სამეფო დარბაზების მშენებლობის ახალი პროგრამა
იეჰოვა, უეჭველად, ასრულებს თავის დანაპირებს, რომ ასწავლოს თავისი სახლის წევრებს და გაუძღვეს მათ თავის გზებზე (ეს. 54:13). იეჰოვამ ოდითგანვე კონკრეტული ზომები მიიღო გაერთიანებული თაყვანისმცემლობისთვის, რაშიც აუცილებელი სწავლაც შედის (რჯლ. 31:12, 13; ნეემ. 8:1—8; ფსალმ. 121:1). ამან დიდი სარგებლობა მოუტანა მის ერთგულ ხალხს. მისი რჩევების ზედმიწევნით გამოყენებით ისინი გამოყოფილები არიან ქვეყნიერებისგან და ახლო ურთიერთობას ინარჩუნებენ თანამორწმუნეებთან (გამ. 34:11—16; 2 კორ. 6:14—18). განსაკუთრებით ამ უკანასკნელ დღეებში მოგვიწოდებენ, რეგულარულად შევიკრიბოთ ერთად, რათა არა მხოლოდ ვისწავლოთ იეჰოვასგან, არამედ ერთმანეთი გავამხნევოთ და აღვძრათ სიყვარულისა და კეთილი საქმეებისკენ (რომ. 1:11, 12; ებრ. 10:23—25).
პირველი საუკუნიდან დღემდე ქრისტიანები იკრიბებიან თაყვანისმცემლობისთვის, როგორც კერძო ბინებში, ისე საჯარო ადგილებში (საქ. 2:42, 46; 12:12). მაგრამ განსაკუთრებით 1935 წლიდან, როცა გამოცხადებული იყო, რომ ჰავაიში შენდებოდა შეხვედრებისთვის განკუთვნილი ახალი ადგილი, რომელსაც დაერქმეოდა „სამეფო დარბაზი“, იეჰოვას მოწმეების კრებები ყველგან ცდილობენ, რომ ჰქონდეთ თაყვანისმცემლობისთვის განკუთვნილი საკუთარი განსაკუთრებული ადგილი, რომელსაც ზემოხსენებული სახელი ეწოდება. ასე რომ, დღეს სამეფო დარბაზები მთელ მსოფლიოშია და ყოველწლიურად აშენებენ ან სხვა გზით იძენენ უფრო მეტ ასეთ დარბაზს, როგორც კრების სისტემატური შეხვედრების ადგილს.
იეჰოვას მოწმეებისთვის სამეფო დარბაზი უმნიშვნელოვანესი ადგილია იქ, სადაც ისინი ცხოვრობენ. მისი აგებულება და კონსტრუქცია შეიძლება მიმზიდველი იყოს, მაგრამ შედარებით სადა გარეგნობის მქონე შენობასაც დიდად აფასებენ, რადგან ჭეშმარიტი თაყვანისმცემლობისა და თეოკრატიული მოღვაწეობის ცენტრს წარმოადგენს. ის იმის მტკიცებას იძლევა, რომ ადგილობრივ მიმდინარეობს სამეფოს შესახებ სასიხარულო ცნობის ქადაგება. ეს ის ადგილია, სადაც ყოველი, ვისაც შეგნებული აქვს თავისი სულიერი მოთხოვნილებები, ნამდვილ სულიერ გამხნევებასა და დარიგებებს იღებს (მათ. 5:3).
სწრაფი ზრდა მეტ სამეფო დარბაზს მოითხოვს
სამქადაგებლო მსახურების ანგარიშები ცხადყოფს, რომ იეჰოვა ‘აჩქარებს’ ხალხის შეკრების საქმეს ჩვენს დროში, როცა დიდი სისწრაფით გვიახლოვდება თანამედროვე სისტემის აღსასრული. ეს ზუსტად ისე ხდება, როგორც მან ესაია წინასწარმეტყველის მეშვეობით თქვა: „მცირე ათასად გადაიქცევა და უმრწემესი — ძლიერ ხალხად“ (ეს. 60:22). მაგალითად, ჯერ მარტო რუსეთში ბოლო სამი წლის განმავლობაში 41 000-ზე მეტი ახალმონათლულია. ამ ღირსშესანიშნავ ზრდას 412 ახალი კრების ჩამოყალიბება მოჰყვა. ადგილობრივ კრებებს უჭირთ, ფეხდაფეხ მიჰყვნენ ამ ზრდას და ახალი სამეფო დარბაზები ააშენონ. ეს საჭიროება კი უფრო მეტად იგრძნობა, განსაკუთრებით, რაც დრო გადის და ხალხის შეკრების საქმე სწრაფად მიმდინარეობს. ხელმძღვანელი საბჭო დაინტერესებულია იმაში, რომ კრებები საჭირო სამეფო დარბაზებით იყოს უზრუნველყოფილი, და წამოიწყო ახალი პროგრამა, რათა დახმარება გაუწიოს ძმებს განსაკუთრებით იმ ადგილებში, სადაც ახალი სამეფო დარბაზების აშენება ძალიან ძნელი საქმეა. ამ პროგრამას შემდეგი სახელწოდება აქვს: „სამეფო დარბაზების მშენებლობის პროგრამა იმ ქვეყნებისთვის, სადაც შეზღუდული შესაძლებლობებია“.
