გონივრულად გამოვიყენოთ ყოველივე, რაც გვაქვს
1 ‘მაძღრები, დარწყულებულები და გახარებულები იქნებიან ჩემი მორჩილნი’. იეჰოვას ეს დაპირება უკვე დღეს სრულდება სულიერი გაგებით. იეჰოვა ერთგული „მონის“ მეშვეობით ჩვენს მოთხოვნილებებს სხვადასხვა საშუალებით აკმაყოფილებს. მათგან აღსანიშნავია ჟურნალები, ბროშურები, წიგნები და ბიბლიები. ეს ყოველივე იმდენად უხვადა გვაქვს, რომ სხვებისთვისაც შეგვიძლია გაზიარება. ყოველივე ეს ყოველწლიურად ასიათასობით ადამიანს ეხმარება, რომ ნაბიჯები გადადგან სიცოცხლის გზისკენ (ეს. 65:13; მათ. 24:45).
2 ბოლო წლებში მათი არჩევანი გაიზარდა. მრავალ ენაზე გამოიცა „საღვთო წერილის განხილვა“, წელიწდეულები, სიმღერის წიგნები, კალენდრები, აკინძული ტომები, დიდი ცნობარები, ვიდეოები, მუსიკისა და დრამის ჩანაწერები აუდიოკასეტებზე, ბიბლიისა და ლიტერატურის საძიებლები კომპიუტერის დისკეტებსა და კომპაქტ-დისკებზე.
3 ათწლეულების წინ საზოგადოებამ საკუთარი სტამბები დააფუძნა მაღალი ხარისხის ჟურნალებისა და ლიტერატურის დროულად და ეკონომიურად გამოსაცემად. ბოლო წლებში, გარკვეული ნივთების დასამზადებლად რამდენიმე ადგილას სპეციალური განყოფილებები შეიქმნა. გარკვეული ნივთების დამზადებაში საზოგადოება კომერციულ კომპანიებსაც იშველიებს, თუ საქმის წარმოება ასე უფრო ეკონომიურია.
4 თუმცა საზოგადოების ოფისებსა და სტამბებში ბეთელის ოჯახების გულმოდგინე და თავგანწირული მუშაობა ამცირებს ხარჯებს, მაინც უზარმაზარი თანხებია საჭირო ყოველწლიური ხარჯების დასაფარავად. მანქანების, მასალის, მოვლისა და ენერგიის გარდა, პუბლიკაციებმა და სხვა ნივთებმა ხელმისაწვდომი რომ გახდეს კრებებისთვის, საჭიროა ტრანსპორტირებასთან, გადასახადებთან და საბაჟო მომსახურებასთან დაკავშირებული ხარჯების დაფარვა.
5 ცხადია, რომ ასეთი პუბლიკაციები და ნივთები ხარჯებსა და ძალისხმევას მოითხოვს. ეს კი გვეხმარება სწორ შეფასებაში, როდესაც გვახსოვს, რომ პუბლიკაციებისა და სხვა ნივთებისთვის საჭიროა გარკვეული სამუშაოს შესრულება და თანხის გაღება. მიუხედავად იმისა, რომ ამ ყოველივეს კრებაში უფასოდ ვღებულობთ, ეს პუბლიკაციები ხელმისაწვდომი რომ გამხდარიყო, მრავალი შესაწირავი იყო საჭირო.
როგორ იფარება ხარჯები?
