მოკრძალებული ჩაცმულობით ღვთისადმი ღრმა პატივისცემას ვავლენთ
1. როგორ შეგვიძლია მადლიერების გამოხატვა მომავალი საოლქო კონგრესისათვის?
1 მალე წილად გვხვდება დიდი პატივი — 2003 წლის საოლქო კონგრესზე, სახელწოდებით „დიდება მივაგოთ ღმერთს“, იეჰოვას სტუმრები ვიქნებით. უზომოდ მადლიერი ვართ იეჰოვასი, რომ მან ასეთ მდიდარ სულიერ ნადიმზე მიგვიწვია! მისადმი ღრმა პატივისცემა და სულიერი მზრუნველობისთვის მადლიერება შეგვიძლია ჩვენი ჩაცმულობითა და გარეგნობით გამოვხატოთ (ფსალმ. 115:3, 8).
2. რატომ არის მნიშვნელოვანი, რომ სუფთად და აკურატულად გამოვიყურებოდეთ?
2 სუფთები და მოწესრიგებულები. ჩვენი გარეგნობა უნდა ირეკლავდეს სიწმინდისა და წესრიგის მოყვარული ღვთის მაღალ ნორმებს (1 კორ. 14:33; 2 კორ. 7:1). აუცილებელია, სუფთები ვიყოთ, თმაც და ფრჩხილებიც სუფთა გვქონდეს; ესე იგი, აკურატულად უნდა გამოვიყურებოდეთ. დღეს გავრცელებულია დაუდევარი ჩაცმულობა. მაგრამ, თუ ცნობილ კინოვარსკვლავს ან სპორტსმენს აცვია მოუწესრიგებლად, ეს იმას არ ნიშნავს, რომ ქრისტიანმაც ასე უნდა ჩაიცვას. თუ ჩაცმულობაში ქვეყნიურ სტილს მივბაძავთ, ხალხს გაუჭირდება ჭეშმარიტი ღვთის მსახურების განსხვავება მათგან, რომლებიც არ არიან მისი მსახურები (მალ. 3:18).
3. რა უნდა გავითვალისწინოთ იმისათვის, რომ ჩვენი გარეგნობა შეესაბამებოდეს 1 ტიმოთეს 2:9, 10-ში მოცემულ რჩევას?
3 ჩაიცვით ისე, როგორც ქრისტიან მსახურს შეეფერება. როდესაც პავლემ ქრისტიან ზედამხედველს, ტიმოთეს, წერილი მისწერა, მას მოუწოდებდა: „დედაკაცებიც წესიერი სამოსლით, მორცხვობით და კდემამოსილებით შეიმკონ. . . კეთილი საქმეებით, როგორც შეჰფერით დედაკაცებს, რომლებმაც ღვთისმოსაობა ირჩიეს“ (1 ტიმ. 2:9, 10). ტანსაცმელი „წესიერი“ რომ იყოს, სერიოზული დაფიქრებაა საჭირო. ტანსაცმელი უნდა იყოს აკურატული, სუფთა და მოკრძალებული და არა ულაზათო ან გამომწვევი (1 პეტ. 3:3).
4, 5. რა უნდა გაითვალისწინონ ქრისტიანმა მამაკაცებმა და ქალებმა?
4 პავლე აგრეთვე გვაფრთხილებდა, რომ ზედმეტად არ გაგვემახვილებინა ყურადღება „თმის დაწვნაზე, ოქროზე, მარგალიტებსა თუ ძვირფას ტანსაცმელზე“ (1 ტიმ. 2:9). ქრისტიანი ქალები ბრძნულად იქცევიან, თუ გაწონასწორებულად იყენებენ ძვირფასეულობას, მაკიაჟსა და სხვადასხვა სამკაულებს (იგავ. 11:2).
5 პავლეს რჩევაში ჩადებული პრინციპები ეხება არა მარტო ქრისტიან ქალებს, არამედ ქრისტიან მამაკაცებსაც. ძმებიც უნდა მოერიდონ ჩაცმულობის ისეთ სტილს, რომელიც წუთისოფლის აზროვნებას ირეკლავს (1 იოან. 2:16). მაგალითად, ზოგიერთ ქვეყანაში პოპულარულია მოჩაჩული, ზომაზე დიდი ტანსაცმელი, მაგრამ ღვთის მსახურს არ შეეფერება ასეთი ჩაცმულობა.
6. რატომ უნდა შევინარჩუნოთ მაღალი ნორმები ჩაცმულობასა და გარეგნობასთან დაკავშირებით კონგრესზე მგზავრობისას, იქ ყოფნისას და პროგრამის დამთავრების შემდეგ?
6 თავისუფალ დროს. კონგრესზე დასწრებისას და-ძმების უმეტესობა შესანიშნავ მაგალითს იძლევა ჩაცმულობასა და გარეგნობაში. თუმცა, როგორც იუწყებიან, ზოგი დაუდევრად ეკიდება ამ საკითხს, როდესაც კონგრესზე მიემგზავრება, უკან ბრუნდება ან როდესაც თავისუფალ დროს ატარებენ პროგრამის დამთავრების შემდეგ. სინამდვილეში, ჩვენი გარეგნობა, იქნება ეს პროგრამის განმავლობაში თუ თავისუფალ დროს, გავლენას ახდენს სხვებზე; მათ ამის შედეგად უყალიბდებათ წარმოდგენა ღვთის ხალხზე. რადგანაც კონგრესის დროს სამკერდე ნიშანს ვატარებთ, ყოველთვის ისე უნდა გვეცვას, როგორც ქრისტიან მსახურს შეეფერება. ამის გამო სხვებისგან ხშირად ვიმსახურებთ მოწონებას, რაც დამოწმების საშუალებას გვაძლევს (1 კორ. 10:31—33).
7. რა გავლენა შეიძლება მოახდინოს სხვებზე ჩვენმა ჩაცმულობამ და გარეგნობამ?
7 როგორც მეგობრული ღიმილი მატებს სილამაზეს ჩვენს სახეს, ასევე მოკრძალებული ჩაცმულობა და გარეგნობა მატებს ღირსებას ცნობას, რომელსაც ვქადაგებთ და ორგანიზაციას, რომელსაც წარმოვადგენთ. გვსურს, რომ მათ, ვინც დაგვაკვირდება ამა წლის საოლქო კონგრესის დროს — სახელწოდებით „დიდება მივაგოთ ღმერთს“ — დაინახონ, რატომ განვსხვავდებით და, საბოლოოდ, თქვან: „თქვენთან წამოვალთ, რადგან გაგებული გვაქვს [და ჩვენი თვალით ვნახეთ], რომ თქვენთან არის ღმერთი“ (ზაქ. 8:23). მოდი ყველამ ღრმა პატივისცემა გამოვავლინოთ იეჰოვასადმი ჩაცმულობითა და გარეგნობით.
[ჩარჩო 5 გვერდზე]
ღირსეული იყოს შენი გარეგნობა. . .
▪ როდესაც მგზავრობ
▪ კონგრესზე
▪ თავისუფალ დროს