რა კარგია ყოველთვის დასწრება!

¹ აღმოსავლეთ ევროპაში მრავალ ჩვენს ძვირფას ძმას ათეული წლების განმავლობაში ეკრძალებოდა საჯაროდ შეკრება. წარმოიდგინე მათი სიხარული, როდესაც აკრძალვები მოიხსნა და თავისუფლად შეკრების შესაძლებლობა მიეცათ!

² ერთ-ერთი ასეთი კრების მონახულების შესახებ სარაიონო ზედამხედველმა დაწერა: „სამშაბათ საღამოს, ზუსტად ჩემი მონახულების დასაწყისში, დაზიანდა გათბობის სისტემა. გარეთ ნული გრადუსი იყო, შიგნით კი თერმომეტრი დაახლოებით 5 გრადუსს აჩვენებდა. ძმები პალტოებით, კაშნეებით, ხელთათმანებით, ქუდებითა და ჩექმებით ისხდნენ. არავის შეეძლო თვალი ედევნებინა ბიბლიისთვის, რადგან ფურცლების გადაშლა შეუძლებელი იყო. სცენაზე კოსტიუმით ვიდექი, სიცივისგან გათოშილი, და, როდესაც ვლაპარაკობდი, ვხედავდი პირიდან გამომავალ ორთქლს. მაგრამ გამაოცა იმ ფაქტმა, რომ საჩივარი არავის დასცდენია. ყველამ აღნიშნა, თუ რამდენად სასიამოვნო და კარგი იყო, რომ დაესწრნენ!“ ძმებს არც კი უფიქრიათ შეხვედრის გაცდენა!

³ ჩვენც ასე ვფიქრობთ? ვაფასებთ ჩვენს ყოველკვირეულ შეხვედრებზე თავისუფლად შეკრების შესაძლებლობას? თუ, როდესაც ხელსაყრელი პირობებია, შეხვედრები ჩვეულებრივ რამედ მიგვაჩნია? შეხვედრებზე სისტემატური დასწრება იოლი არ არის. შეიძლება ზოგჯერ საფუძვლიანი მიზეზის გამო გვიწევს გაცდენა. მაგრამ არასოდეს დავივიწყოთ, რომ ჩვენ შორის არიან ისეთები, რომლებსაც, ასაკის, მძიმე ავადმყოფობის, ფიზიკური უძლურების, დაძაბული სამუშაო რეჟიმისა და სხვა სერიოზული პასუხისმგებლობების მიუხედავად, ესმით კრების შეხვედრების მნიშვნელოვნება და ყოველთვის ესწრებიან. რა შესანიშნავი მისაბაძი მაგალითია! (შეადარე ლუკ. 2:37).

⁴ მოდი ჩვევად გავიხადოთ, მხარი დავუჭიროთ ჭეშმარიტ თაყვანისმცემლობას ყველა შეხვედრაზე დასწრებით — წიგნის შესწავლის მცირერიცხოვანი შეხვედრებით დაწყებული და დიდი კონგრესებით დამთავრებული. რატომ უნდა მოვეკიდოთ ასე სერიოზულად ასეთ შეკრებებს? იმიტომ რომ ღმერთმა დაგვიწესა, ერთად შევკრებილიყავით. მაგრამ სხვა მნიშვნელოვანი ფაქტორებიცაა. ყველას გვესაჭიროება ღვთიური ხელმძღვანელობა და სულიწმიდის დახმარება, რასაც კრების შეხვედრებზე ვიღებთ (მათ. 18:20). ჩვენ ვმტკიცდებით ურთიერთგამხნევებით, როცა ვხდებით ჩვენ ძმებს (ებრ. 10:24, 25).

⁵ ფერისცვალებისას პეტრემ თქვა: „მოძღვარო, რა კარგია ჩვენთვის აქ ყოფნა“ (ლუკ. 9:33). იგივე გრძნობა უნდა გვეუფლებოდეს ყველა ქრისტიანულ შეხვედრასთან დაკავშირებით. მართლაც, რა კარგია ყოველთვის დასწრება!