6 ზოგს შეიძლება ჰგონია, რომ ‘ყველაფრისთვის, რასაც უფასოდ ვღებულობთ, საზოგადოება იხდის’. მაგრამ ნამდვილად ასეა ეს? რა არის „საზოგადოება“? მრავალ ქვეყანაში „ბიბლიისა და ტრაქტატების საზოგადოება საგუშაგო კოშკი“ ან „იეჰოვას მოწმეების რელიგიური ორგანიზაცია“ რეგისტრირებულია როგორც აუცილებელი იურიდიული პირი, რომ შეასრულოს ყოველი აუცილებელი საქმე სულიერი საზრდოს მოსამზადებლად და გასავრცელებლად. ფილიალების ოფისებში მიმდინარე სამუშაოსა და სამქადაგებლო საქმეს ყველა ნებაყოფლობით ასრულებს, ასე რომ, ორგანიზაციაში არავის ეძლევა არანაირი ხელფასი თუ საკომისიო გადასახადი. საზოგადოება არავითარ მომგებიან საქმეს არ ეწევა და დაფინანსებისთვის არც არავითარი საიდუმლო წყარო აქვს. ფული, რომელიც იხარჯება, შემოდის ჭეშმარიტების მოყვარული ადამიანების მიერ გაღებული ნებაყოფლობითი შესაწირავების წყალობით. საზოგადოება კი მხოლოდ ხელმძღვანელობას უწევს, თუ როგორ შეიძლება ამ ნებაყოფლობითი შესაწირავების საუკეთესოდ გამოყენება ადამიანების დასახმარებლად.
7 ნათელია, რომ ამ დახმარებას, ძირითადად, იეჰოვას მიძღვნილი მსახურები სწევენ. ფაქტობრივად, ჩვენ თვითონ, როგორც საერთაშორისო საძმო, ვფარავთ ჩვენს ხარჯებს. მაგრამ ის, თუ ვინ რამდენს შესწირავს, თითოეულის შეძლებასა და სურვილზეა დამოკიდებული. (2 კორ. 8:10–15; 9:6–14). რა თქმა უნდა, დიდად ფასდება იმ გულწრფელად დაინტერესებული და მადლიერი ადამიანების მიერ გაღებული მცირე შესაწირავები, რომლებსაც სამქადაგებლო მსახურებაში ვხვდებით. მაგრამ ასეთი შესაწირავები ჩვენი სამეფო საქმისთვის გაღებული ხარჯების მხოლოდ მცირე ნაწილს თუ ფარავს.
8 შესაწირავების უმეტეს ნაწილს მცირე შეძლების მქონე ადამიანები სწირავენ. ზოგიერთი მაუწყებელი მიჰყვა კორინთელებისთვის მიცემულ პავლეს რჩევას, რომ შესძლებოდათ რაღაცის შეწირვა: „ყოველ კვირის პირველ დღეს თითოეულმა თქვენგანმა გადადოს თავისთან და გადაინახოს, რაშიც წარმატება ჰქონდა“ (1 კორ. 16:2, აფ). ზოგმა შეიძლება მეტი შესწიროს, სხვებმა კი — ნაკლები. მაგრამ არ უნდა გვრცხვენოდეს, თუ ბევრის შეწირვის საშუალება არა გვაქვს. იეჰოვამ დააფასა ქვრივის ორი ლეპტა (მარ. 12:41–44).
9 ჩვენ სიხარულით ვეუბნებით ყველას: ‘მოდი, უსასყიდლოდ აიღე სიცოცხლის წყალი’ (გამოცხ. 22:17). ჭეშმარიტება უფასოა და ჩვენ გვსურს ყოველგვარი მატერიალური კომპენსაციის გარეშე დავეხმაროთ გულწრფელ ადამიანებს. მაგრამ შეგვიძლია ტაქტიანად ავუხსნათ დაინტერესებულებს, თუ როგორ ფინანსდება ჩვენი მსოფლიო საგანმანათლებლო საქმე და რომ ამ საქმის მხარდაჭერა ყველა მსურველს შეუძლია.