ამ სტატიაში აღწერილია ზოგი საკითხი, რომელთა განხილვითაც გაცნობებთ, თუ როგორ იმოქმედებს ახალი ღონისძიება და როგორ შეუძლია მომავალში თითოეულ ჩვენგანს მონაწილეობის მიღება ამ „სამეფო ერთიანობაში“.
საჭიროება
წიგნში „ორგანიზებული ვართ ჩვენი მსახურების შესასრულებლად“ (რუს.), 61-ე გვერდზე, ნათქვამია: „სამეფო დარბაზი, როგორც თაყვანისმცემლობის ადგილი, სხვებზე შთაბეჭდილების მოხდენის მიზნით არ უნდა იყოს აშენებული ორიგინალური კონსტრუქციით. მისი არქიტექტურული სტილი სხვადასხვა ადგილას შეიძლება განსხვავდებოდეს, მაგრამ მისი მიზანი ის არის, რომ მოქმედი იყოს (შეადარე საქმეების 17:24). ის კეთილმოწყობილი და მოსახერხებელი უნდა იყოს ქრისტიანული შეხვედრების ჩასატარებლად, რომლებიც გვეხმარება სულიერ ზრდასა და იეჰოვას გაცნობაში, რაც აღგვძრავს სამეფო მსახურებაში მონაწილეობისკენ“. როგორც ბიბლიური განათლების ცენტრი, სამეფო დარბაზი უშუალოდ ემსახურება იმას, რომ სასიხარულო ცნობა ექადაგოს კრების ტერიტორიაზე მცხოვრებ ხალხს.
სტატისტიკა ცხადყოფს, რომ რუსეთის ფედერაციაში მხოლოდ 61 სამეფო დარბაზია და 32 დარბაზი ჯერ კიდევ შენდება. ამ სამეფო დარბაზებს დაახლოებით 180 კრება იყენებს, მაშინ როცა რუსეთის ფედერაციაში ათასზე მეტი კრებაა. ეს გარკვეულ პრობლემებს ქმნის იქ, სადაც ცოტა სამეფო დარბაზია ან სადაც საერთოდ არც ერთი დარბაზი არ არის. ზოგან ძალიან ძნელია შესაფერისი ადგილის დაქირავება სამეფო დარბაზად გამოყენებისთვის, ამიტომ ეს აიძულებს მრავალ კრებას, შეხვედრები დაბალხარისხოვან შენობებში ან კერძო ბინებში ჩაატარონ. როცა შეხვედრის ადგილები არ ეთანხმება ჩვენი თაყვანისმცემლობის შინაარსს, ზოგი ადამიანი, განსაკუთრებით, ახლები, აღარ ესწრებიან შეხვედრებს რეგულარულად. ზოგჯერ უხუცესები აყოვნებენ ახალი კრების ჩამოყალიბების საკითხის დაყენებას, რადგან ახალ კრებას არ ექნება შესაკრებელი ადგილი. აგრეთვე სხვა კრებებისთვის შორ მანძილებზე გამგზავრება ნაკლებად მოსახერხებელს ხდის შეხვედრებზე დასწრებას, ამას ფინანსური სირთულეებიც ემატება და ხელს უშლის ზრდას. დღეს მრავალი ისეთი ქალაქია, სადაც მილიონზე მეტი მოსახლე ცხოვრობს, ძმებს კი ერთი საკუთარი სამეფო დარბაზიც არა აქვთ.
სხვა მხრივ, მრავალი კრება, რომლებმაც სამეფო დარბაზის მშენებლობა წამოიწყეს, ძლიერ ბიუროკრატიას აწყდება მიწის ნაკვეთის პოვნისა და მომავალი სამეფო დარბაზის ასაშენებლად ნებართვის აღების მცდელობისას.
რა გაკეთდა?
