რატომ უნდა გვეშინოდეს ჭეშმარიტი ღმერთის ამჟამად?
„ღვთისა გეშინოდეს და დაიცავი მცნებანი მისნი, რადგან ეს არის კაცის თავი და თავი“ (ეკლესიასტე 12:13).
კარგია ადამიანისთვის, ჰქონდეს ჯანსაღი და მოწიწებული შიში ღვთის წინაშე. თუმცა მრავალი ადამიანი აღმაშფოთებელ, ჯანმრთელობისთვის საზიანო შიშსაც კი განიცდის, ჩვენთვის კარგია, გვქონდეს იეჰოვა ღმერთისადმი შიში (ფსალმუნი 111:1; ეკლესიასტე 8:12).
2 შემოქმედმა იცის ეს. ის თავისი ქმნილებების მიმართ სიყვარულით აღძრული, მოუწოდებს ყველას, ჰქონდეთ მისადმი შიში და თაყვანი სცენ მას. ჩვენ ვკითხულობთ: «ვიხილე სხვა ანგელოზი, რომელიც ზეცის შუა დაფრინავდა. მას ჰქონდა მარადიული სახარება, დედამიწის მკვიდრთათვის — ყოველი ერის და ტომის, ენისა და ხალხისათვის სახარებლად. ამბობდა დიდი ხმით: „გეშინოდეთ ღვთისა და დიდება მიაგეთ მას, ვინაიდან დადგა მისი სამსჯავროს ჟამი. თაყვანი ეცით ცისა და მიწის. . . შემქმნელს“» (გამოცხადება 14:6, 7).
3 რა თქმა უნდა, ჩვენ არ უნდა უგულებელვყოთ ყოველივეს შემოქმედი, სიცოცხლის წყარო, რადგან ჩვენც და მთელი პლანეტაც მას ვეკუთვნით (ფსალმუნი 23:1). უდიდესი სიყვარულით, იეჰოვამ თავის მიწიერ შვილებს მისცა სიცოცხლე და ჩინებული საცხოვრებელი ადგილი — შესანიშნავი სამოთხე. მაგრამ ეს დიდებული საჩუქარი განსაზღვრული პირობით მიეცათ. სინამდვილეში, იმ პირობით, რომ ეზრუნათ მასზე. ჩვენს პირველ მშობლებს უნდა მოევლოთ თავიანთი მიწიერი საცხოვრებლისთვის და გაეფართოებინათ ის, სანამ მთელი დედამიწა არ იქნებოდა დასახლებული და სანამ არ დაეუფლებოდნენ მას. მათ მიეცათ უპირატესობა და დაეკისრათ პასუხისმგებლობა ცხოველებზე, ფრინველებსა და თევზებზე — ყველა ცოცხალ ქმნილებაზე, რომლებიც მათთან და მათ შთამომავლობასთან ერთად იქნებოდნენ დედამიწაზე. ადამიანი პასუხისმგებელი უნდა ყოფილიყო ყველაფერზე, რაც მოსავლელად ჰქონდა მიბარებული.
4 ასეთი შესანიშნავი დასაბამის მიუხედავად, დააკვირდი, როგორ გააბინძურა ადამიანმა თავისი ლამაზი მიწიერი სახლი! იმის უგულებელყოფით, რომ დედამიწა, — ეს ძვირფასი მარგალიტი — ღმერთის საკუთრებაა, მათ სიბინძურის კერად აქციეს ის. დედამიწის გაბინძურებამ ისეთ წერტილს მიაღწია, რომ ცხოველების, ფრინველებისა და თევზების უფრო და უფრო მეტ ნაირსახეობას განადგურება ემუქრება. ჩვენი სამართლიანი და მოსიყვარულე ღმერთი უსასრულოდ არ მოითმენს ამას. გაჩანაგებული დედამიწა მოთქვამს შურისგების შესახებ და მრავალ ადამიანს მიზეზი აქვს ეშინოდეს ამის. სხვა მხრივ, ვისაც ღმერთისადმი პატივისცემით აღსავსე ნდობა აქვს, მანუგეშებელია იმის ცოდნა, თუ რა მოხდება. იეჰოვა აუცილებლად მოსთხოვს ადამიანებს პასუხს და დედამიწა აუცილებლად განახლდება. ეს ნამდვილად სასიხარულო ცნობაა ყველა გულმართალი ადამიანისთვის დედამიწაზე.