10 რამდენიმე წლის განმავლობაში ყოფილი საბჭოთა კავშირის ქვეყნები სხვების გულუხვი მხარდაჭერით სარგებლობდნენ. ძმები სხვა ქვეყნებიდან სიხარულით ეხმარებოდნენ მათ. მაგრამ მსოფლიოში არსებობს უფრო უარეს ეკონომიკურ მდგომარეობაში მყოფი ქვეყნები. ისინიც დიდ დახმარებას საჭიროებენ, ჩვენი შესაძლებლობები კი შეზღუდულია. რაც უფრო მეტად ატარებს თითოეული ჩვენგანი საკუთარ ტვირთს და იკისრებს საკუთარი ხარჯების პასუხისმგებლობას, მით მეტად დაეხმარება ეს ძმებს სხვაგან. ამგვარად უფრო მეტი დახმარება გაეწევათ იმ მხარეებს, სადაც უფრო მეტი საჭიროებაა.
როგორ უნდა გამოვიყენოთ ლიტერატურა?
11 რადგან დიდმა თავისუფლებამ შესაძლებელი გახადა ბიბლიური ლიტერატურის გავრცელება, უდიდესი ძალისხმევა მოხმარდა მაუწყებლებისთვის უფასო, დაბეჭდილი ლიტერატურის საკმარისი რაოდენობით მიწოდებას. უმთავრესად, ეს სხვა ქვეყნებიდან მიღებული ნებაყოფლობითი შესაწირავების წყალობით გახდა შესაძლებელი. ბოლო წლებში უდიდესი რაოდენობის ლიტერატურა გავრცელდა ამ ქვეყნებში. ამან, პირდაპირი გაგებით, ასიათასობით ადამიანს მისცა შესაძლებლობა, გაეგო კეთილი ცნობა ღვთის სამეფოს შესახებ. მრავალი დიდი ინტერესით კითხულობს ჩვენს ჟურნალებს და სიხარულით იღებს ყოველ ახალ ნომერს. მაგრამ არიან ისეთებიც, რომლებიც არ კითხულობენ ბიბლიურ ლიტერატურას.
12 ჩვენ პატივს ვცემთ ადამიანის პირადი გადაწყვეტილების მიღების უფლებას და არ გვინდა, დავაძალოთ იმის გაკეთება, რაც არ სურს. ჩვენი პუბლიკაციები ძვირფასი მარგალიტებია და არა გადასაყრელი რამ. თუ ადამიანები ნამდვილად არ აფასებენ ამ სულიერ საჩუქარს, არავითარი მიზეზი არ გვაქვს, რომ გადავუყაროთ ისინი მათ (მათ. 7:6). როგორც საკუთარ ქონებას ვიყენებთ გონივრულად, ისე თითოეული მაუწყებელი პასუხისმგებელია, რომ გონივრულად გამოიყენოს ლიტერატურა, რომელსაც ადგილობრივ კრებაში ღებულობს.
13 ანგარიშებიდან ჩანს, რომ ზოგიერთმა მაუწყებელმა ლიტერატურის გავრცელების აშკარად არაგონივრული ჩვევა განივითარა. ისინი ხვდებიან ისეთ ადამიანებს, რომლებიც უარს არაფერზე ამბობენ, ოღონდ უფასო იყოს. ამგვარად, მაუწყებლებს მიაქვთ მათთვის ყველაფერი — ერთ მისვლაზე რამდენიმე პუბლიკაციაც კი. ზოგიერთს ჩვენი პუბლიკაციები დიდი რაოდენობითა აქვს სახლში. მაგრამ ნამდვილად შეუძლიათ ან აქვთ სურვილი, ყოველივე ეს წაიკითხონ? და რა შედეგი შეიძლება გამოიღოს, თუ ძალიან ბევრს მივუტანთ?
