„ყოველივე ეს ხდებოდეს აღსაშენებლად“
1 ძმებთან ურთიერთობისას უნდა ვაკეთოთ ის, რაც კარგი იქნება მათ აღსაშენებლად. ეს კი იმას ნიშნავს, რომ დაინტერესებული ვიყოთ მათი სულიერი ინტერესების დაცვით. თუ ჩვენ მოვეწყვეთ რამე სამუშაოზე, რომელიც მოითხოვს ნაწარმის ან მომსახურების რეკლამირებას, ფრთხილად უნდა ვიყოთ, რომ არაფრით დავაბრკოლოთ ძმები (2 კორ. 6:3; ფილ. 1:9, 10).
2 ზოგიერთი ჩაება კომერციულ წამოწყებაში და თანაქრისტიანები სამიზნეში ამოიღო, როგორც პოტენციური მომხმარებელი. უდავოა, სავაჭრო ორგანიზაციები აქეზებენ თავიანთ წარმომადგენლებს, ყველა პოტენციურ მყიდველად მიიჩნიონ, მათ შორის ისინიც, ვინც მათ რელიგიას მიეკუთვნება. ზოგმა ძმამ მოწმეების ფართო შეკრების ორგანიზება მოახდინა იმ მიზნით, რომ ისინი საქმიან წამოწყებაში მონაწილეობის მისაღებად აღეძრა. ზოგი კი თავისი კომერციული საქმიანობისთვის ხელის შესაწყობად თანაქრისტიანებს სთავაზობდა ნივთებს, ბროშურებს, ინფორმაციას ინტერნეტში ან ვიდეო- და აუდიოჩანაწერებს. განა მართებული იქნება ქრისტიანისთვის თეოკრატიული კონტაქტებისა და სულიერი ძმების გამოყენება? არა! (1 კორ. 10:23, 24, 31—33).
3 ძმები ფრთხილად უნდა იყვნენ. ეს იმას არ ნიშნავს, რომ ქრისტიანს არ შეუძლია, საქმიანი ურთიერთობა იქონიოს ძმასთან. ეს პირადი საკითხია. ამისდა მიუხედავად, ზოგიერთი ისეთ საქმეს იწყებს, რომელიც სიხარბეს აღვივებს და თანაქრისტიანებს უბიძგებს, მათი კომპანიონი ან ინვესტორი გახდეს. მრავალი ასეთი კომერციული წამოწყება კრახს განიცდის, მასში მონაწილეს კი ეს უზარმაზარ თანხად უჯდება. თუმცა მათ, ვინც უერთდება წამოწყებას, ფულის სწრაფად შოვნის სურვილი უბიძგებს, ორგანიზატორმა არ უნდა მიიჩნიოს, რომ საქმის წარუმატებლობის შემთხვევაში თავისუფალი იქნება პასუხისმგებლობისგან. მან წინასწარ საგულდაგულოდ უნდა აწონ-დაწონოს, როგორ იმოქმედებს ძმების სულიერ და მატერიალურ მდგომარეობაზე კომერციული წამოწყების ჩაშლა. ისინი, ვისაც თეოკრატიული პასუხისმგებლობები აკისრია, განსაკუთრებით ფრთხილად უნდა იყვნენ ქვეყნიურ საქმიანობასთან დაკავშირებით, რადგან სხვები, შესაძლებელია, მათ პატივისცემით ეკიდებიან და დიდ ნდობას ავლენენ მათ მიმართ. არასწორი იქნებოდა ამ ნდობის ბოროტად გამოყენება. ძმას, რომელიც კარგავს სხვების პატივისცემას, შეიძლება წმინდა მსახურების უპირატესობა ჩამოერთვას.
4 ჩვენი მიზანი ის უნდა იყოს, რომ „ყოველივე ეს ხდებოდეს აღსაშენებლად“ (1 კორ. 14:26). უნდა მოვერიდოთ ისეთი რამის კეთებას, რაც საფუძველს ჩაუყრის და ხელს შეუწყობს კრების შიგნით სავაჭრო საქმიანობას. ასეთ საკითხებს საერთო არაფერი აქვს შეკრებასთან დაკავშირებულ ბიბლიურ მითითებასთან (ებრ. 10:24, 25).