5 ვისი მეშვეობით აღასრულებს ღმერთი განაჩენს? იესო ქრისტეს მეშვეობით, რომელიც ღმერთის ზეციერ სამეფოში ტახტზეა აღზევებული მეფედ. ამ ზეციერი ძის მეშვეობით იეჰოვა ბოლოს მოუღებს ახლანდელ წაბილწულ, მეამბოხე სისტემას (2 თესალონიკელთა 1:6–9; გამოცხადება 19:11). ამგვარად, ღმერთი თავის მოშიშებს მოუტანს შვებას და ამავე დროს დაიცავს და გადაარჩენს ჩვენს საცხოვრებელს, დედამიწას.
6 როგორ მოხდება ეს? ბიბლია მოგვითხრობს მომავალ დიდ გასაჭირზე, რომელიც თავის კულმინაციურ წერტილს არმაგედონის ომში მიაღწევს (გამოცხადება 7:14; 16:16). ეს იქნება ღმერთის განაჩენის აღსრულება ამ წაბილწულ სისტემაზე და მის წამბილწველებზე. თუ გადარჩება ვინმე? დიახ! ესენი იქნებიან, ვისაც ღმერთის მიმართ აქვს არა დამღუპველი და ავადმყოფური, არამედ პატივისცემის გამომხატველი და მოწიწებული შიში. დიახ, ისინი გადარჩებიან (იგავნი 2:21, 22).
განსაცვიფრებელი ძლევამოსილების გამოვლენა
7 იეჰოვა ღმერთის ეს დრამატული მოქმედება მოასწავებდა იმ დიდებულ საქმეს, რომელიც მან მოიმოქმედა თავისი თაყვანისმცემლების სასარგებლოდ ძველი წელთაღრიცხვით დაახლოებით 1 500 წელს. დიდი სამხედრო ძალის მქონე ქვეყანას, ეგვიპტეს, დამონებული ჰყავდა ემიგრირებული ისრაელები, ძალდატანებით ამუშავებდა და გენოციდის მოწყობასაც კი ცდილობდა, როდესაც მისმა მმართველმა, ფარაონმა, ბრძანა მოეკლათ მამრობითი სქესის ყველა ახალშობილი ისრაელი. ღმერთის გამარჯვებამ ეგვიპტეზე დესპოტური პოლიტიკური სისტემისგან გათავისუფლება მოუტანა ისრაელებს, დიახ, გათავისუფლება იმ ერისგან, რომელიც მრავალი ღმერთისადმი თაყვანისცემით იყო წაბილწული.
8 წიგნის გამოსვლის, მე-15 თავი გვამცნობს, თუ როგორი რეაქცია ჰქონდათ ისრაელებს ეგვიპტის მონობიდან გათავისუფლების გამო. ამ ამბის გაანალიზება დაგვეხმარება გავიგოთ, როგორ შეუძლიათ ქრისტიანებს გათავისუფლდნენ სულიერად და ფიზიკურად წაბილწული დღევანდელი სისტემისგან. მოდი, განვიხილოთ გამოსვლის მე-15 თავი და ყურადღება მივაქციოთ განსაზღვრულ მუხლებს, რათა გავიგოთ, რატომ უნდა ავირჩიოთ, რომ შიში გამოვავლინოთ ჭეშმარიტი ღმერთის, იეჰოვას წინაშე. დავიწყოთ პირველი და მეორე მუხლებიდან:
9 „მაშინ უმღერეს მოსემ და ისრაელიანებმა ეს სიმღერა უფალს და ასე თქვეს: ვუმღერი უფალს, რადგან განდიდდა დიდად, ზღვაში გადაყარა ცხენი და მხედარი. ჩემი ძალა და დიდებაა უფალი, მხსნელად მყავდა იგი“.