1983 წელს ამერიკის შეერთებულ შტატებში შემოიღეს „სამეფო დარბაზების ფონდი“ და, იქიდან მოყოლებული, ეს ღონისძიება ათასობით კრებას დაეხმარა მთელ მსოფლიოში. ამჟამად თითქმის ყველა ფილიალს აქვს სამეფო დარბაზების საკუთარი ფონდი და რუსეთში აქედან ბევრმა კრებამ მიიღო დახმარება. 1987 წელს სიახლე იყო რეგიონალური სამშენებლო კომიტეტი. ეს ტვირთს უმსუბუქებს ძმებს, რომლებიც საკუთარი ძალებით აშენებენ სამეფო დარბაზებს, რადგან მათ ეხმარებიან ნაკვეთისა და მასალის შეძენაში, სამეფო დარბაზის პროექტირებასა და იმ რეგიონის მოხალისე მშენებლების ხელმძღვანელობაში. ამჟამად ჯერ მარტო რუსეთში 10 რეგიონალური სამშენებლო კომიტეტი მოქმედებს, აგრეთვე ერთი საქართველოშია და ერთიც ყაზახეთში. ეს ძმები შესანიშნავ სამუშაოს ასრულებენ, რადგან ადგილობრივ კრებებს საჭირო დახმარებას უწევენ.
მაგრამ გამოთვლილია, რომ დღეს მსოფლიოში საჭიროა 12 000 ახალი სამეფო დარბაზი, აქედან 450 მხოლოდ რუსეთში უნდა აშენდეს. ეს ციფრები კი განუწყვეტლივ იზრდება. ხელმძღვანელ საბჭოს კარგად ესმის ამ საქმის დაჩქარების აუცილებლობა. ამ მიზნით დიდი ზრუნვა გაეწია კრებების საჭიროებებს, რის შედეგიც ამ ახალი ღონისძიების შემოღება იყო, რაც დაეხმარება ძმებს ისეთ ქვეყნებში, სადაც ძალიან საჭიროა სამეფო დარბაზები. ძირითადი ბიბლიური პრინციპი, რომელიც ამ ღონისძიების მოქმედებაში ჩაიდო, წარმოთქმული იყო პავლე მოციქულის მიერ მე-2 კორინთელთა 8:14, 15-ში. ის პალესტინაში მცხოვრები ძმების მატერიალურ საჭიროებებზე ფიქრობდა და სათანადო რჩევები მისცა მცირე აზიის კრებებს, რათა დახმარებოდნენ მათ.
პავლე მოციქულმა მიუთითა, რომ იეჰოვამ სიყვარულით მიიღო ზომები, რათა ეზრუნა ისრაელთა საჭიროებებზე უდაბნოში მათი ორმოცწლიანი მგზავრობის დროს, და თქვა: «თქვენი ნამეტი შეავსებს მათს ნაკლულობას, რათა მათმა ნამეტმაც შეავსოს თქვენი ნაკლულობა, რომ იყოს თანასწორობა. როგორც წერია: „ვინც ბევრი აკრიფა, ზედმეტი არ ჰქონდა, ხოლო ვინც ნაკლები — არ აკლდა“ » (შეადარე გამოსვლა 16:18). მაგრამ როგორ ხდება დღეს ახალი სამეფო დარბაზებით უზრუნველყოფა?
სამეფო დარბაზების მშენებლობის პროგრამა იმ ქვეყნებისთვის, სადაც შეზღუდული შესაძლებლობებია
პირველ ახალ თავისებურებას, რომელიც რუსეთში სამეფო დარბაზების მშენებლობის პროგრამას ახასიათებს, ქრისტიანი ძმების ადგილობრივ იურიდიულ წარმომადგენლებად დანიშვნა წარმოადგენს. სხვადასხვა მხარეში უკვე შვიდი ძმა დაინიშნა ამ საქმეზე. ეს ძმები დაეხმარებიან გარკვეულ კრებებს ისეთ საკითხებში, როგორიც არის მიწის ნაკვეთისა და ნაგებობების შეძენა, აგრეთვე მშენებლობის ნებართვა და შენობებისთვის გარკვეული დანიშნულების მინიჭება. ეს ძმები ცხოვრობენ იქ, სადაც დანიშნულები არიან, ასე რომ, ისინი სრული დროით იმუშავებენ სამეფო დარბაზების მშენებლობასთან დაკავშირებულ საკითხებზე. ადგილობრივი ძმები იოლად დაუკავშირდებიან მათ და ისინი სწრაფად გამოეხმაურებიან სხვადასხვა კრების საჭიროებას.
