʼu̱ Ndeʼi̱?
Kivi̱ víti kuaʼa̱ na̱yivi, tá nákani inina saʼa̱ Jesús, káʼánna ña̱ Jesús kúúna tátu̱ʼun iin taleé ivá o káʼánna ña̱ kúúna iin profeta ndíchí oo̱nvá o janí ña̱ kúúna iin ta̱a sa̱yati ñúʼú kivi. Jo ¿á ko̱ káʼán miíní ña̱ tá ná jákuáʼa va̱ʼa chááka̱yó saʼa̱ ndijaá ña̱ ni̱kee Jesús tá ni̱saiona nuu̱ Ñúʼu̱ Ndeʼi̱ chindeéña saa̱yó kanaʼá va̱ʼa chááka̱yó saʼa̱na? Nuu̱ lección yóʼo, jákuáʼayó saʼa̱ java ña̱ʼa ndayaʼvi chááka̱ ni̱kee Jesús ta janí saʼa̱ ndiki̱ʼo kuu chindeé ña̱ ni̱kee Jesús miíní viti.
1. ¿Ndá chúun kúú nu̱ú chááka̱ ni̱sakee Jesús?
Chúun kúú nu̱ú chááka̱ ni̱sakee Jesús sa̱kuu ña̱ “kástu̱ʼunna noticia va̱ʼa saʼa̱ Reino Ndio̱s” nuu̱ na̱yivi (kaʼviní Lucas 4:43, TNM). Ni̱ka̱stu̱ʼunna noticia va̱ʼa ña̱ Ndio̱s chikaa̱na indiví iin reino o iin gobierno jándíʼi nuu̱ ndijaá táʼa̱n tu̱ndóʼó ndóʼo na̱yivi.a Nuu̱ tein uni̱ kuia̱ java, Jesús iin ni̱naki̱ʼona miína ni̱sisa ni̱kuchúunna jaá ni̱ka̱stu̱ʼunna saʼa̱ noticia va̱ʼa (Mateo 9:35).
2. ¿Ndiku̱ú ña̱ ni̱naʼa̱ ndijaá milagro ni̱kee Jesús?
Tu̱ʼun Ndio̱s nakani saʼa̱ kuaʼa̱ ña̱ʼa “sa̱ kee na [Jesús] ña̱ náꞌano, xíꞌín ña̱ ndato noo̱ ndo̱ꞌó ni̱ kee Ndios” (Hechos 2:22). Ndiveʼe ndee̱ ii̱ ni̱xi̱ʼo Ndio̱s nuu̱ Jesús, ni̱chi̱tivina tachi̱ xée̱n, ni̱xi̱ʼona ña̱ ni̱sa̱sáʼan kuaʼa̱ mil na̱yivi, ni̱ja̱nduva̱ʼana na̱ kíʼvi̱ ta nda̱ ni̱ja̱nátakuna java na̱ ni̱xiʼi̱ (Mateo 8:23-27; 14:15-21; Marcos 6:56; Lucas 7:11-17). Ndijaá milagro ni̱kee Jesús ni̱naʼa̱ táʼya ña̱ mií Ndio̱s Jeová ni̱chi̱ndaʼána ni̱kixina. Ta janí, ña̱yóʼo ninaʼa̱ ña̱ ió kuaʼa̱ ndee̱ nuu̱ Jeová ña̱ kandeéna jándíʼina nuu̱ ndijaá táʼa̱n tu̱ndóʼó ndóʼoyó.
3. ¿Ndiku̱ú ña̱ kati̱ʼayó saʼa̱ ndiki̱ʼo ni̱kuchúun Jesús nuu̱ Jeová?
Jaá kuití ni̱xinijo̱ʼo Jesús chúun ni̱saʼnda Jeová nuu̱na (kaʼviní Juan 8:29). Ndijaá tiempo ndaa̱ ni̱sakuchúun Jesús nuu̱ Tatána nda̱ kivi̱ nixiʼi̱na jáchi̱ jaá ni̱sakeena ndijaá táʼa̱n ña̱ʼa ni̱xika̱ Jeová nuu̱na va̱árá kuaʼa̱ na̱yivi ni̱kee tu̱ndóʼó xíʼínna. Ni̱naʼa̱na nuu̱ ndijaáyó na̱yivi ña̱ kuuvá kuchúun ndaa̱yó nuu̱ Ndio̱s va̱árá ná yáʼayó nuu̱ kuaʼa̱ tu̱ndóʼó. Ki̱ʼa jaá, ni̱kee Jesús “ni̱ da̱náʼa̱ na̱ noo̱ yo̱” na̱ ndíko̱ñá ña̱ ná “kaka yó íchi̱ ni̱ xika mií ná” (1 Pedro 2:21).