10 მსოფლიოში ყველა ადამიანისთვის ცნობილია, როგორ გაათავისუფლა იეჰოვამ ისრაელები ეგვიპტიდან. ის მრავალ სასჯელს ატეხდა ძლიერ მსოფლიო მპყრობელს, სანამ, ბოლოს და ბოლოს, ფარაონმა წასვლის ნება არ დართო ისრაელებს. მაგრამ შემდეგ ფარაონის ჯარი დაედევნა უმწეო ხალხს და, ისე ჩანდა, თითქოს მახეში გააბა ისინი მეწამული ზღვის სანაპიროსთან. თუმცა შთაბეჭდილება იქმნებოდა, რომ ისრაელები მალე დაკარგავდნენ თავიანთ ახლადშეძენილ თავისუფლებას, იეჰოვას კიდევ სხვა რამე ჰქონდა ჩაფიქრებული. მან სასწაულებრივად გახსნა გზა ზღვაზე და უსაფრთხოდ გადაიყვანა თავისი ხალხი. როდესაც მათ ეგვიპტელები მიჰყვნენ, ღმერთმა შეაერთა მეწამული ზღვის წყლები და ფარაონი და მისი სამხედრო ძალები შთაინთქნენ (გამოსვლა 14:1–31).
11 იეჰოვას მიერ ეგვიპტის სამხედრო ჯარების განადგურებამ განადიდა ის თავის თაყვანისმცემელთა თვალში და მისი სახელი ფართოდ გახადა ცნობილი (იესო ნავეს ძე 2:9, 10; 4:23, 24). დიახ, მისი სახელი ამაღლდა ეგვიპტის ყველა უძლურ და ცრუ ღმერთების სახელზე უფრო, რომლებსაც არ შესწევდათ ძალა გადაერჩინათ თავიანთი თაყვანისმცემლები. ცრუ ღმერთებზე, ხრწნად ადამიანებსა და სამხედრო ძალებზე დაიმედებამ მწარე იმედგაცრუებამდე მიიყვანა ისინი (ფსალმუნი 145:3). არ არის გასაკვირი, რომ ისრაელები აღიძრნენ ეგალობათ ქება-დიდების საგალობელი, რომელშიც გამოიხატებოდა ჯანსაღი შიში ცოცხალი ღმერთისადმი, რომელმაც მძლავრი მკლავით იხსნა თავისი ხალხი!
12 ჩვენც უნდა შევიგნოთ, რომ დღევანდელი ვერც ერთი ცრუ ღმერთი, ვერც ერთი ყველაზე მძლავრი მპყრობელი, რომელსაც ბირთვული იარაღიც კი აქვს, ვერ გაუტოლდება იეჰოვას. მას შეუძლია და გადაარჩენს კიდეც თავის ხალხს. „თავის ნებაზე იქცევა, როგორც ზეცის მხედრობაში, ისევე ქვეყნის მკვიდრებში, მის ხელს წინ ვერავინ აღუდგება და ვერავინ ვერ ეტყვის: ამას რას შვრებიო?“ (დანიელი 4:32). როდესაც ბოლომდე ვწვდებით ამ სიტყვების მნიშვნელობას, აღძრული ვართ სიხარულით ვაქოთ ის.
13 გამარჯვების სიმღერა მეწამულ ზღვასთან ასეთი სიტყვებით გრძელდება: „მეომარია უფალი, უფალია [იეჰოვაა, აქ] მისი სახელი“. ასე რომ, ეს დაუძლეველი მეომარი არ არის ადამიანთა წარმოდგენაში შექმნილი უსახელო მონაგონი. მას სახელი აქვს! ის არის ის, რომელიც ‘აქცევინებს’, დიდებული შემოქმედი, პიროვნება, ‘რომლის, ერთადერთის სახელიც არის იეჰოვა — უზენაესი მთელ ქვეყნიერებაზე’ (გამოსვლა 3:14; 15:3–5; ფსალმუნი 83:18 [82:19], „მეფე იაკობის თარგმანი“ [King James Version]). განა არ ეთანხმები იმას, რომ იმ ძველი დროის ეგვიპტელებისთვის ბრძნული იქნებოდა, იმის ნაცვლად, რომ უარეყოთ ის, ჰქონოდათ გონივრული და პატივისცემით აღსავსე შიში ყოვლისშემძლე ღმერთის მიმართ?