14 დასაწყისში ბიბლიის ჭეშმარიტებებისადმი ინტერესი ნაპერწკლის მსგავსია. თუ ღუმელში ცეცხლი ოდნავ ბჟუტავს, უცბად გატენიდით მას შეშით? რა მოჰყვებოდა ამას? პატარა ცეცხლი შეიძლება ჩამქრალიყო. ბრძენი კი შეშას ფრთხილად დაუმატებდა ცოტ-ცოტას, სანამ პატარა ცეცხლი არ აგიზგიზდებოდა და შთანთქავდა უფრო მეტს. ხშირად ბრძნულია, ადამიანებსაც მსგავსი პრინციპით მივუდგეთ. თუ ცეცხლი ბჟუტავს, ანუ ჭეშმარიტებისადმი მცირე ინტერესია, ის შეიძლება გაგვეღვივებინა ტრაქტატით, ჟურნალით ან ბროშურით. ლიტერატურა შეშასავით ცოტ-ცოტა უნდა დავუმატოთ, მხოლოდ იმდენი, რამდენსაც ადამიანები დასაწყისში შედეგიანად ითვისებენ.
15 თუმცა ადამიანები შეიძლება სიხარულით იღებენ პუბლიკაციებს, მაგრამ დროდადრო შეიძლება შეამჩნიო, რომ არავითარი ნაპერწკალი არ არის მათს გულებში — არა აქვთ ნამდვილი ინტერესი ბიბლიისადმი. რატომ გადავყაროთ ჩვენი ძვირფასი ლიტერატურა? დარწმუნდი რომ ისინი ღირსეულნი არიან და აფასებენ ლიტერატურას და სურთ შემეცნების გაზრდა, რაც მათ საბოლოოდ მარადიულ სიცოცხლემდე მიიყვანს. თუ სურთ ბიბლიის რეგულარულად შესწავლა, ეს ნიშნავს, რომ ნამდვილად აფასებენ ჭეშმარიტ შემეცნებას (იოან. 17:3).
ლიტერატურა უცხო ენებზე
16 თუ უცხოელებს ვხვდებით, რომელთა მშობლიური ენაც განსხვავდება ჩვენისგან, ყოველთვის კარგია, შევამოწმოთ, თუ რის მიწოდება შეგვიძლია მათ მშობლიურ ენაზე. თუმცა შეიძლება ცოტათი ესმოდეთ ჩვენი ენა, მათ გაუჭირდებათ ღრმა აზრების ჩაწვდომა სხვა ენაზე. თუ ტრაქტატები, ბროშურები ან ჟურნალები არსებობს იმ ენაზე, რომელიც საუკეთესოდ ესმით, მათ შეიძლება სიამოვნებით წაიკითხონ ისინი. მაგრამ იმის დასადგენად, მივაწოდოთ თუ არა მათ მეტი ლიტერატურა, ვიხელმძღვანელებთ იმავე კრიტერიუმით, რომლითაც სხვებს ვუდგებით. თუ ისინი ნამდვილად აფასებენ ჭეშმარიტებას, მოხარული ვიქნებით გონივრულად დავეხმაროთ მომავალშიც.
17 საზოგადოებამ ზოგ ენაზე გამოსცა დიდი ცნობარები. „ბიბლიის ცნობარი“ (Insight on the Scriptures) არის ბიბლიური ლექსიკონი, რომელიც 2 500-ზე მეტ გვერდს შეიცავს. წიგნი „იეჰოვას მოწმეები — ღვთის სამეფოს მაუწყებლები“ შეიცავს მსოფლიოს მასშტაბით ჩვენი ორგანიზაციის ისტორიას. „სრული სიმფონია“ გამიზნულია სიტყვებისა და ბიბლიური მუხლების მოსაძებნად „საღვთო წერილის ახალი ქვეყნიერების თარგმანში“. „საგუშაგო კოშკის პუბლიკაციების საძიებელში“ მითითებულია 1930 წლიდან დღემდე გამოცემული პუბლიკაციები და გვეხმარება გამოცემული მასალისა და ბიბლიური მუხლების ახსნების მოძებნაში. ეს ძვირფასი დამხმარე საშუალებებია მაუწყებლებისთვის, რომლებიც კარგად ფლობენ იმ ენას, რომელზეც ისინია გამოცემული. მაგრამ ეს პუბლიკაციები არ უნდა შევთავაზოთ ახლად დაინტერესებულებს. უნდა მოვიცადოთ, სანამ მაუწყებლები არ გახდებიან.
