რა ხდება მსოფლიოში

◼ ერთი გამოკვლევის თანახმად „მძღოლებზე მობილურით საუბარი, თუნდაც ამ დროს ტელეფონი ხელში არ ეჭიროთ, ისევე უარყოფითად მოქმედებს, როგორც ალკოჰოლი“ (საინფორმაციო სააგენტო „რეიტერი“, აშშ).

◼ 2006 წელს იანვრიდან მაისის ჩათვლით გვატემალაში ავტობუსებზე განხორციელებული შეიარაღებული ძარცვის 30 200 ფაქტი დაფიქსირდა. ამ თავდასხმების დროს დაიღუპა ავტობუსის თოთხმეტი მძღოლი თუ მათი დამხმარე და ათი მგზავრი („PRENSA LIBRE“, გვატემალა).

◼ ერთი გამოკვლევის თანახმად, რომელიც ჯანმრთელობის დაცვის მსოფლიო ორგანიზაციამ 124 ქვეყანაში სისხლის შენახვისა და მისი შემოწმების მეთოდების შესასწავლად ჩაატარა, დადგინდა, რომ 56 ქვეყანაში „არ ხდებოდა ყველა დონორის სისხლის შემოწმება აივ-ზე, B და C ჰეპატიტსა და სიფილისზე“ (ჯდმო, შვეიცარია).

◼ გასული საუკუნის 60-იანი წლებიდან 2003 წლამდე 5-დან დაახლოებით 70 პროცენტამდე გაიზარდა იმ ავსტრალიელების რიცხვი, რომლებიც ქორწინებამდე ერთად ცხოვრობდნენ (მელბურნის უნივერსიტეტი, ავსტრალია).

დიაბეტი — მსოფლიო პრობლემა

გაზეთი „ნიუ-იორკ ტაიმზი“ იტყობინება, რომ დიაბეტის საერთაშორისო ფედერაციის მონაცემების თანახმად ბოლო 20 წლის განმავლობაში დიაბეტით დაავადებულ ადამიანთა რიცხვი მთელ მსოფლიოში 30 მილიონიდან 230 მილიონამდე გაიზარდა. იმ ათი ქვეყნიდან, სადაც ამ დაავადების მქონე ადამიანთა რიცხვი ყველაზე დიდია, შვიდი განვითარებადი ქვეყანაა. „დიაბეტი მსოფლიოში ერთ-ერთი ყველაზე საშიში დაავადებაა“, — ამბობს ზემოხსენებული ფედერაციის პრეზიდენტი, დ-რი მარტინ სილინკი. „მსოფლიოს უღარიბეს ქვეყნებში დიაბეტით დაავადებულები დიდხანს ვერ ცოცხლობენ“, — აღნიშნულია „ნიუ-იორკ ტაიმზში“.

სარკინიგზო გზა, რომელიც „ცას სწვდება“

მსოფლიოში ყველაზე დიდ სიმაღლეზე გაყვანილი რკინიგზა, რომელიც 2006 წლის ივლისში საზეიმოდ გაიხსნა, პეკინს ტიბეტის ცენტრთან, ლჰასასთან აკავშირებს. ეს სარკინიგზო ხაზი დაახლოებით 4 000 კილომეტრზეა გაჭიმული. „რკინიგზის ეს ხაზი საინჟინრო ხელოვნების ერთ-ერთ ყველაზე დიდ მიღწევად ითვლება. ზღვის დონიდან ის 4 800 მეტრის სიმაღლემდე აღწევს და გადის ისეთ ტერიტორიებზე, სადაც ყინულის საფარი ზოგჯერ ლღვება“, — ნათქვამია „ნიუ-იორკ ტაიმზში“. ამიტომ, ერთ-ერთი ამოცანა, რომლის წინაშეც იდგნენ ინჟინრები, იყო ის, რომ არამდგრადობის თავიდან ასაცილებლად მიწის ვაკისი, რაზეც ლიანდაგები უნდა დაეგოთ, მთელი წლის განმავლობაში გაყინულ მდგომარეობაში შეენარჩუნებინათ. ასეთ სიმაღლეზე მგზავრობა მოითხოვს იმას, რომ მგზავრებს კუპეებში დატუმბული ჰაერი მიეწოდებოდეთ. გარდა ამისა, კუპეებში მგზავრებისთვის ინდივიდუალურადაც არის გათვალისწინებული დამატებითი ჟანგბადის მიწოდება.

„უჩინმაჩინი სტუდენტები“

საფრანგეთის ერთ-ერთი უნივერსიტეტის ფილოლოგიური ფაკულტეტის პირველი კურსის სტუდენტთა ათიდან ოც პროცენტამდე „საერთოდ არ ესწრება ლექციებს“, — იუწყება გაზეთი „ფიგარო“. ზოგი იმიტომ ხდება სტუდენტი, რომ ისარგებლოს სტუდენტებისთვის გათვალისწინებული შეღავათებით. მაგალითად, მათ შეუძლიათ ისარგებლონ სოციალური უზრუნველყოფით, შეღავათიან ფასებში იმგზავრონ როგორც თვითმფრინავით, ისე საზოგადოებრივი ტრანსპორტით, შედარებით ნაკლებ ფასად გაჩერდნენ სასტუმროებში და ნაკლები გადაიხადონ კინოთეატრის ბილეთებში. ზემოხსენებული შეღავათებით რომ ისარგებლონ, „უჩინმაჩინი სტუდენტები“ ირიცხებიან მაგალითად, ბელორუსული, ფინური ან სუაჰილი ენების შემსწავლელ კურსებზე, მაგრამ ლექციებს არ ესწრებიან. ასეთი „სტუდენტების“ რიცხვი საკმაოდ დიდია, რადგან სასწავლო დაწესებულებებში დამსწრე აუდიტორიის შემოწმება არ ხდება. როგორც გაზეთში იყო ნათქვამი, „სტუდენტები“ ინტერნეტით გადიან რეგისტრაციას და რამდენიმე დღეში სტუდენტის მოწმობას იღებენ.

„გარე სამყაროს მოწყვეტილი“

ებრაელი მეცნიერები თვლიან, რომ მათ აღმოაჩინეს უხერხემლოთა რვა ახალი სახეობა გამოქვაბულში, რომელიც საუკუნეების განმავლობაში „გარე სამყაროს იყო მოწყვეტილი“, — იუწყება იერუსალიმში გამომავალი გაზეთი „The Jerusalem Post“. კარიერში მომუშავეები წააწყდნენ მცირე ზომის ხვრელს, რომელიც დაბლა ეშვებოდა გამოქვაბულისკენ. ამ გამოქვაბულის სიგრძე მთლიანობაში დაახლოებით 2,5 კილომეტრს შეადგენდა. მასში ერთგან იყო მიწისქვეშა ღრუ, სადაც ტბა იყო დაგუბებული. აქ ბინადრობდნენ მორიელის მსგავსი არსებები; ამ ახალი სახეობებიდან ოთხი კიბოსებრთა კლასის წარმომადგენელი იყო (ორი ზღვის წყალში მობინადრე, ორიც — მტკნარ წყალში), დანარჩენი ოთხი კი ხმელეთის ბინადარი.