14 როგორც დედამიწის კონსტრუქტორი და ზღვის შემქმნელი, ის სრულად უწევს კონტროლს დედამიწის წყლის დიდ რაოდენობას (გამოსვლა 15:8). აგრეთვე თავისი ძალაუფლების გამოყენებით ქარზე, მან განახორციელა, რაც თითქოს შეუძლებელი იყო. მან გაყო წყლის სიღრმეები განსაზღვრულ საზღვრამდე და შეაკავა ერთმანეთის პირისპირ იმ მიზნით, რომ წარმოქმნილიყო დერეფანი, რათა მის ხალხს გადაეკვეთა ზღვა. წარმოიდგინე, მილიონობით ტონა ზღვის წყალი აღიმართა ორ მაღალ პარალელურ კედლად და წარმოქმნა ისრაელებისთვის თავის დასაღწევი გზა. დიახ, ისინი, რომლებიც ჯანსაღ შიშს ავლენდნენ ღმერთის მიმართ, დაცული იყვნენ. შემდეგ იეჰოვამ წარმღვნელ ზვირთებად დააბრუნა წყალი, რომელმაც შთანთქა ფარაონის ჯარი მთელი თავისი აღჭურვილობით. ღვთიური ძალის როგორი გამოვლენაა უსარგებლო ღმერთებსა და ადამიანთა სამხედრო ძალებზე! უეჭველია, იეჰოვა არის პიროვნება, რომლისაც უნდა გვეშინოდეს, ხომ ასეა? (გამოსვლა 14:21, 22, 28; 15:8).
ღმერთისადმი ჩვენი შიშის გამოვლენა
15 ჩვენც რომ უსაფრთხოდ ვმდგარიყავით მოსესთან ერთად, ნამდვილად აღვიძვრებოდით გვემღერა: „ვინ არს შენი მსგავსი, უფალო, ღმერთთა შორის? ვინ არის, შენს მსგავსად რომ იყოს ძლიერი სიწმიდით, ქებათა ღირსი, სასწაულმოქმედი?“ (გამოსვლა 15:11). ასეთი გრძნობები იმ დროიდან ექოსავით მეორდებოდა საუკუნეების განმავლობაში. ბიბლიის ბოლო წიგნში, მოციქული იოანე აღწერს ღმერთის ერთგულ ცხებულ მსახურებს: „გალობდნენ ღვთის მსახურის მოსეს გალობას და კრავის გალობას“. რომელ დიდებულ სიმღერას გალობდნენ? „დიდია და საკვირველი შენი საქმენი, უფალო ღმერთო ყოვლისმპყრობელო! წრფელი და ჭეშმარიტია შენი გზები, ხალხთა მეფეო! ვის არ შეეშინდება, უფალო, და არ ადიდებს შენს სახელს? რადგან მხოლოდ შენ ხარ წმიდა“ (გამოცხადება 15:2–4).
16 აგრეთვე დღესაც არიან გათავისუფლებული თაყვანისმცემლები, რომლებიც მადლიერების გრძნობით აფასებენ არა მხოლოდ ღმერთის ხელთანამოქმედარს, არამედ მის კანონებსაც. ადამიანები ყველა ერიდან, რომლებიც სცნობენ და ცხოვრებაში იყენებენ ღმერთის სამართლიან ნორმებს სულიერად თავისუფლდებიან და ეყოფიან ამ გახრწნილ წუთისოფელს. ყოველწლიურად ასი ათასობით ადამიანი აღწევს თავს ამ გახრწნილ წუთისოფელს და მკვიდრდება იეჰოვას თაყვანისმცემელთა წმინდა, სამართლიან ორგანიზაციაში. მალე, იმის შემდეგ, რაც შესრულდება ღვთის გამოტანილი ცეცხლის განაჩენი ცრუ რელიგიასა და ამ ბოროტი სისტემის დანარჩენი ნაწილის წინააღმდეგ, ისინი მარადიულად იცხოვრებენ სამართლიან ახალ ქვეყნიერებაში.