მეორე, ეს ახალი პროგრამა ითვალისწინებს სრული დროით მომსახურე მშენებელთა ჯგუფებს, რომელთა საქმეც მხოლოდ სამეფო დარბაზების მშენებლობა იქნება. ეს ჯგუფები დაეხმარება იმ კრებებს, რომლებსაც უფრო მეტად სჭირდებათ მხარში ამოდგომა მშენებლობის საქმის ორგანიზებასა და შესრულებაში. თითო ჯგუფში შედის 6—10 მუშა საერთაშორისო სამშენებლო პროგრამაში მონაწილეებიდან და რუსეთიდან. ეს ჯგუფები ადგილობრივ ძმებთან ერთად მიიღებენ მონაწილეობას მშენებლობაში. ჯგუფები დაემატება იმის მიხედვით, თუ რამდენად გაიზრდება მეტი სამეფო დარბაზის აშენების საჭიროება, რომელთა აშენებაზეც ნებართვაა მიღებული. კრებებს რომ არ დააწვეს ამ ჯგუფებზე ზრუნვის დამატებითი ტვირთი, ფილიალი იზრუნებს მათზე.
სამეფო დარბაზების მშენებლობის ეს პროგრამა არ ცვლის რეგიონალური სამშენებლო კომიტეტების მიერ თავდაპირველად მიღებულ ზომებს სამეფო დარბაზების აშენებასთან დაკავშირებით, არამედ დროებით დახმარებას სთავაზობს მათ მანამ, სანამ დაკმაყოფილებული არ იქნება უდიდესი საჭიროება და სანამ თავად ძმები არ შეძლებენ მომავალ ზრდაზე ზრუნვას.
საკონგრესო დარბაზების აშენება
ორგანიზაციის დღევანდელი ზრდისთვის ბევრად პრაქტიკული და გონივრულია უფრო დიდი შენობების აშენება, სადაც შესაძლებელი იქნება სარაიონო კონგრესების ჩატარება. ამ ნაგებობებს ეწოდება „იეჰოვას მოწმეების საკონგრესო დარბაზები“. ამ პროექტების განხორციელება მხოლოდ ჩვენი საზოგადოების ნებართვით ხდება. ზოგ მხარეში უფრო მეტი ასეთი შენობაა საჭირო, მაგრამ უპირველესად ჩვენ სამეფო დარბაზების მშენებლობაზე გვინდა ყურადღების გამახვილება, რაც უფრო საჭირო და გადაუდებელია.
რის გაკეთება შეგიძლია ამ ახალი პროგრამის მხარდასაჭერად?
რადგან ამ სამშენებლო პროექტის ყურადღება უპირველესად გადატანილი იქნება ისეთ ადგილებზე, სადაც ბევრი მოწმე ცხოვრობს და სამეფო დარბაზების დიდი საჭიროება არსებობს, ეს იმას ნიშნავს, რომ დასაწყისში უპირატესობა დიდ ქალაქებს მიენიჭება. მაშ, როგორ შეუძლია ყველა კრებას ამ ახალ პროგრამაში მონაწილეობის მიღება? ყველას შეუძლია დახმარება გაუწიოს სხვა კრებებს თავიანთი შესაწირავებით მსოფლიო საქმისთვის.
რა თქმა უნდა, ასეთი დიდი სამშენებლო პროგრამა ბევრ მუშახელსაც მოითხოვს. იმ მუშების სიის შესაქმნელად, რომლებსაც მომავალში ჩართავენ ამ პროგრამაში, კრებებს გაეგზავნათ ახალი ბლანკები ძმებისთვის, რომლებსაც მშენებლის რამე პროფესია აქვთ და შეუძლიათ ითანამშრომლონ სრული დროით მსახურებთან, რომლებიც სამეფო დარბაზების მშენებლობით არიან დაკავებული. ასეთებს უნდა შეეძლოთ, თავიდან სამი თვის მანძილზე მაინც რომ იმსახურონ თავიანთი სახლიდან შორს. რადგანაც ჩვენი იეჰოვა ღმერთის თაყვანისმცემლობისთვის განკუთვნილ ადგილებს ვაშენებთ, უმთავრესი ყურადღება სულიერ თვისებებს ექცევა. ამ ძმებს შეუძლიათ შეავსონ „სამეფო დარბაზების მშენებლობის პროგრამის მოხალისის ბლანკი“ (A-25). როცა დამატებითი დახმარებაა საჭირო, ფილიალის „სამეფო დარბაზების მშენებლობის მაგიდას“ ამ სიიდან შეუძლია მოხალისეების მიწვევა. მოგვიანებით, ამ პროგრამის გაგრძელებისას, ზოგი ძმა შეიძლება „სამეფო დარბაზების მშენებლობის მსახური“ გახდეს, რაც იმას ნიშნავს, რომ ამიერიდან ისინი სრული დროით იმუშავებენ ამ პროგრამით.