ვიდეოკასეტები
18 ლიტერატურის გარდა საზოგადოებამ გამოსცა სხვა სასწავლო საშუალებები — ვიდეოკასეტები. დღესდღეობით რუსულ ენაზე გამოცემულია შემდეგი ვიდეოკასეტები: 1) „იეჰოვას მოწმეები — ორგანიზაცია ამ სახელწოდებით“, 2) „იეჰოვას მოწმეების სიმტკიცე ნაცისტური თავდასხმის წინააღმდეგ“, 3) „ბიბლია — ზუსტი ისტორია და სანდო წინასწარმეტყველება“ და 4) „იისფერი სამკუთხედები“. სხვა ენებზე გამოცემულია უფრო მეტი ვიდეოკასეტა და, დროთა განმავლობაში, ისინი რუსულ ენაზეც გამოვა. ამის შესახებ განცხადება „ჩვენს სამეფო მსახურებაში“ გაკეთდება.
19 საზოგადოების მიერ გამოშვებული ზოგი ვიდეოკასეტა შესანიშნავი დამხმარე საშუალებაა ბიბლიის შემსწავლელებისთვის. ხშირად ისინი ადგებათ მათ, რომ უკეთ აუხსნან ურწმუნო მეუღლეებს ჩვენი ორგანიზაცია. განათლებული ადამიანები დიდ შეფასებას აძლევენ ჩვენი ვიდეოფილმების ხარისხს. მათი გამოყენება მაშინაც შეიძლება, როცა ვასწავლით წერა-კითხვის უცოდინართ, პატარებს, რომლებმაც ჯერ არ იციან კითხვა, მათ, ვისაც უჭირთ დიდი ხნით ყურადღების მოკრება, აგრეთვე ყრუებს.
20 მრავალმა კრებამ უკვე მიიღო ზოგი ვიდეოკასეტი რუსულ ენაზე. როგორ იყენებენ ისინი მათ? ზოგმა კრებამ, მიუხედავად იმისა, რომ კრებაში არავის აქვს ვიდეომაგნიტოფონი, მაინც გამოიწერა ვიდეოკასეტები. ვიდეოკასეტებს სარგებლობა არ მოაქვს, როცა ისინი უბრალოდ აწყვია. კარგია იმის შემოწმება, თუ როგორ შეიძლება მათი გამოყენება საუკეთესოდ. ზოგჯერ სკოლებს, უნივერსიტეტებს, ბიბლიოთეკებსა თუ სხვა დაწესებულებებს, აგრეთვე ქალაქის მოხელეებსა და სხვა ოფიციალურ პირებს სურთ ვიდეოკასეტის ფლობა ან თხოვება. ხშირ შემთხვევაში, ნამდვილი ინფორმაცია ჩვენს შესახებ აქარწყლებს ეჭვებსა და არასწორ წარმოდგენებს. ამ მხრივ, ვიდეოფილმებს კარგი სამსახურის გაწევა შეუძლია.
21 როგორ შეუძლიათ მაუწყებლებსა და პიონერებს ვიდეოკასეტების გამოყენება, თუ მათ არა აქვთ ვიდეომაგნიტოფონები? თუ ისინი ხედავენ, რომ მათ, ვისაც ბიბლიას ასწავლიან ან რეგულარულად აკითხავენ, აქვთ ვიდეომაგნიტოფონები, შეუძლიათ ჰკითხონ, ხომ არ ისურვებდნენ ჩვენი ვიდეოფილმების ყურებას. თუ თანახმა არიან, ვიდეოს ყურება მათთან ერთად შეიძლება ან მაუწყებლებს შეუძლიათ ათხოვონ ფილმი რამდენიმე დღით. კრების სამსახურებრივ ზედამხედველს ან წიგნის შესწავლის ხელმძღვანელს შეუძლიათ უზრუნველყონ ისინი ვიდეოკასეტებით ამ მიზნისთვის.