17 გამოცხდების 14:6, 7-ის თანახმად, კაცობრიობა ამჟამად ისმენს გამაფრთხილებელ ცნობას სასამართლოს შესახებ, რომელსაც მთელ დედამიწაზე აუწყებენ იეჰოვას მოწმეები ანგელოზების ხელმძღვანელობით. გასულ წელს 230-ზე მეტ ქვეყანაში დაახლოებით 5 მილიონი მაუწყებელი ავრცელებდა კეთილ ცნობას ღმერთის სამეფოსა და მისი სასამართლოს ჟამის შესახებ. იმისათვის, რომ ადამიანები გადარჩნენ, მოწმეები რეგულარულად მიდიან მათთან სახლებში და ატარებენ ბიბლიის უფასო შესწავლას. ამგვარად, ყოველწლიურად ასიათასობით ადამიანი იძენს სათანადო ცოდნას, რომ გონივრული შიში ჰქონდეს ღვთისადმი, მიუძღვნას თავისი სიცოცხლე მას და მოინათლოს. რა სასიხარულოა, რომ ასეთი ადამიანები იძენენ შიშს ჭეშმარიტი ღვთისადმი! (ლუკა 1:49–51; საქმეები 9:31; შეადარე ებრაელთა 11:7).
18 ნამდვილად მონაწილეობენ სამქადაგებლო საქმიანობაში ანგელოზები? ნათლად ჩანს, რომ ანგელოზებს, ხშირად, პირდაპირ მიჰყავთ იეჰოვას მოწმეები იმ სახლთან, სადაც გაჭირვებაში მყოფ ადამიანს სწადია სულიერი დახმარება და ლოცულობს კიდეც ამის შესახებ! მაგალითად, კარიბის კუნძულებზე იეჰოვას ორი მოწმე პატარა ბიჭის თანხლებით კეთილ ცნობას ქადაგებდა. რადგან შუადღე ახლოვდებოდა, უფროსებმა გადაწყვიტეს სახლში წასვლა. მაგრამ ბავშვი უჩვეულოდ იყო მოწადინებული, სწვეოდნენ შემდეგ სახლს. როდესაც მან დაინახა, რომ უფროსები არ ეთანხმებოდნენ, ის გაემართა სახლისკენ და დააკაკუნა. კარები ახალგაზრდა ქალბატონმა გააღო. როდესაც უფროსი ასაკის მოწმეებმა ეს დაინახეს, გაემართნენ მისკენ და დაუწყეს ლაპარაკი. ქალმა მიიპატიჟა ისინი სახლში და აუხსნა, რომ როდესაც კარზე კაკუნის ხმა გაისმა, ის იმ დროს ღმერთს ევედრებოდა, გამოეგზავნა მოწმეები მასთან ბიბლიის შესასწავლად. ისინი შეთანხმდნენ, დაეწყოთ ბიბლიის შესწავლა.
19 ჩვენ ერთგულად ვაუწყებთ ცნობას ღმერთის სასამართლოს შესახებ და აგრეთვე ვასწავლით ხალხს მის სამართლიან კანონებს. როდესაც ადამიანები ცხოვრებაში ამ კანონებს იყენებენ, შედეგად ფიზიკურ და სულიერ კურთხევებს იმკიან. მაგალითად, ბიბლია აშკარად სდებს მსჯავრს ყველა სექსუალურ უზნეობას (რომაელთა 1:26, 27, 32). დღეს ღვთიური ნორმები სრულიად უგულებელყოფილია მსოფლიოში. რა არის შედეგი? ირღვევა ქორწინებები. იზრდება დამნაშავეობა. ვრცელდება სქესობრივი კავშირით გადამდები ავადმყოფობები, რომლებიც XX საუკუნეში ფართოდ გავრცელებულ უბედურებად გადაიქცა. სინამდვილეში, შიშის მომგვრელი შიდს-ი, უმეტეს შემთხვევაში ვრცელდება სექსუალური უზნეობის გამო. ნუთუ ღვთისადმი მოწიწებული შიში არ უზრუნველყოფს საუკეთესო დაცვით ჭეშმარიტ ქრისტიანებს? (2 კორინთელთა 7:1; ფილიპელთა 2:12; იხილე აგრეთვე საქმეები 15:28, 29).
