მთავარი თემა | როგორ ვიკითხოთ ბიბლია მეტი ინტერესით?

როგორ გავხადო ბიბლიის კითხვა საინტერესო?

ბიბლიის კითხვა თქვენთვის საინტერესო იქნება თუ მოსაწყენი, ბევრადაა დამოკიდებული იმაზე, თუ რა მეთოდებს მიმართავთ მის წასაკითხად. მოდი, შევეხოთ რამდენიმე მხარეს, რაც დაგეხმარებათ, ბიბლიის კითხვა თქვენთვის უფრო საინტერესო და სახალისო გახდეს.

შეარჩიეთ თანამედროვე ენაზე შესრულებული ბიბლიის თარგმანი. თუ ბიბლიის ისეთ თარგმანს კითხულობთ, სადაც ბევრი მოძველებული და ძნელად გასაგები სიტყვაა გამოყენებული, რა თქმა უნდა, მისი კითხვა თქვენთვის არცთუ ისე სასიამოვნო იქნება. ამიტომ შეარჩიეთ ისეთი თარგმანი, სადაც ადვილად გასაგები და გულში ჩამწვდომი სიტყვებია გამოყენებული. გარდა ამისა, დარწმუნდით, რომ თქვენ მიერ შერჩეული თარგმანი ზუსტი და სანდოა.a

ისარგებლეთ თანამედროვე ტექნოლოგიით. დღესდღეობით ხელმისაწვდომია ბიბლიის არა მხოლოდ ბეჭდვითი, არამედ ელექტრონული ვერსიაც. ბიბლიის ზოგიერთი თარგმანის წაკითხვა შესაძლებელია ონლაინში. ასევე მისი ჩამოტვირთვა შეგიძლიათ თქვენს კომპიუტერში, პლანშეტურ მოწყობილობასა თუ ტელეფონში. ზოგიერთ ელექტრონულ ვერსიას აქვს დამატებითი ფუნქციები, რისი საშუალებითაც შეგიძლიათ მოძებნოთ ერთსა და იმავე საკითხთან დაკავშირებული სხვადასხვა ბიბლიური მუხლი ან ერთმანეთს შეადაროთ ბიბლიის რამდენიმე თარგმანი. ზოგიერთ ენაზე აგრეთვე ხელმისაწვდომია ბიბლიის აუდიოჩანაწერებიც, ამიტომ თუ კითხვას მოსმენას ამჯობინებთ, შეგიძლიათ მისი აუდიოვერსია გამოიყენოთ. ბევრი სიამოვნებით უსმენს ბიბლიის აუდიოჩანაწერებს ისეთ დროს, როდესაც ხელი არ ეშლება, მაგალითად მგზავრობის ან თუნდაც სახლის საქმეების კეთების დროს. კარგი იქნება, თუ ზემოხსენებული საშუალებებიდან ერთ-ერთს შეარჩევთ.

გამოიყენეთ ბიბლიის შესწავლაში დამხმარე საშუალებები. მათი გამოყენება დაგეხმარებათ, უფრო ნაყოფიერი გახადოთ ბიბლიის კითხვა. ამ დამხმარე საშუალებებში შედის რუკებიც, სადაც მოცემულია ბიბლიური ქვეყნების ადგილმდებარეობა. ეს საშუალებას მოგცემთ, წარმოდგენა შეიქმნათ ბიბლიაში მოხსენიებული ქვეყნებისა თუ ტერიტორიების შესახებ და ადვილად დააკავშიროთ ერთმანეთთან წაკითხული ისტორიები. მსგავსი სტატიები, რომლებიც დაბეჭდილია ამ ჟურნალში ან განთავსებულია ვებ-გვერდზე jw.org („ბიბლიური სწავლებები“), დაგეხმარებათ, უკეთ ჩასწვდეთ ბიბლიის ამა თუ იმ მონაკვეთს.

ცვალეთ მეთოდები. თუ იმის გაფიქრებაც კი გაშინებთ, რომ ბიბლია თავიდან ბოლომდე უნდა წაიკითხოთ, უმჯობესი იქნება, მისი კითხვა იმ მონაკვეთიდან დაიწყოთ, რომელიც განსაკუთრებით მოგწონთ. ან თუ გსურთ, მეტი გაიგოთ ბიბლიის ცნობილი პერსონაჟების შესახებ, შეგიძლიათ უშუალოდ ის მონაკვეთები წაიკითხოთ, სადაც მათი ისტორიებია მოთხრობილი. ბიბლიის კითხვის ასეთი მეთოდის ნიმუში მოცემულია თანდართულ ჩარჩოში „უკეთ გაეცანით ბიბლიის პერსონაჟებს“. გარდა ამისა, შეგიძლიათ ბიბლია თემატურად ან ქრონოლოგიური თანმიმდევრობით განვითარებული მოვლენების მიხედვით იკითხოთ. კარგი იქნება, თუ ზემოხსენებული მეთოდებიდან ერთ-ერთს მაინც ცდით.