NÁ KUNDAA̱ VA̱ʼA CHÁÁKA̱ INIYÓ SAʼA̱ TEMA YÓʼO
Ná kande̱ʼéyó ndixi ni̱sakee Jesús ni̱saka̱stu̱ʼunna saʼa̱ noticia va̱ʼa ta janí saʼa̱ ndixi ni̱sakeena ndijaá milagro.
4. Jesús ni̱saka̱stu̱ʼunna saʼa̱ noticia va̱ʼa
Kuaʼa̱ ndiva̱ʼo kilómetro ta kilómetro ni̱xikanuu Jesús íchi̱ nuu̱ ió kuaʼa̱ ñúʼu̱ ya̱ká jaá ni̱ka̱stu̱ʼunna saʼa̱ noticia va̱ʼa nuu̱ ndijaá táʼa̱n na̱yivi. Kaʼvindó Lucas 8:1, TNM ta kanatúʼúnndó saʼa̱ ña̱ va̱xi yóʼo:
¿Á sa̱va̱ʼa ni̱saja̱naʼa̱ kuití Jesús nuu̱ na̱yivi na̱ kuaʼa̱n nandukúña kunijo̱ʼona ña̱ káʼa̱nna?
¿Ndixi ni̱sandukundeé Jesús jaá ni̱sananiʼi̱na kuaʼa̱ na̱yivi?
Ndio̱s ni̱kachi ña̱ na̱ kakuu Mesías kástu̱ʼunna saʼa̱ noticia va̱ʼa. Kaʼvindó Isaías 61:1, 2 ta kanatúʼúnndó saʼa̱ ña̱ va̱xi yóʼo:
¿Ndixi ni̱kee Jesús ndijaá ña̱ káʼa̱n profecía yóʼo?
¿Á káʼán miíní ña̱ tiempo viti janí xiniñúʼún na̱yivi kunijo̱ʼona noticia va̱ʼa yóʼo?
5. Jesús ni̱ja̱naʼa̱na kuaʼa̱ consejo ndayaʼvi ndiva̱ʼo
Jesús ni̱ka̱stu̱ʼunna noticia va̱ʼa saʼa̱ Reino Ndio̱s, ta janí ni̱ja̱naʼa̱na consejo va̱ʼa ña̱ kuu keeyó. Ná kande̱ʼéyó java consejo ni̱ka̱ʼa̱nna ña̱ va̱xi nuu̱ ña̱ naní Sermón del Monte. Kaʼvindó Mateo 6:14, 34 xíʼín 7:12, ta kanatúʼúnndó saʼa̱ ña̱ va̱xi yóʼo:
¿Ndiku̱ú java consejo va̱ʼa ni̱xi̱ʼo Jesús nuu̱ iin iin versículo yóʼo?
¿Á káʼán miíní ña̱ ndijaá consejo yóʼo kuu chindeéán na̱yivi kivi̱ víti?
6. Jesús ni̱keena kuaʼa̱ milagro
Jeová ni̱xi̱ʼona ndee̱ ii̱ nuu̱ Jesús jaá ni̱kuu ni̱keena kuaʼa̱ milagro. Tá kúni̱ndó kande̱ʼéndó iin ña̱yóʼo, kaʼvindó Marcos 5:25-34 o kande̱ʼéndó VIDEO. Tá ni̱ndiʼi kanatúʼúnndó saʼa̱ ña̱ va̱xi yóʼo:
Tátu̱ʼun ni̱xiniyó nuu̱ video, ¿ndiku̱ú ña̱ ni̱kandeé káʼno ini ñáʼa̱ kíʼvi̱?
¿Ndiku̱ú ña̱ kutoó chááka̱ miíní xiníní saʼa̱ milagro ni̱keena?
Kaʼvindó Juan 5:36 ta kanatúʼúnndó saʼa̱ ña̱ va̱xi yóʼo:
¿Ndiku̱ú ña̱ “xíʼo kuendá” o ni̱naʼa̱ ndijaá milagro ni̱kee Jesús?
¿Á náʼání?