შედეგები, რომლებიც მოჰყვება დღეს ღვთის შიშს
20 უხვად არის კურთხეული, ვისაც აქვს ღვთის შიში და მის კანონებს მიჰყვება. განვიხილოთ შემთხვევა, რომელიც ცხადყოფს იმ ფაქტის მზარდ აღიარებას, რომ იეჰოვას მოწმეები წარმოადგენენ მაღალი ზნეობის მქონე მშვიდობიან და სამართლიან ქრისტიანთა ძმობას. სამხრეთ ამერიკაში, მოწმეების გარკვეული რაოდენობა, საერთაშორისო კონგრესის დელეგატები, გაჩერდნენ სასტუმროში, სადაც იმავე საღამოს შეხვედრა ჰქონდათ ადამიანებს, რომლებიც არ წარმოადგენდნენ მოწმეებს და მათ წინაშე სიტყვით უნდა გამოსულიყო სახელმწიფოს პრეზიდენტი. როდესაც პირადი დაცვით გარშემორტყმული პრეზიდენტი ლიფტისკენ გაემართა, ერთ-ერთი მოწმე და, რომელმაც არ იცოდა, ვინ იყო ლიფტში, შეჰყვა მათ, რითაც პრეზიდენტის პირადი დაცვის გაკვირვება გამოიწვია! როდესაც მიხვდა რა გააკეთა, მოწმემ მათ ბოდიში მოუხადა შეჭრისთვის. მან აჩვენა კონგრესის სამკერდე ნიშანი, რითაც მას სცნობდნენ როგორც იეჰოვას მოწმეს და უთხრა, რომ არანაირ საშიშროებას არ წარმოადგენდა პრეზიდენტისთვის. ერთ-ერთმა დამცველმა ღიმილით უთხრა: „ყველა ადამიანი იეჰოვას მოწმეების მსგავსი რომ იყოს, ასეთი დაცვა საჭირო არ იქნებოდა“ (ესაია 2:2–4).
21 დღეს ასეთ ხალხს კრებს და ამზადებს იეჰოვა, რათა ისინი ‘მოვიდნენ დიდი გასაჭირიდან’, რომლის შედეგადაც ბოლო მოეღება ამ სისტემას (გამოცხადება 7:9, 10, 14). ეს გადარჩენა არ იქნება შემთხვევითი. იმისათვის, რომ გადარჩეს, პიროვნებას უნდა ჰქონდეს ღვთის შიში, სცნოს იგი უზენაეს მმართველად და მიძღვნილი იყოს მისადმი. თუმცა ფაქტია, მრავალი არ განავითარებს ასეთ შიშს, რომელიც გადარჩენის ღირსად ხდის პიროვნებას (ფსალმუნი 2:1–6). ყველა არსებული მტკიცების თანახმად, იეჰოვას არჩეული მმართველი, იესო ქრისტე მეფობს გადამწყვეტი 1914 წლიდან. ეს ნიშნავს, რომ იწურება დრო, რომელიც დარჩათ პიროვნებებს იეჰოვა ღმერთისადმი შიშის განვითარებისა და გამოვლენისთვის. მაგრამ ჩვენი შემოქმედი ნებას რთავს ადამიანებს, აგრეთვე მაღალი მდგომარეობის მქონე პიროვნებებს, გამოეხმაურონ სიტყვებს: „ახლა კი გონს მოდით, მეფენო! განისწავლენით, ქვეყნის მსაჯულნო! ემსახურეთ უფალს შიშით და შეჰღაღადეთ თრთოლვით. ეამბორეთ ძეს, რომ არ განრისხდეს იგი და არ დაიღუპოთ გზაში, რადგან მალე აღიგზნება რისხვა მისი. ნეტარ არს ყველა, ვინც მასზეა მინდობილი“ (ფსალმუნი 2:7–12).
