სამეფოს მაუწყებლები იტყობინებიან

ღირსეულთა ძებნა ავსტრალიის მეჩხრად დასახლებულ ტერიტორიაზე

ავსტრალიის შიდა ვრცელი ტერიტორია მეჩხრად არის დასახლებული. ამ დაშორებული ტერიტორიის ზოგ ნაწილში იეჰოვას მოწმეები 12 წლის მანძილზე არ გამოჩენილან. ამიტომ მოწმეებმა ღირსეულთა მოსაძებნად ქალაქ დარვინში (ავსტრალიის ჩრდილო ტერიტორიის ადმინისტრაციული ცენტრი) ორგანიზება გაუწიეს ცხრადღიან სამქადაგებლო კამპანიას (მათე 10:11).

კამპანიისთვის საგულდაგულო მზადება 12 თვით ადრე დაიწყეს. მათ გადაწყვიტეს 800 000–ზე მეტი კვადრატული კილომეტრი ფართობის ტერიტორიაზე ექადაგათ, რომელიც დაახლოებით სამჯერ აღემატება ახალ ზელანდიას. ამისათვის მათ შეადგინეს რუკები. რამდენად მეჩხრად არის ეს ტერიტორია დასახლებული? წარმოიდგინეთ, მსხვილფეხა საქონლის ფერმამდე მისასვლელი მთავარი გზიდან 30 კილომეტრზე მეტი მანძილია ფერმერის სახლის ჭიშკრამდე! უფრო მეტიც, ზოგი ფერმა 300 კილომეტრით ან უფრო მეტი მანძილის მოშორებით მდებარეობს.

ამ კამპანიაში 145 მოხალისე მონაწილეობდა, მათ შორის შორეული ტასმანიიდან ჩასული მოწმეები. ზოგი ორხიდიანი მანქანებით გაემგზავრა; მათ თან წაიღეს კარვები, ავტოსათადარიგო ნაწილები და საწვავი. სხვებმა საჭირო აღჭურვილობა ტრეილერებით გადაზიდეს. მათ, ვისაც ორხიდიანი მანქანა არ ჰყავდა, ოცდაორადგილიანი ავტობუსები დაიქირავეს და, ძირითადად, პატარა ქალაქებში ქადაგებდნენ.

გამგზავრებამდე ძმები შეიკრიბნენ და იმაზე იმსჯელეს, თუ როგორ გაევრცელებინათ სასიხარულო ცნობა ამ უჩვეულო ტერიტორიაზე. შეთავაზებების ინსცენირებებიც მოაწყეს. მაგალითად, აბორიგენებთან ეფექტურად რომ ექადაგათ, საჭირო იყო, სცოდნოდათ მათი ტრადიციები, ქცევის წესები და შესაბამისად მოქცეულიყვნენ. მოწმეებმა იმაზეც იმსჯელეს, თუ როგორ გაფრთხილებოდნენ გარემოს.

კამპანიაში მონაწილეებს ბევრი საინტერესო შემთხვევა ჰქონდათ. მაგალითად, ერთ აბორიგენულ დასახლებაში ძმებმა გადაწყვიტეს, ბიბლიაზე დაფუძნებული მოხსენება წაეკითხათ. ამის შესახებ ერთმა აბორიგენმა ქალმა, რომელიც დასახლებაში დიდი პატივისცემით სარგებლობდა, ხალხს პირადად შეატყობინა. მოხსენების წაკითხვის შემდეგ 5 წიგნი და 41 ბროშურა გავრცელდა. სხვა დასახლებაში მოწმეები ერთ აბორიგენს ესაუბრნენ. მას საკუთარი ბიბლიაც კი ჰქონდა, „მეფე ჯეიმზის თარგმანი“, მაგრამ ის ძალიან ძველი და დაფლეთილი იყო. მან წაიკითხა ჟურნალში ციტირებული მარკოზის 12:30, სადაც ეწერა: „გიყვარდეს იეჰოვა, შენი ღმერთი, მთელი გულით“. ამ აბორიგენმა თქვა: „ძალიან მომწონს ეს მუხლი“. ვრცელი საუბრის შემდეგ ძმებმა მას ახალი ბიბლია და სხვა პუბლიკაციები დაუტოვეს.

კარპენტარიის ყურესთან ახლოს ერთმა მამაკაცმა, რომლის ფერმაც 400 000 ჰექტარზე იყო გადაჭიმული, სამეფოს ცნობისადმი დიდი ინტერესი გამოავლინა. როდესაც შესთავაზეს წიგნები „ჩემი წიგნი ბიბლიური მოთხრობებით“ და „მარადიულ სიცოცხლემდე მიმყვანი შემეცნება“a, მან იკითხა, იყო თუ არა ხელმისაწვდომი ლიტერატურა კრეოლურ ენაზე. მისმა ნათქვამმა გააოცა მოწმეები, რადგან, მართალია, ამ ენაზე ბევრი აბორიგენი ლაპარაკობს, მაგრამ კითხვა ძალიან ცოტას შეუძლია. როგორც გაირკვა, ფერმაში მომუშავე ორმოცდაათივე აბორიგენს კრეოლურ ენაზე შეეძლო კითხვა. ფერმის მესაკუთრემ სიხარულით აიღო ამ ენაზე გამოცემული ბიბლიური პუბლიკაციები და ტელეფონის ნომერიც მისცა მოწმეებს, რათა მათთან კონტაქტი არ გაეწყვიტათ.

ცხრა დღის მანძილზე აქტიური ქადაგების შედეგად მოწმეებმა გაავრცელეს 120 ბიბლია, 770 წიგნი, 705 ჟურნალი და 1 965 ბროშურა. მათ 720 განმეორებითი მონახულება გააკეთეს და 215 ბიბლიის შესწავლა დაიწყეს.

ბოლოს და ბოლოს ავსტრალიის ამ ვრცელ ტერიტორიაზე მიმოფანტულმა ბევრმა ღირსეულმა ადამიანმა სულიერი შიმშილის გრძნობა დაიკმაყოფილა (მათე 5:6).

[სქოლიოები]

[რუკა 30 გვერდზე]

(სრული ტექსტი იხილეთ პუბლიკაციაში)

ავსტრალია

ჩრდილო ტერიტორია

დარვინი

კარპენტარიის ყურე

სიდნეი

ტასმანია