22 ჩვენი ზოგი ფილმის ჩვენება შეიძლება მოინდომოს ზოგმა სატელევიზიო სადგურმაც. ასეთ შემთხვევებში ჩვენ ვთხოვთ, რომ დაუკავშირდნენ ფილიალის ბიუროს, რომ დაიდოს კონტრაქტი ამ საკითხთან დაკავშირებით და რომ სათანადო კასეტა მიეწოდოთ პროფესიონალური ხელსაწყოებისთვის.
აუდიოკასეტები და კომპაქტ-დისკები
23 საზოგადოებამ გამოუშვა აუდიოკასეტები და კომპაქტ-დისკები, რომლებზეც ჩაწერილია სამეფო მელოდიები. მელოდიები ორკესტრის შესრულებით, ძირითადად, სახლში მოსასმენად. ასეთი მუსიკისთვის რვა კასეტა ან კომპაქტ-დისკია გამოშვებული.
24 საზოგადოებამ აგრეთვე გამოუშვა „საგუშაგო კოშკის ბიბლიოთეკა“ კომპაქტ-დისკზე. ის გამოცემულია გერმანულ, დანიურ, ესპანურ, იაპონურ, ინგლისურ, იტალიურ, პორტუგალიურ, ფრანგულ და ჰოლანდიურ ენებზე. მათი გამოყენება შეიძლება ისეთ კომპიუტერზე, რომელსაც CD-ROM-ის მაფორმირებელი აქვს. ეს გამოცემა წარმოადგენს ბიბლიოთეკას, რომელშიც შედის: „საღვთო წერილის ახალი ქვეყნიერების თარგმანი — სქოლიოებით“, 1950 წლიდან გამოცემული „საგუშაგო კოშკისა“ და 1970 წლიდან გამოცემული „გამოიღვიძეთ!“-ის ყოველწლიური აკინძული ტომები, ბიბლიური ენციკლოპედიის (Insight on the Scriptures) ორი ტომი და საზოგადოება „საგუშაგო კოშკის“ მიერ 1970 წლიდან გამოცემული სხვა მრავალი წიგნი, ბროშურა და ტრაქტატი. ამასთანავე, მასში მოცემულია საძიებელი „საგუშაგო კოშკის“ ყველა პუბლიკაციისთვის, რომლებიც გამოიცა 1930 წლიდან. ეს დამხმარე საშუალება მხოლოდ მაშინაა სასარგებლო, როცა გესმის ენა და გაქვს ამისთვის საჭირო მოწყობილობები.
25 რა უნდა გააკეთო იმ შემთხვევაში, თუ გაქვს ვიდეომაგნიტოფონი, კომპაქტ-დისკის „პლეიერი“ ან კომპიუტერი CD-ROM-ის მაფორმირებლით და გსურს შეიძინო რამე ზემოხსენებულიდან? სთხოვე შენს კრებაში ლიტერატურაზე პასუხისმგებელ ძმებს, რომ გამოგიწერონ ისინი. ძმა შეგეკითხება, გაქვს თუ არა ყოველივე აუცილებელი, რომ ზემოხსენებული გამოიყენო. თუ გსურს სპეციალური ნივთის შეძენა უცხო ენაზე, უნდა იცოდე ის ენა, რომ შეძლო მისი გამოყენება. მფლანგველობა იქნებოდა ისეთი რამის გამოწერა, რის ეფექტურად გამოყენებაც არ შეგიძლია. უცხო ენის შესწავლის მიზნით ამ ძვირფასი ნივთების გამოწერა არ იქნებოდა კარგი. გთხოვთ, აგრეთვე დაიმახსოვრე, რომ ეს სპეციალური ნივთები მხოლოდ მაუწყებლებისთვისაა — ისინი არ უნდა გავრცელდეს.