22 დაე, ვიყოთ მათ შორის, ვინც განადიდებს ჩვენს შემოქმედს, როგორც ერთადერთს, რომელმაც გვიხსნა. მაგრამ ამისთვის ჩვენ უკვე დღეს გვესაჭიროება გამოვავლინოთ ჭეშმარიტი ღვთისადმი შიში! (შეადარე ფსალმუნი 2:11; ებრაელთა 12:28; 1 პეტრე 1:17). ჩვენ უნდა გავაგრძელოთ მისი კანონების შესწავლა და დავემორჩილოთ მას. მოსესა და კრავის სიმღერა, ჩაწერილი გამოცხადების 15:3, 4-ში, თავის აპოგეას მიაღწევს, როდესაც იეჰოვა მოსპობს ყველა ბოროტებას დედამიწაზე, დაიწყებს ადამიანისა და დედამიწის განკურნებას ცოდვის გამხრწნელი ზეგავლენისგან. შემდეგ მთელი გულით ვიმღერებთ: „დიდია და საკვირველი შენი საქმენი, უფალო ღმერთო ყოვლისმპყრობელო! წრფელი და ჭეშმარიტია შენი გზები, ხალხთა მეფეო! ვის არ შეეშინდება, უფალო, და არ ადიდებს შენს სახელს?“
თუ გახსოვს?
◻ რატომ იმსახურებს იეჰოვა, რომ მის მიმართ ჯანსაღი შიში გვქონდეს?
◻ რა გამოვლინდა ღმერთის მოქმედებებით მეწამულ ზღვასთან?
◻ როგორი სარგებელი მოაქვს პატივისცემით აღსავსე შიშს იეჰოვას წინაშე?
◻ როგორი მომავალი მოელით მათ, ვისაც უკვე დღეს აქვს ჭეშმარიტი ღმერთის მიმართ შიში?
[სასწავლო კითხვები]
1, 2. რატომ არის სასარგებლო გვქონდეს ღვთისადმი სათანადო შიში?
3. რა გააკეთა შემოქმედმა ჩვენი პირველი მშობლებისთვის?
4. როგორ მოექცა ადამიანი ღმერთის ქმნილებას?
5, 6. როგორ უპასუხებს ღმერთი მის ქმნილებებთან დაკავშირებით ადამიანთა მოქმედებას?
7. რატომ დაიცვა ღმერთმა ისრაელი ერი მოსეს დროს?
8, 9. როგორი რეაქცია ჰქონდათ მოსესა და ისრაელებს ღმერთის ჩარევაზე?
10. რა იყო იმის მიზეზი, რომ ღმერთმა გაანადგურა ეგვიპტის ჯარი?
11. როგორი დასასრული ჰქონდა ღმერთის მოქმედებას ეგვიპტის წინააღმდეგ?
12, 13. რა უნდა ვისწავლოთ ღმერთის გამარჯვებიდან მეწამულ ზღვასთან?
14. როგორი მნიშვნელობა ჰქონდა ღვთის მიმართ გამოვლენილ შიშს მეწამულ ზღვასთან?
15. როგორ უნდა გამოვეხმაუროთ ღმერთისგან გამოვლენილ გადამრჩენ მოქმედებებს?
16, 17. მოვლენების როგორ დიდებულ განვითარებას ვხედავთ დღეს?
18. რა ნათელყოფს ანგელოზების მონაწილეობას ჩვენს სამქადაგებლო საქმიანობაში?
19. რისი აღნიშვნა შეიძლება იმასთან დაკავშირებით, რომ სასარგებლოა ღვთის შიში?
20. რა უჩვენებს, რომ იეჰოვას მოწმეების რეპუტაცია სხვებისთვის ცნობილია?
21. მოქმედების როგორი გზები არის ხსნილი დღეს ადამიანებისთვის?
22. რას მოუტანს მომავალი იმ ადამიანებს, რომლებიც ღვთისადმი შიშს ავლენენ დღეს?