მკითხველთა წერილები

ახალგაზრდების თვითმკვლელობა.  მსურს დიდი მადლობა გადაგიხადოთ სტატიათა სერიისთვის „რა იმედი არსებობს დღევანდელი ახალგაზრდობისთვის?“ (8 სექტემბერი, 1998). კითხვისას ცრემლები ვერ შევიკავე. თვითმკვლელობა უკვე არაერთხელ ვცადე, მაგრამ მიხარია, რომ არაფერი გამომივიდა.

ა. ზ., ჩეხეთის რესპუბლიკა

სტატიები საკმაოდ მტკივნეულ თემაზე შესანიშნავად იყო დაწერილი. ამა წლის დასაწყისში, ქრონიკულ დეპრესიაში მყოფმა, თვითმკვლელობით სიცოცხლის დასრულება ვცადე. გმადლობთ ამ დროული თემისთვის. მან მე სიცოცხლე შემინარჩუნა.

რ. პ., ინგლისი

სამწუხაროდ, ჩემმა ორმა თანაკლასელმა თვითმკვლელობა სცადა. ერთ-ერთი მათგანი ასე იმიტომ მოიქცა, რომ მომავლისგან პრობლემების გარდა სასიკეთოს არაფერს ელოდა. ასე რომ, ეს სტატია საკმაოდ პრაქტიკული აღმოჩნდა, რადგან ნათლად და კონკრეტულად ხსნიდა, რატომ შეიძლება მომავალი ჩვენთვის აზრით აღსავსე იყოს.

რ. დ., ესპანეთი

თქვენი სტატია გულში ჩამწვდომი იყო. თითქოს იეჰოვა, როგორც მოსიყვარულე მამა, პირადად მელაპარაკებოდა. როცა პატარა ვიყავი, მამამ ჩემზე ძალა იხმარა. თავი არარაობა მეგონა და ხშირად თვითმკვლელობაზე ვფიქრობდი. მაგრამ ახლა, თქვენს სტატიაში მოცემული რჩევების შემდეგ, ვცდილობ „ჭეშმარიტი სიცოცხლის“ დიდი სურვილი მქონდეს (1 ტიმოთე 6:19).

ს. რ., ბრაზილია

გმადლობთ, განსაკუთრებით იმისთვის, რომ ახალგაზრდების სიტყვებს ციტირებდით, რომელთა უმეტესობაშიც პრობლემებიდან გამოსავალი მხოლოდ რამდენიმე სიტყვით იყო ნაჩვენები.

ვ. ჰ., გერმანია

ფულის გამომუშავება.  მთელი გულით მსურს გადაგიხადოთ მადლობა, რომ დრო დაუთმეთ საკმაოდ ინფორმაციული სტატიის გამოქვეყნებას, „ახალგაზრდები იძლევიან შეკითხვას. . . როგორ გამოვიმუშაო ფული?“ (8 სექტემბერი, 1998). დიდი ხანი სამუშაოს ვერ ვპოულობდი, მაგრამ თქვენი რჩევის გათვალისწინების შემდეგ, როგორც იქნა, ვიპოვე!

ს. დ., განა

ჟესტების ენა.  „ენა, რომელსაც ხედავ“ (8 სექტემბერი, 1998). ამ სტატიის წაკითხვის შემდეგ არ შემეძლო, რომ თქვენთვის სამადლობელი წერილი არ მომეწერა. ასეთი სტატიები გვეხმარება გავუგოთ მათ, ვისაც ჩვენგან განსხვავებული მდგომარეობა აქვთ. მე მყავს დაბადებიდან ყრუ-მუნჯი მეგობარი და ამიტომაც ჟესტების ენის სწავლა მინდოდა. მაგრამ, ამა თუ იმ მიზეზის გამო, სწავლისთვის დრო ვერ ვნახე. ამჯერად კი, სამომავლოდ ნამდვილად აღარ გადავდებ!

მ. ე., ინგლისი

დიდი სურვილი მაქვს, მადლობა გადაგიხადოთ ყრუ-მუნჯების დასახმარებლად გაწეული უდიდესი შრომისთვის. ეს სტატიები მთავრობის წარმომადგენლებს მივეცი წასაკითხად, და რადგანაც შესანიშნავად იყო დაწერილი, კიდევ რამდენიმე ეგზემპლარი მთხოვეს! აგრეთვე სტატია ვაჩვენე ქალბატონს, რომელიც არ თანხმდებოდა მის ყრუ-მუნჯ ქალიშვილს იეჰოვას მოწმეებთან ბიბლია ესწავლა. სტატიის წაკითხვის შემდეგ მან სიხარულის ცრემლები ვერ შეიკავა. ახლა თავის გოგონას ქრისტიანულ შეხვედრებზე დასწრებაში ეხმარება და დაჰპირდა, რომ კონგრესზე გასამგზავრებელ თანხასაც კი მისცემს!

ე. რ., მექსიკა

ძალიან მინდა იცოდეთ, რა მადლობელი ვარ ამ სტატიისთვის. მიზნად მქონდა ამერიკული ჟესტების ენის სწავლა და იეჰოვას მოწმეთა ჟესტების ენის ადგილობრივ კრებისთვის დახმარების გაწევა, მაგრამ ენთუზიაზმი დამეკარგა. თქვენმა სტატიამ სწორედ იმის ძალა შემმატა, რომ დასახულ მიზანს მივაღწიო!

ნ. დ., აშშ

გამაოგნებელი იყო იმის გაგება, რომ ყრუ-მუნჯები ჟესტების ენაზე ფიქრობენ. პირადად მე, რომელსაც სმენასთან პრობლემა არ მაქვს, უფრო ყურადღებიანი ვიქნები, რომ მათთან კარგი ურთიერთობა მქონდეს.

პ. ჰ., აშშ