სამეფო ერთიანობის დემონსტრირება
გვსურს, შევაქოთ ყველა ძმა, ვინც მრავალი წლის განმავლობაში ინიციატივას იჩენდა სამეფო დარბაზების აშენებაში. ადგილობრივ და რეგიონში გაერთიანებული ძალისხმევის შედეგად რუსეთის ტერიტორიაზე ათობით სამეფო დარბაზი აშენდა. ერთი საკონგრესო დარბაზიც უკვე აშენებულია სანქტ-პეტერბურგში. იქ, სადაც ეს შენობები დგას, ისინი არა მხოლოდ კრებებისა და რაიონების უშუალო საჭიროებებს აკმაყოფილებს, არამედ სასწაულებრივად ადასტურებს იმას, რომ იეჰოვას სახელით წოდებული ხალხი აქტიურად მოქმედებს იმ მხარეებში. იმასთან ერთად, რომ ძმები ფინანსურად უჭერენ მხარს ადგილობრივ პროექტებს, რომლებშიც შედის აშენება და ტექნიკური მოვლა, ისინი კვლავ სწირავენ თავიანთ მატერიალურ სახსრებს სამეფო საქმის გაფართოებას მსოფლიო მასშტაბით. გვჯერა, რომ ამას ყველა ძმისგან სათანადო გამოხმაურება მოჰყვება, როცა ისინი დაწვრილებით გაეცნობიან დამატებით საკითხებს.
სამეფო დარბაზების მშენებლობის ღონისძიება დღეს კიდევ ერთ შესაძლებლობას გვაძლევს, რათა საქმით დავამტკიცოთ, რომ ნამდვილად გაერთიანებული ხალხი ვართ, რომელიც თაყვანს სცემს იეჰოვას სამეფო ერთიანობით, როგორც ერთი ორგანიზაცია. იმის გარდა, რომ მხოლოდ ჩვენი კრების აუცილებელ მოთხოვნილებებზე ვიფიქროთ, უნდა გავითვალისწინოთ ისიც, თუ რა მოთხოვნილებები აქვთ ჩვენს ძმებს, რომლებსაც განსაკუთრებული დახმარება სჭირდებათ სამეფო დარბაზების მშენებლობაში იმ ტერიტორიაზე, რომელსაც ჩვენი ფილიალი ემსახურება. ეს კიდევ ერთ მიზანს მოემსახურება: განამტკიცებს სამეფო ერთიანობას, მაშინ როცა რეალისტური თვალით ვუყურებთ ‘წუთისოფელში არსებული საძმოს’ საჭიროებებს, რათა დავეხმაროთ მათ, როგორც თითოეულმა ჩვენგანმა, ისე მთელმა კრებამ ამ საჭიროების დაკმაყოფილებაში (1 პეტ. 5:9).
დასკვნა
მოდი ეს საკითხი მუდამ მოვიხსენიოთ მთელი გულით ჩვენს ლოცვებში. და ყველა ჩვენგანმა ეძიოს ჩვენი ლოცვების თანახმად მოქმედების საშუალებები, რათა დაკმაყოფილდეს სამეფო დარბაზებთან დაკავშირებული ამჟამად არსებული საჭიროება. რადგან იეჰოვა ჯერჯერობით საშუალებას აძლევს „სხვა ცხვრებს“, შემოვიდნენ მისი გაერთიანებული თაყვანისმცემლების სამწყსოში, დაე მან იმაზეც იზრუნოს, რომ ჩვენ საკმარისი შენობები გვქონდეს, რათა დავეხმაროთ ახლებს ჭეშმარიტებაში განმტკიცებასა და სულიერი მოწიფულობის მიღწევაში. დაე ეს პროგრამა ჩვენს დიდ ტერიტორიაზე დაეხმაროს ძმებს ‘ერთმანეთის წახალისებაში სიყვარულისა და კეთილი საქმეებისკენ’ იმ ადგილას, რომელსაც დიდება მოაქვს იეჰოვას სახელისთვის (ებრ. 10:23—25). ჭეშმარიტად, ჩვენ დიდი სიხარული გვაქვს და ეს სიხარული კვლავაც გაიზრდება, რადგან იეჰოვა დიდად აკურთხებს მისადმი, როგორც ერთადერთი ჭეშმარიტი ღვთისადმი, გაერთიანებულ თაყვანისმცემლობას.