26 კიდევ ერთი რამის დამახსოვრებაა საჭირო, რაც შეეხება იმ ნივთებს, რომელთა გამოწერაც შეიძლება გსურს. როგორც იცი, ამ ნივთებიდან უმრავლესობის გამოშვება საკმაოდ ძვირი ჯდება. ამიტომ ჩვენ ზომიერება და კეთილგონივრულობა გვესაჭიროება. მიუხედავად იმისა, რომ არანაირ გადასახადს არ გვთხოვენ, როცა რაღაცას ვუკვეთავთ, ყველას გვესმის, რომ, როგორც საერთაშორისო საძმოს, თითოეულს გვაკისრია ხარჯების დაფარვის პასუხისმგებლობა.
27 ზოგი დაინტერესდა სხვადასხვა ნივთის ღირებულებით. ამაზე პასუხი შეიძლება მივიღოთ, თუ გავიხსენებთ, რა ღირს, ჩვეულებრივ, მსგავსი ნივთები, როცა ისინი მაღაზიაში იყიდება. მაგრამ, როცა ვფიქრობთ ჩვენს შესაძლებლობაზე, შევწიროთ სამეფო საქმისთვის, ჩვენ მხოლოდ ლიტერატურა ან სხვა პირადად გამოსაყენებელი ნივთები არ გვაქვს მხედველობაში. ჩვენ გვესმის, რომ არსებობს სხვა მრავალი მხარე, სადაც თანხებია საჭირო; ამაში შედის სპეციალური პიონერების, მიმომსვლელი ზედამხედველების, ბეთელის საქმიანობის, სამეფო დარბაზების, კონგრესების, ჰუმანიტარული დახმარებისა და სხვა საკითხების დაფინანსება. ყოველივე ამაზე ჩვენი ნებაყოფლობითი შესაწირავები იხარჯება. ასე რომ, ჩვენ ვცდილობთ სიტუაციის დანახვას არა ნაწილობრივ, არამედ მთლიანად, და ვწირავთ ჩვენი შესაძლებლობებისა და გულიდან გამომდინარე სურვილის თანახმად (გამ. 25:2).
28 საზოგადოებას სურს, მეტი საშუალება მისცეს არა მხოლოდ კრებებსა და წიგნის შესწავლის ჯგუფებს, არამედ ცალკეულ მაუწყებლებსაც, რომ ისარგებლონ ამ სპეციალური ნივთებით. გვჯერა, რომ მაუწყებლები და პიონერები გაიგებენ, თუ რა შესაწირავებთანაა დაკავშირებული ასეთი ნივთების გამოშვება, და საღი აზროვნებით იხელმძღვანელებენ, სანამ რამეს შეუკვეთავენ პირადი ხმარებისთვის (იგავ. 16:20).
29 ძალიან გვახარებს, რომ იეჰოვამ უამრავი რამით მოგვამარაგა: ლიტერატურითა და სხვა ნივთებით. დიდად კურთხეულები ვართ, რომ გვაქვს სიცოცხლის მომცემი ბიბლიური ჭეშმარიტების პრაქტიკული ინფორმაცია. ეს დაგვეხმარა ჩვენ, ჩვენს ოჯახებსა და კიდევ სხვა უამრავ ხალხს, ცხოვრებაში მნიშვნელოვანი ნაბიჯების გადადგმაში. დიდად მადლიერები ვართ ყველაფრისთვის, რაც გვაქვს და გვსურს მათი გამოყენება რაც შეიძლება უკეთესად და გონივრულად, რომ ხელი შევუწყოთ ღვთის სამეფოს წინსვლას და სრულად დავუჭიროთ მხარი სამეფოს საქმეს.