მეფეები — წიგნი მეორე
11 დაინახა ათალიამ,+ ახაზიას დედამ, რომ მოკვდა მისი ვაჟი,+ ამიტომ გაანადგურა სამეფო შთამომავლობა.+ 2 მაგრამ იეჰოშებამ, მეფე იეჰორამის ასულმა და ახაზიას დამ, გამოარიდა ახაზიას ვაჟი იეჰოაში+ დასახოცად განწირულ უფლისწულებს და ძიძასთან ერთად საძინებელ ოთახში დამალა. უმალავდნენ მას ათალიას და ამიტომ ვერ მოკლეს იგი. 3 ექვსი წელი მალავდნენ მას იეჰოვას ტაძარში, სანამ ათალია განაგებდა ქვეყანას.
4 მე-7 წელს გაგზავნა იეჰოიადამ ხალხი და მოუხმო კარიელი მცველების ასისთავებს და სასახლის მცველთა მეთაურებს+ იეჰოვას ტაძარში; კავშირი შეკრა მათთან, დააფიცა იეჰოვას ტაძარში და მხოლოდ ამის შემდეგ გამოუჩინა უფლისწული.+ 5 უბრძანა: „აი, რა გევალებათ: თქვენგან ერთ მესამედს შაბათს მოუწევს მოსვლა მეფის სასახლის დასაცავად,+ 6 მეორე მესამედი საძირკვლის კარიბჭესთან იდგება და ერთი მესამედიც — სასახლის მცველთა უკან, კარიბჭესთან. მონაცვლეობით დაიცავთ სასახლეს. 7 თქვენგან ორი ჯგუფი, რომლებიც არ იქნებიან შაბათს მორიგეები, მეთვალყურეობას გაუწევენ იეჰოვას ტაძარს და მეფეს დაიცავენ. 8 გარს შემოერტყით მეფეს, თითოეული იარაღით ხელში; თუკი ვინმე რიგს გაარღვევს, უნდა მოკვდეს. გვერდიდან არ მოსცილდეთ მეფეს, სადაც არ უნდა წავიდეს!“
9 ასისთავებმა+ ყველაფერი მღვდელ იეჰოიადას ბრძანებისამებრ გააკეთეს. წაიყვანა თითოეულმა თავისი ხალხი, ისინი, ვინც შაბათს მორიგეობდნენ, და ისინიც, ვინც შაბათს არ იყვნენ მორიგეები. შევიდნენ ისინი მღვდელ იეჰოიადასთან.+ 10 დაურიგა მღვდელმა ასისთავებს მეფე დავითის შუბები და მრგვალი ფარები, რომლებიც იეჰოვას ტაძარში ეწყო. 11 დადგნენ სასახლის მცველები+ მეფის გარშემო, თითოეული იარაღით ხელში ტაძრის მარჯვენა მხრიდან მარცხენა მხარემდე, სამსხვერპლოსთან+ და ტაძართან. 12 შემდეგ იეჰოიადამ გამოიყვანა უფლისწული,+ დაადგა მას გვირგვინი, დაადო მოწმობა*,+ გაამეფეს და სცხეს. ტაში შემოჰკრეს და შესძახეს: „დღეგრძელი იყოს მეფე!“+
13 შემოესმა ათალიას ხალხის ხმა, რომლებიც მირბოდნენ და მაშინვე იეჰოვას ტაძარში შეკრებილ ხალხს მიაშურა.+ 14 მან დაინახა მეფე, რომელიც, წესისამებრ, სვეტთან იდგა,+ და მასთან ერთად მთავრები და მესაყვირეები;+ ხარობდა ხალხი და საყვირებს აყვირებდა. მაშინ ათალიამ სამოსი შემოიხია და დაიკივლა: „შეთქმულებაა! შეთქმულება!“ 15 მღვდელმა იეჰოიადამ ჯარის ასისთავებს+ უბრძანა: „მოაშორეთ აქედან! ვინც მას გაჰყვება, მახვილით მოკალით!“ მღვდელს ნათქვამი ჰქონდა, იეჰოვას ტაძარში არ მოკლათო ის. 16 მაშინ ხელი სტაცეს მას, მიიყვანეს მეფის სასახლის იმ შესასვლელთან,+ ცხენები რომ შეჰყავდათ ხოლმე და იქ მოკლეს.
17 ამის შემდეგ იეჰოიადამ მეფესა და ხალხს იეჰოვას წინაშე პირობა დაადებინა,+ რომ ისინი კვლავაც იეჰოვას ხალხი იქნებოდნენ; მან მეფესა და ხალხსაც დაადებინა ერთმანეთთან პირობა.+ 18 მივიდა მთელი ხალხი ბაალის ტაძარში და დაანგრია მისი სამსხვერპლოები;+ დალეწეს მისი ქანდაკებებიც,+ ბაალის ქურუმი+ მათანი კი სამსხვერპლოების წინ მოკლეს.
შემდეგ მღვდელმა იეჰოვას ტაძრის მეთვალყურეებად ზედამხედველები დანიშნა.+ 19 შეკრიბა მან ასისთავები,+ კარიელი მცველები, სასახლის მცველები+ და მთელი ხალხი, რომ იეჰოვას ტაძრიდან გამოეყვანათ მეფე. სასახლის მცველთა კარიბჭის გავლით მივიდნენ ისინი მეფის სასახლეში და დაჯდა მეფე ტახტზე.+ 20 ხარობდა ხალხი და მშვიდობა იყო ქალაქში, რადგან ათალია უკვე მახვილით მოეკლათ მეფის სასახლესთან.