Ña̱ kuaʼa̱ chááka̱ náʼáyó saʼa̱ Jesús va̱xiña nuu̱ ndin kumi̱ libro ña̱ kúú Evangelio va̱xi nuu̱ Tu̱ʼun Ndio̱s. Ta̱a ni̱taa ndin kumi̱ Evangelio—Mateo, Marcos, Lucas xíʼín Juan—sa̱ jíin jíin ña̱ʼa nakanira saʼa̱ Jesús. Ndijaá ña̱yóʼo vií na̱kitáʼanña ta chindeéñayó kundaa̱ va̱ʼa chááka̱ iniyó saʼa̱ tátu̱ʼun ki̱ʼo ñúchí ió ini Jesús.
MATEO
ni̱sakuura miínu̱ú ni̱taa iin Evangelio yóʼo. Libro ni̱taara nakani chááka̱ña saʼa̱ ndijaá ña̱ ni̱ja̱naʼa̱ Jesús, tátu̱ʼun ña̱ kúni̱ʼi chááka̱ ni̱ka̱ʼa̱n Jesús saʼa̱ Reino Ndio̱s.
MARCOS
ni̱taara Evangelio lóʼo̱ chááka̱. Ñúchí nakanira ndixi ni̱saio ini Jesús ta kujii̱ iniyó tá kaʼviyóña.
LUCAS
nakanira saʼa̱ ña̱ ndayaʼvi ndiva̱ʼo kúú ña̱ kaka̱taʼvi̱yó ta saʼa̱ ña̱ ñúchí ndiva̱ʼo ni̱sakee Jesús xíʼín ndijaá na̱ ñáʼa̱.
JUAN
kuaʼa̱ ndiva̱ʼo ña̱ʼa nakanira saʼa̱ tátu̱ʼun ki̱ʼo ñúchí ni̱saio ini Jesús, jáchi̱ yóʼo va̱xi kuaʼa̱ ña̱ ni̱ndatúʼún Jesús xíʼín ndijaá na̱ netáʼan va̱ʼa xíʼínna ta xíʼín javaka̱ na̱yivi.
ÑA̱ KÁʼA̱N INGA NA̱YIVI: “Jesús ni̱sakuu kuití iin ta̱a va̱ʼa oo̱nvá”.
¿Ndixi káʼán miíní?
ÑA̱ NI̱KATI̱ʼAYÓ
Jesús ni̱ka̱stu̱ʼun saʼa̱ Reino Ndio̱s, ni̱keena kuaʼa̱ milagro ta jaá kuití ni̱xinijo̱ʼona Tatána Jeová.
¿Á naku̱ʼun inión?
¿Ndiku̱ú ña̱ kúú nu̱ú chááka̱ ni̱sakee Jesús tá ni̱saiona nuu̱ Ñúʼu̱ Ndeʼi̱?
¿Ndiku̱ú ña̱ ni̱naʼa̱ ndijaá milagro ni̱kee Jesús?
¿Ndiku̱ú consejo va̱ʼa ni̱ja̱naʼa̱ Jesús ña̱ kuu kuchúunyó?
KUU NANDUKÚNÍ JAVAKA̱ ÑA̱ʼA
¿Ndiku̱ú ña̱ kúni̱ʼi chááka̱ ni̱ja̱naʼa̱ Jesús?
“¿Ndiva̱ʼa ña̱ ndayaʼvi kúú Reino Ndio̱s nuu̱ Jesús?” (La Atalaya, 1 de octubre de 2014)
Kande̱ʼéní ndiva̱ʼa miía̱ndaa̱ kuu kandísayó ña̱ ndijaá milagro ni̱kee Jesús ni̱kuu ndísaña.
“Ndijaá milagro ni̱kee Jesús: ¿ndiku̱ú ña̱ jánaʼa̱ña nuu̱ miíní?” (La Atalaya, 15 de julio de 2004)
Kaʼviní ndixi ni̱naja̱ma vida iin ta̱a tá ni̱kati̱ʼara ña̱ Jesús ko̱ ni̱ndiʼi inina keena ña̱ kúni̱ miína.
“Jaá ni̱sandiʼi ini keei ña̱ kúni̱ mií kuitívaí” (La Atalaya, 1 de octubre de 2014)
Kande̱ʼéní ña̱ ndayaʼvi chááka̱ saʼa̱ vida Jesús nuu̱ va̱xi yíko̱ña.
a Nuu̱ lección 31 nda̱ 33 va̱xi ña̱ nakani va̱ʼa chááka̱ saʼa̱ ndíki̱án kúú Reino Ndio̱s.