a ბევრი დარწმუნდა, რომ ბიბლიის „ახალი ქვეყნიერების თარგმანი“ ზუსტი და სანდოა. აგრეთვე მასში ადვილად გასაგები სიტყვებია გამოყენებული. ბიბლიის ეს თარგმანი გამოცემულია იეჰოვას მოწმეების მიერ და ხელმისაწვდომია 130-ზე მეტ ენაზე. ვებ-გვერდიდან jw.org შეგიძლიათ ჩამოტვირთოთ მისი ელექტრონული ვერსია ან აპლიკაცია „JW ბიბლიოთეკა“. მაგრამ თუ ბიბლიის ბეჭდვით ვერსიას ამჯობინებთ, იეჰოვას მოწმეებს შეუძლიათ სახლში მოგიტანონ.

უკეთ გაეცანით ბიბლიის პერსონაჟებს

**ერთგული ქალები**
აბიგაილი	1 სამუელის 25-ე თავი.
ესთერი	ესთერის 2—5 და 7—9 თავები.
ხანა	1 სამუელის 1, 2 თავები.
მარიამი	(იესოს დედა) მათეს და ლუკას 1 და 2 თავები; აგრეთვე იოანეს 2:1—12; საქმეების 1:12—14 და 2:1—4 მუხლები.
რახაბი	იესო ნავეს ძის 2 და 6 თავები; აგრეთვე ებრაელების 11:30, 31 და იაკობის 2:24—26 მუხლები.
რებეკა	დაბადების 24—27 თავები.
სარა	დაბადების 17, 18, 20, 21, 23-ე თავები; აგრეთვე ებრაელების 11:11 და 1 პეტრეს 3:1—6 მუხლები.

**ერთგული მამაკაცები**
აბრაამი	დაბადების 11—24 თავები; აგრეთვე 25:1—11 მუხლები.
დავითი	1 სამუელის 16—30 თავები; 2 სამუელის 1—24 თავები; 1 მეფეების 1, 2 თავები.
იესო	მათეს, მარკოზის, ლუკას და იოანეს სახარებები.
მოსე	გამოსვლის 2—20, 24, 32—34 თავები; რიცხვების 11—17, 20, 21, 27, 31 თავები; მეორე კანონის 34-ე თავი.
ნოე	დაბადების 5—9 თავები.
პავლე	საქმეების 7—9, 13—28 თავები.
პეტრე	მათეს 4, 10, 14, 16, 17 და 26-ე თავები; საქმეების 1—5, 8—12 თავები.

იეჰოვას მოწმეების მიერ მომზადებული ბიბლიის შესწავლაში დამხმარე საშუალებები

JW.ORG. ამ ვებ-გვერდზე განთავსებულია ბიბლიის შესწავლაში დამხმარე მრავალი საშუალება. მაგალითად, განყოფილებაში „პასუხები ბიბლიურ კითხვებზე“ ბევრი ბიბლიური საკითხი განიხილება. ვებ-გვერდზე აგრეთვე იხსნება, როგორ შეგიძლიათ ჩამოტვირთოთ აპლიკაცია „JW ბიბლიოთეკა“.
„ეწვიეთ მადლიან ქვეყანას“. ამ ბროშურაში მოცემულია ბიბლიაში მოხსენიებული ტერიტორიების რუკები და სურათები.
„წმინდა წერილების საკვლევი ცნობარი“. ეს არის ბიბლიის ენციკლოპედია, რომელიც დეტალურ ინფორმაციას გვაწვდის ბიბლიაში მოხსენიებული ხალხის, ტერიტორიებისა თუ ტერმინების შესახებ. ხელმისაწვდომია მისი ელექტრონული ვერსია.
„მთელი წმინდა წერილი ღვთისგან არის შთაგონებული და სასარგებლოა“. ამ წიგნიდან, რომელიც მეცნიერულ კვლევებს ეფუძნება, ვიგებთ, როდის, სად და რატომ დაიწერა ბიბლიის ესა თუ ის წიგნი; მასში გადმოცემულია ბიბლიის თითოეული წიგნის მოკლე შინაარსი.
„რას გვამცნობს ბიბლია?“. ამ 32-გვერდიან ბროშურაში მოკლედ არის გადმოცემული ბიბლიის მთავარი თემა.